ǁNaeǁgaudi Sida Xristeǁî ûib tsî aoǁnâ sîsenni sîsen ǂkhanib
JANUARIB 7-13
ELOBMÎSA XU HÂ ǂÛǂÛSA MÎDI | ǃNAEǃKHAIDI 21-22
“As ǃKhūb [Jehovab, NW] di ǂâisa ī”
(ǃNaeǃkhaidi 21:8-12) Tsî sao ra tsēs ai ge ge sige, Paulub tawa hâge ǂoa, tsî Kaesareas tawa ge sī. Tsî ge ge Filipub ǃgâiǂhôa-aob di oms ǃnâ ge ǂgâ, ǁnā hûgu di ǀgui ge iba, tsî ǁîb tawa ge hâ. 9 Tsîb ge ǁîba haka ǀgôadi ǃgame tamade ge ūhâ i, ǀgôadi hîa ra kēbode. 10 Tsî ǀnî tsēde ge ge hâ io, ob ge ǂanǂansa kēbo-aob, Agabub ti ǀon hâba Judeaba xu ǁgôaxa, 11 tsî sige tawa hā, tsî Paulub di ǃgaesenna ū tsî ǃomkha tsî ǂaira âba ǃgaesen tsî ge mî: Nētib ra ǃAnu Gagaba mî: ǁNā khoeb, nē ǃgaesenna ūhâban ge Jodeǁîna ǁnāti Jerusalems tawa ǃgae tsî ǀūben ǃomǁae nî māǁnâ. 12 Tsî nēna ge ge ǁnâuo, o da ge sige tsî ǁnā ǃās din tsîda ge ǀkhoma bi, îb tā Jerusalems ǃoa ǃapa.
bt-E 177-178 ¶15-16
“As ǃKhūb [Jehovab, NW] di ǂâisa ī”
15 Paulub ge Filipub ǀkha hâ i ǁaeb ǃnâb ge ǀnî hâ khoeb tsîna ge sari—Agabub di ǀon hâba. Filipub oms ai ge hâ î khoen hoan ge Agabuba kēbo-aob ase ge ǂan i hîna ge Klaudiub ǂgaeǂguis ǃnaga ǃâtsūǀkhāb xa a kēboba. (ǃNaeǃkhaidi 11:27, 28) ǁÎn ge ǀnîsi gere ǂhâ: ‘Tae-i ǃaromab ge Agabuba hā? Tae-i haisi-amsab go hau?’ ǁÎn ra kō hînab ge ǁîba Paulub di beltsa ge ǃkhō. Nē belts ge ge gaxu i tsî ǀnîsi mari-i ra ǂgā ǃnâ-e ǃkhaib tsîna ge ūhâ i. Agabub ge nē belts ǀkha ǁîb ǃomra tsî ǂaira tsîna ge ǃgae. Tsîb ge ge ǃhoa tsoatsoa. ǁÎb haisi-ams ge ge ǃgāsa i: “Nētib ra ǃAnu Gagaba mî: ǁNā khoeb, nē ǃgaesenna ūhâban ge Jodeǁîna ǁnāti Jerusalems tawa ǃgae tsî ǀūben ǃomǁae nî māǁnâ.”—ǃNaeǃkhaidi 21:11.
16 Kēbos ge ge ǁgau Paulub Jerusalemsa ǃoa nî īsa. Nēs tsîn ge ra ǁgau ǁîb ge Jodeǁîn ǀkha ūhâ i ǃgaeǀhaos ra ǁgausa ǁîb ‘ǀūben ǃomǁae nî māǁnâhesa.’ Nē kēbos ge ǁîn hîna ge ǁnā tsēs ai hâ îna ge tsâǀkhā. Lukab ge ge xoa: “Tsî nēna ge ge ǁnâuo, o da ge sige tsî ǁnā ǃās din tsîda ge ǀkhoma bi, îb tā Jerusalems ǃoa ǃapa. Xaweb ge Pauluba ge ǃeream: Mati du kha ra dī, o du ā tsî ti ǂgaoba ra khôa? Tita kom ǂhomisen hâo, ǃgaehes ǀguisa tama i tsî ta nî ǁkhāti ǁōsa Jerusalems tawa ǃKhūb Jesub di ǀons ǃaroma.”—ǃNaeǃkhaidi 21:12, 13.
(ǃNaeǃkhaidi 21:13) Xaweb ge Pauluba ge ǃeream: Mati du kha ra dī, o du ā tsî ti ǂgaoba ra khôa? Tita kom ǂhomisen hâo, ǃgaehes ǀguisa tama i tsî ta nî ǁkhāti ǁōsa Jerusalems tawa ǃKhūb Jesub di ǀons ǃaroma.
bt-E 178 ¶17
“As ǃKhūb [Jehovab, NW] di ǂâisa ī”
17 Nēsa mûnan-ai re. ǃGâsan ge Pauluba ra ǀkhoma îb tā ī, Lukab tsîn ge ǁnā ǃgâsan ǁaegu hâ. ǀNîn ge ra ā. ǁÎn ra tsâ ǀgaubab ra mû amagab ge Pauluba ǁîna ra mîba ‘ti ǂgaob ge ra khôa.’ ǀNî Grikegowab ǂnûiǃkhunidi ge ra mî “ǁîn ge ǁîb ǂgaoba ra khôa” di. Xawes tsînab ge ǁîba ra mîmâi īsa. Nē ǃnaeǃkhais tsînab ge Tires ǃnâ ǃgâsana xu ge hōǃâ, xawes tsînab ge ge mā-am tama hâ ǁîn ǁgamron xa ǂkhabu kaihesa. Tsîb ge nēn ǂam-ais tsîna ǁîna ra ǁguiǃāba tae-i ǃaromab nî īsa. ǁÎb ge ama ǁkhoaǂgaosiba ge ǁgau. Jesub khamib ge Pauluba ge mîǁgui Jerusalems ǃoa īsa. (Heb. 12:2) Paulub ge ǁîb di ǂgoms ǃgao go ǃgamhe khoe-i axase ge ǂanhe ǂgao tama hâ i. Xaweb ga ǁîb ǂgoms ǃgao ga ra ǃgamhe o, os tsînab ge ǁnāsa aiǂhanub ase gere mû Jesub Xristub khami.
(ǃNaeǃkhaidi 21:14) Tsî ǃhoadankaisen tamab ge io, o da ge ge ǃnō, tsî: “As ǃKhūb di ǂâisa ī, ti ge mî.”
bt-E 178 ¶18
“As ǃKhūb [Jehovab, NW] di ǂâisa ī”
18 ǃGâsana mati ge tanisen? ǃGôasib ǀkha. Khomai da ge ra: “Tsî ǃhoadankaisen tamab ge io, o da ge ge ǃnō, tsî: As ǃKhūb di ǂâisa ī, ti ge mî.” (ǃNaeǃkhaidi 21:14) ǁÎn hîna ge Pauluba gere ǀkhoman îb tā Jerusalemsa ǃoa īn ge ǁîb mîǁguiba ge ǁnâuǃā. ǁÎn ge Pauluba ǃgâ, ǁnâuǃā tsî ge mûǂan ǁîb Jehovab ǂâisa ra dī ǂgaosa nēsa ūǃoas ge ǁîna ǃgomba i xawe. Paulub ge ǁîb ûiba ge ǁkhōǁkhōsa mâsib ǃnâ a mâi daoba ge ǁhûi. Pauluba î ge kaise ga supuba hâ ǁîn hîna ǁîba a ǀnaman ga ǁîba ǂhā tama hâ o.
Gagasi xūna ǀō-aisase ôaǃnâs
(ǃNaeǃkhaidi 21:23, 24) Dī ǁnâi nē-i sige ra mîba tsi-e: Sige ge haka khoega ūhâ, mîmâi-e ǁîgu ai ūhâga. 24 ǁÎga ū, î ǁîgu ǀkha ǃanuǃanusen, î ǁîga marina māǂuiba, î gu danade ǂkhom kai ǁkhā, în hoana ǂan, ǁnā xūn sats xan gere ǃhoabahen a ǁau ǃkhaisa, tsîts sats ǂûtsa ǁkhāti ǁnāti ra tanisen tsî ǂhanuba ra dī ǃkhaisa.
bt-E 184-185 ¶10-12
“ǃGâ re, nēsi ta sado nî dība ǃereambasensa”
10 Paulub ge ǁnâuǃāxasiba gere ǁgau ǁîn hîna Jodeǁîn ǁnaetiga ra ūǃoan ǃoagu. Nēs ge sâtsēsa tsēdī tama is tsî ǀnî ǂûna ǂû tama is tsîna ge ǃkhōǂgā hâ i. (Rom. 14:1-6) ǁÎb ge ǃgaohes xas tsîna ǁgaraga ge ǁgui tama hâ i. Tsîb ge Pauluba Timoteuba ge ǃgao kai în tā Jodeǁîna ǀnî hâdi ǁîba mû ǁîb ǁgûb ge Grikeǁî i amaga. (ǃNaeǃkhaidi 16:3) Mâ khoe-i hoa-i ge ǃgaohes xa aitsama nî mîǁgui. Paulub ge Galateǁîn ǃoa ge xoa: “ǃGaos karao, aikhōb karao xū-i xare-e harebe tamao, xawe ǂgoms, ǀnammi ǃnâ a sîsenxasa.” (Gal. 5:6) ǃGaohes ǃnâ-ū î ge khoe-e ǂhanuba gere ūǃoa xawe Jehovab mā-amsa ǁnās ǃnâ-ū ge ǁgau tama hâ i.
11 ǃHoahe gere xūn ge ama tama hâ i xawen ge Jodeǁîna nēs xa noxoba gere ǂhani-e. ǁNās ǀkha gu ge ǀhaohâb ǃûi-aoga Pauluba ge daoǁgau: “Sige ge haka khoega ūhâ, mîmâi-e ǁîgu ai ūhâga. ǁÎga ū, î ǁîgu ǀkha ǃanuǃanusen, î ǁîga marina māǂuiba, î gu danade ǂkhom kai ǁkhā, în hoana ǂan, ǁnā xūn sats xan gere ǃhoabahen a ǁau ǃkhaisa, tsîts sats ǂûtsa ǁkhāti ǁnāti ra tanisen tsî ǂhanuba ra dī ǃkhaisa.”—ǃNaeǃkhaidi 21:23, 24.
12 Paulub ge ga mî hâ ǁîb ǃgomsiba ūhâ tama hâ ǃkhaisa xawen Moseb ǂhanuba ra ūǃoa Jodeǁîna a ǃgomsi ǃkhaisa. Xaweb ge ǁîba māsenxase nē daoǁgausa ge ūǃoa ǁîs ge Elob ǁgaraga ǃgûǂam tama hâ i amaga. ǁÎb ge ge xoa: “ǃNaga hâna ta ge ǂhanub ǃnaga hâse iba, ǂhanub ǃnaga hâna ta nî hōse.” (1Kor. 9:20) Nē ǃnaeǃkhais ge ī o, ob ge Pauluba Jerusalems di ǀhaohâb ǃûi-aogu di daoǁgausa ge sao tsî “ǂhanub ǃnaga hâse” gere tanisen. Nēsa dīs ǃnâ-ūb ge ǁîba ǃgâi aiǁgausa ge ǁgau da î da ǀhaohâb ǃûi-aogu ǀkha sîsenǀhao tsî tā sida ǂâi ǀgaub ǃoagu ǀgui xūna dī ǂgao.—Heb. 13:17.
(ǃNaeǃkhaidi 22:16) Tsî nēsi tarexats ra ǀhawe? Khâi î ǁāǁnâkaisen, în sa ǁorena khōǁnâhe î ǃKhūb di ǀonsa ǂgaiǀî.
nwtsty study note ǃNǃkh. 22:16
în sa ǁorena khōǁnâhe î ǃKhūb di ǀonsa ǂgaiǀî: Tamas ka io “sadu ǁorena ǀûbahe ǁîb ǀonsa ǂgais ǃnâ-ū.” Khoe-i di ǁoren ge ǁāǁnâs ǃnâ-ū ǀgui ǁnābehe tide xawe î ga ǁî-e Jesub ǀonsa ga ra ǂgai o ǀgui. Nēsa dīs ge Jesub ǃnâ ǂgoms tsî Xristeǁî ûiǀgaub ǃnâs tsîna nî ǁgauhe.—ǃNǃkh. 10:43; Jak. 2:14, 18.
Elobmîs khomai ǃâs
(ǃNaeǃkhaidi 21:1-19) Aogo, ǃgâsago, ǁgûgo, ǃgâ re, nēsi ta sado nî dība ǃereambasensa. 2 Tsî Hebreǁîgowab ǃnâb ge ǁîna ǃhoa-ū ǃkhaisan ge ǁnâuo, on ge ǁnās ǃgâ-ai ge ǃnō. Ob ge ge mî: 3 Tita ge Jodeǁî khoeta, Tarsus Silisiab ǃās ǃnâ ge ǃnae ta tsî nē ǃās ǃnâ ge kaikaihe ta, Gamalieli di ǂaira tawa ǁgûsi ǂhanub di ǁkhōǁkhōsib ǃoa ge ǁgauhe ta, Elob ǂama gere tau ta, sadu hoadu nētsē īs ǁkhās khami, 4 nē daob dina ǁōb kōse gere ǃgôaǃgon ta, hoan, aogu tsî taradi tsîna ǃgae tsî ǃkhō-oms ǃnâ ra māǁnâse. 5 ǁKhāti gu ǀgapipristergu tsî ǂnomdomgu hoaga ra ǃkhō-am te khami, ǁîga xu ta ge ǁkhāti ǂkhanide hō ǃgâsagu ǃoa tsî Damaskus ǃoa ge ǃgû, î ta ǁkhāti ǁnāpa hâna ǃgaehe hâse Jerusalems ǃoa ūǃgû ti, ǁkharahen nîga. 6 Tsî ta ge ge ībahe, ǃgû ta garu hîa tsî ta Damaskusa ra ǀgūse sī hîa ta ge tsēǃgâǁaeb ai ǃnapetamase ǀhomma xu kai ǃnâb xa ge ǃnâǃnâǂnamipehe. 7 O ta ge ǃhūb ai ǁnā, tsî dom-e ge ǁnâu: Saultse, Saultse, tarexats ra ǃgôaǃgon te? ti ra mîlî te-e. 8 O ta ge tita ge ǃeream: Tarits a, ǃKhūtse? ti. Ob ge tita ǃoa ge mî: Tita ge Jesuta, Nasareǁîta, sats ra ǃgôaǃgon ta. 9 Tsî tita ǀkha hâgu ge ǃnâba mû tsî ge ǃhuri, xawe gu ge tita ǀkha ra ǃhoab di domma ǁnâu tama ge hâ i. 10 O ta ge tita ge mî: Tare-e ta nî dī, ǃKhūtse? Ob ge ǃKhūba tita ǃoa ge mî: Khâi, î Damaskus ǃoa ǃgû, ǁnāpats ge nîra mîbahe, dīts nîsets ǂnûibahe hân hoana. 11 Tsî ǃnâb di ǂkhaib xa ta ge mû ǁoa io, o ta ge tita ǀkha hâgu xa ǃommi ai ǂgaeǂguihe, tsî Damaskus tawa ge sī. 12 Tsîb ge Ananiab, ǂanǂansa eloǃaoǃgâxa khoeba ge hâ i, ǂhanub ǃoa ǁnāpa ǁan hâ Jodeǁîn hoan tawa ǃgâi gom-e ūhâba. 13 ǁÎb ge tita tawa hā tsî mâ tsî ge mî: ǃGâsa Saultse, ǁkhawa mû! O ta ge ǁkhā iri ai ǁîba ge mû. 14 Ob ge ge mî: Elob sada îgu dib ge ǃkhōǂuibasen tsi hâ, ǁîb di ǂâisats nî mûǂanga tsî ǂhanu-ainats nî mûga, tsî ǁîb ams di dommats nî ǁnâuga. 15 ǁÎbats nî ǀhûǀguitimî-aose ība xui-ao, hoa khoen tawa, mû tsîts go ǁnâu xūn xa. 16 Tsî nēsi tarexats ra ǀhawe? Khâi î ǁāǁnâkaisen, în sa ǁorena khōǁnâhe î ǃKhūb di ǀonsa ǂgaiǀî. 17 Tsî ta ge ge ībahe, Jerusalemsa ǃoa ta ge oa, tsî tempeli ǃnâ ǀgoreo, o ta ge gagas ǃnâ ǂgaeǃapahe, 18 tsî ǁîba ge mû, tita ǃoab ra mî hîa: ǃHaeǃhaesen î ǃnoesase Jerusalemsa xu ǂoa, tita xats ra ǃkhō-amsan ǃkhōǃoa tide xuige. 19 O ta ge ge mî: ǃKhūtse, ǁî-aitsaman kom a ǂano, sats ǃnâ ǂgom hâna ta ǃkhō-oms ǃnâ aoǂgā tsî sinagogegu ǃnâ gere ǂnau ǃkhaisa.
JANUARIB 14-20
ELOBMÎSA XU HÂ ǂÛǂÛSA MÎDI | ǃNAEǃKHAIDI 23–24
“Sige ge nē khoeba ge hō ǂhīǁōb ase, tsî ǃhūbaib hoab ai Jodeǁîn hoana ra gongonǃnâb ase”
(ǃNaeǃkhaidi 23:12) Tsî ǁgoa i ge, o gu ge ǀnî Jodeǁîga ǀhû, tsî ge ǀâxarexūsen, ǂû tsî gu ā tide ti, Pauluba gu nî ǃgams kōse.
(ǃNaeǃkhaidi 23:16) Tsî Paulub ǃgâsas di ôasab ge ǂâibasens âga ǁnâu, ob ge hā tsî ǁgoeǃkhais ǃnâ ǂgâ, tsî ǁîsa Pauluba ge ǂhôa.
bt-E 191 ¶5-6
‘ǁKhoaǂgaoxa re’
5 Paulub ge ǁaerob ǀgaib ǀguiba ge ǁkhaeǂgaohe. Tsî sao ra tsēs ai gu ge 40 Jodeǁîga “ǀâxarexūsen, ǂû tsî gu ā tide ti, Pauluba gu nî ǃgams kōse” di ge mî. Nē ‘ǀâxare-i ǀkha ǀâxarexūsens’ ge gere ǁgau nē Jodeǁîgu ge amabes ǃnâ a mîǁguisa Pauluba ǃgamsa. ǁÎgu ge gere ǂgom nēsa gu ga dī tama io, o gu go ǀâxare-e di. (ǃNaeǃkhaidi 23:12-15) ǁÎgu ge gere ǀape î gu Pauluba ǀgapi pristergu tsî ǀapeǀhaos ǃnans aiǃâ ǂhai tsî dîǃnâ-e. Xawe gu ge noxoba gere ǀape ǁîba ǃkhai-i ǃnâ ǀhao-ū tsî ǃgamsa.
6 Xaweb ge Paulub ǁnuriba nēsab ge ǁnâu o, o Pauluba sī ge mîba. Tsîb ge Pauluba ǁîb ǁnurisaba ge mîba îb Romeǁîn di ǂgaeǂgui-aob Klaudiu Lisiata sī mîba. (ǃNaeǃkhaidi 23:16-22) Amabes ǃnâb ge Jehovaba ǂkhamkhoena a ǀnam, nē ǀons ai ǂgaihe tama hâ Paulub ǁnurib khami. ǁKhoaǂgaose Elob khoen di ǃgâiba ǁîn aiǃâ mâi tsî ǂgomǂgomsase Elob Gaosiba ra ǂkhâǃnâse.
(ǃNaeǃkhaidi 24:2, 3) Tsî ǂgaiheb geo, ob ge Tertuluba ǀhapimā bi tsoatsoa, tsî ge mî: 3 Kai ǂkhîba da sats ǃnâ ūhâ, tsî sa aiǂhomisa xu gu koa-anusa dīga nē ǁaesa ra hāǂam ǃkhaisa da ge hugaǀgui tsî mâ ǁaeb hoab ai gangans ǀkha ra ǃkhōǃoa, ǀgapiǃgôahesa Felikstse.
(ǃNaeǃkhaidi 24:5, 6) Sige ge nē khoeba ge hō ǂhīǁōb ase, tsî ǃhūbaib hoab ai Jodeǁîn hoana ra gongonǃnâb ase, tsî Nasareǁîn kāǁhapuǂgoms di aiǃgû-aob ase, 6 ǁkhāti ge tempelab nî ǀuriǀurisa dītsâb xase. ǁÎba ge ge ǁkhāti go ǃkhō, tsî sige ǂhanub ǃoa goro ǀgoraǃgâ bi ǂgao.
bt-E 192 ¶10
‘ǁKhoaǂgaoxa re’
10 Paulub ge “Herodeb di ǂhanuǂhanu-ommi ǃnâ” Kaeserias ǃnâ ǁîb di mâǃoa-aoga Jerusalemsa xu ge ǃgâu hâ i. (ǃNaeǃkhaidi 23:35) Tsî koro tsēdi khaoǃgâ gu ge ge hā—ǀgapipristeri Ananiab, ǂnomdomgu tsî ǂanǂansa khoeb Tertulub tsîna. Tertulub ge aibe Feliksa gere koa Jodeǁînab ge dīban ǃgao xaweb ge nēsa Feliksi xab nî ūǃoahe ǃkhais ǃgao gere dī. Tsîb ge ǁnās khaoǃgâ Paulub ǃoa ge mî, nē khoeba ge ge ǂhīǁōb ase ra mû “tsî ǃhūbaib hoab ai Jodeǁîn hoana ra gongonǃnâb ase, tsî Nasareǁîn kāǁhapuǂgoms di aiǃgû-aob ase.” Tsîn ge nau Jodeǁîna “ǃkhō-am tsî nēn ǁnāti ī ǃkhaisa ge mî.” (ǃNaeǃkhaidi 24:5, 6, 9) ǂHīǁōb, gongonǃnâ-aob tsî Tempela ra ǀuriǀuri khoe-i ase ǂgā-amhes ge kaise ge ǁkhōǁkhōsa i nēs ge ga ǃaroma hâ î-i khoe-e ǃgamhe.
(ǃNaeǃkhaidi 24:10-21) Ob ge Pauluba, ǃākhōmâi-aob ge ǃhoab nîse nape bi ǃnubai ge mî: ǂAn ta a xui-ao, ǂgui kurigats nē ǁaes ǂama ǂhanuǂhanu-ao ge i ǃkhaisa, o ta ǁnās ǃgâ-ai ǃgâiǂâixase ra ǃereambasen. 11 ǂAn ǁkhāts a xui-ao, disiǀgamǀa tsēde i ǃnā tamasa, Jerusalems ǃoa ta ge ǃapasa, ǀgoreǀî ta nîse. 12 Tsî gu ge ǁkhāti tempeli ǃnâ khoe-i ǃoa ra ǃhoase hō te tama tsî ǁkhāti ǁaes ǃnâ gongonai-e ra dīse, sinagogegu ǃnâs kas, ǃās ǃnâs kas hoasa. 13 Tsî gu ge ǁkhāti a ǃhoadan te ǁoa, nēsin ra ǀhapimā ten xa. 14 Xawe ta nēsa sats ai ra ǁguiǁnâ, ǁnā daob kāǁhapuǂgoms tin ra ǂgaiba-ū ta, ǁgûgu di Eloba ǁnāti ra ǃoaba ǃkhaisa, ǂhanub tsî kēbo-aogu tsîn ǃnâ xoamâihe hâna ǂgom tsî. 15 Tsî ta ge ǃâubasensa Elob ai ūhâ, ǁîn ǁkhāti ūhâsa, ǁō hâna xu khâi-i nîra hâ ti, ǂhanu-ain tsî ǂhanuoǃnân tsîn di-e. 16 Tsî ǁîs ǃnâ ta ra ǁkhāpesen, hugaǀgui ta nî ǁgonǁgonǂgao-o ǂâi-e Elob tsî khoen tsîn aiǃâ. 17 O ta ge ǀnî kurigu khaoǃgâ ge hā, ti ǁaesa ta nî aude dībase, tsî ǁguibadi tsîna. 18 ǁÎna ta ra dī hîa gu ge tempeli ǃnâ ǃanuǃanuhe hâ khoese ge hō te, ǁaes ǀkha tama i tsî gongonai-e dī tamase. 19 ǁÎgu Jodeǁîgu Asiab digu ga nēpa sa aiǃâ hā hâ, î gu ga ǀhapiǀhapi te, xū-e gu ga tita ǃoagu ūhâo. 20 A gu ǁnâi aitsama mî, īse gu tsū xū-e tita ǃnâ go hō ǃkhaisa, ǀapeǀhaos aiǃâ ta go mâ io. 21 Nē mîs ǀguis ǃaromas, ǁîgu ǃnâ ta mâ hîa ta go ǂgaisa: ǁŌ hân di khâis ǃaroma ta nētsē sago xa ra ǀanaǃgâhe ti.
bt-E 193-194 ¶13-14
‘ǁKhoaǂgaoxa re’
13 Paulub ge amase ǃgâi aiǁgausa ge ǁgau da ǂamkhoegu aiǃâ da ga ǂhai o da nî tanisen ǀgaub xa. Tamas ka io da ga sida ǂgoms ǃgao ǂhanu tama hâ ǀgaub ǃnâ ga ra ǀgoraǃgâhe o aiǁgause ǂgaeǂhapu-ao-i, khoena ra ǂgāǁae khoe-i ase ǂhanub ǃoagu tamas ka io “ǁkhōǁkhōsa ǃgubis” di ǁanise. Paulub ge ǂgaeǂgui-aob xab nî ūǃoahese ge tanisen tama hâ Tertulub gere dī khami. ǁÎb ge ǃnomsase ǃgôasiba ra ǁgause gere tanisen. ǁÎb ge gā-aisiba ra sîsen-ūse ǃamku ǃgāsa ǃereamsa ge mā. Paulub ge ge mî ǁîba ge ǂgā-am Jodeǁîn hîna ‘Asiaba’ xu gere hān ge ǀkhai i ǃkhaisa tsîb ǁîba ǁîn aiǃâ ǀgui nî ǁkhaubasensa.—ǃNaeǃkhaidi 24:18, 19.
14 Xaweb ge Pauluba ge ǃkhō-oasen tama hâ i ǁîb ǂgom ǀgauba ǁguiǃās ǃnâ. ǁKhoaǂgaosib ǀkhab ge Pauluba khâisa ge ǁapoǁapo. Nē ǁhōb ge kai ǂkhababa ge ǃaroma ǀapeǀhaos aiǃâb ge ǂhai o. (ǃNaeǃkhaidi 23:6-10) Paulub ge ǁîb di ǁkhaubasens ǃnâ khâis di ǃâubasensa ge ǁguiǃgâ. Tae-i ǃaroma? Paulub ge Jesub xa gere aoǁnâ tsî Jesub ge ǁōba xu a khâisa gere ūǃoa ǁîb mâǃoa-aon ge ūǃoa ǂgao tama hâ i xawe. (ǃNaeǃkhaidi 26:6-8, 22, 23) Nēs ra ǁgaus ge nē ǃhoas ge Jesub tsî khâis ai ǃgaoǃgaosa ī ǃkhaisa.
Gagasi xūna ǀō-aisase ôaǃnâs
(ǃNaeǃkhaidi 23:6) Tsî Paulub ge ǂan io, ǀgui ǃâs a Saduseǁî tsî nau ǃâs a Fariseǁî ǃkhaisa, ob ge ǀapeǀhaos ǃnâ ge ǂgaiǂui: ǃGâsago, tita ge Fariseta tsî Fariseb di ôata, tsî ta ge ǃâubasens tsî ǁō hân di khâis ǃaroma ra ǀanaǃgâhe.
nwtsty study note ǃNǃkh. 23:6
Tita ge Fariseta: ǀNîn hîna ge nē ǃnaeǃkhais tawa hâ în ge Pauluba ge ǂan i. (ǃNǃkh. 22:5) ǁÎn ge ga ǁnâuǃā hâ Paulub ga Fariseb ǀgôa ta ge ti mî hâ o, ǁîb khaoǃhūb di ra ǁgau amaga. ǁÎn ge ge ǁnâuǃā Paulub ge ǂhumi mâi-aiǃâsen tama hâ isa, Farisegu tsî ǀApeǀhao ǃnans ge ǂan-i amagab ǁîb ge a ǁkhoaǂgao Xristeǁî kai ǃkhaisa. Xawe nē ǃnaeǃkhais hînab ge Pauluba Fariseb ase a mâi-aiǃâsens ge ǀnî hâ ǀgaub ǃnâ ge ǁnâuǃāhe. Paulub ge Farisegu ǀkhab a ǀguise gere mâi-aiǃâsen ǁîb ge Farisegu khâis ǃnâ ra ǂgom ǀgauba gere ūǃoa amaga, Sadusegu ǀkhas ose. Nēsa dīs ǃnâ-ūb ge ǁîba ǃgâi ǃgaoǃgaoba gere kuru Farisegu ǀkha. ǁÎb ge gere ǂâi nēs xa ǃhoas ǃnâ-ūb ǀApeǀhao ǃnans di ǃgâiba nî hō di tsîs ge nēsa ge sîsen. (ǃNǃkh. 23:7-9) Paulub di mîdi hîna ǃNǃkh. 23:6 ǃnâ hâdi ge ǁîb gere ǁguiǃāsen ǀgaub ǀkha ra ǃgûǀhao Gao-aob Agripab aiǃâb ge ǂhai hâ i ǁaeb ǃnâ. (ǃNǃkh. 26:5) Tsîb ge Romes xu Filipis ǃnâ hâ Xristeǁîn ǃoa a xoa o, ob Fariseb khaoǃhūbab ūhâse ge mâi-aiǃâsen. (Fil. 3:5) ǀŌ-aisa î ge a mûsa matin ge Farise ge ī Xristeǁîna gere mâi-aiǃâhe ǀgauba ǃNǃkh. 15:5 tawa.—Mû re study note ǃNǃkh. 15:5.
(ǃNaeǃkhaidi 24:24) Tsî ǀnî tsēdi khaoǃgâb ge Feliksa ǁîb taras Drusilas Jodeǁîs ǀkha hā tsî Pauluba haisi tsî Xristub Jesub ǃnâ ǂgoms din xa ge ǁnâu bi.
(ǃNaeǃkhaidi 24:27) Tsî ǀgam kurikha ge ǃgôa-īo, ob ge Feliksa Porsiub Festuba ǁîb di amǃnâs ai ge hō. Tsî Feliksi ge Jodeǁîna khoexasi-e ǁgau ǂgao amagab ge ǃkhōsab ase ge ǃgoro kai bi.
nwtsty study note ǃNǃkh. 24:24
Drusilas: Nēs ge Herodeb hîna ǃNǃkh. 12:1 ǃnâ Herodeb Agripab I di ra ǂgaiheb di ǃnonaǁî ǀgôasa. ǁÎs ge 38ǁî kurib ǃnâ ge ǃnaehe, ǁîs ge ge Agripab tsî Bernises tsîn di ǂkham ǃgâsa i. (Mû re study note ǃNǃkh. 25:13 tsî Glossary “Herodeb.”) ǃNaga hâ ǂgaeǂgui-aob Feliksi ge ge ǁîs ǀgamǁî ǃgame-ao-i. ǁÎs ge ǂgurose Siriab Gao-aob Asisub, Emesab di ǀon hâb ǀkha ge ǃgame hâ i. Tsî ǁîb ǀkha ǀgora tsî ǁnās khaoǃgâ 54ǁî kurib ǃnâ Feliksi ǀkha ge ǃgame 16 kurixas a hîna. Īǁkhā as ge Paulub ge Feliksi ǀkha “ǂhanu-aisib tsî ǀgausib tsî ǃgoaxa ǀgoraǃgâs” xa gere ǃhoa o, os ge ǁîs tsîna hâ isa. (ǃNǃkh. 24:25) Feliksi ge ǁîb ǂharosa Festuba a mā o, ob ge ǁîba Pauluba noxoba ǃkhōsis ǃnâ ge ūhâ i îb “Jodeǁîna khoexasi-e ǁgau.” Tsî nēs ǃnâ-ūs tsîna ǁîb taras hîna ge Jodeǁî îsa ǂkhîǂkhî.—ǃNǃkh. 24:27.
Elobmîs khomai ǃâs
(ǃNaeǃkhaidi 23:1-15) ǃNubaib ge Pauluba ǀapeǀhaosa ǃgapaǀî, tsî ge mî: Aogo, ǃgâsago, ǃgâi ǂâis hoas ǀkha ta ge tita Elob aiǃâ nētsēs kōse gere tanisen. 2 Ob ge ǀgapipristeri Ananiaba ǁîb tawa mâga ge mîmā, î gu ams ai ǂnau bi, ti. 3 Ob ge Pauluba ǁîb ǃoa ge mî: Elob ge nîra ǂnau tsi, sats ǃuriǃurisa ǂnubiǂgoatse, ǂnûts hâ ǂhanub ǃoats nî ǀgoraǃgâ tese, tsîts ǂhanub ǃoagu ra mîmā, ǂnauhe ta nîsa? 4 O gu ge ǁnāpa mâga ge mî: ǀAots ra Elob di ǀgapipristera? 5 Ob ge Pauluba ge mî: ǀŪ ta go i, ǃgâsago, ǀgapipristeri a ǃkhaisa. Xoamâihe i kom hâo: ǁAes âts di danakhoebats ge ǀgoe tide, ti. 6 Tsî Paulub ge ǂan io, ǀgui ǃâs a Saduseǁî tsî nau ǃâs a Fariseǁî ǃkhaisa, ob ge ǀapeǀhaos ǃnâ ge ǂgaiǂui: ǃGâsago, tita ge Fariseta tsî Fariseb di ôata, tsî ta ge ǃâubasens tsî ǁō hân di khâis ǃaroma ra ǀanaǃgâhe. 7 Tsî nēsab ge mîo, o i ge ǂnoagu-e ge hā Farisegu tsî Sadusegu ǁaegu, tsîs ge ǀapeǀhaos ǂnûsa ge ǀgoraǃāsen. 8 Sadusegu ge khâi-i kas, ǀhomǃgā-i kas, gaga-i kas a ǀkhai ti ra mî xui-ao; xawe gu ge Farisega hoan hâ ǃkhaisa ra ǂgom. 9 O i ge kai ǃau-e ge hā. O gu ge xoaǂansabegu Fariseǁî ǃâs diga khâi, tsî ǂnoagu tsî ge mî: Sige ge nē khoeb ǃnâ tsū xū-e hō tama hâ; tsî gaga-i kas, ǀhomǃgā-i kas ga ǁîb ǀkha ǃhoa hâo, a ge tā Elob ǃoagu ǂnoagu. 10 Tsî ǂnoagus ge kaio, ob ge ǂamkhoeba ge ǃao, ǀnîsi gu nî Pauluba ǀkhauǃā ǃkhaisa, ob ge toroǁaesa ge mîmā, ǁgôaxa tsî gu nî ǁîba ǁîgu ǁaeguba xu ūǂui tsî ǁgoeǃkhais ǃoa ūsī ǃkhaisa. 11 Tsî sao ra tsuxub ǃnâb ge ǃKhūba ǁîb tawa mâ, tsî ge mî: ǃGâiǂâixa re, Paulutse, tita xats ge Jerusalems ǃnâ ǃkhō-am khamits ge ǁkhāti Romes tawa nîra ǃkhō-am. 12 Tsî ǁgoa i ge, o gu ge ǀnî Jodeǁîga ǀhû, tsî ge ǀâxarexūsen, ǂû tsî gu ā tide ti, Pauluba gu nî ǃgams kōse. 13 Tsî gu ge hakadisisa ge ǃnā hâ i, nē nūsa ge nūǁaega. 14 ǁÎgu ge ǀgapipristergu tsî ǂnomdomgu tsîgu tawa sī, tsî ge mî: Sige ge ǀâxare-i ǀkha go ǀâxarexūsen, xū-i xare-e ge tsâtsâ tidesa, Pauluba ge nî ǃgams kōse. 15 Sago tsî ǀapemāǃnans tsîna ǁnâi ǂamkhoeba ǂanǂan, îb ǁari sago tawa ūhā bi, ǁîb di ǃnaeǃkhaina go ra ǂōrisase ôaǃnâ ǂgao khami; sige ge ǂhomisen hâ, ǀgūseb hā tama hâ hîa ǁîba ǃgamsa.
JANUARIB 21-27
ELOBMÎSA XU HÂ ǂÛǂÛSA MÎDI | ǃNAEǃKHAIDI 25-26
“Paulub ge ǂgurose Kaesari aiǃâ ra ǂhai tsî ǁnās khaoǃgâ gao-aob Agripab aiǃâ”
(ǃNaeǃkhaidi 25:11) ǂHanuo xū-i tsî ǁōba anu hâ xū-e ta ga dī hâo, o ta ǁō ta nîsa ǂkhā tama; xawe nēgu ra ǀhapiǀhapi ten di ǀgui-i xare-i ga ti ī tama io, o i kom khoe-i xare-e khoexasiba xu tita ǁîna a māǁnâ ǁoao. Kaesari ai ta ra ǂgaimāsen.
bt-E 198 ¶6
“Kaesari ai ta ra ǂgaimāsen”
6 Festub ga Jodeǁîna nē ǁhōb ǃnâ ǃkhōǂgā hâ o, os ge nēsa Pauluba ǁkhōǁkhōsa mâsib ǃnâ ga mâi hâ. ǁNās ǀkhab ge Pauluba ǁîb Romeǁî ǁanǂgāsabesis di aiǂhanuba ge sîsen-ū. ǁÎb ge Festuba ge mîba: “Tita ge Kaesari di ǂhanuǂhanuǃnaos ai mâta, ǁnāpa ta nî ǂhanuǂhanuhe; Jodeǁîna ta tsū-e dī tama hâ, sats ǁkhāti îsase ǂan khami . . . Kaesari ai ta ra ǂgaimāsen.” Nēs ge ge ǀkharaǀkharahe ǁoa-i. Festub ge ge ǁguiǃâ, mî rase: “Kaesarats go ǂgaimāsen, ots ge Kaesari ǃoa nî ǃgû.” (ǃNaeǃkhaidi 25:10-12) ǀGapi ǂamkhoegu aiǃâb nî ǂhais aiǃâb ge Pauluba ǃgâi ǁgauǁgausa Xristeǁîna ge ǁgau. Mâǃoa-aon ga “ǀgoraǃgâǃnaos” kōse ga ra ǂkhababa ôa o, on ge Jehovab di ǀHûǀguitimî-aona ǁîn di khoesi ǂhanuba ra sîsen-ū ǃgâiǂhôasa ǁkhaubas ǃgao.—Psa. 94:20.
(ǃNaeǃkhaidi 26:1-3) Ob ge Agripaba Paulub ǃoa ge mî: ǃHoabasensats mā-amhe hâ. ǃNubaib ge Pauluba ǃomma ra ǀhōǂuise nēti ge ǃereambasen: 2 ǃGâiǃgâse ta ra ǃgôasen, gao-ao Agripatse, Jodeǁîn ra ǀhapiǀhapi ten hoan xa ta nētsē sa aiǃâ nî ǃereambasen ǃkhaisa. 3 ǃGōsase Jodeǁîn di ǂūgu tsî ǂnoagu-aidi hoan di ǂanaots a amaga. ǁNā-amaga ta ra ǀkhoma tsi, ǃnūǃnâxasets nî ǁnâuǃgâ tesa.
bt-E 198-201 ¶10-16
“Kaesari ai ta ra ǂgaimāsen”
10 Paulub ge ǃgôasib ǀkha Gao-aob Agripaba ge gangan, aitsama ǁkhaubasens aiǂhanubab ge mā bi ǃkhais ǃgao. Paulub ge ge mûǂan gao-aob Jodeǁîn di ǃhaoǃnâbe ǁnaetigu tsî ǂnôagudi tsîn ǃnâ ǂansa ūhâsa. Paulub ge ǁîb di khaoǃhūba sao rase ge ǁguiǃā: “Mati ta ge hoan xa ǁkhōǁkhōsase sekteb sada eloǃoabas dib ǃoa Fariseb ase gere ûi ǃkhaisa.” (ǃNaeǃkhaidi 26:5) Fariseb aseb ge Pauluba Mesiab di hāsa ge ǃâubasen hâ i. Tsîb ge ǁîba Xristeǁîb ase ǁkhoaǂgaosib ǀkha Jesub Xristuba hānîb ase ge ǁguiǃā. Nē ǂgom ǀgaubab ge ǁîb tsî ǁîb mâǃoa-aon tsîna gere ūǃoa. Nēs ge ǃâubasens hîna ra ǁgausa Elob di mîmâis nî dīǀoaǀoahesa ǁîn kai ǁgûga ǃoa ge mîmâihe hâ îsa. Tsîs ge nēsa ge ǃaroma îb Pauluba ǁnā tsēs ai ǀgoraǃgâhe. Nēs tsîn ge ge ǃaroma îb Agripaba ǁnâu ǂgao Paulub tae-e ra mîsa.
11 ǁÎb ge Xristeǁîna gere hâ-ū ǀgaub xab ge Pauluba ge xoa: “Tita on ge tita ǃnâ gere ǂâi, Jesub Nasareǁîb di ǀons ǃoagu ta ǂgui xūna nî dī ǃkhaisa . . . Tsî ǃnāǂamsase ta ge ǁîn ǃoagu khâikhâisen, o ta ge ǃauga ǂnôa ǃādi kōse ǁîna gere ǃgôaǃgon.” (ǃNaeǃkhaidi 26:9-11) Paulub ge nēsa ǁnâuhe ǂgaob gere ǃkhais ǃgao ǀgui ge mî tama hâ i. ǂGui khoen tsîn ge ge ǂan i ǁîb ge Xristeǁîna gere soaǃgôn ǃkhaisa. (Gal. 1:13, 23) ‘Tae-e nēti i khoeba ge ǀkharaǀkhara?’ Dib ge ǀnîsi Agripaba gere ǂâi.
12 Paulub di mîdi ge nēsa ra ǁguiǃā: “ǁkhāti nē dīb ǃnâ Damaskus ǃoa ge ǃgû, ǀgapipristergu tawa ǁkhāsib tsî mā-ams tsîra hō hâǃâ. ǃNubai ta ge tsēǃgâǁaeb ai daob ai ǃnâ-e ǀhomma xu ge mû, gao-aotse, sores di ǂkhaib ǃgâ-ai ǂkhaisa-e, tita tsî tita ǀkha daob ai hâga ra ǃnâǃnâǂnamipe-e. Tsî hoage ge ǃhūb ai ǁnāǁgoe ǃnubai ta ge dom-e ge ǁnâu, Hebreǁî gowab ǃnâ tita ǃoa Saultse, Saultse, tarexats ra ǃgôaǃgon te? ti ra mî-e. ǃGomba tsî nîra ǃkhari-ūdas ǃoagu ǂnāsa. O ta ge tita ge mî: Taritsa kha, ǃKhūtse? Ob ge: Tita ge Jesuta, sats ra ǃgôaǃgon ta, ti ge mî.”—ǃNaeǃkhaidi 26:12-15.
13 Nē ǃnaeǃkhais aiǃâb ge Pauluba ‘ǃgomba tsî nîra ǃkhari-ūdas [gaxu haib] ǃoagu ǂnāsab’ ase gere tsâ. Nēs ge gomab hîna gaxu haib ǃoagu ūri tsî aitsama ra tsûtsûsen nî ǀkha ra ǀgopeǀnō-e, ǁnās ǁkhās khamis tsînab ge Pauluba gagasise gere tsûtsûsen Elob ǂâisa dī ǂgao tama îs ǃnâ-ū. Jesub ge Damaskus di daob ai Paulub ǀkha ǃhoas ǃnâ-ū ge hui bi îb ǁîb ǂâi ǀgauba dawa ǁkhā.—Johaneb 16:1, 2.
14 Paulub ge ǂgui ǀkharaǀkharana ǁîb ûib ǃnâ ge dī. Tsîb ge Agripaba ge mîba: “ǁNā-amaga, gao-ao Agripatse, ta ge nē ǀhommi aisa ǁnâuǀnamoǃnâ tama ge i. Tsî ta ge aibe Damaskus din tsî Jerusalems din tsî Judeaǃhūb hoaragab din tsî ǀūben tsîna gere ǂhôa, ǃhausen tsîn nî Elob ǃoa ǃhobasen ti, ǃhobasensa anu hâ sîsenga ra dīse.” (ǃNaeǃkhaidi 26:19, 20) Tsîb ge Pauluba kuriga Jesub Xristub ge mā bi ǁgui-aisa gere dī. Tae-i ǀamǂoas ǀkha? ǁÎn hîna ge Paulub gere aoǁnâ ǃgâiǂhôasa a ǁnâu tsî a ūbasenan ge ge ǃhobasen ǁîn di ǁgai ûiǀgaub tsî gāxaǃnâsiba xu tsî Elob ai ge ǂgā mâisen. Nēn ge ge ǃgâi ǁanǂgāsabe kai tsî ǁnās ǀkhas tsîna ǃgôasiba ǂhanuba gere ǁgau.
15 Pauluba gere mâǃoa Jodeǁîn ge nēs ǃgâiba ge mû tama hâ i. Paulub ge ge mî: “ǁÎ ǃkhais ǃaroma gu ge Jodeǁîga tempeli ǃnâ ǃkhō te tsî gere ǃgam te ǂgao. Xawe Elob xa huihe hâǃâ ta nētsēs kōse mâ tsî ra ǀhûǀguitimîba ǂkharin tsî kain tsîn hoana, tsî ta ge ǀnî xū-e mî tama kēbo-aogu tsî Moseb tsîgu ge īn nîra ti mîn ǀguina.”—ǃNaeǃkhaidi 26:21, 22.
16 Xristeǁîn ase du ge “hugaǀgui ǂhomisen hâ, sadu ǃnâ hâ ǃâubasens xa ga ǃereamsa ǂgaoǀkhā du-i hoa-e ǃereamsa māsa.” (1Pet. 3:15) ǀGoraǃgâ-aogu tsî ǂgaeǂgui-aogu tsîn ǀkha da ga sada ǂgoms xa ga ra ǃhoa o, o da ge Paulub di aiǁgaus xa a ǂâiǃgâ ǁkhā. ǁÎna da ge ǃgôasib ǀkha Elobmîs ge sida ûiba a dawa ǀgaub xa nî mîba. Nēs ge ǁîn hîna ge sida haisi-amsa a ūǃoan tsîna ǃkhōǂgā hâ. ǀNîsi du ge ǂamkhoegu tsîna a tsâǀkhā ǁkhā.
(ǃNaeǃkhaidi 26:28) Ob ge Agripaba Paulub ǃoa ge mî: ǁAupets ra mîdan te, Xristeǁî kai ta nî ǃkhaisa.
bt-E 202 ¶18
“Kaesari ai ta ra ǂgaimāsen”
18 Tsîb ge Pauluba ǂgaeǂgui-aoba ge ǃeream: “ǃKhau tama ta hâ, ǀgapiǃgôasa Festutse, tsî ta ge ama tsî ǁnâuǃāxa mîde ra ǃhoa. Gao-aob kom nēn xa a ǂano, o ta kom ǂhauǂgarose ǁîb ǃoa ra ǃhoao, nē xūn di ǀgui-i xare-i kom ǂganǃgâsaba bi tama hâo, tita ra ǂgom ǁîn ǁhôa-i ǃnâ ī tama hâ xui-ao. ǂGomts ra, gao-ao Agripatse, kēbo-aoga? ǂAn ta ge a, ǂgomts ra ǃkhaisa. Ob ge Agripaba Paulub ǃoa ge mî: ǁAupets ra mîdan te, Xristeǁî kai ta nî ǃkhaisa.” (ǃNaeǃkhaidi 26:25-28) Nē ǂhauǃnâ mîdi ge ra ǁgau Paulub ge gao-aoba a tsâǀkhāsa.
Gagasi xūna ǀō-aisase ôaǃnâs
(ǃNaeǃkhaidi 26:14) Tsî hoage ge ǃhūb ai ǁnāǁgoe ǃnubai ta ge dom-e ge ǁnâu, Hebreǁî gowab ǃnâ tita ǃoa Saultse, Saultse, tarexats ra ǃgôaǃgon te? ti ra mî-e. ǃGomba tsî nîra ǃkhari-ūdas ǃoagu ǂnāsa.
nwtsty study note ǃNǃkh. 26:14
ǃGomba tsî nîra ǃkhari-ūdas ǃoagu ǂnāsa: ǃKhari-ūdas ge gaxu haib hîna gu ǂgari-aoga ra sîsen-ūba xamanin ǃgao. (ǂHǂh. 3:31) “ǃKhari-ūdas ǃoagu ǂnāsa” di hâ ǃhoa ǀgaub ge Grikegowab ǂkhoamîdi ǂkhanin ǃnâ ra hō-e. Nēs tsîn ge ra ǁgau mati î ǃgaridana gomaba nē gaxu haib ǃoagu ūri tsî aitsama ra tsûtsûsen ǀgauba. Saulub tsîn ge nē ǀgauba gere ǁgau Xristeǁî kaib nîs aiǃâ. Jesub di saosaben hîna Jehovab xa ra ǁkhaubahen ǃoagu ǃkhams ǃnâ-ūb ge Pauluba aitsama ge tsûtsûsen. (ǀGopeǀnō re ǃNǃkh. 5:38, 39; 1Tim. 1:13, 14.) Aoǁn. 12:11 ǃnâ “ǃkhari-ūdan axase ī” di hâ ǂkhoamîs ge gā-ai khoe-e ǃoa ra ǁnaeǁgau hîna ǃgâi mîde ra sîsen-ūhe ǁî-i ǃgâ-aona a hui ǁkhā-e.
nwt glossary
ǃkhari-ūdas [gaxu haib]. Nēb ge gaxu haib hîna gu ǂgari-aoga ra sîsen-ūba goman ǃgao. ǃKhari-ūdas di hâ ǂkhoamîs ge gā-ai khoe-e ǃoa ra ǁnaeǁgau hîna ǃgâi mîde ra sîsen-ūhe ǁî-i ǃgâ-aona a hui ǁkhā-e. ‘ǃKhari-ūdas ǃoagu ǂnās’ ge ǂkhoamîs ase ra sîsen-ūhe, ǁgau rasa mati î ǃgaridana gomaba nē gaxu haib ǃoagu ūri tsî aitsâma ra tsûtsûsen ǀgauba.—ǃNǃkh. 26:14; ǂHǂh. 3:31.
(ǃNaeǃkhaidi 26:27) ǂGomts ra, gao-ao Agripatse, kēbo-aoga? ǂAn ta ge a, ǂgomts ra ǃkhaisa.
w03-E 11/15 16-17 ¶14
Nauna hui re în Gaosib ǃgâiǂhôasa ūbasen
14 Paulub ge ge ǂan i Agripab ǀons ai ǀgui a Jodeǁîsa. Agripab Jodeǁîn ǂgoms xa ūhâ ǂans xab ge Pauluba ge mî tsî “ta ge ǀnî xū-e mî tama kēbo-aogu tsî Moseb tsîgu ge īn nîra ti mîn ǀguina,” nēs ge Mesiab hās tsî khâis tsîna ǃkhōǂgā hâ. (ǃNaeǃkhaidi 26:22, 23) ǁNās ǀkhab ge Pauluba Agripaba ge dî: “ǂGomts ra, gao-ao Agripatse, kēbo-aoga?” Agripab ge kai ǃgomsiba ge hōǃâ. Agripab ga ǃeream o ǁîb kēbo-aoga ǂgom tama hâsa os ge ǁîb ǀonsa nî ǁgaiǁgaihe. Xaweb ga ǁîba Paulub ra mî-e ūǃoa o, ob ge ǁîba kaise ǁkhōǁkhōsa mâsib ǃnâ ga mâisen hâ tsî Xristeǁîb ase ǀnîsi ga ǂgaihe hâ. Paulub ge gā-aib ǀgaub ǃnâ ǁîb dîde ge ǃeream, mîb ge o: “ǂAn ta ge a, ǂgomts ra ǃkhaisa.” Agripab ǂgaoba mati ge tsâǀkhā-e nē ǃereams xa? ǁÎb ge ge ǃeream: “ǁAupets ra mîdan te, Xristeǁî kai ta nî ǃkhaisa.” (ǃNaeǃkhaidi 26:27, 28) Agripab ge Xristeǁî kai tama hâ i xaweb ge ǁîb ǂgaoba Paulub mîdi xa ge tsâǀkhāhe.—Hebreǁîn 4:12.
Elobmîs khomai ǃâs
(ǃNaeǃkhaidi 25:1-12) Tsî Festub ge ǁîb gaosîsenna ǃkhōǃoao, ob ge ǃnona tsēdi khaoǃgâ Kaesareasa xu Jerusalems ǁga ge ǃapa. 2 ǃNubai gu ge ǀgapipristergu tsî Jodeǁîn di ǂgurosaga Pauluba ǀanaǃgâ tsî Festuba ge ǀkhoma, 3 khoexasi-e Paulub ǃoagu ra ǂganbasenǃâ, îb ǁîba Jerusalems ǃoa hā kai ti, daob ai gu nî ǁnoa-e ǁguiba bi tsî ǃgam bi, ti ǂâibasen tsî. 4 Ob ge Festuba ge ǃeream, Paulub nî Kaesareas tawa sâuhe, tsîb nî ǁî-aitsama ǃhaese ǁnāǀî ǃgûsa. 5 Sago ǃnâ ǁnâi ga sī ǁkhāga, a gu ǁgôaǀhao tib ge ge mî, î gu ǀanaǃgâ bi, xū-i ga nē khoeb ǃnâ hâo. 6 Tsî disi tsēdi ǀguideb ge ǁîn ǀkha hâ io, ob ge Kaesareas ǃoa ge ǁgôa, tsî sao ra tsēs aib ge ǂhanuǂhanuǃnaos ai ǂnôa io, ob ge Paulub nî ǀkhī-ūhesa ge mîmā. 7 Tsî hāb geo, o gu ge Jerusalemsa xu go hā Jodeǁîga mâǂnamipe bi, tsî ǂgui tsî ǃgom ǀhapiǀhapi-aina Paulub ǃoagu ge ūhā, ǁgauǃā ǁoa gu ge ina. 8 ǃEreambasen raǃâb ge mî xui-ao: Tita ge ǁore tama hâ Jodeǁî ǂhanub ǃoagus kas, tempeli ǃoagus kas, Kaesari ǃoagus kas hoasa. 9 Ob ge Festuba Jodeǁîna khoexasi-e ǁgau ǂgao tsî Pauluba ǃeream tsî ge mî: Jerusalems ǃoa ǃapa ǂgaots ra, ǁnāpats nî tita aiǃâ nēn ǃaroma ǀgoraǃgâhega? 10 Ob ge Pauluba ge mî: Tita ge Kaesari di ǂhanuǂhanuǃnaos ai mâta, ǁnāpa ta nî ǂhanuǂhanuhe; Jodeǁîna ta tsū-e dī tama hâ, sats ǁkhāti îsase ǂan khami. 11 ǂHanuo xū-i tsî ǁōba anu hâ xū-e ta ga dī hâo, o ta ǁō ta nîsa ǂkhā tama; xawe nēgu ra ǀhapiǀhapi ten di ǀgui-i xare-i ga ti ī tama io, o i kom khoe-i xare-e khoexasiba xu tita ǁîna a māǁnâ ǁoao. Kaesari ai ta ra ǂgaimāsen. 12 ǃNubaib ge Festuba ǀapemāǃnans ǀkha ǁgamǀhao, tsî ge ǃeream: Kaesarats go ǂgaimāsen, ots ge Kaesari ǃoa nî ǃgû.
JANUARIB 28–FEBRUARIB 3
ELOBMÎSA XU HÂ ǂÛǂÛSA MÎDI | ǃNAEǃKHAIDI 27-28
“Paulub ge Romesa xu ge ī”
(ǃNaeǃkhaidi 27:23, 24) Nē ī go tsuxub ǁkhāb ǃnâb ge Elob di ǀhomǃgāb, ǁîb di ta ab tsî ǃoaba ta raba tita tawa mâ, 24 tsî go mî: Tā ǃao, Paulutse, Kaesari aiǃâts ge nîra mâihe; Elob ge sats ǀkha ǃgû garun hoana go ǀkhae tsi.
bt-E 208 ¶15
“ǀGuib xaweb âgo ûiba ǂoaǃnâ tide”
15 Paulub ge ǁîb ǀkha ge ǂgaub ai hâ i ǂgui khoena ‘Eloba xu ge ǁgûga ība mîmâis di ǃaromas’ xa ge aoǁnâba. (ǃNaeǃkhaidi 26:6; Kol. 1:5) Tsîb ge Pauluba ǂgaub ge khôa ǁaeb ai noxoba ge aiǃgû nē ǃâubasens xa ǃhoasa. ǁÎb ge ge mî: “Nē ī go tsuxub ǁkhāb ǃnâb ge Elob di ǀhomǃgāb, ǁîb di ta ab tsî ǃoaba ta raba tita tawa mâ, . . tsî go mî,‘Tā ǃao, Paulutse, Kaesari aiǃâts ge nîra mâihe; Elob ge sats ǀkha ǃgû garun hoana go ǀkhae tsi.’” Tsîb ge Pauluba ǁîna ge mîba: “ǁNā-amaga ǃgâiǂâixa re, aogo, Eloba ta kom ra ǂgomo, mîbahe ta gos ǁkhās xase i nîra ī ǃkhaisa. Xawe ge kom sage ǂanǂansa ǃnāǃnuiros tawa nîra aoǂuiheo.”—ǃNaeǃkhaidi 27:23-26.
(ǃNaeǃkhaidi 28:1, 2) Tsî sâuhe ge geo, o ge ge ǁnâu, ǁnā ǃnāǃnuis Melite ti ra ǂgaihe ǃkhaisa. 2 Tsîn ge ǁnāpa hâ khoena sige ǂkhari tama khoexasiba ge ǁgau, ǀae-e khau tsîn ge sige hoage ge ǃkhōǃoa, ǁnā ǀapib tsî ǃkhaib tsîn ǃaroma.
bt-E 209 ¶18
“ǀGuib xaweb âgo ûiba ǂoaǃnâ tide”
18 Tsî sâuhe gen ge Melite [Maltas] ai ge hâ i, Sicilisi di Suides tawa. (Mû re boksisa “Maltas mâpa hâsa?”) Khoen hîna ge ǁnā ǃās ai ǁan hâ în ge ǀō-aisa “khoexasiba” ge ǁgau. (ǃNaeǃkhaidi 28:2) ǁÎn ge ǀaesa ǁîn ǃās ai ge sī khoena ge khauba hîna ge ǀâb xa gere ǀhūna. Nē ǀaes ge nē khoena ge hui în ǀgam ǁkhā. Nēs ge ǀō-aisa buruburuxa xū-e ge ǃaroma.
bt-E 210 ¶21
“ǀGuib xaweb âgo ûiba ǂoaǃnâ tide”
21 ǃKhū hâ aob hîna Publiub di ra ǂgaiheb ge ǁnā ǃās ǃnâ ge ǁan hâ i. ǁÎb ge ǀnîsi ge Romeǁîn ǀapaǃnam i Maltas ǃnâ. Lukab ge nē aoba “ǃnāǃnuis di ǂgurosab [ǁnā ǃās ǂgurosab]” di ge ǂgai. Nē ǂgai ǀgaub ge Maltas di xoa-aisa ai-īsigu ai a hō-e ǁkhā. ǁÎb ge Paulub tsî ǁîb ǀkha ge hâ i khoen tsîna ǃnona tsēde ǃhaokhoeǃkhōǃoaxasiba ge ǁgau. Xawe Publiub ǁgûb ge ge ǀaesen hâ i. Tsîb ge Lukaba nēsa ǂōrisase ge ǁguiǃā. ǁÎb ge nē aob xa ge xoa: “ǁKhais tsî ǃnātsûb xa ǀaesen hâse ge ǁgoe i,” nē mîdi ǃnâ-ūb ge nē aob di ǀaeba ge ǁguiǃā. Paulub ge ǁîb ǃomga nē aob ai ǁgui tsî ge ǀgore tsîb ge ge ǂgau. Paulub ge nē aoba a ǂgauǂgau ǀgaub xan ge khoena kaise ge buru tsî ǁnās ǀkhas tsîna ǀaesen hâ khoena Paulub tawa ge sī-ū. Tsîn ge ǀkhae xūn tsîna Pauluba sī ge mā îb ǁîb tsî ǁîb ǀkha hâ khoen di ǂhâsiga kōǃgâ ǁkhā.—ǃNaeǃkhaidi 28:7-10.
(ǃNaeǃkhaidi 28:16, 17) Romes tawa ge ge sio, ob ge danakhoeba ǃkhōsaga ǂamkhoeba ge māǁnâ. Tsîb ge Pauluba torokhoeb ǁîba nî sâub ǀkha ǀguri hâ oms ǃnâ ǁansa ge mā-amhe. 17 Tsî i ge ǃnona tsēdi khaoǃgâ ge ī, ob ge Pauluba Jodeǁîn di ǂgurosaga ge ǂgaiǀhû. Tsî ǀhû gu geo, ob ge ǁîgu ǃoa ge mî: Aogo, ǃgâsago, tita ge ǁaes ǃoagu tsî abogu ǂūgu ǃoagu hâ xū-e dī tama hâ, xawe ta ge Jerusalemsa xu ǃgaehe hâse Romeǁîn di ǃomǁae ge māǁnâhe.
bt-E 213 ¶10
ǂŌrisase “gere ǀhûǀguitimîba”
10 Nē ǃnarimâra-aogu ge Romes ǃnâ a sī o, ob ge “Pauluba torokhoeb ǁîba nî sâub ǀkha ǀguri hâ oms ǃnâ ǁansa ge mā-amhe.” (ǃNaeǃkhaidi 28:16) ǁÎn hîna ge ǃkhōsis ǃnâ gere ǃkhōhen ge ǃnāsa ǁaeba ǀapaǃnami ǀkha ǀguiba gere ǃgaeǀhao-e. Xaweb ge Pauluba nē mâsib ǃnâb ge hâ i xawe ge ǀû tama hâ i aoǁnâsa. Tsîb ge Pauluba ǃnona tsēdi khaoǃgâb ge sâ toa o, o hoa ǂanǂansa Jodeǁîgu hîna ge Romes ǃnâ hâ i ga ǂgai ǀhao tsî ge mâi-aiǃâsen tsî ǁîga ge aoǁnâba.
Gagasi xūna ǀō-aisase ôaǃnâs
(ǃNaeǃkhaidi 27:9) Tsî ǂomxa ǁaeb ge ǃgû-īo, tsî ǃgûs ge ǀnai tsūǃgâse io, ǂûtama hâs ǁaeb go ǁkhāti ǀnai ǃgû-ī xui-ao, ob ge Pauluba ǁîga ǁnama
nwtsty study note ǃNǃkh. 27:9
ǂÛtama hâs ǁaeba: Tamas ka io “hai ǃkharub ǁaeb [saoba ra sao ǁaeb].” Nē Grikegowab mîs ‘ǂûtama hâs ǁaeb’ ge ge ǂguro mîmā i Moseb di ǂhanub ǃnâ. Nēs ge ge ǂguro ǂÛtama hâs ǁaeb hîna ge Yom Kippur (Hebregowab ǃnâ yohm hak·kip·pu·rimʹ, “ǃgū-ais tsēs”) di gere ǂgaihes ǀkha a ǀgui. (Lev. 16:29-31; 23:26-32; Num. 29:7; Mû re Glossary, “Day of Atonement.”) “Sadu di ǀomde du nî ǃgamǃgamse” di hâ mîdi ge ǂÛtama hâs ǁaeb ǀkha ra ǃgûǀhao. Nēs tsîn ra ǂâibasens ge hoase ǀûǃgâsensa, ǀnî mîdi ǃnâ ǂûtamase hâsa. (Lev. 16:29) Nē mîs “ǂûtama hâs” ge ǃNǃkh. 27:9 tawa hoase ǀûǃgâsens ase ra sîsen-ūhe. ǂÛtama hâs tsēs ge Septemberi ǁaeguba xu tamas ka io Oktoberi tsoatsoas kōse gere hâ.
(ǃNaeǃkhaidi 28:11) Tsî ǃnona ǁkhâgu khaoǃgâ ge ge Aleksandriaǁî doe-om-i, ǃnāǃnuis ai saoba hâtoa hâ-i, tsî ǀgēkha di saosa ūhâ-i ǃnâ ge ǂnauǁnâ.
nwtsty study note ǃNǃkh. 28:11
ǀGēkha: Grikeǁî gowab tsî Romeǁîn xoaǀgaub ǃoagu kha ge Kastori tsî Polluxi di ǀon hâ. ǁÎkha ge Zeub (Jupiters) di ǀon hâ elob tsî Spartan gao-aos Ledas tsîn di ǀgôakha. ǁÎkha ge hurib ai tsûtsûhe hâ khoen tsîna gere kōǃgâ. Nēs tsîn ge ra ǁgau nē ǃnaeǃkhaisa ge xoa khoe-i ge aitsâma ǁnāsa a mûsa.
Elobmîs khomai ǃâs
(ǃNaeǃkhaidi 27:1-12) Tsî ǂâibasenhe i ge hâ io, Italiab ǃoa ge nî ǃgâusa, o gu ge Paulub tsî ǀnî ǃkhōsaga kaidisigu danakhoeb, Juliub ti ǀon hâb, Kaesari toroǂnubis diba ge māǁnâ. 2 O ge ge Adramitiumǁî doe-om-i Asiab ǃnâ hâ ǃkhaide-ū nî ī-i ǃnâ ǂgâ tsî ge ǂnauǁnâ, tsî Aristarxub, Masedoniaǁîb, Tesalonikas dib ge sige ǀkha ge hâ i.3 Tsî ge ge sao ra tsē Sidons tawa ge sī. Tsî Juliub ge Pauluba khoexaǃnâse sîsenū, tsî ge mā-am bi, khoen tawa sī tsîb nî sîsenbahe ǃkhaisa. 4 Tsî ǁnāpa xu ǂhāǁnâ tsî ge ge Siprusa-ū ge ī, ǂoagu ge sige ǃoagu hâ i xui-ao. 5 Tsî Silisiab tsî Pamfiliab tawa hâ huriba ǃgâu tsî ge ge Miras, Liseab ǃās tawa ge sī. 6 Tsî ǁnāpab ge kaidisigu danakhoeba Aleksandriaǁî doe-om-i Italiab ǃoa nî ǃgû-e hō tsî ǁî-i ǃnâ ge ǃnao ge. 7 Tsî ǂgui tsēde ge ge ǂause ī, tsî Knidus ǃoa ǃgâus kōse ǃgomse ge sī, tsî ǂoab ge mā-am tama i xui-ao ge ge Kretasa-ū ge ī, Salmones ǃoa-ai. 8 Tsî ǁîsa ǀase ǃnara hâǃâ ge ge ǂanǂansa ǃkhais, ǃGâi Doe-ommâ-ais, ti ra ǂgaihes, ǃās Laseas ǁîs ǀgūse hâs tawa ge sī. 9 Tsî ǂomxa ǁaeb ge ǃgû-īo, tsî ǃgûs ge ǀnai tsūǃgâse io, ǂûtama hâs ǁaeb go ǁkhāti ǀnai ǃgû-ī xui-ao, ob ge Pauluba ǁîga ǁnama 10 tsî ǁîgu ǃoa ge mî: Aogo, mû ta ra doe-ommi ǃgûs nî ǂhanis tsî kai ǂkhôas tsîra ǀkha īsa, ǃnaos tsî doe-ommi tsîra ǀguira xa tama i tsî ǁkhāti sage ûib tsîn xa. 11 Xaweb ge danakhoeba ǂgaeǂgui-aob tsî doe-ommi di ǀhonkhoeb tsîkha Paulub xa ge mîhes ǃgâ-ai ge ǂgom. 12 Tsî doe-ommâ-ais ge ǁîs ǃnâ nî saoba hâtoahesa ǃgâibase ǁgoe tama hâ i xui-ao gu ge ǂguiga ge ǀapemā, ǁnāpa xu gu nî ǁkhawa ǃgû ti, ise gu ǀnîsi Feniks tawa sī tsî ǁnāpa saoba nî hâtoase, Kretas doe-ommâ-ais tawa, ǃkhawagasa xu huriǂoasǀî tsî ǀapasa xu huriǂoasǀî ǁgoesa.