1. Elobmîs kēbode tae-e ǁnâuǃās ǀkha ra huida?

TAE-E Jehovab khoen ǀkha ǀgūǁae nî i? Nē ǃereamsa da ge a hōǁkhā. Elobmîs kēbodi ge ǂhâǂhâsa xūn hîna ǀgūǁae nî ise īn tsî sada ra tsâǀkhan xa ra ǃhoa. ǀGui Elobmîs kēbos ge ǃgāsase ra mîba da ǃhūbaib ǀgaisa ǂgaeǂgui-aogu tae-e nî dīsa. Nē kēbos ge Danieli 12ǁî xoaǀgoras ǃnâ ra hō-e tsî ǀgam gaokha hîna ra ǃkham kha, ǀapas gaob tsî ǃkhapagas gaob tsîkha xa ra ǃhoa. ǃNāsa ǃâb nē kēbos dib ge ǀnai ge dīǀoaǀoahe. Nēs ǃaroma da ge a ǂgom ǁkhā nau ǃâb tsîn nî dīǀoaǀoahe ǃkhaisa.

2. Genesis 3:15 tsî ǂHaiǂhais 11:7 tsî 12:17 ǃnâ i ra ǁgauhe khami da Danieli kēbosa da ga ôaǃnâ o, taena ǂâis ǃnâ nî ūhâ?

² Danieli 11ǁî xoaǀgoras ǃnâ xoasa kēbosa ǁnâuǃās ǃaroma da ge nî mûǂan nē kēbos Elob khoena ra ǁnāǂam ǂhanuga ǃoa ra ǁnaeǁgausa. Tsî Elob ǁaes ǀoro ǃgôab khoen ǀguina ra kuruǂûi xawen ge ǃhūbaib ǃnâ ra ī xūn xa hoaǁae ra tsâǀkhahe. Tae-i ǃaromasa nēsa? ǁGâuab tsî ǁîb ǀkhab ai hâ khoen tsîn di ǃuru ǂâibasens ge Jehovab tsî Jesub tsîna ra ǃoaba khoen hoana hîkākāsa. (Khomai re Genesis 3:15 tsî ǂHaiǂhais 11:7; 12:17.) Danieli kēbos ge nau kēbodi Elobmîs ǃnâ hâ di ǀkha nî ǃgûǀhao. ǀNî Elobmîs ǃâga ǃoa da ge nî kō Danieli ǂkhanis kēbosa da ga ǁnâuǃā ǂgao o.

3. Tae-e da nē ǁkhāǁkhāǃâs tsî saoras tsîn ǃnâ nî ǃhoaǃgao?

³ Nē xūna ǂâis ǃnâ ūhâse da ge Danieli 11:25-39 sa nî ǃhoaǃgao. Mû da ge nî ǀapas gaob tsî ǃkhapagas gaob tsîn ge ham isa 1870ǁî kuriba xu 1991ǁî kurib kōse tsî da ge nî mû tae-i ǃaroma da ǀgui ǃâb nē kēbos diba da ra ǁnâuǃā ǀgausa nî ǀkharaǀkharasa. Saora ǁkhāǁkhāǃâs ǃnâ da ge Danieli 11:40–12:1 sa nî ǃhoaǃgao tsî da ge nî mû nē kēbos 1990ǁî kuriba xu tae-e Armagedons xa ra mîsa. Nē ǀgam ǁkhāǁkhāǃâra du ra ǁkhāǁkhāsen hîna “mâǃoaxa gaogu ǀams ǁaeb ǃnâ” di hâ boksisa ôaǃnâs ge nî ǃgâi. Xawe da ge ǂgurose nî ǂan nē ǀgam gaokha a ham ǃkhaisa.

ǀAPAS GAOB TSÎ ǃKHAPAGAS GAOB TSÎKHA ǂANǂÛIS

4. Mâ ǃnona xūna ǃoa da nî kō ǀapas gaob tsî ǃkhapagas gaob tsîna da ga ǂanǂûi ǂgao o?

⁴ Tsoatsoasa xu di ge ǀapas di gaob di hâ mîsa ǀapas Israeli di ǃâba gere ǂgaeǂgui ǂgaeǂgui-aoga ǃoa gere ǁnaeǁgau tsî ǃkhapagas di gao-aob ti hâ mîsa ǃkhapagas Israeli ǀkhab disa gere ǂgaeǂgui ǂgaeǂgui-aoga ǃoa. Tae-i ǃaroma da nēti ra mî? Daniela ge nē haisi-amsa hauba ǀhomǃgāb ge tae-e mîsa ǃoa kō re: “O ta ge tita nēsi go hā ǁnâuǃā kaitsi ta nî se ǁnan sa ǁaes ǂama ǀuni tsēdi ai nîra hāna.” (Dan. 10:14) Penkster 33ǁî kurib kōsen ge ǁnā ǁaeb Israelǁaes khoena ge Elob di khoe-i. Jehovab ge nēs khaoǃgâ ge ǃgāsa kai Jesub di ǂgomǂgomsa ǁkhāǁkhāsaben a ǁîb di khoe ǃkhaisa. Danieli 11ǁî xoaǀgoras ǃnâ xoamâisa kēbos ge Xristub di ǁkhāǁkhāsabena ǃoa ra ǁnaeǁgau tsî Israelǁaesa ǃoas ose. (ǃNǃkh. 2:1-4; Rom. 9:6-8; Gal. 6:15, 16) Tsî ǀnî hâ gaogu ge ǀapas tsî ǃkhapagas tsîn ǃnâ ge ǂgaeǂgui tsoatsoa. Tsî ǀnî hâ gaogu ge ǀapas gao-aob tsî ǃkhapagas gao-aob tsîn di ǃkhaide ge ū. Nē ǀkharaǀkharan ge hâ xawen ge ǀnî xūna ǁnāti ǀgui ge hâ ǀgara. ǂGurose, gaob ge Elob khoena ǃgomǃgâxa ǀgaub ǃnâ gere hâ-ū. ǀGamǁîsen, ge Elob khoen ǀkhan gere hâ ǀgaub ǃnâ ge ǁgau Eloban a ǃhuisa ǃkaisa. Tsî ǃnonaǁîse, nē ǀgam gaokha ge ǀgaib hîna kha ūhâ ǁkhāb ams-ai gere ǂnoagu.

5. Kaidisiǁî kuriba xu 1870ǁî kurib ǃnâs ǀapas tsî ǃkhapagas tsîna gaokha ge ūhâ i? ǁGuiǃā re.

⁵ Kaidisi kurigu khaoǃgân ge ama Xristeǁî ǀhaohâga ama tama Xristeǁîn xa ge ǀoa. ǁÎn ge ama tama ǂgomdi ǁkhāǁkhāde gere ǂgom tsî Elobmîs amaba ge ūǃoa tama hâ i. Xawe ǁnā ǁaeba xu 1870ǁî kurib kōseb ge Eloba ǃhūbaib ai ǀapeǂhomi-e ge ūhâ tama hâ i. Ama tama ǂgomdi ǀgâgu ge ǁhai tsî ama ǂgomsa ge ǂganam. (Mat. 13:36-43) Nēsa ǂansa tae-i ǃaroma a ǂhâǂhâsa? Kaidisiǁî kuriba xu 1870ǁî kurib kōse kha ge ǀapas gaob tsî ǃkhapagas gaob tsîkha noxoba gaon ase ge ǂnû tama hâ i. Elob khoen hîna kha nî ǁnāǂgaman ge ǁnā ǁaeb ai ge ǀkhai i.b Xawe 1870ǁî kurib khaoǃgâ da ge ǀapas tsî ǃkhapagas tsîra ǃaroma gaona ge hō ǁkha i. Nēsa da mati a ǂan?

6. Elob khoena ǁkhāba mâǁae nî ǂanǂûihe? ǁGuiǃā re.

⁶ 1870ǁÎ kuriba xun ge Elob khoena ge ǀhaoǀhaosen tsoatsoa. ǁNā ǁaeb ǃnâ ge is ge Charles T Russelli tsî ǀnî ǃgôab khoen tsîn ge Elobmîs ôaǃnâs ǁkhāǁkhāde a tsoatsoasa. ǃGâsab Russelli tsî ǁîb di sîsenǁare-aon ge Elobmîs ra mî khami Messiab di gaosib ams ai “daoba ge ǁâǁâ tamas ka io ǂhanuǂhanu.” (Mal. 3:1) Elob khoen ge ǁkhāba ge ǂansa. Elob khoena nî ǁnāǂam khoe-e ǁnāǁaeb ai ge hâ i? Saora xū-e ǃoa kō re.

ǀAPAS DI GAOBA A HAM?

7. Ham-e ge ǀapas di gao-i ǂguro torob kōse?

⁷ 1870ǁî kurib ǃnâb ge Britaina ǃnāsa ǂgaeǂguisa ǃhūbaib ai ge ūhâ i tsî ǀgaisa toroǃkham-aogu tsî xūn tsîna ge ūhâ i. Nē ǂhanub ge ǂkhari ǁnârob hîna nau ǃnona ǁnâga ra hîkākāb ase ge mûhe—Fransi, Spaini tsî Nederlands tsîna. (Dan. 7: 7,8). Tsî Britaini ge ǀapas gaob di ǃkhaib ǃnâ ǂguro torob nî tsoatsoas kōse ge ǂgaeǂgui. Nē ǁkhā ǁaeb ǃnâb ge Amerikab tsîna kai ǃâb ǃhūbaib diba ge ǂgaeǂgui tsoatsoa tsî Britaini ǀkha ǃgaeǀhaosa gere kuru.

8. Ham-e ǀuni tsēdi ǃnâ a ǀapas di gao?

⁸ ǂGuro torob ǁaeb ǃnâ kha ge Amerikab tsî Britaini tsîna gere sîsenǀhao tsîkha ge kaise ge ǀgaisa i. Britaini tsî Amerikab tsîkha ge ǀguiba ge sîsen tsoatsoa tsîkha ge ge ǀgaisa ǂhanu kai ǃhūbaib ǃnâ. Danieli ge kēbo khamib ge nē gaoba “kai tsî ǀgaisa toroǂnuwi-e” ge hō. (Dan. 11:25) ǀUni tsēdi ǃnâb ge ǀapas di gaoba a Britaini tsî Amerikab di gao.c Xawe ham-e ge ǃkhapagas di gao kai?

HAM-E A ǃKHAPAGAS DI GAO?

9. Mâ ǁaeb ǃkhapagas di gao-aoba ge oaǀkhī tsî Danieli 11:25 sa mati ge dīǀoaǀoahe?

⁹ 1871ǁÎ kurib ǃnân ge Russelli tsî ǁîb di sîsenǁare-aon tsîna Elobmîs ôaǃnâs ǀkha a tsoatsoa o, ob ge ǃkhapagas di gaoba ǁkhawa ge oaǀkhī. ǁNā kurib ǃnâb ge Otto Von Bismarcka ǃkharagagu ǃhūga ǀhaoǀhao tsî ǀgaisa ǂgaeǂguis hîna Germanib (Duitsland) ti ǂansaba ge tsoatsoa. William ǂgurob ge Germanib ǃnāga hâ ǀgui ǀkhariba gere ǂgaeǂgui.d Saora kurigu ǃnâb ge Germaniba ǃnāsa ǃâb ǃhūbaib diba ge ǂgaeǂgui tsoatsoa, Afrikab ǃhūgu tsî Pacific hurib ǃhūgu tsîna. Tsî Germanib ge Britaina ge mâǃoa tsoatsoa (Khomai re Danieli 11:25.) Germanib ge ǀgamǁîse ǃhūbaib ǃnâ a ǂgui toroǃkham-aoga ge ūhâ i. Germanib ge ǁîga torob ǃnâ ǁîn mâǃoa-aon ǃoa-ai ge ǃkham kai.

10. Danieli 11:25, 26 sa mati ge dīǀoaǀoahe?

¹⁰ Danieli ge ǁnāpaxū ge ǁnaeǁgau tae-i Germanib ǂgaeǂgui-aogu tsî toroǃkham-aogu ǀkha nî īsa. Elobmîs kēbos ge ra ǁgau ǃkhapagas gaob “mâhō tide” ǃkhaisa. Tae-i ǃaromasa nēsa? “ǁÎn nî ǂâide ǁîb ǃoagu ǂâiǂâisen xui-ao.” Tsî “ǁîb ǂûn dide ga ǂûgu ge ǁîba nîra khôa.” (Dan. 11:25, 26) Danieli tsēdi ǃnâ ǁnân hîna gaob di ‘ǂûn di ǃâdi xa tsî ǂau xûib xa’ gere ǂûn ge ‘gaob di’ omgu ǃnâ gere sîsen. (Dan. 1:5) Nē kēbosa ham-e ǃoa ra ǁnaeǁgau? Nē kēbos ge Germanib ti ǂam ǂgaeǂgui-aoga ǃoa ra ǁnaeǁgau.e Nē kēbos ge ǂhanub di ǁnās xa ǀgui ge ǃhoa tama hâ i xawe ǀapas gaob di torob di ǀamǂoas xas tsîna ge ǃhoa. ǃkhapagas gaob xa i ra ǃhoa o, o i ge ra mî: “Toroǂnuwis âb ge nî ra dâu i ǂam tsî ǂgui ǃgamhesan ge nî ra ǁnā.” (Dan. 11:26) ǂGuro torob ǃnâ mîmâihe i ge khamib ge Germanib di toroǃkham-aoga ge ‘dâubē-e’ tsî ǂguin ge ‘ge ǁnā.’ Nē torob ǃnân ge kaise ǂgui khoena ǃkharuge ǁaeb ǃnâ ge ǁō.

11. ǀApas gaob tsî ǃkhapagas gaob tsîkha tae-e ge dī?

¹¹ ǂGuro toroba ǃoa ge ǁnū xūna ǁguiǃās ǃnâs ge Danieli 11:27, 28 sa ǀapas di gaob tsî ǃkhapagas di gaob xa ra mî: “ǀGui tāb ǀguib tawa kha ge ǂhumiga nîra ǃhoa.” ǀApas di gaob nî ‘ǂgui ǃgâi xūna’ ǀhaoǀhaobasen tis tsîna i ge ra mî tsî nē xūn ge mîhe i ge khami ge ī. Germanib tsî Britaini tsîkha ge ǂkhîba kha ge ǂhāba hâ di ge mîbagu xawe nē mîdi ge ge ama tama hâ i torob ge 1914ǁî kurib ǃnâ a tsoatsoa o. 1914ǁÎ kurib ais ai ge hâ i kurigu ǃnâb ge Germaniba kaise ge ǃkhū tsî ǀgamǁîse ǃhūbaib ǃnâ ǃkhūhâ ǃhūb ase gere mâǂoa. Tsî Danieli 11:29, 30 ǃnâ i ra ǁgauhe khamib ge Germaniba ǃkhapagas di gaob ǀkha ǃkham tsî nēsa ge ǂoaǃnâ.

GAOGU GE ELOB KHOEN ǀKHA GERE ǃKHAM

12. ǂGuro torob ǃnâ kha ǀapas di gaob tsî ǃkhapagas di gaob tsîkha tae-e ge dī?

¹² 1914ǁÎ kuriba xu kha ge nē ǀgam gaokha gere ǃkhamgu tsî Elob khoen tsîna gere māǃoa. Aiǁgause, ǂguro torob ǃnâ kha ge Germanib di ǂhanub tsî Britaini di ǂhanub tsîkha Elob khoena gere māǃoa, torob ǃnân ge ǃâ tama hâ i ǃkhais ǃaroma. Tsî Amerikab di ǂhanub ge ǁnān hîna aoǁnâs sîsenni ǃnâ ǂgaeǂguisa gere ūna ǃkhōsis ǃnâ ge ū. Nē saoǃgons ge kēbos hîna ǂHaiǂhais 11: 7-10 ǃnâ a xoasasa ge dīǀoaǀoa.

13. 1930ǁÎ kurib tsî ǀgamǁî torob ǁaeb ǃnâb ǀapas di gaoba tae-e ge dī?

¹³ 1930ǁÎ kurib ǃnâ ǀgamǁî torob ǁaeb ǃnâb ge ǀapas di gaoba Elob khoena ǀkhoma ǁgau tamase gere ǁnāǂam. Nazi’s ǂgaeǂguis ge Germaniba ū o, ob ge Hitlera Elob khoen sîsen-e dīhesa ge ǂkhā. Nē māǃoa-aon ge 1500 xa a ǃnāsa Jehovab di khoena ge ǃgam tsî ǂguina ǃkhō-omde ǃoa ge sî. Nē xūn hoan ge Danieli kēbos ǃnâ ge kēbohe. ǀApas di gaob ge “ǃanusiba nî ra ǀuriǀuri” tsî “tsēkorobe ǁguibasa nî ra ūbe” tsî nēs ǃnâ-ū Elob khoena Jehovab ǀonsa khaikhaisa nî ra ǀamǀam kai. (Dan. 11:30, 31) Hitleri, Germanib di ǂgaeǂgui-aob tsîn ge ge mîmâi Elob khoenab Germaniba xu nî ǃgam ǂûi ǃkhaisa.

ǀASA GAOBA ǀAPAS ǃAROMA

14. Ham-e ge ǀapas di gao kai ǀgamǁî torob khaoǃgâ? ǁGuiǃā re.

¹⁴ ǀGamǁî torob ǁaeb ǃnâb ge ǂhanub hîna Soviet Unions ǂgaeǂguis ǃnāga ge hâ iba Germaniba ǃkhōsis ǃnâ ū tsî ge ǀapas di gao kai. Soviet Unions ǂhanub ge ǃnāsa ǃâgu hîna ge Germanib di i ga ge ǂgaeǂgui tsoatsoa. Nazis ǂhanub ge Elob khoena gere mâǃoa khamis ge Soviet Unions ǂhanuba ǁnān hîna Elob ǂâisa gere dīna gere mâǃoa.

15. ǀGamǁî torob ge toas khaoǃgâb ǀapas di gaoba tae-e ge dī?

¹⁵ ǀGamǁî torob ge toas khaoǃgâb ge ǀapas di ǀasa gaob Soviet Unions diba Elob di khoena ge ǁnāǂam tsoatsoa. ǂHaiǂhais 12:15-17 ǃnâ hâ kēbosa ra dīǀoaǀoaseb ge nē ǂhanuba aoǁnâs sîsenna ge ǀamǀam kai tsî ǂgui ǃoaba-aon Jehovab dina ǃkhōsisa ǃoa ge sî. Tsî ǀuni tsēdi ǃnâb ge ǀapas di gaoba ǁgâiǀāb ‘ǃāba’ Elob khoen ǃoa ai ge ǁkhowa-am, ǁîn di sîsenna ǀam kaisan da dītsâ xawen dīhō tama hâ hîna.f

16. Soviet Unionsa mati Danieli 11:37-39 ǃnâ hâ kēbosa ge dīǀoaǀoa?

¹⁶ Khomai re Danieli 11:37-39. Nē kēbosa dīǀoaǀoahes ǃaromab ge ǀapas di gaoba ‘elogu ǁîb îgu diga ge ǃgôaǃgâ’ tama hâ i. Tae-i ǃaromasa nēsa? Soviet unions ge hoaraga ǂgomde gere hîkākā ǂgao tsî nēs ǃaroma ǀgaisa ǃhaoǃnâbe ǂgom ǀgauga gere ǁnāǂam. Nēsa dīǀoaǀoas ǃaromab ge Soviet unions ǂhanuba 1918ǁî kurib ǃnâ ǀnai ge mîmâi i gu skolga Atheist ǂgoms xa ǀgui ǁkhāǁkhā. Matib ge ǀapas di gaoba elob ǀgaib diba ǁîb “mâ ǃkhais” ai ǃgôa? Soviet Unions ge kaise ǂgui mari-e ge sîsen-ū toroǃkham-ū xūna ǀhaoǀhaobasen tsî ǀgaiba omkhâibasens ǃnâ. ǀApas gaob tsî ǃkhapagas gaob tsîkha hoakha ge ǂâusa ǃkham xūna ge ǀhaoǀhaobasen ǂgui ǃgôab khoena ǃgams di ǂâibasens ǀkha.

NĒ ǀGAM GAOKHA GE GERE SÎSENǀHAO

17. ‘ǁGaidib hîǀhurusa’ ra ǃaromaba a ham?

¹⁷ ǀApas di gaob ge ǃkhapagas di gaoba ǀgui ǂhâǂhâsa ǃaromas amsi ǀgui gere hui. ǁÎkha ge “ǁGaidib hîǀhurus diba nî ra mâi.” (Dan. 11:31) Nē “ǁgaidib” ge a United Nations.

18. Tae-i ǃaromas United Nationsa “ǁgaidib” di ra ǁguiǃāhe?

¹⁸ United Nations ǀapeǂhumis di “ǁgaidib” ge ra ǁguiǃāhe. Nē ǀapeǂhumis Elob Gaosib ǀguib a dīǁkhā xū-en nî dī ti ra mî amaga—ǃhūbaiba ǂkhîba haubasa. Tsî kēbos ge ra mî ǁgaidib ‘hîǀhurusa’ nî ra ǃaroma ǃkhaisa. United Nations ama tama ǂgomde hîkākās ǃnâ kai ǃâ-e nî ūhâ amaga.​—“Mâǃoaxa gaogu ǀams ǁaeb ǃnâ” di hâ boksisa mû re.

TAE-I ǃAROMA DA NĒ XŪNA NÎ ǂAN?

19-20. (a) Tae-i ǃaroma da nē da go ǃhoaǃgao xūna nî ǂan? (b) Mâ dîsa da sao ra ǁkhāǁkhāǃâs ǃnâ nî ǃhoaǃgao?

¹⁹ Nē xūna da ge nî ǂan 1870ǁî kuriba xu 1990ǁî kurib kōses Danieli ǂkhanisa kēbodi ǀapas di gaob tsî ǃkhapagas di gaob tsîkha xa hâ xūn dide ra dīǀoaǀoa ǃkhais ǃaroma. Tsî nēs ge nî hui da ǂgomǃgâsiba ūhâsa ǃgau hâ ǃâb nē kēbos dib nî ama kai ǃkhaisa.

²⁰ 1991ǁÎ kurib ǃnâs ge Soviet Unionsa ge ǁnā. Ham-e nētsē a ǀapas di gao? Sao ra ǁkhāǁkhāǃâs ge nēsa nî ǃhoaǃgao.

1-2. Tae-e da nē ǁkhāǁkhāǃâs ǃnâ nî ǃhoaǃgao?

KAISE i ge a ǃgāsa ǀunis ǁaeb ǃnâ da ûi hâ ǃkhaisa. ǀGū ǁae kha ge Jehovab tsî Jesub Xristub tsîkha ǂhanugu hîna ǁîkha Gaosib ǃoa-ai ra ǃkhamga nî hîkākā. Nēs nî īs aiǃâ kha ge ǀapas gaob tsî ǃkhapagas gaob tsîkha ǁîkha ǁaegu tsî Jehovab khoen ǀkhas tsîna nî ǃkham.

² Nē ǁkhāǁkhāǃâs ǃnâ da ge Danieli 11:40–12:1 ǃnâ hâ kēbosa nî ǃhoaǃgao. Nētsē ǀapas gao-aob ase ra ǂgaeǂgûi gaoba da ge nî ǂanǂûi tsî da ge tae-i ǃaroma da ǃnomsase nî hâ tsî Jehovab ǃnâ nî ǂgomǃgâ ǃkhais tsîna nî ǃhoaǃgao.

ǀASA GAOB ǀAPAS DIB

3-4. Ham-e nētsē a ǀapas di gao? ǁGuiǃā re.

³ Soviet Unions ge 1991ǁî kurib ǃnâ ǁnā o, on ge Elob khoena ‘ǂkhari huiroba’ ge hō​—ǃnorasasib ǁaeba. (Dan. 11:34) Nēs xa ǃaroma-e hâsen ge ǂgui ǃgâsana Soviet Unions ǃnāga gere ǁnā ǃhūgu ǃnâ ge aoǁnâ ǁkhā i tsîn ge ǂgui aoǁnâ-aona ǁnā ǃhūgu ǃnâ ge ǀoa. Xawe kurin khaoǃgâb ge Russiab tsî ǁîba ra ǂkhāǃnâ ǃhūgu tsîna ge ǀapas di gao kai. ǃKharugo ǁkhāǁkhāǃâs ǃnâ da go ǃhoaǃgao khamib ge ǂhanuba ǃnona xūna nî dī, ǀapas di gaob tamas ka io i ga ǃkhapagas di gao kai ǂgao o: (1) Elob khoena ra ǁnāǂam, (2) ǁîn dīgu ǃnâ-ū nî ǁgau Jehovab tsî ǁîb ǃoaba-aon di mâǃoa-aon a ǃkhaisa tsî (3) nau gaob ǀkha nî mâǃoagu.

⁴ Saora di ge ǀnî hâ ǃaromade mîba ǁkhā da a de, tae-i ǃaroma da ra mîsa Russiab tsî ǁîba ra ǂkhâǃnâ ǃhūgu tsîn nētsē a ǀapas di gao-ao ǃkhaisa. (1) Elob khoena ra ǁnāǂam, aoǁnâ sîsenna ǀam kais tsî ǂgui ǃgâsan hîna ǂkhâǃnâ ra ǃhūgu ǃnâ hâna ǃkhōsis ǃnâ ra ǂgā. (2) Nē dīgu ge ra ǁgau Jehovab tsî ǁîb ǃoaba-aon di mâǃoa-aon a ǃkhaisa. (3) ǃKhapagas gaob ǀkhan ge ra mâǃoagu, Britaini tsî Amerikaba. Hā re i da kō Russiab tsî ǁîba ra ǂkhâǃnâ ǃhūgu tsîn tae-e ge dīsa tsî tae-i ǃaroma da a ǂgom ǁkhā ǃkhaisa ǁîb a ǀapas di gao-ao ǃkhaisa.

ǀAPAS TSÎ ǃKHAPAGAS TSÎKHA DI GAOKHA GE MÂǃOAGUS ǀKHA RA AIǃGÛ

5. Danieli 11:40-43 sa tae-e ra ǃhoaǃgao tsî tae-e nē ǁaeb ǃnâ nî ī?

⁵ Khomai re Danieli 11:40-43. Nē ǃâb kēbos dib ge ǀunis ǁaeb xa hoaraga ǃgāsasiba ra mā. Nēba i ge ra ǁgûiǃā mati kha ǀapas di gaob tsî ǃkhapagas di gaob tsîkha ra mâǃoagu ǀgausa. Danieli kēbos ǃnâ i ra ǁgau-e khamib ge ǀams ǁaeb ǃnâ ǃkhapagas di gaoba ǀapas di gaoba nî mâǃoa tsî ‘ǁnâgu ǀkha nîra ǃkhāgu.’​—Dan. 11:40.

6. Tae-e ra ǁgau nē ǀgam gaokha ǁnâgu ǀkha ra ǃkhāgu tamas ka io ra ǂhāgu ǃkhaisa?

⁶ ǀApas tsî ǃkhapagas di gaokha ge noxoba ra mâǃoagu, mâb hoab ra ǃhūbaib di ǀgaisa gao kai ǂgoa amaga. ǀGamǁî torob khaoǃgâs ge Soviet Unionsa Europi di ǃnāsa ǃâga ge ǂgaeǂgui tsoatsoa o i ge tae-e isa ǃoa kō re. Nēs ǃaromab ge ǃkhapagas di gaoba ge mîǁgui nau ǃhūgu ǀkha sîsen ǀhao tsîb ǀapas di gaoba nî ǁnāǂamsa. Nē ǀapeǂhumis ge NATO di a ǂansa. ǀApas di gaob tsî ǃkhapagas di gaob tsîkha hoakha ge ǂgui mari-e ge sîsen-ū ǀgaisa toro ǂnūbide oms ǃaroma. ǀApas gaob ge Afrikab, Asiab tsî Latin Amerikab tsîna ra sîsen-ūse ǃkhapagas di gaob ǃoa-ai gere ǃkham. Russiab tsî ǁîb ǀkha ra sîsen ǀhao ǃhūgu ge ǃhūbaib ǂhawase kai ǀgaiba ūhâ. ǁÎn ge komputerdi ǃnâ-ū ǃkhapagas di gaoba ra ǁnāǂam. ǁÎkha ge komputerdi ǃnâ-ū mariǁhōgu tsî ǂgîǂgōsi ǁaxasigu ǁîkha dina ra ǁnāǂam di ra ǂgari-amgu. Danieli ge kēbo khamib ge ǀapas di gaoba Elob khoena ra ǁnāǂam.​—Dan. 11:41

ǀAPAS DI GAOB GE “ǃHŪB ÎSASIB DIB ǃN” RA ǂGÂ

7. “ǃHūb îsasib” diba a tae?

⁷ Danieli 11:41 ge ra mî ǀapas di gaob ge “ǃhūb îsasib dib ǃnâ” nîra ǂgâ di. Nē ǃhūba a tae? ǃKharu gere ǁaegu ǃnâs ge Israelǁaesa ‘ǃhūgu hoagu xa a ǂkhaisa’ ǃhūb ǃnâ ge ǁan hâ i. (Ese. 20:6) Xawe ǃhūba gere mâǂoa kai ǃkhais ge, nē ǃhūb ǃnâs ge ama ǂgomsa gere aiǃgûsa. 33ǁÎ kurib di pinkstertsēsa xub ge ‘ǃhūba’ ǀgui ǃâb ǃhūbaib diba ǃoa ǁnaeǁgau tama hâ, Jehovab khoen ǃhūbaib ǂhawase ǁan hâ amaga. Xawe “ǃhūb îsasib dib” ge Jehovab khoen nētsē ra dī sîsen-e ǃoa ra ǁnaeǁgau. Nēs ge ǀhaodi tsî aoǁnâ sîsen-i hîna Jehovaba ǃoabas ǃnâ ra dī-e na ǃkhōǂgā hâ.

8. ǀApas di gaoba mati “ǃhūb îsasib dib” ǃnâ ge ǂgâ?

⁸ ǀUni tsēdi ǃnâb ge ǀapas di gaoba ǂgui ǃnâde “ǃhūb îsasib dib” ǃnâ ge ǂgâ. Aiǁgause, Nazi Germanib ge ǀapas di gao i o, ob ge “ǃhūb îsasib dib” ǃnâ ge ǂgâ, Elob khoenab ge mâǃoa tsî gere ǃgam o. ǀGamǁî torob khaoǃgâs ge Soviet Unionsa ǀapas di gao kai o, os ge “ǃhūb îsasib dib” ǃnâ ge ǂgâ, Elob khoena mâǃoa tsîs ge ǁîn omde xu gere ǂoa kai nî o.

9. Russiab tsî ǁîba ra ǂkhâǃnâ ǃhūga mati “ǃhūb îsasib dib” ǃnâ ge ǂgâ?

⁹ Russiab tsî ǁîba ra ǂkhâǃnâ ǃhūgu tsîn ge “ǃhūb îsasib dib” ǃnâ ge ǂgâ. Matin nēsa ge dī? 2017ǁÎ kurib ǃnâb ge Russiaba Jehovab khoen sîsen-e ǀam kai tsî ǀnî ǃgâsana ǃkhōsis ǃnâ ge ū. Tsîb ge sida ǂkhanin tsî New World Translation Elobmîsa mâǂguisa ge ǀam kai. Saorasen ge ǁnâub beros, gaosib ǀhû-omgu tsî kai ǀhaodi ra ūhâ ǃnâ-e ǃkhaiga ge ǂgan-am. Nē xūn ge īs khaoǃgâs ge ǂgaeǂguira sorosa 2018ǁî kuri ge mî, Russiab tsî ǁîba ra ǂkhâǃnâ ǃhūgu a ǀapas di gao ǃkhaisa. Jehovab khoen ge kai ǁgaiban ra hō xawe ǂhanuba mâǃoa tamas ka io ǀkharaǀkhara ǂgao tama hâ. Xawe Elobmîs dauǁgaude sao tsî ‘ǀgapise mâgu hoaga’ ra ǀgoreba, ǃgōsase sada ǃnōrasasiba ra tsâǀkhā mîmâina gu ra dī ǁaeb ai.​—1Tim. 2:1, 2.

ǀAPAS GAOBA ǃKHABAGAS GAOBA NÎ HÎKĀKĀ?

10. ǀApas gaoba ǃkhabagas gaoba nî hîkākā? ǁGuiǃā re.

¹⁰ Danieli 11:40-45 ǃnâ hâ kēbos ge ǀapas gaob xa ǃnāsase ra ǃhoa. Nēsa ra ǂâibasen ǁîb ǃkhapagas gaoba nî hîkākā di? Hî-î. ǃKhapagas gaob ge noxoba nî ‘ûitsâma’ Jehovab tsî Jesub tsîkha ga ǃhūbaib di ǂhanuga Armagedons ai a hîkākā ǁaeb ǃnâ. (J.ǂHa. 19:20) Tae-i ǃaroma da nē ǂgomǃgâsiba ūhâ? Hā re i da Danieli tsî ǂHaiǂhais tsîra kēbode ǃoa kō.

11. Danieli 2:43-45 sa tae-e ra ǁgau? (Tsoatsoas ai hâ ai-īsiba mû re.)

¹¹ Khomai re Danieli 2:43-45. Danieli kēbos ǃnâ ra ǁguiǃāhe ǂhanugu ge ǃkharagagu ǂhanugu hîna Elob khoena ra ǁnāǂam ga. ǁÎgu ge ǃkharagagu ǃâgu kai ai-īsib digu ai ra ǁguiǃāhe. ǀUniga ǂhanub hîna ra ǁguiǃā-eb ge ǂgoab tsî ǂnūǀuriba xu kurusa ǂaidi dawa ra ǁgau-e. ǂAidi ge Anglo-American World Power ǂgaeǂguisa ra ǂnûǁkhaeba. Nē kēbos ge ra ǁgau Anglo-American World Power ǂgaeǂguis Elob ga ǃhūbaib ǂhanuga hîkākā tsoatsoa ǁaeb ai noxoba nî mâsa.

12. Hû danade ūhâ ǀguruba tae-e ra ǂnûǁkhaeba tsî nēsa tae-i ǃaroma a ǂhâǂhâsa?

¹² Apostel Johaneb tsîn ge ǃkharagagu ǂhanugu hîna Elob khoena ra mâǃoagu xa gere ǃhoa. ǁÎb ge nē ǂhanuga hû danade ūhâ ǀurub ase ge ǁguiǃā. Nē ǀgurub hîna hû danade ūhâb ge Anglo-American World Power ǂgaeǂguisa ǃoa ra ǁnaeǁgau. Nēs ge kaise a ǂhâǂhâsa nē ǀgurub ǀnî hâ dana-e hō tama amaga. Nē hû danade ūhâ ǀgurub ge Xristub ga ǁîb di ǀhomsi ǂnubis ǀkha hîkākā tsoatsoa ǁaeb ai noxoba nî ǂgaeǂgui tsî nau ǀgurugu ǀkha nî hîkākāhe.b​—J.ǂHa. 13:1, 2; 17:13, 14.

ǀAPAS GAOBA ǀGŪǁAE TAE-E NÎ DĪ?

13-14. “Gogi, ǃhūb Magogi” diba a ham tsî tae-i ǃaromab Elob khoena nî ǁnāǂam?

¹³ Esegieli ǃnâ xoasa kēbos ge ǃgāsasiba ra mā da, tae-i ǀapas gaob tsî ǃkhapagas gaob ǀkha ǀams ǁaeb ǃnâ nî īsa. Saora kēbo di hîna Esegieli 38:10-23; Danieli 2:43-45; 11:44–12:1 tsî ǂHaiǂhais 16:13-16, 21 ǃnâ hâ di ǀgui xū-i xa ra ǃhoa di da ga ǂâi o, o da ge saora xūna a ǃâubasen ǁkhā.

¹⁴ ǁAe-e kai ǁgâiǀāb tsoatsoa hâs khaoǃgâ gu ge ‘ǃhūbaib di gao-aoga’ khoena nî ǀhaoǀhao ǂnubisa oms ǃaroma. (J.ǂHa. 16:13, 14; 19:19) “Gogi, ǃhūb Magogi” dis Elobmîsa ra ǂgai ǂnubis ge nēsa. (Ese. 38:2) Nē ǂnubis khoen ge Elob khoena ǁnāǂam tsî nî hîkākā ǂgao. Tae-e nē ǁnāǂamsa nî ǃaroma? Nē kēbos xa ra ǃhoaseb ge apostel Johaneba ge mî kai ǃnaredi ǀhomma xu Elob di khakhoen ai nî ǁnā di. Nē ǃnaredi ge ǀnîsi kaise ǁkhōǁkhōsa haisi-ams hînan Jehovab khoena nî aoǁnâse isa ǃoa a ǁnaeǁgau ǁkhā. Nē haisi-ams ge Gogi, ǃhūb Magoga a ǃkhāǃkhā ǁkhā tsîb ge Jehovab khoena ǁnāǂam tsî nî hîkākā ǂgao.​—J.ǂHa. 16:21.

15-16. (a) Danieli 11:44, 45 ǃnâ hâ mîde tae-e ǃoa a ǁnaeǁgau ǁkhā? (b) Tae-e ǀapas gaob tsî Gogi, ǃhūb Magoga ra kuruǂui ǁaedi ǀkha nî ī?

¹⁵ Nē ǁkhōǁkhōsa haisi-ams tsî Elob khoen ǁnāǂams hîna Danieli 11:44, 45 ǃnâ ra ǃhoaǃgaohes ge ǀgui xū-e ǃoa a ǁnaeǁgau ǁkhā. (Khomai re.) Danieli ge ge mî “gomgu aiǂoasa xu tsî ǀapasa xu ra hāgu” ǀapas gaoba nîra ǃhuriǃhuri ǃkhaisa hîna “kai” ǁaib ǃnâ hâba. ǀApas di gaob ge “ǀoasanab nî hîkākā tsî ǀâxarese” ra ǀape. ǁNān hîna ‘ǀoasa’ tamas ka io ǂguin ge Jehovab khoena ǃoa ra ǁnaeǁgau.c Danieli ge nēpa Elob khoen di ǁnāǂamsa ǃoa a ǁnaeǁgau ǁkhā.

¹⁶ ǀApas di gaob tsî ǃhūbaib ǂhanugu tsîn ga Elob khoena ǁnāǂam o, ob ge Eloba nî ǁaixa tsîb ge Armagedons toroba nî tsoatsoa. (J.ǂHa. 16:14, 16) ǀApas gaob tsî nau ǁaedi hîna Gogi, ǃhūb Magoga ra kuruǂuidi ge nî hîkākāhe tsîb ge “hui-ao-i xare-e ūhâ tide.”—Dan. 11:45.

17. Danieli 12:1 ǃnâ ra mîhe Mixaeli, ‘kai gaoba’ a ham tsî tae-eb ra dī?

¹⁷ Sao ra xoaǀgoras ge nēs ai ǃnāsa ǃgāsasiba ra mâ matib ǀapas di gaob tsî ǁîba ra ǂkhâǃnâ khoen tsîna nî hîkākāhe ǀgausa ra ǁgauba. (Khomai re Danieli 12:1.) Nē xoaǀgorasa tae-e ra ǂâibasen? Mixaeli ge ǀnî hâ ǀonsa sada Goa-aob Xristub Jesub disa. ǁÎb ge ǁaes “dina” ra ǂnûǁkhaeba 1914ǁî kurib ge ǀhomsi Gaosiba a tsoatsoasa xu. ǀGūǁaeb ge “nîra khâi” tsî Armagedons tawa Elob khākhoena nî hîkākā. Nē ǁnāǂams ge nî ǀuniga ǁnāǂam i hînab Daniela “ǂōǂōsib” ǁaeb dira ǂgâiba. Johaneb kēbos hîna ǂHaiǂhais ǃnâ a xoasas ge nē ǁaeba ‘kai ǁgâiǀāb’ di ra ǂgâi.​—J.ǂHa. 6:2; 7:14.

SADU ǀONSA “ǂKHANIS ǃNÂ XOAHE” I NÎ?

18. Tae-i ǃaroma da hanîǁaeba ǃnomsasib ǀkha a ǃâubasen ǁkhā?

¹⁸ Danieli tsî Johaneb tsîkha hoakha ge ge mî Jehovab tsî Jesub tsîkha ǁîkha ra ǃoaba khoena kai ǁgâiǀāb ǃnâ nî sâusa. Nēs ǃaroma da ge ǃnomsase nî hâ, tae-i ǀgui i ga i xawe. Danieli ge ra mî ǁnān hîna ra ûiǃkharun ǀondi ge “ǂkhanis ǃnâ xoahe” hâ. (Dan. 12:1) Tae-e da nî dī i di sida ǀonde ǁnā ǂkhanis ǃnâ xoamâihe? ǁGau da ge nî Elob ǁKhaub, Jesub ǃnâ da ra ǂgomsa. (Jhn. 1:29) Sida ûiba da ge Eloba mā tsî nî ǁāǁnâ kaisen. (1Pet. 3:21) Tsî da ge khoena Jehovab xa ǁkhāǁkhās ǃnâ-ū Elob Goasiba nî ǂkhâǃnâ.

19. Tae-e da nēsi nî dī tsî tae-i ǃaroma?

¹⁹ Nēb ge a ǁae sada Jehovab tsî ǁîb ǀapeǂhumis ǃnâ ǂgomǃgâsiba nî omkhâisa. Nēsi da ge Elob Gaosiba nî ǂkhâǃnâ. Nēsa da ga dī o, o da ge ǀapas tsî ǃkhapagas gaokha ga Elob Gaosib xa hîkākāhe o, o nî sâuhe.

Kēbodi hîna nēba ra ǁguiǃāhe di ge ra saogu. Tsî ǂgui ǀgaugu ǃnâ ra ǁgau ‘ǀuni tsēdi’ ǃnâ da ûi hâ ǃkhaisa. —Dan. 12:4.

• 

  

  Xoadi J.ǂHa. 11:7; 12:13, 17; 13:1-8, 12

  Kēbos “ǀGurub” ge ǃhūbaib ai hâ khoen ǂama 3 000 xa ǃnāsa kuriga gere ǂgaeǂgui. Nē ǁaeb ǃnâb ge hûǁî danas ǀgurub disa ra tsûtsûhe. Egas ge danasa ra ǂuru tsîb ge ‘ǃhūbaib hoaba’ ǀguruba buru hâse gere sao. Satanni ge ǀguruba ra sîsen-ū îb ‘ǃanun ǀkha torodī.’

  Dīǀoaǀoas ǁGammi dâus khaoǃgâ gu ge ǂhanuga Elob khoen ǂama ge ǂgaeǂgui tsoatsoa. 3 000 Kurin xa ǃnāsa ǁaeb ǃkharu hâseb ge ǀgaisa ǂhanub hîna Britaini di ǂansaba ǁîb ǀgaiba ǂguro torob ǃnâ ge ǂoaǃnâ. ǁÎb ǀgaibab ge ge hō-oa Amerikab ǀkhab ge sîsen ǀhao tsoatsoa o. ǀUnis ǁaeb ǃnâb ge Satanna hoa ǂhanugu hîna ǃhūbaib ai hâga ra sîsen-ū Elob khoena mâǃoas ǃnâ.

• 

  Xoas Dan. 11:25-45

  Kēbos ǀUnis ǁaeb ǃnâ kha ge ǀapas gaob tsî ǃkhawagas gaob tsîkha ǀgaib ǃaroma ra ǃkham.

  Dīǀoaǀoas Germanib ge Britaini tsî Amerikab tsîkha ǃoa-ai ra ǃkham. 1945ǁÎ kurib ǃnâs ge Soviet Unions tsî ǁîsa ra ǂkhâǃnâ ǃhūgu tsîna ge ǀapas di gao kai. 1991ǁÎ kurib ǃnâs ge Soviet Unionsa ǁîs ǀgaiba ge ǂoaǃnâ tsîb ge Russiab tsî ǁîba ra ǂkhâǃnâ ǃhūgu tsîna ge ǀapas di gao kai.

• 

  Xoadi Jes. 61:1; Mal. 3:1; Luk. 4:18

  Kēbos Jehovab ge ǁîb di haisi am-aoba ra “sî” îb daoba ǃgâiǃgâi-e Mesiab Gaosib nî tsoatsoas aiǃâ. Haisi am-aon ge ‘ǃgâiǂhôasa aoǁnâs’ ǀkha ra aiǃgû.

  Dīǀoaǀoas 1870ǁÎ kurib tsoatsoas ǃnâb ge C. T. Russelli tsî ǁîb sîsen ǁare-aona Elobmîs amaba gere ǁguiǃā. 1880ǁÎ kurib ǃnân ge ge mûǂan aoǁnâ sîsenni Elob khoen amsi kaise a ǂhâǂhâsasa. ǁÎn ge sao ra xoaǂamde ūhâ ǂkhaniga ge ǁgâi “Wanted 1 000 Preachers” tsî “Anointed to Preach.”

• 

  Xoadi Mat. 13:24-30, 36-43

  Kēbos Khoeb ge ǃhoroba ra ǂgā. Mâǃoa-aob ge ǀgâga ǃhorob ǁaegu ra ǂgā. ǀGâgu ge kai tsî ǃhoroba ra ǁgâiǀā. ǃGaos ǁaeb aib ge ǀgâba ǃhoroba xu ra ǀgorahe.

  Dīǀoaǀoas 1870ǁÎ kurib tsoatsoas ǃnâb ge ama ǂgoms tsî ama tama ǂgoms tsîn ǁaegu hâ ǃkharagagusiba ge mûhe ǁkhā i. ǀUnis ǁaeb ǃnân ge ama Xristeǁîna ǀhaohâgu ǃnâ ra ǀhaoǀhaohe tsî ama tama ǂgomsa xu ra ǀgorahe.

• 

  Xoadi Dan. 2:31-33, 41-43

  Kēbos ǂGoab tsî ǂnūǀuriba xu kurusa ǂaidi ge ǃkharagagu xūn ǀkha kurusa ai-īsib di ǃâ.

  Dīǀoaǀoas ǂGoab ge hoaǃnâ-aixa khoena ra ǂnûǁkhaeba hîna Britaini tsî Amerikab tsîkha xa ra ǂgaeǂguihena xawe nē ǂhanukha ra mâǃoana. Nēs ǃaroma kha ge ǂhanukha ǁîkha di hoa ǀgaiba a sîsen-ū ǁoa.

• 

  

  Xoadi Mat. 13:30; 24:14, 45; 28:19, 20

  Kēbos ‘ǃHorob’ ge “sâu-ommi” ǃnâ ra ǀhaoǀhaohe tsîb ge “ǂgomǂgomsa tsî gā-ai ǃgāba” “oms” ǂama ra mâihe. “ǃGâiǂhôas gaosib” dis ge “ǃhūbaib hoab” ai nîra aoǁnâhe.

  Dīǀoaǀoas 1919ǁÎ kurib ǃnâb ge ǂgomǂgomsa ǃgāba Elob khoen ǂama ge mâihe. ǁNā ǁaeba xun ge Elobmîs ôaǃnâ aona ǀgaisase ge aoǁnâ tsoatsoa. Nētsēn ge Jehovab di ǀHûǀguitimî-aona 200 ǃhūgu ǃnâ 1 000 gowagu ǃnâ Elobmîs ai ǃgaoǃgaosa ǂkhanina ra māǂui.

• 

  Xoadi Dan. 12:11; J.ǂHa. 13:11, 14, 15

  Kēbos ǀGam ǁnâkha ūhâ ǀgurub ge ǃhūbaib ai hâ khoena ra mîba în ‘ǀgurub di ība’ ‘ǁkhawa ûiba’ mā.

  Dīǀoaǀoas Britaini tsî Amerikab tsîkha ge League of Nationsa ra tsoatsoa. Nau ǃhaodi ge nē ǂhanuba ra ǁhao. 1926ǁÎ kuriba xu 1933ǁî kurib kōseb ge ǀapas di gaoba ge League of Nations ǃâ i. Khoen ge ra ǂgom United Nations (UN) ǃhūbaiba ǂkhîba nî hauba di, nē ǂkhîb Elob Gaosib xa ǀgui a hauhe ǁkhā hîna.

• 

  

  Xoas Dan. 8:23, 24

  Kēbos ǃGaoroxa gaob ge nî khâimâ hîna ‘buruxase nîra hîǀhuruba.’

  Dīǀoaǀoas Britaini tsî Amerikab tsîkha ge kaise ǂgui khoena ǃgam tsî ǁgaoǁgaosiba ge ǃaroma. Aiǁgause, ǀGamǁî torob ǃnâb ge Amerikaba Britaini tsî ǁîb ǃoa-ai ge khâi ǂhanuba kaise ǁkhōǁkhōsa bomdi ǀkha ge hîgāgā. Nē bomdi ge kai ǂkhôaba ge ǃaroma.

• 

  Xoadi Dan. 11:31; J.ǂHa. 17:3, 7-11

  Kēbos Disi ǁnâga ūhâ “skarlakǀapa” ǀgurub ge abisuǂgâba xu ra ǂoaxa tsî ǁîb ge a ǁkhâisaǁî gao. Danieli ǂkhanis ge nē gaob xa ra mî “ǃanusiba nîra ǀuriǀuri” di.

  Dīǀoaǀoas ǀGamǁî torob ǁaeb ǃnâb ge League of Nationsa ge ǀam. Torob khaoǃgâs ge UN sa ge ‘mâihe’. UNs ge League of Nations khami ǀgui ī tsî Elob Gaosib nî hō khoasa ra ūbasen. UNs ge ama tama ǂgomde nî ǁnāǂam.

• 

  

  Xoadi 1Tes. 5:3; J.ǂHa. 17:16

  Kēbos ǃHaodi ge “ǂkhîb ge hâ tsî tsūǃgâ-i a ǀkhai” di nî mî tsîgu ge “disi ǁnâgu” tsî “ǀgurub” tsîna “ǀai-aosa” ǁnāǂam tsî nî hîkākā. Nēs khaoǃgâ di ge ǃhaode nî hîkākāhe.

  Dīǀoaǀoas ǃHaodi ge nî mî ǂkhîb ge hâ tsî tsūǃgâ-i a ǀkhai di. UN sa ra ǂkhâǃnâ ǃhūgu ge ama tama ǂgomde nî ǁnāǂam. Nēs ge nî kai ǁgâiǀāb di tsoatsoa i. Nē ǁnāǂams ge Jesub ga ǃgau hâ ǃâb Satanni ǃhūbaib diba Armagedons tawa hîkākā o, o nî ǀam.

• 

  Xoadi Ese. 38:11, 14-17; Mat. 24:31

  Kēbos Gogi ge Elob khoena ra ǁnāǂam. ǀHomǃgāgu ge ‘ǂkhauhesana’ ra ǀhaoǀhao.

  Dīǀoaǀoas ǀApas gaob ge ǃhūbaib ǂhanugu hoagu ǀkha sîsen ǀhao tsî Elob khoena ra ǁnāǂam. Nē ǁnāǂams khaoǃgân ge ǂkhauhesa ǃgâsan hîna ǃgau hâna ǀhomma ǃoa nî ǀhaoǀhaohe.

• 

  Xoadi Ese. 38:18-23; Dan. 2:34, 35, 44, 45; J.ǂHa. 6:2; 16:14, 16; 17:14; 19:20

  Kēbos ‘ǃUri hāb’ tsî “ǁîb ai ǂnôab” tsîn ge Gogi tsî ǁîba ra ǂkhâǃnâ khoen tsîna nî hîkākā. ‘ǀGurub’ ge “ǀaes hurib, sulfuri ǀkha ra khaub ǃnâ ge aoǂgāhe.”

  Dīǀoaǀoas Jesub Elob Gaosib di gao- aob ge hîkākās ǃaroma ra ǀkhī. 144 000 ǂGaeǂgui-aon tsî ǁîb ǂnubis ǀhomǃgāgu tsîn ǀkhab ge Elob khoena ra ǁnāǂam ǃhaodi hoade nî hîkākā. Nēs ge nî Satanni ǃhūbaib di ǀam i.