1-3. Tae-i dînan khoena ra dî ǁōb xa tsî matin ǀnî eloǃoabade nē dîde ra ǃeream?

ELOBMÎS ge ra mîmâiba da ‘ǁōb ǃaruǀî hâ tidesa’ ǀgui tsē. (ǂHaiǂhais 21:4) Koroǁî danaǃâs ǃnâ da ge go ǁkhāǁkhāsen xoremarib ǁguibas ge ra ī ǁkhā kai î da ǀamo ûiba hō. Xawe da ge noxoba ra ǁō. (Aoǁnâ-aob 9:5) Kai dîs hîna ra dîhes ge, tae-e ra ī ǁō da ga o?

² Nē dîs ǃereamsa hōs ge kaise a ǂhâǂhâsa ǀō-aisase sada ǀnam hâ khoe-i ga ǁō o. ǂHâ ǁkhā da ge a: ‘ǁÎ-e mapa go ī? Sida i ra kēǃgâ? Hui da ǁkhā i a? ǁKhawa xare ǁî-e mû i da nî?’

³ Eloǃoabadi ge nē dîde ǃkharagagu ǀgaugu ai ra ǃeream. ǀNîn ge ra ǁkhāǁkhā khoe-i ga ǃgâise ûi o, o i ǀhommi ǃoa ra ī tsî ǁgaise i ga ûi o, o i ge ǀamoǀaeb ǃnâ sī nî ǂhubi. ǀNîn ge ra mî ǁō du ga o, o du ge ra gaga kai tsî sadu ǁōǂoa ge ǀaokhoen ǀkha sī nî hâ. Tsî ǀnîn ge ra mî ǁō du kas khaoǃgâ du ga ǀgoraǃgâhe o, o du ge ǁkhawa ra ǃnaehe, tamas ka io ǀnî hâ soros ǀkha ra oaǀkhī tsî ǀnî hâ khoe kai tamas ka io a ra xamari kai.

4. Tae-i hoaǃnâ-aixa ǁkhāǁkhāsan eloǃoabade ǁōb xa ra ǁkhāǁkhā?

⁴ Eloǃoabadi ge ǃkharagagu xūna ra ǁkhāǁkhā. Xawe hoadi ge hoaǃnâ-aixase ǀgui xū-i ǀgui-e ra ǁkhāǁkhā. ǁÎdi ge ra ǁkhāǁkhā khoe-i ga ǁō o, o i khoe-i soros ǃâ-e ra ûiǃkharusa. ǁNāsa ama-e?

MAPA DA RA Ī ǁŌ DA GA O?

5, 6. Tae-e ra ī ǁō da ga o?

⁵ Jehovab ge a ǂan tae-i ra īsa ǁō da ga o tsî ǁîb ge ǁnāsa ra mîba da, khoe-i ga ǁō o, o i ge ǁî-i ûiba go ǀam. ǁŌb ge ûib ǀkha ǀgui tama. Khoe-i ga ǁō o, o i ge ǁî-i di tsâsigu tsî ǂâis tsîna ǀnî hâ ǃkhai-i tawa sī ûi tama hâ.a ǁŌ da ga o, o da ge mû ǁoa, ǁnâu ǁoa tsî da ge a ǂâi ǁoa ǁkhawa.

⁶ Gao-aob Salomob ge ge mî “ǁō hân ge xū-i xare-e ǂan tama hâ.” ǁŌ hân ge ǀnam tsî a ǁkhan ǁoa tsî “sîsenni xareb, tsî ǃereams xares, tsî ǂans xares, tsî gā-aisib xareb ge ǀhobas, ǁîs ǃoats garus ǃnâ hâ tama hâ xuige.” (Khomai re Aoǁnâ-aob 9:5, 6, 10.) Tsî Psalmdi 146:4 ǃnâs ge Elobmîsa ra mîba da khoeb ga ǁō o, o i “ǁîb di ǀapede ra kā” ti.

JESUB GE ǁŌB XA MÎ I

7. Jesuba tae-e ǁōb xa ge mî?

⁷ ǁÎb di ǃgâi ǀhōsab Lasarub ge ǁō o, ob ge Jesuba ǁîb ǁkhāǁkhāsabega ge mîba: “Lasarub sage horesab ge ǁom hâ.” Xawe Jesub ge ge ǂâibasen tama hâ i Lasarub sâǁgoe hâ ti. Jesub ge ǃaruǀî ge mî: “Lasarub ge go ǁō.” (Johaneb 11:11-14) Jesub ge ǁōba ǁoms ǀkha gere ǀgopeǀnō. ǁÎb ge ge mî tama hâ i Lasarub ǀhommi ǃnâ sī hâ tamas ka io ǁîb di ǁōǂoa ge ǀaokhoen ǀkha ǀguiba hâsa. Tsî ǁîb tsîn ge ge mî tama hâ i Lasarub ǀamoǀaeb ǃnâ ra ǂhubi ti tamas ka io ǀnî hâ khoese ra ǃnaehesa tamas ka io xamarise. Hî-î, Lasarub ge ǃgam ǂoms ǃnâ ǀgui ge hâ i. ǀNî xoadi tsîn ge ǁōba ǃgam ǂoms ǀkha ra ǀgopeǀnō. ǀNî hâ ǁaxasib aib ge Jesuba ǁōba ǁoms ǀkha ge ǀgopeǀnō. Jairub ǀgôasa ǂkhaiǂkhai tsîb ge ge mî, “ǁîs ge ǁō tama xawes ge ǁom hâ.”—Lukab 8:52.

8. Mati da a ǂan Elob ge khoena ǁōn nî ga kuru tama hâ isa?

⁸ Eloba Adammi tsî Eva hâra ge kuru î ra ǁō? Hî-î! Jehovab ge ǁîra ge kuru î ra ǀamose ûi dīǀoaǀoasa ǂurusib ǀkha. Jehovab ge khoena kuru o, ob ge ǁîna turab ǀkha ge kuru în ǀamosib kōse ûi. (Aoǁnâ-aob 3:11) ǁGûn ge ǁîn ǀgôana mû ǂgao tama hâ în kaira tsî ǁō, Jehovab tsîn ge sada ti ǀgui ra tsâba. Xawe Elob ga sada kuru o, ǀamose da nî ûi ga, o tae-i ǃaroma da ǁnâi ra ǁō?

TAE-I ǃAROMA DA RA ǁŌ?

9. Tae-i ǃaromas ge mîmās Jehovab ge Adammi tsî Eva hâra māsa ǁnâuǃāxa i?

⁹ Edenni ǃhanab ǃnâb ge Jehovaba Adamma ge mîba: “Mâ hai-i ǃhanab di-i hoa-i xats ge ǃnorasase a ǂû ǁkhā; xawe ǁnā hais ǃgâib tsî ǂkhabab tsîkha ǂans dis xats ge ǂû tide; ǁîs xats ga ǂû tsēs hoas aits nî ǁō xui-ao.” (Genesis 2:9, 16, 17) ǁNā ǃgāsa mîmās ge ge ǃgom tama hâ i ǁnâuǀnamsa tsî Jehovab ge ge ǂhanu i Adammi tsî Evas tsîna mîbasa tae-i a ǃgâis tsî tae-i a tsūs tsîna. Jehovaba ra ga ǁnâuǀnam hâ o, o ra ge ga ǁgau hâ ǁîb ǂhanuba ra ǃgôasiba ūba hâsa. ǁÎra tsîn ge ga ǁgau hâ matikōse ra ǁîb ge dība ra xūna ra ǃgôaǃgâsa.

10, 11. (a) Satanna mati Adammi tsî Evas tsîna ge ǂgaeǂhapu? (b) Tae-i ǃaroma ra Adammi tsî Eva hâra ǀhapiokaisen ǁoa dī ra ge xū-e xu?

¹⁰ Tsûtsûsa as ge Adammi tsî Eva hâra ge Jehovaba ǁnâuǀnam tama hâ isa. Satanni ge Evas ǃoa ge mî: “O kha, mîb ge xare Eloba: Saro ge ǂû tide mâ hai-i nē ǃhanab di-i hoa-i xa, ti?” Evas ge ge ǃeream: “Sim ge ǂûn nē ǃhanab ǃnâ hâ haidi din xa ra ǂû. Xawe ǂûn nē ǃhanab ǁaegub ǃnâ hâ hais din xab ge Eloba ge mî: ǁÎn xa tā ǂû, î ro ǁîna ǁkhāti tā tsâǀkhā, ǁō ro tidega.”—Genesis 3:1-3.

¹¹ ǁNāpaxūb ge Satanna ge mî: “Tātsē ro kom ǁō tideo. Xawe Elob ge a ǂan, ǁîs xa ro ga ǂû tsēsa xu di saro di mûde nî khowahe ǃkhaisa, o ro ge Elob ǁkhāb khami nî ī, tsî ro ge nî ǂan mâ-i a ǃgâi tsî mâ-i a ǂkhaba ǃkhaisa.” (Genesis 3:4-6) Satanni ge gere ǂhâba is Evasa ǂâi ǁîs aitsama a mîǁguibasen ǁkhāsa tae-i a ǃgâis tsî tae-i a tsūs tsîn ǁaegu. ǁKhā ǁaeb aib ge ge ǂhumi tae-i nî īsa ǁnâuǀnamoǃnâs ga ra o. Satanni ge ge mî Evas ǁō tidesa, ǁnās ǀkhas ge Evasa haisa xu ǂûsa ū tsî ge ǂû tsî ǁîs aob tsîna ge mā. Adammi tsî Eva hâra ge ǃamkuse ge ǂan i Jehovab ge ǁîra ǂkhāsa î ra tā ǁnā haisa xu ǂû. ǂÛ ra ge o, o ra ge ge ǁhûi ǃgāsa tsî supu mîmāsa ǁnâuǀnamoǃnâsa. ǂÛ ra ges ǀkha ra ge ge ǁgau ǃgôasiba ra ǁîra di ǀnamxaǃnâ ǀhomsi ǁGûba ūhâba tama hâsa. ǀHapiokaisen ǁoa ra ge ge i, dī ra ge xū-e xu!

12. Tae-i ǃaroma i a tsûtsûsa Adammi tsî Eva hâra ge Jehovaba ǁnâuǀnamoǃnâ o?

¹² Matikōse i a tsûtsûsa sada di ǂguro ǁgûra ge Kuru-aoba ǃgôasiba ǁgau tama hâ isa! Mati du nî tsâ ǃgomse du kaikai hâ ǀgôan ga sado mâǃoa o tsî sadu mî tama hâ xū-e dī o? Sadu ǂgaoba khôahe tide?

13. Jehovaba tae-e gere ǂâibasen “tsîts kom ǁkhawa nîra tsara kaio” dib ge mî o?

¹³ ǁNâuǀnamoǃnâ ra ge o, o ra ge Adammi tsî Eva hâra ǀamose ûis di ǃēsa ge ǂoaǃnâ. Jehovab ge Adamma ge mîba: “Tsarats kom satsao, tsîts kom ǁkhawa nîra tsara kaio.” (Khomai re Genesis 3:19.) ǁNās ge ra ǂâibasen Adammi ge ǁkhawa a tsara kaisa, kuruheb nîs aiǃâb ge hâ i mâsib ǃoab ge ge oa. (Genesis 2:7) Adammi ge ǁores khaoǃgâb ge ge ǁō tsî ǁkhawa ûi tama.

14. Tae-i ǃaroma da ra ǁō?

¹⁴ Adammi tsî Eva hâra ga Eloba ǁnâuǀnam hâ o, o ra ge nētsēs kōse ga ûitsama hâ. Xawe ǁîba ra ge ǁnâuǀnamoǃnâ o, o ra ge ge ǁore tsî ǀams ai ge a ǁō. ǁOreb ge ǁkhōǁkhōsa ǀaeb khami ī sada ge ǀumiba sada di ǂguro ǁgûra xu. Hoa da ge ǁore-aose ra ǃnaehe ǁnā-amaga da ge ra ǁō. (Romeǁîn 5:12) Xawe ǁnās ge Elob di ǂâibasen tama ge isa khoe da ǃoa-ai. Elob ge tātsēs tsîna ge ǂhâba tama hâ i, în khoena ǁō, Elobmîs ǂûs ge ǁōba “khākhoeb” di ra ǂgai.—1 Korinteǁîn 15:26.

AMAB GE NÎ ǃNORA KAI DA

15. ǁŌb xa hâ amaba mati ra ǃnora kai da?

¹⁵ Amab ǁōb xa hâb ge a ǃnora kai da ǁkhā ǂgui ǂhanu tama hâ ǂâide xu. Elobmîs ge ra ǁkhāǁkhā da ǁō hân tsûba tsâ tama hâsa tsî tsûaǂgaos tsîna dī tamasa. Sada ge ǁîn ǀkha a ǃhoa ǁoa tsî ǁîn tsîn ge sada ǀkha a ǃhoa ǁoa. ǁŌ hâna da ge a hui ǁoa tsî ǁîn tsîn ge sada a hui ǁoa. ǁÎn ge sada a tsûtsû ǁoa, ǁnā-amaga da ge ǁîna ǃao tide. Xawe ǂgui eloǃoabadi ge khoena ra mîba ǁō hân a ûitsama ǃkhaisa tsî ǁîna da a hui ǁkhāsa, ǁkhāǁkhā-aogu tsî ǃanuse ra mûhe khoena da ga ra matare o. Xawe ǁōb xa hâ amaba da ga ǂan o, o da ge nē ǂhumiba ǂgom tide.

16. Tae-i ǂhumiban ǂgui eloǃoabade ra ǁkhāǁkhā ǁōb xa?

¹⁶ Satanni ge ǂhumi ǂgomde ra sîsenū ǂhumiba da ra de î da ǂâi ǁō hân a ûitsama ti. Aiǁgause, ǀnî eloǃoabadi ge ra ǁkhāǁkhā ǁō da ga ra o, o i sada sorodi ǃâ-e ra ûiǃkharusa. Sadu eloǃoabasa ǁnāsa ra ǁkhāǁkhā tamas ka io Elobmîs ta ǁkhāǁkhā-e i ra mî ǁōb xa? Satanni ge ǂhumib ǃnâ-ū khoena Jehovaba xu ra ǂgaebē.

17. Khoen da ǀamoǀaeb ǃnâ ǂhubi ǂâisa tae-i ǃaroma Jehovaba ra ǃkhāǃkhā?

¹⁷ ǂGui eloǃoabadi ra ǁkhāǁkhā xūn ge a buru kai du ǁkhā. Aiǁgause, ǀnîn ge ra ǁkhāǁkhā ǁgai khoen nî sī ǀamoǀaeb ǃnâ ǂhubisa. ǁNā ǂhumib ge Jehovaba ra ǃkhāǃkhā. ǁÎb ge tātsēs tsîna mā-am tide în khoena ǁnāti ī ǀgaub ai ǃgomma tsâ! (Khomai re 1 Johaneb 4:8.) Mati du khoe-i hîna ǀgôa-e ra ǁara-i,ǃomkha ǀaes ǃnâ ǂhubis ǃnâ-ū i xa nî tsâ? ǁNāti ī khoe-i a karoǂgaoxa ti du ge nî ǂâi. ǁÎ-e du ge ǂan ǂgaos tsîna hî tide. Tsî ǁnāb ge ǀgauba Satanni ra ǂhâbaba î da Jehovab xa tsâ!

18. Tae-i ǃaroma da ǁō hâna ǃao tide?

¹⁸ ǀNî eloǃoabadi ge ra mîba da khoe-i ga ǁō o, o i ra gaga kai ti. ǁNāti ī eloǃoabadi ge ra ǁkhāǁkhā î da nē gagana ǃgôa tsî ǃao, ǁîn ǀgaisa ǀhōsa tamas ka io tsū khākhoe kai ǁkhā amaga. ǂGui khoen ge ǁnā ǂhumiba ra ǂgom. ǁÎn ge ǁō hâna ra ǃao tsî ǁnās ǀkha ǁîna ra ǀgoreǀî, Jehovab ose. ǂÂis ǃnâ ūhâ re ǁō hân ge xū-e tsâ tamas ka io hōǃnâ ǁoa, ǁnā-amaga i ge ǂhâbasa tama hâ ǁîna ǃaosa. Jehovab ge sada di Kuru-aoba. ǁÎb ge a ama-ai Elo tsî da ge ǁîb ǀguiba ǀguri nî ǀgoreǀî.—ǂHaiǂhais 4:11.

19. Matib ǁōb xa hâ amaba ǂansa a hui da ǁkhā?

¹⁹ ǁŌb xa hâ amaba da ga ǂan o, o da ge eloǃoabadi ǂhumiba xu nî ǃnora. Tsî nē amab ge nî hui da, î da ǁnâuǃā buruxa mîmâidi Jehovab ge sada di ûib tsî hānîǁaeb ǃaroma dīna.

20. Tae-e da sao ra danaǃâs ǃnâ nî ǁkhāǁkhāsen?

²⁰ ǃKharu ge ǁaeb ǃnâb ge ǀgui ǃgāb Elob diba Job di ra ǂgaiheba ge dî: “Khoeb ga ǁō-o, ûib nî ǁkhawa?” (Job 14:14) Amabes ǃnâ ī ǁkhā-e ǁō hâ khoe-i nî ǁkhawa ûisa? Elob ta Elobmîs ǃnâ mā da ǃereams ge kaise a buruxa. Sao ra danaǃâs ǃnâ da ge ǁî-e nî mû.

1-3. Tae-e hoa da ǃkhōsis ǃnâ ūhâ tsî Jehovaba mati nî ǃnora kai da?

ǂÂI RE ûib ǃkhō-oms ǁkharaba du ge go ǁkharahe, sadu dī tama hâ ǂkhabadīb ǃaroma. ǃĒ-i ge a ǀkhai sadu nî tātsē ǃnoras di-e. ǃÂubasen-e du ge ūhâ tama hānîǁaeb ǃaroma tsî xū-e du ge a dī ǁoa. Xawe ǂkhabuǂâi du hâ hîna du ge ra ǁnâu ǀgaisa khoe-i ge hâ ǃnora kai du nî-e tsî nē khoe-i ge go mîmâi hui du i nîse! Mati du nî tsâ?

² Hoa da ge ǁōb di ǃkhōsabe da. Tae-i ǀgui-e da ga dī xawe da ge a ǃnora ǁoa. Xawe Jehovab ge ǀgaiba ūhâ ǁōba xu ǃnora kai dasa. Tsî ǁîb ge ge mîmâi “ǀuni khākhoeb, hîkākāhe nîb ge ǁōba.”—1 Korinteǁîn 15:26.

³ ǂÂi re ǃnorasasib hîna du nî tsâba, ǁkhawa du ǁō tide sadu ga ǂan o! Xawe Jehovab ge ǁōb ǀguiba ūbē tide. ǁÎb ge ǁnān hîna ge ǀnai ǁōna ǁkhawa ûiba nî mā. ǂÂi re ǁnās tae-e nî ǂâibasenba du sa. ǁÎb ge ge mîmâi “ǁō hân ge nîra ûi” ǁōb ǃnâ a ǀgai on hoana. (Jesajab 26:19) Nēs ge Elobmîs xa khâis di ra ǂgaihe.

ǀNAM DA HÂ KHOE-I GA ǁŌ O

4. (a) Tae-e ǁkhaeǂgaosa a mā da ǁkhā sada ǀaokhoe-i tamas ka io ǀgū ǀhōsa-i ga ǁō o? (b) Hamna ge Jesub di ǀgū ǀhōsa-i?

⁴ Sada di ǀaokhoe-i tamas ka io ǀgū ǀhōsa-i ga ǁō o, ob ge sada di tsûb tsî ǃoab tsîna tanihe ǁoasase a kai. Huioǃnâse da ge ra tsâ. Xū-e da ge a dī ǁoa ǁnā khoe-e ǁkhawa ûi kaisa. Xawe Elobmîs ge ama ǁkhaeǂgaosa ra mā da. (Khomai re 2 Korinteǁîn 1:3, 4.) Hā re î da ǀgui aiǁgausa ǃhoaǃgao ǁgau rasa matikōseb Jehovab tsî Jesub tsîna sada di ǁōǂoa ge ǀnamsana ra ûiba ǁkhawa mā ǂgao ǀgausa. Jesub ge ǃhūbaib ai hâ i o, ob ge Lasarub tsî ǁîb ǀgam ǃgâsara Martas tsî Marias tsîna gere sari. Hoa ǃnonan ge ge Jesub di ǃgâi ǀhōsa-i. Elobmîs ge ra mî: “Tsîb ge Jesuba Martas, tsî ǁîs di ǃgâsas tsî Lasarub tsîna ǀnam ge i.” ǁNāpaxūb ge Lasaruba ǀgui tsē ge a ǁō.—Johaneb 11:3-5.

5, 6. (a) Jesuba tae-e ge dī Lasarub ǀaokhoen tsî ǀhōsanab ge mû o, ǃoab ǃnâ hâna? (b) Tae-i ǃaroma i a ǁkhaeǂgaoxa ǂansa Jesub ge mati ǁōb xa tsâ ǀgausa?

⁵ Jesub ge Martas tsî Marias tsîna sī ge ǁkhaeǂgao. Martas ge ǁnâu o, Jesub ǃgoaxasa os ge ǃās ǃgauga ge ǂoa is sī ǃgûǃoa bi. ǁÎs ge kaise gere ǃgâiaǂgao Jesuba mûsa, xawes ge ǁîb ǃoa ge mî: “Sats ga nēpa hâ hâo, ob ge ti ǃgâsaba ga ǁō tama hâ.” Martas ge ge ǂâi hâ i Jesub ge ǃonkhao ti. ǁNās khaoǃgâb ge Jesuba ǁîs di ǃgâs Mariasa ā rase ge mû. Ob ge kaise ge tsûaǂgao tsî ge ā. (Johaneb 11:21, 33, 35) ǁÎb ge ǃgam tsûb hîna ǀnam da hâ khoe-i ga ǁō o, ra hāba ge hōǃâ.

⁶ ǁKhaeǂgaohe da ge ra ǂansa Jesub tsîn ta sada khami ǁōb xa tsâsa. Tsî Jesub ge ǁîb ǁGûb khami ī. (Johaneb 14:9) Jehovab ge ǀgaiba ūhâ ǁōba ǀamosib kōse ūbēsa tsî ǁîb ge ǁnāsa ǀgūǁae nî dī.

“LASARUTSE, ǂOAXA!”

7, 8. Tae-i ǃaromas ge Martasa ǂgao tama hâ i Lasarub ǀhobasa xus ǀuisa nî ūbēhesa xawe Jesuba tae-e ge dī?

⁷ Jesub ge ǀhobas Lasarub di soros ge hâ iba sī o, os ge dao-amsa kai ǀuib ǀkha ge ǂganamsa i. Jesub ge ge mî: “ǀUisa ūbē.” Xawe Martas ge ge ǂgao tama hâ i. Lasarub soros ge hakaǁî tsēs ais tsîna ǀhobas ǃnâ hâ i amaga. (Johaneb 11:39) ǁÎs ge ge ǀū i Jesub ǁîs ǃgâsaba ra hui ǂgaosa.

⁸ Jesub ge Lasarub ǃoa ge mî: “ǂOaxa!” Martas tsî Marias tsîn ge sao rase mûn ge ge buruburuxa i. “Ob ge ǁō hâba ge ǂoaxa, ǃomkha tsî ǂaira ai ǀhobas ǃkhaiga ǃgaehe hâse.” (Johaneb 11:43, 44) Lasarub ge ge ûi-ûihe ǁkhawa! ǁÎb ǀaokhoen tsî ǀhōsan ǀkhab ge ge ǀhaoǀhaohe. ǁÎn ge ǁîba ge ǃkhōǂgā ǁkhā i, tsâǀkhā bi tsî ǁîb ǀkha gere ǃhoa. Tae-i buruxa sîsenna! Jesub ge Lasaruba khâisa ge mā.

“ǀGÔAROSE, TITA RA MÎBA SI: ‘ǂKHAI!’”

9, 10. (a) Ham-e Jesuba ǀgaiba ge mā ib khoena khâisa mā? (b) Tae-i ǃaromas khâis di ǃnuriga a ǀō-aisaba da?

⁹ Jesuba khoena ǁîb ǀgaib ǀkha khâisa gere mā? Hî-î. Lasarubab nî khâisa mās aiǃâb ge Jesuba Jehovab ǃoa ge ǀgore tsî Jehovab ge ǁîba ǀgaiba ge mā ib Lasaruba khâisa mā. (Khomai re Johaneb 11:41, 42.) Lasarub ǀguib ge khâisa māhe tama hâ. Elobmîs ge disiǀgamǀā kurixa ǀgôas hîna ge kaise ǀaesen hâ is xa ra mîba da. ǁÎs di dadasab Jairub ge ǂhansen tsî Jesuba gere ǀkhoma ib ǁîsa ǂuruǂuru. ǁÎs ge ǁîb di ǀguise ǃnaesa ǀgôa ge isa. ǁÎb ta Jesub ǀkha mâ ǃhoa hîna gu ge ǀnî khoega ge ǀkhī tsî ge mî: “Sa ôas ge go ǁō. Tarexats ra ǁkhāǁkhā-aoba gorose ǀhupuǀhupu?” Xaweb ge Jesuba Jairub ǃoa ge mî: “Tā ǃao; ǂgoms ǀguisa hî re” ǁîs ge nî sâuhe. ǁÎb ge ǁnāpaxū Jairub ǀkha ǁîb oms ǃoa ge ǃgû. Omsa gu ra ǀgū khamib ge Jesuba ge mû tsî khoen di āba ge ǁnâu. Jesub ge ge mîba nî: “Tarexa du ǂkhupi tsî ra ā, ǀgôaros kom ǁō tama tsî ǁom hâo.” ǁÎs ǁgûra ge ǀnîsi gere ǂhâ Jesub tae-e gere ǂâibasensa. Jesub ge hoana ge ǂgan în ǂoa tsî ǁgûra ge sī-ū ǀgôas ǁgoeba. Jesub ge ǃamkuse ǃommi ai ge ǃkhōsi tsî ge mî: “ǀGôarose, tita ra mîba si: ‘ǂKhai!’” ǂÂi re ǁgûra di ǃgâiaǂgaoba ǁîs ge khâimâ tsî ǃgû tsoatsoa o! Jesub ge ǁîra di ǀgôasa khâisa ge mā. (Markub 5:22-24, 35-42; Lukab 8:49-56) ǁNā tsēsa xun ge nē ǂkhari ǀgôarosa gere mûn hoana gere ǂâi oa Jehovab ge Jesub ǃnâ-ū tae-e a dīsa.a

¹⁰ Jesub ge khâisa mān hoan ge ega ǁkhawa ge a ǁō. Xawe nē khoen xa da ra khomai xūn ge ama ǃâubasensa ra mā da. Jehovab ge khoena khâisa ra mā ǂgao tsî ǁîb ge ǁnāsa nî dī.

KHÂIS DI ǃNURIGA XU TAE-E DA RA ǁKHĀǁKHĀSEN

11. Aoǁnâ-aob 9:5 sa tae-e ra ǁkhāǁkhā da Lasarub xa?

¹¹ Elobmîs ge ǃgāsase ra mî “ǁō hân ge xū-i xare-e ǂan tama hâ.” Nēs ge ge ama i Lasarub xa. (Aoǁnâ-aob 9:5) Jesub ge ge mî Lasarub ǁom hâ ti. (Johaneb 11:11) ǀHobas ǃnâb ge hâ i o, ob ge Lasaruba “xū-i xare-e” ge ǂan tama hâ i.

12. Mati da a ǂan Lasarub di khâis ge ama īsa?

¹² Jesub ge Lasaruba khâisa mā o, on ge ǂgui khoena ge mû. Jesub di khākhoegu tsîn ge nē buruxa sîsenna ge mû. Lasarub ge ûitsama i ǃkhais ge ra ǁgau khâis ge amabes ǃnâ a īsa. (Johaneb 11:47) ǂGui khoen tsîn ge Lasaruba gere sī sari tsî ǁnās ǀkha Jesub ǃnâ ge ǂgom tsoatsoa, ǁîb a Elob di sîsabesa. Jesub di khākhoegu ge ge ǃgâibahe tama hâ i, ǁnās ǀkha gu ge gere ǀapeǀape Jesub tsî Lasarub tsîkha ǃgamsa.—Johaneb 11:53; 12:9-11.

13. Tae-i ǃaroma da a ǂgomǁapo ǁkhā Jehovab khoena ǁōba xu khâisa nî māsa?

¹³ Jesub ge ge mî “ǀhobadi ǃnâ hân” hoan khâisa nî hōsa. (Johaneb 5:28) Nēs ge ra ǂâibasen Jehovab nî ǂâihōn hoan nî ûi-ûihesa. Xawe Jehovab ga khoe-e khâisa mā o, ob ge ǁnā khoe-e ī i ge ī ǀgaub ai nî ǂâihō. ǁNā-e amabes ǃnâ dīhōb nî? ǂÂi re, biliundi ǀgamirodi ge ǀhommi ǃnâ hâ. Xawes ge Elobmîsa ra mî, Jehovab mâ ǀguiǀguibe ǀgamirosa ǀons ai a ǂansa. (Khomai re Jesajab 40:26.) ǁÎb ge mâ ǀguiǀguibe ǀgamiros hoasa ǀons ai a ǂan. Ob kom tox, supuse ûi-ûib nî khoena īn ge ī ǀgaub hoab ǀkha nî ǂâihō o. Jehovab ge hoa xūna ge a kuru, ǁnā-amaga da ge a ǂan ǁîb ǀgaiba ūhâsa khoena ǁkhawa ûi-ûisa.

14, 15. Jobi di mîde tae-e khâis xa ra ǁkhāǁkhā da?

¹⁴ ǂGomǂgomsa aob Jobi ge khâis ǃnâ gere ǂgom. ǁÎb ge ge dî: “Khoeb ga ǁō-o, ûib nî ǁkhawa?” ǁNāpaxūb ge Jehovab ǃoa ge mî: “Ots ga satsa ǂgai, tsî tita ga ǃeream tsi, ots ga sîsenni sa ǃomkha diba ǁkhore.” Î, Jobi ge ge ǂan i Jehovab ta ǁkhoresa ǁō hâna khâisa māsa.—Job 14:13-15.

¹⁵ Khâis di ǃâubasensa mati ra tsâ kai du? ǀNîsi du ge ra ǂhâ, ‘Ti omaris ǁanin tsî ǀhōsan hîna ge ǁōna xare khâisa hō in nî?’ ǁKhaeǂgaohe da ge ra ǂansa Jehovab amabes ǃnâ ǁō hâna ra ûi-ûi ǂgaosa. Hā re î da kē Elobmîs tae-e ra mîsa mapan nî hâsa tsî ham ân nî khâisa māhesa.

ǁÎN GE ‘ǁÎB DI DOMMA NÎRA ǁNÂU’ TSÎ NÎ KHÂI

16. Tae ǃnôa ûiban ǁnān hîna ǃhūbaib ai khâisa nî hōna nî ūhâ?

¹⁶ ǃKharu ge ǁaeb ain ge ǁnān hîna gere khâisa māhena ǁîn omaris ǁanin tsî ǀhōsan ǀkha ǃhūbaib ai gere ǀguiǃnâxa kaihe. Nēs tsîn ge hānîǁaeb ai nî ī xawe kaise nî ǂoaǂamsa. Tae-i ǃaroma? ǁNān hîna nî khâisa māhen ge ǃēsa nî ūhâ ǀamosib kōse ûisa tsî ǁkhawa ǁō tide. Tsî ǁîn ge ǀkharaǀkharasa ǃhūbaib ai nî ûi, nē da sada ûi ǃnâ hâb ose. ǁNāpa i ge toro-i, ǂkhabadīb, tsî ǀaeb tsîna hâ tide.

17. Hamna khâisa nî māhe?

¹⁷ Hamna khâisa nî māhe? Jesub ge ge mî ‘ǀhobadi ǃnâ hân hoan ǁîb di domma nîra ǁnâu’ tsî nî khâisa. (Johaneb 5:28, 29) Tsî ǂHaiǂhais 20:13 ge ra mîba da: “Ob ge huriba ǁîb ǃnâ hâ ǁō hâna ge mā; o kha ge ǁōb tsî Hadeb tsîkha ǁîkha ǃnâ hâ ǁō hâna ge mā.” Î, biliundi khoen ge ǁkhawa nî ûi. Apostel Paulub tsîn ge ge mî “ǂhanu-ain tsî ǂhanuoǃnân” tsîn khâisa nî hōsa. (Khomai re ǃNaeǃkhaidi 24:15.) Nēsa tae-e ra ǂâibasen?

18. Hamna ‘ǂhanu-aina’ khâisa nî māhena?

¹⁸ “ǂHanu-ain” ge ǂgomǂgomsa ǃoaba-aon Jehovab din hîna ge Jesub nî ǃhūbaib ǃoa hās aiǃâ ûi hâ îna ǃkhōǂgā hâ. Noaxi, Abrahammi, Saras, Moseb, Ruts tsî Esters ge khâisa nî māhe nēpa ǃhūbaib ai. Sadu ge nē aogu tsî taradi xa a khomai ǁkhā Hebreǁîn di 11ǁî danaǃâs ǃnâ. O Jehovab di ǂgomǂgomsa ǃoaba-aon sada ǁaeb ǃnâ ra ǁōn? ǁÎn tsîn ge a “ǂhanu-ai” tsî ǁnās ǀkha khâisa nî māhe.

19. Hamna ‘ǂhanuoǃnâna’? Tae-i ǃēsan Jehovab xa nî māhe?

¹⁹ “ǂHanuoǃnân” ge biliundi khoena ǃkhōǂgā hâ hîna ge ǃēsa ūhâ tama hâ îna Jehovab xa ǁkhāǁkhāsensa. ǁŌn ge xaweb ge Jehovaba ǁîna ǀuru tama hâ. ǁÎb ge ǁîna khâisa nî mā tsî ǁîn ge ǃēsa nî ūhâ ǁîb xa ǁkhāǁkhāsensa tsî ǁîba ǃoabasa.

20. Tae-i ǃaroman hoa khoena khâisa māhe tide?

²⁰ Nēsa ra ǂâibasen hoa khoen hîna ge ǁōn nî khâisa hō di? Hî-î. Jesub ge ge mî ǀnîn ge ûi-ûihe tide. (Lukab 12:5) Ham-e nî mîǁgui khoe-i nî khâisa māhe tamas ka io māhe tidesa? Jehovab ge ǀuniga ǀgoraǃgâ-aoba xaweb ge Jesub tsîna ǀgaiba ge mā îb ‘ûitsaman tsî ǁō hân tsîn di ǀgoraǃgâ-ao.’ (ǃNaeǃkhaidi 10:42) Khoe-i xare-i ga eloxoresase ǀgoraǃgâhe o tsî i ga māsen ǂgao tama i o ǀkharaǀkharasensa, o i ge ǁî-e khâisa māhe tide.—19ǁÎ ǀArosa ǃgāsasiba mû re.

ǀHOMMI DI KHÂIS

21, 22. (a) Tae-e i ra ǂâibasen ǀhommi khâisa hōsa? (b) Ham-e ge ǂguro khoe-i ǀhommi khâisa ge ǃkhōǃoa-e?

²¹ Elobmîs tsîn ge ra mîba da ǀnî khoen ǀhommi ǃnâ sī nî ûisa. Khoe-i ga ǀhommi khâisa hō o, o i ge khoesi soros ǀkha ûi-ûihe tama hâ. ǁÎn ge gagasi khâisa ra hō în ǀhommi ǃnâ sī hâ.

²² Jesub ge ge ǂguro i nēti ī khâisa ge a ǃkhōǃoaba. (Johaneb 3:13) ǃNona tsēdi ǃgamheb ges khaoǃgâb ge Jehovaba khâisa ge mā bi. (Psalmdi 16:10; ǃNaeǃkhaidi 13:34, 35) Jesub ge khoesi soros ǀkha khâisa māhe tama hâ. Apostel Petrub ge ra ǁguiǃā “ǁgans ǃnâb ge ǃgamhe, xaweb ge Gagas ǃnâ ge ûi-ûihe.” (1 Petrub 3:18) Jesub ge ge ûi-ûihe ǀgaisa gagasi khoese! (1 Korinteǁîn 15:3-6) Xawe Elobmîs ge ra mî ǁîb ǀguib nē khâisa hō tidesa.

23, 24. Hamna ‘ǂkhari gūrona’ Jesub gere ǃhoaǃgaona tsî matikō în a?

²³ ǁŌb nîs aiǃâb ge Jesuba ǁîb di ǂgomǂgomsa ǁkhāǁkhāsabega ge mîba: “ǃGûsī ta ra, hâǃkhai-e ta nî ǂhomiba gose.” (Johaneb 14:2) Nēs ge gere ǂâibasen ǀnî ǁkhāǁkhāsabegu ǁîb digu nî ǁîb ǀkha ǀguiba ǀhommi ǃnâ sī hâsa. Matikōna? Jesub ge ge mî ǂkhari ǃgôab ‘ǂkhari gūron’ din asa. (Lukab 12:32) Apostel Johaneb ge nē ǃgôaba ge mā, Jesubab ge mû o “Sionǃhommi ai ge mâ i, tsî ǁîb ǀkha ǀguikaidisi tsî hakadisihakaǀaǀoadisin.”—ǂHaiǂhais 14:1.

²⁴ Mâǁaen nē ǀguikaidisi tsî hakadisihakaǀaǀoadisin [144 000] Xristeǁîna khâisa nî māhe? Elobmîs ge ra mîba da ǁnās nî īsa Xristub ga ǀhommi ǃnâ ǂgaeǂgui tsoatsoa o. (1 Korinteǁîn 15:23) Sada ge nēsi ǁnā ǁaeb ǃnâ ûi hâ tsî ǃnāsan hîna nē ǀguikaidisi tsî hakadisihakaǀaǀoadisin ǃgôaba ra kuruǂuin ge ǀnai ǀnîna ǀhommi khâisa ge hō. ǁNān hîna noxoba ǃhūbaib ai hân tsî sada ǁaeb ǃnâ ra ǁōn ge ǃnape tama hâse ǀhommi khâisa ra hō. ǁNās xōǀkhān ge ǂgui khoena Paradais ǃhūbaib ai khâisa nî hō ǀgūǁaeb ǃnâ.

25. Tae-e da nî ǁkhāǁkhāsen sao ra danaǃâs ǃnâ?

²⁵ ǀGūǁaeb ge Jehovaba khoesiba ǁōba xu nî ǃnora kai tsî ǁōb ge ǀamosib kōse hâ tide! (Khomai re Jesajab 25:8.) Xawe ǁnān hîna ǀhommi ǃoa ra īna tae-en ǁnāpa sī nî dī? Elobmîs ge ra mî ǁîn Jesub ǀkha ǀguiba sī nî ǂgaeǂguisa Gaosib ǂhanub ǃnâ. Sada ge ǃnāsase nî ǁkhāǁkhāsen ǁnā ǂhanub xa sao ra danaǃâs ǃnâ.