Aibekam ǁae ge hâ i, ǂkhari ǃgubis, “apostelgu tsî ǀhaohâb di ǂnomdomgu” ge kaise ǂhâǂhâsa mîǁguide hoa ǀhaohâba ǂnûǁkhaeba hâse gere dī. (ǃNaeǃkhaidi 15:2) ǀGuiǂâixasegu gere mîǁgui o, os ge nēsa ǃanu gāgāb xa ǁguiǂgāhe hâse tsî Elobmîs ai ǃgaoǃgaohe hâse gere dīhe. (ǃNaeǃkhaidi 15:25) ǁNāti ǀgui i ge nētsē ra dīhe.

Nēs ge Elob xa gere sîsenūhe ǁÎb ǂâisa dīǀoaǀoas ǃaroma. ǂHauhesa ǃgâsagu hîna ǂGaeǂguira soros ǃnâ hâ gu ge Elobmîs ǃnâ ǀgaisa turab tsî kai ǂansa tsēgorobe tsî gāgāsi xūn ǃnâ ūhâ. Wekheb hoaba ǀhao tsîgu ge ǃhūbaib ǂhawase hâ ǃgâsan ǂhâsiga ra kēǃgâ. Aibekam ǁaeb khamin ge Elobmîs ai ǃgaoǃgao hâse huiba ra mā sîǂkhanidi ǃnâ-ū tamas ka io ǃnarimara mûǂam-aogu ǃnâ-ū. Nēs ge ǀguiǃnâxasiba ǂâiǀgaub tsî dīb ǃnâ ra hā-ū. (ǃNaeǃkhaidi 16:4, 5) ǂGaeǂguira soros ge ra kēǃgâ gāgāsi ǂûn ǁaeb ai ǂhomihe tsî aoǁnâ sîsenni ra dīhesa tsî ǃereamsa nî ūhâ ǃgâsaga ra ǁgaumâi.

ǁÎgu ge ǃanugāgāb xa daoba ǁgauhesa ra ǃkhōǃoa. ǂGaeǂguira soros ge Hoa ǃHūbaib Gaob, Jehovab tsî ǀhaohâb di danab Jesub xa ra huihe. (1 Korinteǁîn 11:3; Efeseǁîn 5:23) ǁÎgu ge Elob khoenagu nî gaoǂam khami tanisen tama hâ. ǁÎn ge ǂhauhesan ǀkha, “ǁKhaoba ǃgûb ra ǃkhais hoas ǁga ra saona.” (ǂHaiǂhais 14:4). ǂGaeǂguira soros ge sada ǀgorete ǁîn amǃnâs ai kaise ra aio.

• Aibekam ǁaeb ai hamga ǂgaeǂguira soros ǃnâ ge hâ-i?

• ǂGaeǂguira sorosa nētsē daoba Elob xa ǁgauhesa mati ra ôa?

Bet-el di hâ ǀons ge Hebregowab ǃnâ “Elob om” di ra ǂâibasen. (Genesis 28:17, 19) Nēs ge ǀgauhâ ǀonsa Jehovab ǀHûǀguitimî-aon ge ǁîn xa omhehâ omga māsa, ǃhūbaib ǂhawase hâ aoǁnâ sîsenî ǁnapaxu kēǃgâhe tsî nî ǂkhâǃnâhese. ǂGaeǂguira Soros kai berodi ge New Yorki ǃnâ, Amerikab tawa ǂnoa tsî ǁnapaxu ǁnâugu berode ǃhūgu hâse ǂnoade ra mûǂam. Omaris axasen ge khoen ǁnapa ra sîsena Bet-el omaris di a ǂansa. ǀGui omaris khoen khamin ge ǁanǀhao, sîsenǁae, ǂûǁae tsî Elobmîs ǁkhāǁkhāsensa ǀguiba ra ūhâ.—Psalmdi 133:1.

ǀŌ-aisa ǃkhais khoen omaris axase ǁî aitsama ǁguiǁnāsen tsî ǀguiba māsenxase ǁanhâs. Mâ Bet-el omaridi hoadi tawan ge Xristeǁî aogu tsî tarate hâ ǁîn ûiba mâǁnā tsî Elob Gaosib sîsena hoaǁae ra dīna. (Mateub 6:33) Nē khoen ge ǀgui-i tsîna mâtarehe tama hâ xawe ǀnai omǃnāb xūna ūhâ hâǃkhaisa hō tsî ǂkhari marirosa ra hō ǁîn ǂhâba dīǀoaǀoas ǃaroma. Mâ khoe-i hoa-i ge Bet-els ai sîsen-e mâhe hâ berodi ǃnâs gas, sâi sîseni gas ǂûǃnâ-oms ǃnâs ga xawe. ǀNîn ge ǁgâis tsî ǃamǁares, omǃanūs, sarana ǁās tamas ka io khôara xūna kurus ǃnâ hâ.

Nē ǃkhaib ge Elob Gaosiba aoǁnâs sîsena ra ǂkhâǃnâ. Bet-el omdi kai ǃaromas ge Elobmîs amaba hoa khoena ǂanǂansa. Aiǁgause nē ǂkhanib khami. Nē ǂkhanib ge ǂGaeǂguira soros keǃgâs ǃnāga xoahe tsî elektronise ǀoadisis xa ǃnāsa ǂnûiǃkhunî-aon ǃoa sîhe tsî kaise ǃhae ǁaeb ǃnâ ǁgâihe tsî 110 000 ǀhaohâgu ǃoa sîhe hâ. Mâ ǃharos hoas tawas ge Bet-el omarisa kaise ǂhâǂhâsa kai huib axase i, kaise ǂhâǂhâsa sîseni— ǃgâiǂhôasa aoǁnâs diba.—Markub 13:10.

• Hamna Bet-els tawa ra sîsen tsî matin da huihe?

• Tae kaise ǂhâǂhâsa sîsena ǂkhâǃnâhe hâse bet-els hoas tawa ra dīhe?

Bet-el omaris khoen ge ǂgui ǃkhaidi ai ra sîsen, aoǁnâ sîsenan ta ǀguis xa ǃnāsa ǃhūgu ǃnâ keǃgâse. ǀNîn ge ǂnûiǃkhuni-aon ase ra sîsen, ǁgâi-aon ase, ǂkhanina ǃamǁae-aon ase, sâuǃnâ oms ǂkhanin dis tawa, ǃhoahe ra tsî ǀhuruǃâs axase ra dīhe ǃkhōǁnādi tamas ka io ǀkharib di ǃgomsiga ra kēǃgâ.

ǁNâugu |Ape|haos ge sîsena ra kēǃgâ. ǂGaeǂguira Soros ge ǁnâugu berodi tawa ra dīhe sîsena ǁNâugu ǀApeǀhaos mûǂams ǃnāga mâi hâ, ǃnona tamas ka io ǃnāsa ǀHaohâb ǃûi-aogu ǀgaisa ǁkhāǁkhāsa ūhâga. ǀApeǀhaos ge ǂGaeǂguira Sorosa ǃnâs hoasa ra ǂanǂan, xūn ta aiǃgû ǀgausa mâ ǃhūb hoab ǃnâ tsî ǁnapa ga hâ ǃgomsin ǂama. Nē ǃgomsin ge ǂGaeǂguira Sorosa ra hui ǂansa hānîǁaeb ǃnâ tae ǃhoaǃâdi xa ǂkhanin ǃnâ nî xoahes, ǀhaodi tsî kai ǀhoadi tawa tae-i xa nî ǃhoaǃgaohes tsîna. ǂGaeǂguira Soros ǂnûǁkhaeba aob ge ǃnâs hoasa ǁnâugu berodi ǃoa ra sîhe daoǁgaus tsî kēǃgâsa sîseni ǁaeb ai ra dīhesa. (ǂKhoamîdi 11:14) ǀŌ-aisa ǀapeǁguib ge ǂhomisa Dana beros di ǂnûǁkhaeba-aob tsîn ǃâsa ūhâ ǃhoas dība khoena ǂkhâǃnâsa ǁnān ǁnâugu berodi ǂnamibe ǁan hâna.

ǀGūse hâ ǀhaohâgu ge ra ǂkhâǃnâhe. ǁNâugu berodi ǂgaeǂgui-aogu ge ra kēǂam ǀasa ǀhaohâba tsoatsoasa. Nē ǃgâsagu ge aimâba-aon sîsena ǁgaumâi tsî mâhe ra Elobmîs ǁkhāǁkhā-aon tsî ǃnarimara mûǂam-aob ǁnā ǂharis ǃnâb sîsena ra kēǃgâ. ǁÎgu ge ǀhaohâb ǀhaodi, kai ǀhaodi tsî ǀhû-omga oms tsî ǀhaohâba ǂkhanina ǁaeb ai hōsa ra mûǂam. Mâ xū-i hoa-i ǁnâugu berodi tawa ra dīhe i ge ǃamku ǀgaub ais ǃgâiǂhôas aoǁnâsa nî dīhesa ra ǃaroma.—1 Korinteǁîn 14:33, 40.

• ǁNâugu ǀApeǀhaosa mati ǂGaeǂguira Sorosa ra ǂkhâǃnâ?

• Tae ǃereamdes ǁnâugu berosa ūhâ?