Elob ge ra ǂgao ǂkhîb tsî ǃgâiaǂgaob ǃnâ da nî ǀamose paradais ǃhūbaib ai ûi ǃkhai-e!

Khoets axasets ge ra ǂâi, ‘matis nēsa a ī ǁkhā’ di. Elobmîs ge ra mî, Elob Gaosib ge nēsa nî ī kai ǁkhā, Elob ǂâis ge hoa khoen nē Gaosib xa ǁkhāǁkhāsen tsî ǃaromas nē Gaosib disa nî ǂan ǃkhaisa.—Psalmdi 37:11, 29; Jesajab 9:6.

Elob ge sada ǃgâib ǀguiba ra ǁkhoreba.

ǃGâi ǁgûb ǀgôana ǃgâib ǀguiba ra ǁkhoreba khamib ge sada di ǀhomsi ǁgûb tsîna sada nî ǀamo ǂkhîba ūhâ ǃkhaisa ra ǂhâba. (Jesajab 48:17, 18) ǁÎb ge ge mîmâi “Elob ǂâisa ra dī-i ge ǀamosib kōse ra hâ-e.”—1 Johaneb 2:17.

Elob ge ra ǂgao ǁÎb daob ǃnâ da nî ǃgû ǃkhaisa.

Elobmîs ge ra mî sada kuru-aob ge ra “ǁkhāǁkhā da daogu âb xa,” i da “ǁÎb di daogu ǃnâ ǃgû”. (Jesajab 2:2, 3) ǁÎb ge ǁaesa ge ǀhaoǀhao, “ǀūbena xub nî ǀons âba ǁae-e hōbase” ǁÎb ǂâis nî ǂanhesa ǃhūbaib ǂhawase.—ǃNaeǃkhaidi 15:14.

Elob ge ra ǂgao ǀguiǃnâxase da ǁÎba nî ǃoaba ǃkhai-e.

Khoena ǀgoras xas ge Jehovab di ǃanu ǃoabasa khoena ra ǀhaoǀhao ama ǀnami ǃnâ. (Johaneb 13:35) Mâ khoena nētsē ǃhūbaib ǂhawase ra ǁkhāǁkhā, aob tsî taras Eloba ǀguiǃnâxase nî ǃoabasa? ǁKhau du da ge ra nē ǂkhanib ǃnâ-ū ǃnāsase ǂansa.

Matikō Jehovab di ǀHûǀguitimî-aona du a ǂan? ǀNîn ge sa ǁanǁare-ao ǁkhā, sa sîsenǁare-aon, skol ǀhōsa ǁkhā tamas ka iots ge Elobmîsa xu sida xa ge ǃhoa ūhe hâ i. Jehovab di ǀHûǀguitimî-aona, a ham tsî tae-i ǃaroman ǁîn ǂgomsa ǀhûhâsib ǀkha ra ǀgoragu?

Sida ge sadu di ǁanǁare-ao. ǃKharagaǃnâgu omaridi tsî ǁanǀgauga xu da ge ra hā. ǀNîn ge tsoatsoas ǃnâ ǀkhara ǂgomdi ǃnâ ge hâ i, tsî ǀnîn ge Elob ǃnâ ge ǂgom tama hâ i. Xawe da nî ǀHûǀguitimî-ao kais, aiǃâ da ge Elobmîsa ǂōrisase ge ôaǃnâ. (ǃNaeǃkhaidi 17:11) ǁKhāǁkhāsen da ra xūn a ama ǃkhaisa da ge mûǂan o, o da ge aitsama ge ǁhûi Jehovaba ǃoabasa.

Elobmîsa ǁkhāǁkhāsens ge sida di ǃgâib axase ī. Mâ khoe-i hoa i khami da ge sida tsîna ǃgomsigu tsî ǂkhawusasiga ūhâ. Xawe Elobmîs tsoatsoade sida tsēkorobe ûib ǃnâ ǁnâuǀnams ge ra huida, sida ûiba aiǃgûsa. (Psalmdi 128:1, 2) Nēs ge ǃaromas ǁkhāǁkhāsen da ra xūna da khoen ǀkha ra ǀgoragusa.

Elosi ǀgaub ǃoa da ge ra ûi. Nē ǀgaugu Elobmîs ǃnâ ra ǁkhāǁkhāhegu ge ǃgâisib, ǃgôasiba khoena ūhâbas tsî ǃgâi khoesi ǂūgu ǂhauǃnâsib tsî ǀkhomxaǃnâsib tsîna ra ǁkhāǁkhā. Nē ǀgaugu ge ǂurusib ǃnâ ra omkhâi tsî sîsenǀnamxa ǀhûhâga ra ǂkhâǃnâ omaridi di ǀguisib tsî ǃanusib ǃnâ. “Elob ǀgora e ūhâ tama” ǃkhais ge ra ǁgau ǃhūbaib ǂhawase da gāgāsise khoeǃgâgu, tsî ǂgīǂgōsi xūn xa ǀgorahe tamasa. Khoes ǀguisa da i xawe da ge kaise ǀō-aisa khoen di ǃâba ra kuruǂui.—ǃNaeǃkhaidi 4:13; 10:34, 35 NW.

• Jehovab di ǀHûǀguitimî-aona mâ ǀgaub ai nau khoen ǀkha a ǀgui?

• ǀHûǀguitimî-aona tae-e ra ǁkhāǁkhāsen Elobmîsa xu?

ǂGui khoen ge ra ǂâi Jehovab di ǀHûǀguitimî-aon ǀons ǀasa ǂgom-i di ǀon ti. Xawe, 2 700 kurigu ǃkharuhâsen ge amab ǃnâ Eloba gere ǃoaba khoena ‘ǀhûǀguitimî-aon’ di gere ǂgaihe. (Jesajab 43:10-12) Elobmîs ôaǃnâ aon ti da ge 1931ǁî kurib kōse ge ǂansa i. Tae-i ǃaroma da ge nē ǀons, Jehovab di ǀHûǀguitimî-aon ti hâ sa ūǃoa?

Sida di Eloba ra ǁgauǂui. ǀOrokam ǁaeb ǂkhanigu ǃnâs ge Elob ǀons, Jehovasa, hûǀoadisis xa ǃnāsa ǃnāte Elobmîs ǃnâ ge xoahehâ i. Elobmîs ge tsoatsoas ǃnâ ǂnûiǃkhunihe o, os ge nē ǀonsa ǃKhub tamas ka io Elob di hâ ǂgaiǀgaugu ǀkha ge ǃkhōǃkhunihe. Xaweb ge ama Eloba Moseb ǃoa ǁÎb di ǀons, Jehovas ǀkha ge a ǂanǂansen, nētib ge mîse: “Nēs ge ti ǀonsa ǀamos kōse.” (Eksodus 3:15 NW) Nē ǀgaus aib ge Eloba ǁgôa tsî ǁgoa eloga xu ge ǀgorasen. Sida ge kaise a ǂnīsa Elob ǃanu ǀonsa tanisa.

Sida sîsena ra mîǃgāǃgā. ǂGui khoen ge mâsaogu hâse ǁîn ǂgomsa Jehovab ǃnâ ge ǁgau Abeli ge tsoatsoase. Kurigu ǃnân ge Noaxi, Abrahami, Saras, Moseb, Davib tsî ǀnî khoena nē “ǀhûǀguitimî-aon di ǀnanu i” ǀkha ge ǁhao. (Hebreǁîn 11:4–12:1) Khoe-i ga ǁnâuǃgâ ǃkhaib ai ǀhawioǃnâ khoe-e ǂnoaba, khami da ge sida tsîna ǁgui-aisase sida Elob ǃoa hâ amaba ǀunis kōse nî ǂanǂan.

Sida ge Jesuba ra ǁgae. Elobmîs ge ǁÎba “ǂgom-ǂgomsa tsî ama-ai ǀhûǀguitimî-aob” di ra ǂgai. (ǂHaiǂhais 3:14) Jesub ge aitsama ge mî “tsî ta ge ǁîna sa ǀonsa ge ǂanǂan” tsî “amaba ta nî ǃkhō-ambase.” (Johaneb 17:26; 18:37) ǁNā-amagan ge Jesub di saosabena Jehovab ǀonsa tani tsî ǁîsa ra ǂanǂan. Jehovab di ǀHûǀguitimî-aon ge nēsa ra dī.

• Elobmîs ôaǃnâ aona tae-i ǃaroma Jehovab di ǀHûǀguitimî-aon di ge ǂgaisen?

• Jehovab di ǀHûǀguitimî-aona mā ǁaeba xu ge tsoatsoa?

• Hama a mâǂoa hâ kai ǀHûǀguitimî-ao Jehovab diba?