ǃGâiǂhôasa mâ ǃhaos tsî ǁaes tsî gowab tsî khoen ai aoǁnâs ǃaroma da ge ǁkhā da as kose 750 xa ǃnāsa gowagu ǃnâ ra xoa. (ǂHaiǂhais 14:6) Nē ǃgomǃgâxa sîsene mati da ra dīhō? Nēsa ge ǃhūbaib ǂhawase hâ māsenxa ǂnûiǃkhuni aon Jehovab ǀHûǀguitimî-aon din xa ra dīhe.

ǂGuro xoas ge ǀawaǃao gowab ǃnâ ra xoahe. ǂGaeǂguira soros ge sîsena ra mûǂam Xoara ǃÂb tiba sida di ǃhūbaib hoab dana beros tawa. Nē ǃâb gera ǀguiǀgui xoa-aogu sîsena dana berodi tawa tsî ǁnâugu berodi tawa. ǃKharagagu xoa-aon hâ tsî ǂgui ǃhaode ǃkhais ge ra hui ǂûi ǃhaoǃnâbe ǃhoaǂamdi xa xoasa tsî nēs ge sida ǂkhanin khoena ǃhūbaib ǂhawase kaise ra ǂgaesa.

Xoaǃâs ge ǂnûiǃkhuni-aon ǃoa ra sîhe. Xoaǃâs ga xoahe toas khaoǃnâ i ge khomaihe tsî dī-unuhe tsî internets ǃnâ-ū nau ǂnûiǃkhuni-aon ǃoa ra sîhe ǃhūbaib ǂhawase tsîn ge ǁîna ǁkhapa ǂnûiǃkhuni tsî ra khomai ǃgâ. ǁÎn ge ra dītsâ “xoahehâ di ge a ǂhanu tsîti ge a ama” ǂâibasensa ǀawaǃao gowaba xu ǁîn gowab ǃnâ ǂnûiǃkhunisa.—Aoǁnâ-aob 12:10.

Komputers ge sîsena ra ǃhaeǃhae. Komputers ge xoa ra khoen tsî ǂnûiǃkhuni-aona a ǃkhōǃkhuni ǁoa. Xawe, ǁîn sîsenni ge a ǃhaeǃhaehe ǁkhā komputers ǃnâ hâ mîdi ǂkhanis, gowab xoaǀgaub tsî gowab oâǃnâǀgaub xūn ǀkha. Jehovab di ǀHûǀguitimî-aon ge Multilanguage Electronic Publishing System (MEPS) di ra ǂgaihe komputers ǀapeǁguiba ûhâ ǀoadisis xa ǃnāsa gowagu ǃnâ ra sîsen ūhega, ai-īsi sîsenni tsî xoahehâ xūn ǀkha ra ǀgauna ǁgâis ǃaroma.

Tae-i ǃaroma da nētiko kai ǀhububa ra dī, gowagu ǀoro khoeron xa ǀgui ra ǃhoahen ǃnâs tsîna? Jehovab ǂâis ge “khoen hoan nî ǃgâiǃō, tsîn nî amab di ǂans dawa sīsa.”—1 Timoteub 2:3, 4.

• Sida di ǂkhanina mati ra xoahe?

• Mati i io da sida ǂkhanina nētikō ǂgui gowagu ǃnâ ra ǂnûiǃkhuni?

Sida di ǀapeǂhumis ge miliuns xa ǃnāsa Baibeldi tsî ǂkhanina kurib hoaba ra māǂui marihe ǂgan tamase. Sida ge ǀHû-omgu tsî ǁnâub berode ra om tsî ǃgâi sîsen mâsib ǃnâ ra ūhâ. Sida ge ǀoadisis xa ǃnāsa bet-el ǁan-aon tsî sîsaben tsîna ra kēǃgâ, tsūkēǃgâb ga hā o khoena ǂûn tsî ǂhâbasa xūn ǀkha ra hui. Ots ge ra ǂhâ, ‘Nē xūn hoana marisise mati ǂkhâǃnâhe hâ?’

Sida ge khoena xu disi-ǁîna ū tama-i, matare kai tama i tsî marina ao kai tama. Nē aoǁnâ sîsena ǂkhâǃnâs ge kai marisa ǂgan hâ, xawe da ge marina ǀhope mâ tama hâ. Kurin ǃkharuhâse da ge ǀgamǁî ǂhaweb Watchtower ǂkhanib dib ai ge xoamâi, nē sîsenni Jehovab xa ǂkhâǃnâhe hâ tsî “ǂhâbasa tama ǀhope mâ tsî ǂganmâsa” tsî da ti dī tama hâ.—Mateub 10:8.

Sida sîsenni ge ǂgaoba xū māsenxa huib xa ǂkhâǃnâhe hâ. ǂGui khoen ge kaise sida di Elobmîs huib sîsena ǂkhâǃnâ tsî ra hui. ǀHûǀguitimî-aon tsîn ge māsenxase tsî ǂkhîse ǁîn ǁaeb, marin tsî ūhân ga xūn ǀkha nē sîsena ra ǂkhâǃnâ Elob ǂâis nî i ǁkhā ga. (1 Kroniks 29:9) Mâ ǀHû-omi hoab tawa i ge marin ta aoǂgā ǃnâhe ǃkhaide mâisa khoe-i māsenxase ǁkhā i a khami xū-e mā ǁkhā sa. Tamas ka io marisise sida sîsenna ǂkhâǃnâ re tsî www.jw.org/jw-dmr ti hâ internets ǂhaweba sari. ǃNāsa marina ra mā khoen ge ǁnān hîna ǃgamǃgamsenxa, Jesub gere mî ǀgâsa ǃoa taras hîna ge ǀgam ǂkhari marirora mâs ǀkha a ǀgui. (Lukab 21:1-4) ǁNās ǁkhās khami i ge mâ khoe-i hoa-e “xū-e ǁî-i tawa ǁguibē” tsî a mā ǁkhā “A i mâ-i hoa-e ǂgaob ǃnâ i go ǂâibasen khami dī.”—1 Korinteǁîn 16:2; 2 Korinteǁîn 9:7.

Sida ge ra ǂgom Jehovab khoen ǂgaoga nî tsâǀkhasa, ǁnān hîna Gaosib aoǁnâ sîsena ra ǂkhâǃnâ ǂgaon māsenxase ǁîb ǀonsa nî koa ǁîn di xūn ǀkha ǃkhaisa.—ǂKhoamîdi 3:9.

• Tae-e sida ǂgomsa nau ǂgomde xu ra ǀkharaǀkhara?

• Māsenxase ra māhe marina mati ra sîsenūhe?

ǀOns ta mî Gaosib ǀHû-omi di, khamis ge dana ǁkhāǁkhāsa Elob Gaosib xa ra ǃgû—Jesub gere ǁkhāǁkhā khami.—Lukab 8:1.

ǀHû-omgu ge ama ǃoabas ǃkhai ǀhûhâsib ǃnâ. Nē ǃkhaiba xūs ge ǃgâiǂhôas gaosib dis aoǁnâ sîsena ra dīhe. (Mateub 24:14) Gaosib ǀHû-omgu ge kaisib tsî isib tsîna a ǃkharagagu, xawe om ǀgaub ge a ǃamku, ǂguigu ǀguis xa ǃnāsa ǀhaohâgu xa ra sîsenūhe se. Nē kurigu ǃnâ da ge disidi ǀoadisidi ǀasa ǀHû-omga ge om (tsēs ǃnâ goroga) ǀhaohâgu ra ǂgui khami. Matis nēsa a i ǁkhā?—Mateub 19:26.

ǁÎgu ge sâuǁguisa maris māheras ǀkha ra omhe. Nēba ra mâhe marin tsî xūn ge ǁnâub berode ǃoa ra sîhe tsîs ge nē marisa ǀHû-omga ǂhâ hâ ǀhaohâga ra omba ūhe.

ǀHû-omgu ge matarehe tama māsenxa sîsen-aon ǃkharagagu ǁaede xū hân xa ra omhe. ǂGui ǃhūgu ǃnân ge, ǀHû-omga ra om ǃgubisa aiǂhomisa. Omra ǃnans tsî māsenxase ra hui ǃgâsan tsîn ge ǀhaohâba xu ǀhaohâb ǀkha ra ī. ǃNūse ǁgoe ǃādi ǃoas tsîna gu ge i tsî ǂgaeǂguisa ra ū omhe raba tsî ǁnapa hâ ǀHûǀguitimî-aona ra ǁkhāǁkhā matin nî omsa. ǀNî ǃhūgu ǃnâs ge ǂansa ūhâ ǃgâsaga ǁgaumaisa kēǃgâsa omhe ra tsî dī-unuhe ra ǀhû-omgu ǂama ǁnā ǀkharib ǃnâ. ǀHaohâb ǃûi-aogu hîna oms ǂansa ūhâgu ge ǀhaohâba tsoatsoasa xu ra hui, tsî ǂansa omǀgaugu ǃnâ ūhâ khoegu ge māsenxase ra hui. Jehovab di gāgāb tsî hoa khoen hîna ǂgaoba xu hui ǀnamxa ǀgaus ge nēsa ra ī ǁkhā kai.—Psalmdi 127:1; Koloseǁîn 3:23.

• Tae-i ǃaroma da sida ra ǃoaba ǃkhaiba Gaosib ǀHû-omi ti ra ǂgai?

• Matis ǁnā ǃkhaisa a ī ǁkhā ǀHû-omga ǃhūbaib ǂhawase omsa?