ǂGui khoen ge Eloǃoabadi ǃoa ge ǃgû ǀû, gāgāsisen ǁkhaeǂgaohe tamas ka io hui-e tama hâ amaga. Tae-i ǃaromats Jehovab di ǀHûǀguidimî-aon di ǀhaodi ǃoa nî ī? Tae-ets ǁnapa nî hō?

Tsâba tsi ra tsî ǀnamtsi khoen ǁaegu hâs di ǃgâiaǂgaob. Apostelgu di tsēdi ǃnân ge Xristeǁîna ǀhaohâgu ǃnâ ge hâ i tsî ǀhao tsî Eloba ǃoaba, xoade ôaǃnâ tsî gāgāsise gere ǀgaiǀgaigu. (Hebreǁîn 10:24, 25) ǀNami ǃnân ge gāgāsise khoeǃgâguse tsî ǀhōsase gere ǀhao. (2 Tesalonikaǁîn 1:3; 3 Johaneb 14) Sida ge nētsē ǁnā aiǁgausa ra sao tsî ǁkhā ǂkhîba ūhâ.

ǃGâib hîna da ra ǀamab, Elobmîs di tsoatsoade da ga sida ûib ǃnâ sîsenū o. Elobmîs di ǁaeb ǃnâs khamin ge aogu, taradi tsî ǀgôan tsîna ǀguiba ra ǀhao. ǂAnsa ūhâ aogu ge Elobmîsa ra sîsenū, sida ǁguiǃābasa mati da Elobmîs ǂhanugu ǃnāga nî ûi ǃkhaisa sada uîb ǃnâ. (Deuteronomium 31:12; Nehemiab 8:8) Hoa khoen ge ǁgamǁae tsî ǁnaesao ǁkhā, sida di Xristesi ǂgomsa ra ǁgauǂuisa.—Hebreǁîn 10:23.

ǀKhaeb sa ǂgomsa Elob ǃnâ ra ǀgaiǀgaisa. Apostel Paulub ge ǁîb tsēs ǃnâ ge hâ i ǀhaohâgu ǀguiba ge mîba: “Kaise ta ra ǁkhore, mû tsî ta nî sado ǀnî gāgāsi hō-e ause, ǀgaiǀgai ǃnâhe du nîga;. ǁNās ge, sadu ǃnâ ta nî ǁkhaeǂgaoǀhaohega, sada ǁaegu hâ ǂgoms, sadu dis tsî tis tsîra xu.” (Romeǁîn 1:11, 12) Nē ǀhaodi ǃnâb ge sa ǂgoms tsî turab Xristub ǃnâ ûis diba nî ǀgaiǀgaihe nau Xristeǁîn ǀkhats ta ǀhaos kōse.

Mati i iots nē ǁkhauǂuisa ūǃoa tama saora sida ǀhaohâb di ǀhaodi tamas ka io ǃoabasa hâǃnâ sa? Kaise ǃamku ǀgaub aits ge nî ǃkhōǃoahe. Hoa ǃoabadi ge a mari-o ǃnâ tsî mari-i ge aohe tama hâ.

• Sida ǃoabadi tamas ka io ǀhaode mati ra dīhe, tae-i ai ǃgaoǃgaosa ūhâ?

• Mati da sida Xristeǁî ǀhaodi ai hōdawa ǁkhā?

ǃGarob ǃnâ-ū da ga ǃgûs, ǀnanub tsî ǃkhaib ǃnâ da ga ǃgûs, hoas ai da ge hoaǁae sida Xristesi ǀhaode xu hâbe tama hâ. Tae-i ǃaroman Jehovab di ǀHûǀguitimî-aona ûib di ǃgomsigu ga hâ tamas ka io tsēs ǀams ai hâ tsaub ga hâ xawe ǂkhawu tamase nē ǀhaodi ǃoa ra ǃgû?

Sida khoesise omkhâisensa kaise a ǃgâiba amaga. ‘I da kē-ǃgâgu,’ dib ge Pauluba ge xoa, ǁîb ge sada ra ǀhaohâb ǃnâ ǃoaba u khoen xa gere ǃhoa. (Hebreǁîn 10:24) Nē mîs ge ra ǂâibasen “i da, kaise ǂorisase ǂâiǃgâ,” ǀgūguse ǂangusa dī. Apostel Paulub di mîdi ge sada ra hōhōǃnâ, i da nau khoena ǀnama ūhâba. ǀNî Xristeǁî omaris sats ga ra ǂan o, ots nî ǁnâu ǃkhais ge ǁîn tsîn sats sa omaris ǃnâ ūhâ ǃgomsigu tsîna ge ūhâ i tsî ǃgâiǀgaub ai nē ǃgomsiba ge dan tsî sadu tsîna a huiǁkhā ǃkhaisa.

Hâhâ ra ǀhōsagusisa ra omkhâi. Sida di ǀhaodi tawada ge aidi ai ǀgui ǂangu tama xawe ǀgūse ra khoe ǀhōgu kai. ǀNîhâ ǁaegu ai da ge ǀhao tsî khoexaǃnâse ra ǁkhoreǁharegu tsî ra khoakhoasen. Nēti ī ǀhaode tae ǃgâi sîsenǂuiba ūhâ? ǁKhāǁkhāsen da ge ra gangan gu da nî sa tsî nē ǃkhais ge ǀnama ra ǀgaiǀgai. ǁNā-amaga da ge sida di ǀhōsan ga ǃgomsib ǃnâ hâ o, sam tamase ra huigu ǀgaisa khoeǃgâgu ǀnama da ūbagu hâ amaga. (ǂKhoamîdi 17:17) ǀHaohâb ǃnâ “hoa khoen ǀkha hâs ǃnâ-ū da gera ǁgau, hoa khoena da ǀnama ūbahâ” ǃkhaisa.—1 Korinteǁîn 12:25, 26.

Elob ǂâisa ra dī khoena sa ǀhōsan ase ǁhûire. ǁNā ǀhōsanats ge Jehovab di ǀHûǀguitimî-aon ǃnâ nî hō. Tā xu-i xare-e mā-am sado ǁkhaesa sida ǀkha ǀhûsa.

• Tae-i ǃaroma i sada ǃgâib axase i ǀhaodi tawa khoen ǀkha ǁgamǁaesa?

• Maǁaets sida ǀhaohâb ǀkha ǂangusa ra kuru ǂgao?

ǂGurogam Xristesi ǀhaodi tawa i ge ǁnaes, ǀgores, Elobmîsa khomai tsî ǃhoaǃgâs ge ǃnāsa ǁaeba gere dīhe—ǀnî hâ xūn ge ge ǂgāhe tama hâ i. (1 Korinteǁîn 14:26) Sida ǀhaodi tawats ge ǁnā ǀgaub ǀguiba ǃâubasen ǁkhā.

ǁKhāǁkhādi ge Elobmîs ai ǃgaoǃgaosa tsî ǂûǂûsa. Wekheb ǀams aib ge ǀhaohâba ra ǀhao 30 haika Elobmîsa xūhâ ǃhoasa ǃgâsa, Elobmîs nētsē sada ûib tsî ûiǃnâ da hâ ǁaeb xa ra ǃhoa xūna. Mā khoe-i hoa-i ge ǁî-i Baibels ǃnâ ra sao. ǃHoas khaoǃnâs ge ǀgui kamaba “Watchtower” di hâ ǂkhaniba xu ǁkhāǁkhāsa ra dīhe ǀhaohâb khoen tsîn ta amǃnâxaba. Nē ǃhoaǃgaos ge ra huida Elobmîsa sida ûib ǃnâ sîsenǂuiba ūhâ sa. Hoa ǀhaohâgu, 110 000 xa ǃnāsagu ge nē ǀgui ǃhoaǃâsa ǃhūbaib ǂhawase ra ǁkhāǁkhāsen.

Sida di ǁKhāǁkhā ǀgaub ge ra ǀgaiǀgaihe. ǀGui ǃnāsa da ge wekheb ǁaegub ǃnâ ra ǀhao ǃnona ǃâdi ǃnâ ǀgoraǂgāsa ǀapeǁguiba ra ǃhoaǃgaose, Our Christian Life and Ministry ti ǀon hâba. Nē ǃhoaǃgaodi ge mâ ǁkhâb hoaba ra māǂuihe tsî Life and Ministry Meeting Workbook ti ǀon hâ ǂkhanib ai a ǃgaoǃgaosa. ǂGuro ǃâb nē ǀhaos dib ge Elobmîsa xu ra mâǂoa danaǃâde ǃkhōǂgā hâ hînan ǀhaohâb ǁanina ǁaeb aiǃâ ra khomaina, nēs ge kaise ra hui da. ǁNāpaxū ra saob ge mati da aoǁnâ sîsenni ǃnâ khoena ǀkha nî ǃhoa ǀgaub aiǁgaude hâ tsî Elobmîsa da nî sîsenū ǀgaub tsîna. ǀApemā-aob ge sida ra khomai tsî ǃhoa ǀgaub ǀkha ra huiǃnâ da. (1 Timoteub 4:13) ǀUniga ǃâb ge Xristeǁîn mati Elobmîs tsoatsosade ǁîn ûib ǃnâ nî ûiǂui ǀgauba ra ǃhoaǃgao. Nēs ge dîdi tsî ǃereamdi tsîna ǃkhōǂgā hâ tsî ra hui da î da Elobmîsa ǃamkuse ǁnâuǃā.

Sida di ǀhaodi tawats ga si-o, ots ge nî tsâǀkhāhe sida ra Elobmîsa ǁkhāǁkhā ǀgaub xa.—Jesajab 54:13.

• Tae-e du Jehovab di ǀHûǀguitimî-aon di ǀhaodi tawa ǁnâu tsî a ǃâubasen ǁkhā?

• Mâ wekheb ǀhaosats kaise nî hâ ǃnâ ǂgao?

Nē ǂkhanib ai-īsib ai kē re Jehovab di ǀHûǀguitimî-aon matikō ǃamkuse ana hâsa ǁîn ǀhaodi ǃoa? Mati i io da sida di ai-īsiba nēti kōse ra kēǃnâ?

Eloba da ǃgôasiba ra ǁgau amaga. Ama a ǃkhais ge Elob sada di ai-īsib xa ǃgamse ra kē ǃkhai-e. (1 Samueli 16:7) Xawe da ga ǀhao o ǁÎba ǃoabas ǃaroma, o da ge ǂgaob ǃgamsiba xu ǁÎba ǃgôa tsî sida ǀkha ra ǀgoreǀî ǃgâsan tsîna nî ǃgôa. ǀGoraǃgâ-ǃkhaib ai da ga ǀgoraǃgâ-ao i aisi mâ o, o da ge ǃamkuse nî mûsen ǂgao, ǁîba ǃgôasiba ǁgaus ǃaroma ǁîb ǃharosa da a ǂan amaga. ǁNās ǁkhās khami da ge sada ǀhaodi tawa da ra mûsen ǀgauba nē “ǂhanuǂhanu-aob ǃhūbaib hoaragab diba” da ūhâba hâ ǃgôasib tsî ǀgoreǀî da ra ǃkhaiba da ūhâbahâ ǃgôasiba nî ǁgauǂui.—Genesis 18:25.

Sida ra ǂgom ǀgausa da gera ǁgauǂui. Elobmîs ge Xristeǁîna ra hōhōǃnâ, “anu hâ sara-i ǃnâ taob tsî îǂhôasib tsîkha ǀkha” tsî “Elo ǃao ǃgâsiba ra ǂhôa tarade a anu khami.” (1 Timoteub 2:9,10) “Anu hâ sara-i” ǀkha anasens ge ra ǂâibasen khoena ra nana tsî sa sorosa ǁgauǂui saranats ana tide di “îǂhôasib” ge sada ra hui i da ǃgâise ra mûsen sarana ǁama. Nē tsoatsoadi ge kaise ǂgui ǃkharagagu ǁkhoaba ra mā da sarana da a ǁama ǁkhapa. Xu-e mî tamases ge sada di ǃamkuse tsî ǃanu ana ǀgauba “ǃgâiǃōdī-aob di ǁkhāǁkhāsa hoa xūn ǃnâ anan.” (Titub 2:10; 1 Petrub 2:12) ǃAmkuse da ga ana o, o da ge nau khoen sada ǃoabas Jehovab disa ra mû ǀgausa ra ǀgaiǀgai.

Tās sadu sara ana ǀgauba sado ǃoabade xu hâbē kai. Sada saran ǂgui mariba nî ǂan ǃkhais ge ǂhâbasa tama hâ, ǃanu tsî i ga sorosa ǃgâise ǂganam o.

• Sada di ana ǀgauba matikose a ǂhâǂhâsa Eloba ǃoabas ǃnâ?

• Mâ tsoatsoade sada di saran tsî ǃkhōǂhomisens ǀgauba ǀkha ra huida?

Sadu ga Elobmîsa Jehovab di ǀHûǀguitimî-aon ǀkha ǁkhāǁkhāsen o, o du ge ǀnîsi ǀnai ǁaeb aisi ǁkhāǁkhāǃâsa ra ôaǃnâ. ǃGâise ǁnâuǃās ǃaromats ge ǀhaos ǃoats nî īs aiǃâ nî kēǃgâ. ǁNaetib axasets ga dī-o, ots ge ǃgâi hōdawa-amsa ra hō.

Mâba tsî mâǁaets nî ǁkhāǁkhāsen ǃkhaisa mîǁguire. Mâǁaes ǂkhûsa ǃgâise ra sîsen? ǁGoaga tsēs di sîsenni nî tsoatsoas aiǃâ tamas ka io tsuxuba, ǀgôan ǀnai ǁom hâ hîna? Gaxu ǁaebats ga ǁkhāǁkhāsen ǁoa xawets ge nî kē matikō ǁaerobats a ǁamaǂui ǁkhā ǃkhaisa tsî tā nî mā-am ǂhanihesa. ǃNōsa ǃkhai-e ôa tsî ǂhanib axase ī xūn hoana ai-īsiǂhôaǂgares, ǂhôaǂgares, tanimâ-e ra ǁâǁawab tsî hoa xūna ǀari re. ǀGores ǀkhats ka tsoatsoa o, ots ge ǃhūbaib ǃgomsigu xa ǀuru tsî Elobmîs ai ǂâisa nî ūhâ.—Filipeǁîn 4:6, 7.

ǁKhāǁkhā ǃâsa aiǂhomi re i ǀhaos ǃnâ amǃnâxa. Tsoatsoas ǃnâts ge aibe nî ǁnâuǃā nē ǃhoaǃâs tae-i xa ra ǃgû ǃkhaisa. Mâ ǃâs hoas ti xoaǂams xa ǂâiǃgâ re tamas ka io danaǃâs xa ǂâi re, matis mâ ǂkhari ǃhoaǃâs hoasa xoaǂams tsî ǁgauhera ai-īsigu tsî ǃgûǃgâs dîte ǃhoaǃâs ǃnâ ra mîǃgāǃgā ǀgausa. Mâ xoaǀgoras hoasa khomai re tsî māhe hâ ǁgâisa dîde ǃeream re. Xoade Elobmîsa xu, khomai tsî ǂâi re nē xoadi mati ǃâsa ra ǀgaiǀgai ǃkhaisa (ǃNaeǃkhaidi 17:11) ǃEreams sats ga hō o ǂgaeǃgao re mâǂoa ra mîrode xoaǀgoras ǃnâ ǃereamde sa ǂâis ǃnâ nî hau de. Ots ge ǀhaos ǃnâ sa ǃoma ūkhâi tsî ǃnupu ǃereamsa sa mîdi ǃnâ a mā ǁkhā.

Mâ wekheb hoaba ra māhe ǃkharagagu ǃhoaǃâdi ǀhaos tawa ra ǁguiǃāhede xuts ge mâ ǃnās hoasa ǀasa xū-e ra ǁkhāǁkhāsen Elobmîs “ǁuiba xu.”—Mateub 13:51, 52.

• Tae ǁnaetibats nî ǁguibasen ǀhaos ǃaroma aiǂhomisens ǃoa?

• Matits nî aiǂhomisen ǃereamsa ǀhaos tawa sī mâs ǃaroma?

Aibekam ǁaeba xūb ge Jehovaba ǂhâba hâ, omaridi ǁaeba ǀguiba nî ūhâsa gāgāsise omkhâi gus ǃaroma. (Deuteronomium 6:6,7) ǁNās ǃaroman ge Jehovab di ǀHûǀguitimi-aona mâ wekheb hoaba ǁaeba ra ǁamaǂui omaris ǃoabas ǃaroma sâsa ǀgaub ai gāgāsi xūna ǁîn ûib ǂnamibe ra ǁgamǁae. ǀGurits ga hâ xawets ge nē ǁaeba nî ǁamaǂui Elob !aroma, ǁÎb mîsa ôaǃnâs sats ra ǂgao !âsa kē!gâs ǃaroma.

Nēb ge ǁaeba Jehovab ǃoa ǀgūs diba. “Eloba ǀgū, ob ge sado nî ǀgū”. (Jakobub 4:8) Jehovaba da ge !gâise ra ǂan ǁÎb di ǀgaub tsî dīxūna da ga Elobmîs ǃnâ khomai o. Supu ǀgaub nē omaris ǃoabas ǀkha tsoatsoas ge Elobmîsa da ga ǃgarise khomai tsoatsoa o wekheb hoaba ǀguiba Life and Ministry Meeting ǀapeǁguib ǀkha. Mâ omaris khoe-i hoa-i ge ǃâsa a mâhe ǁkhā, ǁîn nî khomaise tsî ǁnāpaxū mâ khoe-i hoa-e mî ǁkhā tae-e i go ǁkhāǁkhāsensa nē khomai ǃâba xu sa.

ǁAeb ge mâ omaris khoe-i hoa i tawa ǀgūsa. Aob tsî taras tsî ǀgôan tsîn ge ǁîn ûiǁaesa ra ǀgaiǀgai ǁîn ǃnâ Elobmîsan ga ǀguiba omaris ase ǁkhāǁkhāsen o. ǁNā omaris ge ǃgâiaǂgao tsî ǂkhîxa ǁaeba nî ūhâ ǁnā wekheb !nâ. ǀGôan kuriga kē hâsen ge ǁgûna ǀgôan ûib ǃnâ ra ǀgau ǃâde a ǁhûi ǁkhā Watchtower tsî Awake! di hâ ǂkhaniga xū sida internets ǂhaweb ai jw.org/jw-dmr. ǀGôan skoli tawa a hōǁkhā ǃgomsin xats ge a ǃhoa ǁkhā tsî matin ǁnā ǃgomsina supusupu ǁkhā ǀgausa. Tae-i ǃaroma du omaris ase JW Broadcastings (tv.jw.org) ai-īsiǂhôaǂgaresa kē tsî ǁnāpaxū ǃhoaǃgao tama hâ? ǀNîsits ge nî ǃgâibahe ǁnae amdi ǀhoas tawa ra ǁnaehe te ǁkhāǁkhāsen tsî du ga ǁnapaxū ǂkhari ǁkhoaxa ǂûǁaesa ǀams ai ūhâ o.

Nēb ge ǀō-aisa ǁaeb sa omaris hoas ǀkhats Jehovaba ǁkhoaxase nî ǃoababa. Jehovab ge sa ǁguiǂgāsensa kaise nî ǀkhae.—Psalmdi 1: 1-3.

• Mati i io da ǁaeba ra ǁamaǂui omaris ǃoabas ǃaroma?

• ǁGûna mati nē omaris ǃoabasa ǀgôana nî ǁkhoaxa kaiba?

Tae-i ǃaroman nē khoena ra ǃgâiaǂgao? ǁÎn ge sida di kai ǀhaodi ǃnâ ǁhao hâ. Aibekam ǁaeb ain ge Elob ǃoaba-aona ǃnona ǃnāde kurib ǃnâ gere ǀhao, khami da ge sida tsîna kurib ǃnâ ǃnona ǃnāde kai ǀhaode ūhâ ǂguise da ra ǀhoade. (Deuteronomium 16:16) Mâ kurib hoaba da ge ǃnona ǂoaǂamsa ǃnae ǃkhaide ūhâ: ǀGam ǃnāra, ǀgui tsēs ǂharis kai ǀhaora, tsî ǃnona tsēdi ǀkharib kai ǀhaos. Mati da nē ǀhaodi tawa ra omkhâihe?

Sida di Xristesi khoeǃgâgusisa ra ǀgaiǀgai. Israelǁaes ge gere dâ Jehovaban ge “ǀhaohâsigu ǃnâ . . . kare” o khami da ge sida tsîna ǁÎba ǀō-aisa kai ǀhoadi ai ra ǃoaba. (Psalmdi 26:12; 111:1) Nē ǀhaodi ge soasa ra māda sida di ǀHûǀguitimî-aon ǀkhara ǃādi tsî ǃhūgu ǃnâ ǁân hân ǀkha ǀhao tsî ǁkhoreǁharegu sa. Tsēǃgâǁaeb ais ge ǂûǁaesa hâ, ǀhao tsî da khoeǃgâguse gāgāsise ra ǁgamǁaesa nē ǁaxasib tawa. (ǃNaeǃkhaidi 2:42) Nēba da ge ǀnama ra hōǃâ sida ra ǀhaoba ǀguiǃnâxasib !nâ tsî “ǃgâsasiba ǀnam” ǃhūbaib ǂhawase.—1 Petrub 2:17.

Nē ǀhaodi ge gāgāsise ra aiǃgû kai da. Israelǁaes ge “ǁnā mîdi, hînan ge ǂanǂanhede ge ǁnâuǃā xui ao” nē ǀhaode xu hōdawasa gere hō, xoasa xūnan gere mîǃābahes ao. (Nehemiab 8:8, 12) Sida tsîn ge kai ǀhaodi tawa Elobmîsa xū ǁkhāǁkhāsa ra hō tsî kaise ra aio. Mâ ǀapeǁguib hoab ge Xoas ai ǃgaoǃgaosa ūhâ. Kaise ǁkhoaxa ǃhoadi tsî ǀhuruǃâdi ǃnâ xu da ge ra ǁkhāǁkhāhe Elob ǂâisa sida ûib ǃnâ dīǀoaǀoasa. ǃGomgu ǃnân hâ xawe Xristub ǂhâbahâ ǀgaub ǃnâ ûi hâ khoena xu da ge ra ǁnâu, matin nē tsū ǃhūbaib ai Elob ǀgūse ûi hâ ǀgausa tsî da ge ra ǀgai. ǀKharigu di kai ǀhaodi tawa da ge Elobmîs ǁaeb sarana ana hâ se ra ǀhuru ǁnāhe ǀhuruǃâde ra mû, Elobmîs ǁaeb xa ǂâi kai da tsî nētsēs ǁaeb ǃnâ da mati ûi ǁkhā ǃkhaisa ra ǁkhāǁkhāda. Mâ kai ǀhaos hoas tawan ge khoena ra ǁāǁnâhe ǁîn ûiba ǀkharaǀkhara tsî Elob aiǃâ ra ǁguiǁnâna.

• Mati i ion khoena a ǂkhî kai ǀhaodi tawa?

• Nē ǀhaodi tawa hâsa mati nî huida?

ǁŌb nîs aiǃâb ge Jesuba ge mî: “Tsî ǃgâiǂhôas gaosib dis ge ǃhūbaib hoab ai nîra aoǁnâhe, hoa ǁaedi mîdansa ǃoa; tsî ǁnāǃnubais ge ǀamsa nîra hā.” (Mateub 24:14) Matib nē ǃhūbaib ǂhawa aoǁnâ sîsena dīhe ǁkhā? Jesub ge ǃhūbaib aib ge hâ i o, ǁnāxūba da aiǁgausa da ga sao o.—Lukab 8:1.

Sida ge khoena ǁîn omdi tawa ra sī sari. Jesub ge ǁîb di ǁkhāǁkhāsabega ge ǁkhāǁkhā omsa xū oms ǀkha aoǁnâsa. (Mateub 10:11-13; Ap. ǃNaeǃkhaidi 5:42; 20:20) Aibekam ǁaeb Xristeǁî aoǁnâ-aogu ge ǀkhariba ge mâhe hâ i aoǁnâ ǃnâ gu gere pa. (Mateub 10:5, 6; 2 Korinteǁîn 10:13) Nētsēb ge sida sîsenni tsîna ǁnāti ǃamkuse ǀgoraǂgāsa, tsîb ge mâ ǀhaohâb hoaba ǁîb ta sîsen ǃnâ ǃkhaiba ūhâ. Nēs ge sida ra mā-am i da Jesub mîmās “ǁaesa aoǁnâ tsî ge nî ǃkhō-amsa” dīǀoaǀoasa.—ǃNaeǃkhaidi 10:42.

Sida ge khoena da ǀhaoǁkhā ǃkhais hoas tawa ra sī. Jesub ge aiǁgausa ge ǁgauda khoen da hâmâpa tamas ka io hurib ami ai tsî khoen da ǁamaxū ǃkhaib aib gere aoǁnâ amaga. (Markub 4:1; Johaneb 4:5-15) Sida tsîn ge khoena ǀhao-ū da ra ǃkhain hoan ai ra ǁgamba daob ai, sîsenî tawa, parki tamas ka io ǁâǁapab ǃnâ-ū. ǁAnǁare-aon, sîsenǀhōsan, ǀaokhoen tsî hōǁkhāda a khoen hoana da ge ǁae-i ga hâ o ra ǁgam ū. Nē ǃkharagagu sîsen ǀgaugu ge ra ǃaroma miliundi khoen ǃhūbaib ǂhawasen nē ǃgâiǂhôasa ǁnâu tsî nî “ǃgâiǃō.”—Psalmdi 96:2.

Khoe-i xa ǂâire ǃgâiǂhôas Elob Gaosib dis xats ǁgamba ǁkhā-e tsî hānîǁaeb ǃnâs nē ǃgâiǂhôasa ǁîn ûib ǃnâ tae-e ra ǂâibasensa? Tā nē ǃgâiǂhôas haisi-ams ǃâubasens disa aitsama ǀgui ūbasen. ǁKhāts as kose khoen ǀkha ǀgoragu re!

• Tae-i di “ǃgâiǂhôasa”nî aoǁnâhe?

• Jehovab di ǀHûǀguitimî-aona mati Jesub di ǁkhāǁkhā ǀgauba ra sao?

“Aimâba” di hâ mîs ge ǃnāsase ǂguro ra xū-e dī tsoatsoa khoe-i hîna daosa saora khoena ra ǁkhowa-amba i di ra ǂâibasen. Jesub ge ge aimâba-ao i ǃhūbaib ǃoa sîhe tsîb ge khoena ûiba nî mā tsî daob ores dība nî ǁgause hā amaga. (Mateub 20:28). Nētsēn ge ǁÎb saosabena ǁÎba sao tsî ǁkhān a go ǁaeban khoena ra ǁkhāǁkhāsabe dī amaga. (Mateub 28:19, 20) ǀNî khoen ge nē sîsen-e ge ūǃoa aimâba sîsenni di da ra ǂgai-e.

Aimâba-ao i ge ǀoasa ǁaeba ǃgâiǂhôas ǀguisa ra aoǁnâ. Jehovab di ǀHûǀguitimî-aon hoan ge ǃgâiǂhôasa ra aoǁnâ. ǀNîn ge ǁîn ûiba ǁnādi ge a ǀape ǁgui tsî ǁnaetisa aimâba-aose ǁkhâb hoaba 70 kamaka aoǁnâ sîsenna ra dīna. Nē kamaka sîsen ǂgās ǃaroman ge ǁîna ǀoasa tsēsa ǀhonkhoe-e sîsenba tamahâ tsî ǃkhare tsēs ǀguisa ra sîsen. ǀNîn ge ǀō-aisa aimâba-aon ase ra ǁgaumâihe tsîn ge 130 kamaka ǁkhâb hoaba aoǁnâ sîsenna ra dī, Elob Gaosib xa khoena ǁgambasa ǂhâb kaise a ǀgaisaba. Nē aimâba-aon ge ǁîn ûiba kaise ge supusupu tsî ama ǂhâbasa xūron ǀguina ūhâ, Jehovab ain ta ǂgomǃgâ ǃkhais ǃaroma ǁÎb ǁîna nî kēǃgâ ǃkhai-e. (Mateub 6:31-33; 1 Timoteub 6:6-8) ǃNāsa khoen hîna ǀoasa ǁaeba aimâba-ao ǁoan ge huiǃnâra aimâba-ao kai ǁkhā tsîn ge ǁkhâb ǃnâ 30 tamas ka io 50 kamaka aoǁnâ ǁkhā.

Aimâba-aon ge Elob tsî khoenan ūbahâ ǀnami xa nē sîsena ra dī. Jesub khami da ge sida tsîna ra mû khoen nētsē gāgāsi ǀgâhâ ǃkhai-e. (Markub 6:34) Xawe sida ge ǂansa ūhâ khoena nēsi a huiǁkhā sa tsî hānîǁaeb ǃaroma ǃgâi ǃâubasensa ūhâba hâsa. Khoesi ǀnami ge aimâba-aona ra hui ǁîn di ǁaeb tsî ǀgaiba sîsenūsa, khoena gāgāsise huis ǃaroma. (Mateub 22:39; 1 Tesalonikaǁîn 2:8) Nē ǃkhais xa ǃaromahe hâsen ge ǁîn di ǂgomsa ra ǀgaiǀgaihe tsî ǁîn tsîna Elob ǃoa ra ǀgū, kai ǂkhîb tsî ǃgâiaǂgaoban da tsâ amaga.—ǃNaeǃkhaidi 20:35.

• Aimâba-ao e matits nî mîǃgāǃgā?

• Tae-e ǀnî khoena ra ǁgari ǀoasa ǁaeba aimâba-aose sîsensa?

Aoǁnâ sîsen skoli ǁgauǃnâs ge Jehovab di ǀHûǀguitimî-aon di saosa. ǀŌ-aisa skolgu ge ǂhomisa ǁnān ǁguiǂgāsen ran ǃaroma in ǁîn ‘ǃoabasa dīǀoaǀoa.’—2 Timoteub 4:5.

Aimâba-aon sîsenni skoli. Aimâba-ao-i ga ǂguro kuriba ǀoasase dītoa o, o i ge ǀō-aisa skoli ǃaroma a ǁkhauhe ǁkhā ǃnani tsēde ra hâba ǀHû-omi tawa. Nē skoli ǂâibasens ge aimâba-aona huisa in Jehovaba ǃoa ǀgū, hoa ǀgaugu aoǁnâ sisenni digu ǃnâ huiǃnâhe in ǃgâise, tsî ǁaposase hâǀgara.

Skoli Gaosib di aoǁnâ aon ǃaroma. ǀGam ǁkhâga ra hâ skoli ge a ǃamǁaesa ib ǂansa ūhâ aimâba-aona hui hîna ǁkhoreba ūhâna māsenxase ǁîn hâǃkhaiba ǁnāxū tsî huib a ǂhâsaba ra hui ǂgaona. ǁÎn ge amab ǃnâ, “Nē ta ge a! Tita sî re!” ti ra mî kai Aoǁnâ-aob hîna ge ûihâ ib aiǁgausan ra saose, Jesub Xristuba. (Jesajab 6:8; Johaneb 7:29) ǃNūse omsa xu ǃgûs ge supu ûiǀgauba nî ǂgaoǀkhā nau khoen ûiǀgauba ǀgau hâse. ǃHaoǃnâsi ǁnaedigu, sore mâsib, tsi ǂûn ge hoaragase nî ǀkhara ǁîn ǁnaedi hâna xu. ǁKhāsib ga hâ on ge ǀnî hâ gowaba nî ǁkhāǁkhāsen. Nē skoli ge ǀguri hâ ǃgâsagu, ǃgâsadi tsî ǃgame hân tsîna ra hui 23 sa xu 65 kurigu ǁaegu hâna, in ǁîn gāgāsiǀgauga kaikai ǁîn di ǁgaumâidi ǃnân nî ǂhâga nēn ge nî huini ǀoasase Jehovab tsî ǁîb ǀapeǂhumis tsîna sîsenbasa.

Watchtower Baibel Skoli Gileads dib. Hebreǁîn gowab ǃnâs ge “Gilead” di hâ mîsa “ǀHûǀguitimî-ao” di ra ǂâibasen. 1943ǁÎ kuriba xūn ge 8 000 sîsabena Gilead skoli ai ge ǁkhāǁkhāsenan ge “ǃhūbaib ǀams kōse” ge sîǂuihe kai ǃgâib kōse. (!Nae!khaidi 13:47) Aiǁgause sida di ǂguro sîsaben ge Perub ǃnâ sī-o, o i ge ǀgui ǀhaohâb tsîna ge ǀkhai i xawe da ge nētsē 1000 xa ǃnāsa ǀhaohâga ūhâ. Sida di sîsaben ge Japani ǃnâ aoǁnâ tsoatsoa o, o da ge disis xa ǀoro ǀHûǀguitimî-aona ge ūhâ i, nētsēn ge 200 000 xa a ǃnāsa. Koroǁkhâgu ǁgauǃnâs Gileads tawas ge Elobmîsa ǂōrisase ǁkhākhāsensa ǃkhōǂgā hâ. ǁNān hîna ǀō-aisa aimâba-aon, sîǂuisa sîsaben, tsî ǁNâub berodi tawa hân, tamas ka io ǃnarimâra mûǂam-aogu tsîn ge nē skoli ǃoa a ǁkhauǂuihe ǁkhā. ǂŌrisasen ge ra sī ǁkhākhāhe in nē sîsenna ǁapoǁapo tsî ǀgaiǀgai ǃhūbaib ǂhawase.

• Tae-e a ǂâibasen Aimâba-aon sîseni skoli diba?

• Haman ǃaromab Skoli Gaosib di aoǁnâ aon diba a ǂnuwisa?