Khomai-aon Dîdi
Tae-i ǃaromab ge ‘ǀaokhoeba’ mî Rutsab ga ǃgame o, i ǁîb di ǀumisa nî ‘ǂnoahe’ di? (Ruts 4:1, 6)
ǃGamme hâ khoeb gere ǁō o Elobmîs ǁaeb ǃnâ, o î ge ǀnî dîde ga ǃereamhe hâ: ǁÎb ga ǀgôana ūhâ tama io, o i tae-e ǁîb ǃhūb ǀkhā nî ī? ǁÎb ǀons hoasa nî ǂoaǃnâhe? Moseb ǂhanub ge ǁnā dîde ra ǃeream.
Khoeb ga ǁō tamas ka io ǀgâsib xa ǃaromahe hâse ǁîb ǃhūba a ǁamaxu o, o i tae-e nî hā? ǁÎb ǃgâsab tamas ka io ǀaokhoe-i ge ge ǁama oa ǁkhā i. În omaris khoena noxoba nē ǃhūba ūhâ ǁkhā.—Lev. 25:23-28; Num. 27:8-11.
ǁNāsa mati nî īǁkha kai, îs ǁō ge khoeb di ǀonsa tā ǁō ǂoa? Nēs ge ǁîb ǃgâsaba ǁō geb di tarasa ǃgames ǃnâ-ū ge īǁkhā ī. Tsî nēs ge Ruts ǀkha ge ī. Khoeb ga ǁō ge ǃgâsab taras ǀkha ǀgôa-e ūhâ o, o î ge ǁî-e ǁō ge ǁgûb di ǀonsa nî ūhâ îs tā ǁnā ǀonsa ǁō ǂoa. Tsî î ge ǁnā ǀgôa-e ǁō ge ǁgûb di ǃhūba nî ǀumi. Nē ǀgaub ǃnâs tsînas ge ǃoa tarasa gere kōǃgâ-e.—Deu. 25:5-7; Mat. 22:23-28.
Naomis aiǁgaus xa ǂâi re. ǁÎs ge Elimelexa ge ǃgamme hâ i. ǁÎb tsî ǁîb 2 ǀgôakha ge ǁō o, o î ge Naomisa nî kōǃgâ khoe-e ge ǀkhai i. (Rut. 1:1-5) Naomis ge Judaba ǃoa a oaǀkhī o, os ge Rutsa ge mîba is Boasa ǂgan îb ǃgammesi. Tsî ǁîs ǃkhōǂhomi-aob ase ī. ǁÎb ge ge Elimelexi ǀgū ǀaokhoe-i. (Rut. 2:1, 19, 20; 3:1-4) Xaweb ge Boasa ge mûǂan, ǀnî hâ khoeb hînas Elobmîsa “ǀaokhoeb” di ra ǂgaib ge ǁîb xa ǃnāsase Elimelexi ǀgū ǀaokhoe isa. ǁNās ǀkhab ge ǁnā ǀaokhoeba aiǂhanuba ge ūhâ i ǃkhōǂhomi-aob ase isa.—Rut. 3:9, 12, 13.
ǂGuroseb ge ǁnā ‘ǀaokhoeba’ māsenxase gere hui ǂgao. (Rut. 4:1-4) ǁÎb ge ge ǂan i, ǂgui mari-e i nî ūsa ǁnā ǃhūba ǁama oasa. Xawes tsînab ge ge ǂan i Naomis ge kaira hâ isa tsîs ǀgôa-e ǁkhawa a hō ǁoasa, î-i Elimelexi ǀonsa tā ǁō ǂoa. Tsîb ge ǃhūba nē ǀaokhoeb di ǀumis tawa nî ǀarosen.
Xaweb ge nē ǀaokhoeba ge ǂgae-oasen mûǂan nî ge o, Rutsab a ǃgamme ǁkhāsa. ǁÎb ge ge mî: “ǁNāti nî īs kao ta ge tita ǁnā ǃhūǃâsa a ǁama ǁoa, ǁnās ra ǂâibasen xui-ao ti ǂhunuma ǀgôan ǁîba ǀumi ǁkhā tidesa.” (Rut. 4:5, 6) ǁÎba tae-i ǃaroma ge ǂgae-oasen?
Nē ǀaokhoeb tamas ka io ǀnî hâ khoe-i ga Rutsa ǃgamme hâ o, ob ge ǁnā ǀgôaba Elimelexi ǃhūba ga ǀûmi hâ. O ǁnāsa mati ǀaokhoeb ‘ǀumisa’ ga ‘ǁgaiǂoa’ kai hâ? Elobmîs ge nēs xa xū-e mî tama hâ. Xawe ǀnî hâ ǃaromadi ge a hâ ǁkhā.
ǂGurose, ǁîb marisab ge ga ǂôaǃnâ hâ ǁnā ǃhūba ǁamas ǃnâ-ū. Nē ǃhūb ga ǁîb di ǀumi tama hâ xui-ao. Nēs ge Ruts di ǀgôab xa ga ǀumihe hâ.
ǀGamǁîse, ǁÎb ge Naomis tsî Ruts tsîna kōǃgâs ǃereamsa ga tani hâ.
ǃNonaǁîse, Ruts tsî ǀaokhoeb tsîn ga ǀnî hâ ǀgôana ūhâ o, on ge ǁîb di nau ǀgôan ǀkha ǀumisa ga ǀgoragu hâ.
Hakaǁîse, ǀaokhoeb ga ǀnî hâ ǀgôana ūhâ tama io tsîs ga Rutsa ǀgôaba a hō o, ob ge ǁnā ǀgôaba Elimelexi ǃhūb tsî ǀaokhoeb ǃhūb tsîna ga ǀumi hâ. Tsî ǁnā ǀaokhoeb ga a ǁō o, o î ge Elimelexi ǀonsa ūhâ ǀgôaba ǁîb ǃhūba ga ǀumi hâ. Nē ǀaokhoeb ge ǁîb ǀumisa Naomis ǃaroma ge ǂoaǃnâ ǂgao tama hâ i. ǁÎb gere ǂhâbas ge îb Boasi hîna ǃkhōǂhomi-aoba ǁnā ǃereamsa dī. Tsî Boasi ge ǁnāsa ge dī, î-i Elimelexi di ‘ǀons âba tā ǀuruhe. . .ǁîb di khoen ǃnâ.’—Rut. 4:10.
ǀAokhoeb ge ǁîb ǀons tsî ǀumis tsîna ūhâ ǀgaras xa ǀnîsi ge ǂhâǂhâsabahe-i. ǁÎb xa ǀguib ge gere ǂâi nau khoen xas ōse. Nē ǀaokhoeb ge kaise ǃgarise ge sîsen îb ǁîb ǀonsa ǃgâi dī xawe da ge nētsēs kōse ǁîb ǀons mati hâsa a ǀgū. ǁÎb ge Boasi ge hō ǀō-aisa aiǂhanub tsîna ge ǂoaǃnâ. ǁÎb di surib ǃnâ-ūb ge Jesub Xristub hîna Mesiab ase a ǂansaba ge ǃnae. ǁNā ǀaokhoeb ge kaise ǃgâi aiǂhanuba ge ǂoaǃnâ, ǂhâsib ǃnâ hâ khoe-eb ge hui ǂgao tama hâ i ǃkhais ǃaroma. Mat. 1:5; Luk. 3:23, 32.