Matikō Jehovab di ǀHûǀguitimî-aona du a ǂan? ǀNîn ge sa ǁanǁare-ao ǁkhā, sa sîsenǁare-aon, skol ǀhōsa ǁkhā tamas ka iots ge Elobmîsa xu sida xa ge ǃhoa ūhe hâ i. Jehovab di ǀHûǀguitimî-aona, a ham tsî tae-i ǃaroman ǁîn ǂgomsa ǀhûhâsib ǀkha ra ǀgoragu?

Sida ge sadu di ǁanǁare-ao. ǃKharagaǃnâgu omaridi tsî ǁanǀgauga xu da ge ra hā. ǀNîn ge tsoatsoas ǃnâ ǀkhara ǂgomdi ǃnâ ge hâ i, tsî ǀnîn ge Elob ǃnâ ge ǂgom tama hâ i. Xawe da nî ǀHûǀguitimî-ao kais, aiǃâ da ge Elobmîsa ǂōrisase ge ôaǃnâ. (ǃNaeǃkhaidi 17:11) ǁKhāǁkhāsen da ra xūn a ama ǃkhaisa da ge mûǂan o, o da ge aitsama ge ǁhûi Jehovaba ǃoabasa.

Elobmîsa ǁkhāǁkhāsens ge sida di ǃgâib axase ī. Mâ khoe-i hoa i khami da ge sida tsîna ǃgomsigu tsî ǂkhawusasiga ūhâ. Xawe Elobmîs tsoatsoade sida tsēkorobe ûib ǃnâ ǁnâuǀnams ge ra huida, sida ûiba aiǃgûsa. (Psalmdi 128:1, 2) Nēs ge ǃaromas ǁkhāǁkhāsen da ra xūna da khoen ǀkha ra ǀgoragusa.

Elosi ǀgaub ǃoa da ge ra ûi. Nē ǀgaugu Elobmîs ǃnâ ra ǁkhāǁkhāhegu ge ǃgâisib, ǃgôasiba khoena ūhâbas tsî ǃgâi khoesi ǂūgu ǂhauǃnâsib tsî ǀkhomxaǃnâsib tsîna ra ǁkhāǁkhā. Nē ǀgaugu ge ǂurusib ǃnâ ra omkhâi tsî sîsenǀnamxa ǀhûhâga ra ǂkhâǃnâ omaridi di ǀguisib tsî ǃanusib ǃnâ. “Elob ǀgora e ūhâ tama” ǃkhais ge ra ǁgau ǃhūbaib ǂhawase da gāgāsise khoeǃgâgu, tsî ǂgīǂgōsi xūn xa ǀgorahe tamasa. Khoes ǀguisa da i xawe da ge kaise ǀō-aisa khoen di ǃâba ra kuruǂui.—ǃNaeǃkhaidi 4:13; 10:34, 35 NW.

• Jehovab di ǀHûǀguitimî-aona mâ ǀgaub ai nau khoen ǀkha a ǀgui?

• ǀHûǀguitimî-aona tae-e ra ǁkhāǁkhāsen Elobmîsa xu?

ǂGui khoen ge ra ǂâi Jehovab di ǀHûǀguitimî-aon ǀons ǀasa ǂgom-i di ǀon ti. Xawe, 2 700 kurigu ǃkharuhâsen ge amab ǃnâ Eloba gere ǃoaba khoena ‘ǀhûǀguitimî-aon’ di gere ǂgaihe. (Jesajab 43:10-12) Elobmîs ôaǃnâ aon ti da ge 1931ǁî kurib kōse ge ǂansa i. Tae-i ǃaroma da ge nē ǀons, Jehovab di ǀHûǀguitimî-aon ti hâ sa ūǃoa?

Sida di Eloba ra ǁgauǂui. ǀOrokam ǁaeb ǂkhanigu ǃnâs ge Elob ǀons, Jehovasa, hûǀoadisis xa ǃnāsa ǃnāte Elobmîs ǃnâ ge xoahehâ i. Elobmîs ge tsoatsoas ǃnâ ǂnûiǃkhunihe o, os ge nē ǀonsa ǃKhub tamas ka io Elob di hâ ǂgaiǀgaugu ǀkha ge ǃkhōǃkhunihe. Xaweb ge ama Eloba Moseb ǃoa ǁÎb di ǀons, Jehovas ǀkha ge a ǂanǂansen, nētib ge mîse: “Nēs ge ti ǀonsa ǀamos kōse.” (Eksodus 3:15 NW) Nē ǀgaus aib ge Eloba ǁgôa tsî ǁgoa eloga xu ge ǀgorasen. Sida ge kaise a ǂnīsa Elob ǃanu ǀonsa tanisa.

Sida sîsena ra mîǃgāǃgā. ǂGui khoen ge mâsaogu hâse ǁîn ǂgomsa Jehovab ǃnâ ge ǁgau Abeli ge tsoatsoase. Kurigu ǃnân ge Noaxi, Abrahami, Saras, Moseb, Davib tsî ǀnî khoena nē “ǀhûǀguitimî-aon di ǀnanu i” ǀkha ge ǁhao. (Hebreǁîn 11:4–12:1) Khoe-i ga ǁnâuǃgâ ǃkhaib ai ǀhawioǃnâ khoe-e ǂnoaba, khami da ge sida tsîna ǁgui-aisase sida Elob ǃoa hâ amaba ǀunis kōse nî ǂanǂan.

Sida ge Jesuba ra ǁgae. Elobmîs ge ǁÎba “ǂgom-ǂgomsa tsî ama-ai ǀhûǀguitimî-aob” di ra ǂgai. (ǂHaiǂhais 3:14) Jesub ge aitsama ge mî “tsî ta ge ǁîna sa ǀonsa ge ǂanǂan” tsî “amaba ta nî ǃkhō-ambase.” (Johaneb 17:26; 18:37) ǁNā-amagan ge Jesub di saosabena Jehovab ǀonsa tani tsî ǁîsa ra ǂanǂan. Jehovab di ǀHûǀguitimî-aon ge nēsa ra dī.

• Elobmîs ôaǃnâ aona tae-i ǃaroma Jehovab di ǀHûǀguitimî-aon di ge ǂgaisen?

• Jehovab di ǀHûǀguitimî-aona mā ǁaeba xu ge tsoatsoa?

• Hama a mâǂoa hâ kai ǀHûǀguitimî-ao Jehovab diba?

Elobmîs ge ǀnai ge aimûǀgaru hâ i Jesub ǁōb khaoǃgâ gu ǂhomi ǁkhāǁkhā-aoga nî ǂgâxa tsî Elobmîs amaba nî ǁgaoǁgao di. (ǃNaeǃkhaidi 20:29,30) ǁAeb ǀkhas ge nēsa ge ama ī. ǁÎn ge Jesub di ǁkhāǁkhāde ǀūben ǂgomdi ǁkhāǁkhādi ǀkha ǀhaoǀhao tsî ǂhomi Xristesi ǂgomde ge ǂgâxa ū. (2 Timoteub 4:3,4) Mati da nētsē a ǂan ǁkhā amab Elobmîs ǃnâ mâba da amabes ǃnâ ǁnâuǃā tsî ra ǁkhāǁkhā ǃkhai-e?

ǁAeb ge ge ha Jehovab ge amaba a ǂhaiǂhaiba. ǁÎb ge ge mîǁgui hâ i “ǀunis di ǁaeb” aib ge Elobmîs di ǂansa “nîra ǂguiǂguihe.” (Danieli 12:4) 1870ǁÎ kurib ǃnâs ge ǂkhari ǃgubis khoen amaba gere ôana Elobmîsa ôaǃnâ tsî ge mû ǂgui kerkhegu Elobmîsa xu hâ amaba ǁkhāǁkhā tama ǃkhaisa. ǁÎn ge Elobmîs amaba tsoatsoasa xu ǃgamse ǃgaosa xu ge ôaǃnâ tsoatsoa tsîb ge Jehovaba ǁîna gāgāsi gā-aisib ǀkha ge ǀkhae.

ǂHauǃnâ ǂhanu-ai khoegu ge Elobmîsa ǃgamse ge ôaǃnâ tsoatsoa. ǁNā Elobmîs ôaǃnâ aogu, sida ge aimâbagu, ge ǀgauba ge hō sida nētsē ra sîsenūba. ǁÎgu ge Elobmîsa ǃâsa xu ǃâs ǀkha gere ǃhoaǃgao. ǁNâuǃā tama gu hâ ǃâs ai gu gere si-o, ogu ge ǀkhara xoade gere ôa nē ǃâsa gere mîǃgāǃgāde. Nē ǃâs ga hoa xoadi ǀkha ǀgau tsî gu ga mû o hoa xoadi ge ǀguise ra mî di, ogu ge gere xoamâi. ǁÎgu ge Elobmîsa gere sîsenū tsîs ge aitsama gere ǁguiǃāsen, Elob ǀons tsî ǁÎb Gaosib, ǁÎb ǂâis, khoen tsî nē ǃhūbaib ǀkha tsî ǁōhan mâsib tsî ǁîn ǃâubasensa khâis xa. ǁÎgu di ôaǃnâs ge ǁîga ama tama xūna ǂgom tsî dīsa xu ge ǃnora kai.—Johaneb 8:31,32.

1879ǁÎ kurib ǃnân ge Elobmîs ôaǃnâ aona ge mûǂan ǁaeb ge hā ǃkhaisa amaba ǃhūbaib ǃnâ ǂanǂansa. ǁNā kurib ǃnân ge nēsis kōse ra sîsenūhe ǂkhanib The Watchtower Announcing Jehovah’s Kingdom ti ra ǂgaiheba ge ǁgâi tsoatsoa. Nēsisa da ge Elobmîs amaba khoen ǀkha ra ǀgoragu 240 xa ǃnāsa ǃhūgu ǃnâ tsî 750 xa ǃnāsa gowagu ǃnâ. Ûib ǃnâ i ge amab ǂansa ǁnās kōse ge hōhe tama hâ i nētsēs khami.

• Jesub ǁōb khaoǃgâ, Elobmîs amab ǀkha tae-e ge ī?

• Tae-e ge huida ǁkhapa Elobmîs amaba hō-oa sa?

ǂGui kurikan ge Jehovab di ǀHûǀguitimî-aona ǃkharagagu māǂuidi Elobmîs tide ge sîsenū, ǁgâi tsî gere māǂui. Xawe da ge ǂhâsiba ge mû ǀasa ǁguiǃāsa xoasa khoen nî ‘amab di ǂans tawa sīse,’ Elob di ǂâis hoa khoenab ūbahâsa. (1 Timoteub 2: 3, 4) ǁNā-amagas ge 1950ǁî kurib ǃnâ supuse ǁnâuǃāhe ǁkhā, Baibels, New World Translations sa ǃâde xoahe tsî ge māǂuihe tsoatsoa. Nē Baibels ge 130 xa ǃnāsa gowagu ǃnâ ǂgomǂgomsase tsî ǂōrisase ǂnûiǃkhunisa.

Supuse nî ǁnâuǃāsen Elobmîs ge ge ǂhâbasa i. Gowagu ge ǁaeb ta ī khami ra ǀkhara, tsî ǂgui ǂnûiǃkhunidi ge ǀoro, tamas ka io sîsenūhe tama mîde ūhâ ǁnâuǃāhe tamade. ǀOrose ge xoahe hâ i, manuskripgu amaba ūhâgu ge ge hōhe Elobmîs ge xoahe hâ i gowagu ǃnâ, Hebreǁîn gowab, Aramerǁîn gowab tsî Grikeǁîn di gowab tsîgu ge ǁnâuǃāsa kaise ge supusupu nē manuskripgu ge hōhes khaoǃgâ.

Elob ǂhâba hâ khami ra ǁguiǃā ǂnûiǃkhunis ge ge ǂhâbasa i. Baibels ǂnûiǃkhuni aogu ge ǂōrisase Elobmîsa ǂguro ge hâ i xoadi ǀkha nî ǂnûiǃkhuni tsî ǁîgu ǂâidi, tamas ka io ǁnâuǃāb ǃoagu xoa tide. Elob di ǃanu ǀons Jehovas ge ǃnāsa Baibelde xu a ūbesa.

Baibels ge ge ǂhâbasa i Eloba ra koa tsî garesa. (2 Samueli 23:2) New World Translations ǃnâs ge Jehovab di ǀonsa 7 000 xa ǃnāsa ǃnāde ra hōhe ǂguro ge xoahe baibels ǃnâs ge hâ i khami. (Psalmdi 83:18 NW) Kurigu di ǂorisa ôaǃnâs ge ge ǃaroma nē Baibelsa kaise supuse khomaisens tsî ǃgāsase Elob ǂâisa ǁguiǃāsa. New World Translation sats ga sa gowab ǃnâ ūhâ tama i xawe sa Baibelsa tsēs hoasa khomaisa sa ûib ǃâse ūhâ re.—Josuab 1:8; Psalmdi 1:2,3.

• Tae-i ǃaromas ge Elobmîsa ǂnûiǃkhunisa ǂhâǂhâsa i?

• Elob ǂâisa da ga ǂanǂgao-o tsēs hoasa tae-e da nî dī?