ǀAROSA ǃGĀSASIGU
1 JEHOVAB
Elob ǀons ge a Jehova tsî ra ǂâibasen “Tita ge ī ta a khami nî īta” [tamas ka io ǁÎb mîmâidi hoade a dīǀoaǀoa ǁkhā]. Jehovab ge hoaǀgaixa Eloba tsî ǁîb ge hoana ge a kuru. Tsîb ge ǁîba ǀgaiba ūhâ ǂhâbab hân hoana dīsa.
Hebregowab ǃnâ i ge Elob ǀonsa haka xoamûde ūhâ. Tsî ǀawaǃaogowab ǃnâ i ge nē xoamûde YHWH tamas ka io JHVH sa ra ǂnûǁkhaeba. Elob ǀons ge Hebre xoadi ǃnâ ǁaubexa 7 000 ǃnāde ra hō-e. ǃHūbaib ǂhawasen ge khoena Elob ǀonsa ǂguiǃnâgu ǀgaugu ǃnâ ra ǂgaiǂui tsî ǁîn di gowagu ǃoagu ra sîsenū.
2 ELOBMÎS GE ELOB XA “ǃGOMǂGĀǃNÂHE H”
Elobmîs ge Eloba xu hâ tsî khoegu hîna gere sîsenūhe ga xū hâ tama. Nēs ge a ǀgui sîsenni danab hîna ǁîb di xoa-aosa ǁîb ǂâide ǃkhōǂgā hâ sîǂkhanisa ra xoa kaib ǀkha. Elob ge ǁÎb di ǃanu gagab ǀkha Elobmîs xoa-aoga ǁÎb ǂâide gere xoa kai. Elob di ǃanu gagab ge ǁîga ǂguiǃnâgu ǀgaugu ai gere daoǁgau, nē gagab ge gere huigu î gu ǁhapode hō tsî ǁnā xūna xoamâi.
3 TSOATSOADI
Nēdi ge ǁkhāǁkhāde Elobmîs ǃnâ hâ amaba ra ǁgûiǃāde. Aiǁgause tsoatsoas hîna ǁgai ǀhōsan ge “ǃgâi ǂūga ra ǁgaoǁgao” ti hâs ge ra ǁgau khoen hîna da ra hâ ǀhao-ūn a ǂgaeǂhapu da ǁkhā ǃkhāisa. (1 Korinteǁîn 15:33) Tsî tsoatsoas “khoe-i ga tsoro-i hoa-i, ǁnā-e i kom ǁkhāti nîra ǃgaobaseno” ǁnās ge ra ǁkhāǁkhā sida dīxūn ǃaroma da aitsama nî ǃereamsa.—Galateǁîn 6:7.
4 KĒBOS
Eloba xu hâ haisi-ams. Kēbodi ge Elob di ǂâis, ǃanu ûi ǀgaub, mîmadi tamas kai o ǁÎb ǀgoraǃgâde khoena a mîǃāba ǁkhā. ǁÎ di ge hānîǁaeb ǃnâ nî ī xūn tsîna a mîǃā ǁkhā. ǂGui kēbodi hîna Elobmîs ǃnâ hâdi ge ǀnai ge dīǀoaǀoahe.
5 KĒBODI MESIAB XA
Elobmîs ǃnâ hâ kēbodi Mesiab xa di ge Jesub ǃnâ-ū ge dīǀoaǀoahe. “Kēbodi Mesiab xa” hâ boksisa mû re.
▸ 2ǁÎ danaǃâs, 17ǁî xoaǀgoras, ǁnaeǁgau saos.
6 JEHOVAB DI ǂÂIBASENS ǃHŪBAIB ǀKHA
Jehovab ge ǃhūbaiba paradais ase ge kuru în khoen hîna ǁÎba ǀnamna ǁnāpa ǁan. ǁÎb di ǂâibasens ge daba tama hâ. ǀGūǁaeb ge Eloba eloxoresasiba nî ūbē tsî ǁÎb khoena ǀamo ûiba nî mā.
7 SATANNI ǁGÂUAB
Satanni ge ǀhomǃgāb hîna ge Eloba a mâǃoaba. ǁÎb ge Satanni di ra ǂgaihe, “Mâǃoa-aob” di ra ǂâibasensa ǁîb Jehovaba ra mâǃoa xui-ao. ǁÎb ge ǁGâuab di ra ǂgaihe “ǂHumi-aob” di ra ǂâîbasensa Elobab ra ǂhumiǂgā-am xui-ao.
8 ǀHOMǃGĀGU
Jehovab ge ǀhomǃgāga ǃhūbaibab nî kurus aiǃâ ǀnai ge kuru. ǁÎgu ge ǀhommi ǃnâgu nî ǁan ga ge kuruhe. ǁNāpa i ge kaidisi miliundi ǀhomǃgāga hâ. (Danieli 7:10) ǁÎgu ge ǀon di tsî ǃkharaǃnâgu ǀgaugu tsîna ūhâ tsî nē ǂgomǂgomsa ǀhomǃgāgu ge ra ǂkhā khoen xa ǀgoreǀîhesa. Tsî ǁîgu ge ǃkharagagu ǃharodi tsî sîsengu tsîna ūhâ. ǁÎgu ge Jehovab trons aisi mâ tsî ǁîba ra ǃoaba tsî ǁÎb di haisi-amde ra māǂui. ǃHūbaib ai hâ Elob ǃoaba-aona gu ge ǃûi, daoǁgau tsî Jehovab di ǀgoraǃgâsa sîsenǂui tsî aoǁnâ sîsenni tsîna ra ǂkhâǃnâ. (Psalmdi 34:7; ǂHaiǂhais 14:6; 22:8, 9) Hānîǁaeb ǃnâgu ge ǁîga Jesub ǀkha ǀguiba Armagedons torob ǃnâ nî ǃkham.—ǂHaiǂhais 16:14, 16; 19:14, 15.
▸ 3ǁÎ danaǃâs, 5ǁî xoaǀgoras; 10ǁî danaǃâs, 1ro xoaǀgoras
9 ǁOREB
Jehovab ǂgao tama hâ xūna da ga ra tsâ, ǂâi tamas ka io ra dī o da ge ra ǁore. ǁOreb sada dī ǀhōsasisa Elob ǀkha nî tsûtsû xui-aob ge ǁîba ǁgaragu tsî tsoatsoade ge mā da hîna ra hui da na î da tā ǂan da a tsū xūna dī. Tsoatsoas ǃnâb ge Jehovaba hoaraga xūna ǀhōasase ge kuru xawe ra ge Adammi tsî Evas tsîna ge ǁhûi Jehovaba ǁnâuǀamoǃnâsa, ǁîra ge ge ǁore tsî dīǀoaǀoasa kurusa ge ǂoaǃnâ. ǁÎra ge kaira tsî ge ǁō tsî da ge sida ǁoreba Adama xu ge ǀumi, ǁî-i ǃaroma da ge sida nētsē kaira tsî ra ǁō.
▸ 3ǁÎ danaǃâs, 7ǁî xoaǀgoras; 5ǁî danaǃâs, 3ǁî xoaǀgoras
10 ARMAGEDONS
Nēb ge Elob di torob hînab eloxoresa ǃhūbaiba nî dīkākā ūba.
▸ 3ǁÎ danaǃâs, 13ǁî xoaǀgoras; 8ǁî danaǃâs, 18ǁî xoaǀgoras
11 ELOB GAOSIB
Elob Gaosib ge ǂhanub hînab ge Jehovaba ǀhommi ǃnâ a ǂnûikhâiba. Jesub Xristub ge Gao-aob ǁnā Gaosib dib ase ra ǂgaeǂgui. Hānîǁaeb ǃnâb ge, Jehovaba ǁîb Gaosiba nî sîsenū îb eloxoresasiba ūbē. Elob Gaosib ge ǀamosib kōse nî ǂgaeǂgui.
12 JESUB XRISTUB
Elob ge Jesuba ǂgurose hoa xūn aiǃâ ge kuru. Jehovab ge Jesuba ǃhūbaib ǃoa ge sî îb khoen ǃaroma hā ǁō. ǁÎb ge ǃgamhes khaoǃgâb ge Jehovaba ǁîba khâisa ge mā. Jesub ge nēsi Elob Gaosib di Gao-aob ase ra ǂgaeǂgui.
13 KĒBOS 70 WEKHEGU DIS
Elobmîs ǃnâ i ge ǀnai ge kēbo-e Mesiab mâǁae nî hā ǃkhaisa. Tsî nēs ge 69 wekhegu di ǁaeb ǃnâ nî i ge i, ǁnās ge 455ǁî kurib Jesub aiǃâ tsî 29ǁî kurib Jesub khaoǃgâ ge ǀam.
Mati da a ǂan ǁîs ge 29ǁî kurib Jesub khaoǃgâ a ǀamsa? ǃNanidisikhoeseǀa wekhegu ge 455ǁî kurib Jesub aiǃâ ra tsoatsoa, ǁnās ge Nehemiab ge Jerusalems ǃnâ sī tsî ǃāsa a om tsoatsoa o. (Danieli 9:25; Nehemiab 2:1, 5-8) “Dosain” di hâ mîs ge 12ǁî ǃgôas xa ra ǂâi kai da khamis ge 7ǁî ǃgôasa “wekheb” xa ra ǂâi kai da. Nē kēbodi ǃnâ hâ wekhegu ge wekhegu hîna 7 tsēde ūhâ gu xa ǃhoa tama hâ xawe wekhegu 7 kurigu di gu xa ra ǃhoa, kēbodi ǁgarab “mâ tsēs hoasa ǀgui kurib” ti ra mîb ǃhoa. (Numeri 14:34; Esegieli 4:6) Nēs ge ra ǂâibasen mâ wekheb hoab 7 kuriga a gaxusa tsî 69 wekhegu 483 (69 x 7) kuriga ra kuruǂuisa. Tsî da ga 483 kuriga 455ǁî kurib Jesub aiǃâ sa xu ga ra ǃgôa o, o i ge 29ǁî kurib Jesub khaoǃga ra ǀuni. ǁNā kurib ǂûb ǃnâb ge Jesuba ge ǁāǁnâhe tsî ge Mesia kai!—Lukab 3:1, 2, 21, 22.
Nē kēbos ge ǁkhawa ǀnî hâ wekheb xa ge ǃhoa, ǀgau raba 7 kurigu ǀkha. Tsî 33ǁî kurib Jesub khaoǃgâb ge Mesiaba ge ǃgamhe tsî 36ǁî kurib Jesub khaoǃgâ i ge ǃgâiǂhôas Elob Gaosib dīsa nî aoǁnâhe hoaraga ǃhaodi ǃoa Jodeǁîn ǀguin ose.—Danieli 9:24-27.
14 ǃNONA ǀGUIRA ELO ǁKHĀǁKHĀS
Elobmîs ge ra ǁkhāǁkhā Jehova Elob a Kuru-aosa tsîb ge Jesuba hoa xūn aisi a kuru ǃkhaisa. (Koloseǁîn 1:15, 16) Jesub ge Hoaǀgaixa Elo tama hâ. ǁÎb ge tātsē tsîna Elob ǀkhāb a ǀguitikō ti ge mî tama hâ i. ǁÎb ge “Abob tita ǃgâ-ai a kai” ti ge mî. (Johaneb 14:28; 1 Korinteǁîn 15:28) ǀNî eloǃoabadi ge ǃnona ǀguira Elob xa ra ǁkhāǁkhā, ǁîn ge ǃnona khoen ǀgui Elob ǃnâ hâ di ra mî: ǁGûb, ǀGôab tsî ǃanu gagab. “ǃNona ǀguira” di hâ mîs ge Elobmîs ǃnâ hâ tama. Nēb ge ǂhanu tama ǁkhāǁkhā ǀgauba.
ǃAnu gagab ge Elob da sîsenū ǀgaiba, tsî ǁîb ge nē ǀgaib ǀkha ǁîb di ǂâisa ra dīǀoaǀoa. ǃAnu gagab ge khoe tama hâ. Aiǁgause ǂgurokamǁaeb di Xristeǁîn ge “ǃAnu Gagab xa,” ge ǀoahe tsîb ge Jehovaba ge mî tita ge “ti Gagaba ǁgans hoas ai nîra ǁhōǂui.”—ǃNaeǃkhaidi 2:1-4, 17.
▸ 4ǁÎ danaǃâs, 12ǁî xoaǀgoras; 15ǁî danaǃâs, 17ǁî xoaǀgoras
15 KRUISEB
Ama Xristeǁîn ge ǁîn ǀgoreǀîs ǃnâ kruiseba sîsenū tama hâ. Tae-i ǃaroma?
Kruiseb ge ǀhapese ama tama ǂgomdi ǃnâ ra sîsenūhe. ǃKharu ge ǁaegu ǃnâb ge kruiseba kurusa xūna ǃoabas tsî ǀūben ǁgoe-ūgub ǁnaetigu ǃnâs tsîna gere sîsenūhe. Kruiseb ge 300 kurigu Jesub di ǁōb khaoǃgâ Xristeǁîn xa ǁîn ǃoabas ǃnâ ge sîsenū tama hâ i. Romeǁî Gao-aob Constantinib ge ega kruiseba ge kuru Xristeǁîn di saos ase. Nē saos ge ge a dīhe is Xristesisa ǂanǂansa kai. Xawe kruiseb ge Jesub Xristub ǀkha dīxū-e ge ūhâ tama hâ. The New Catholic Encyclopedias ge ra ǁguiǃā: “Kruiseb ge Xristeǁîn aiǃâ ge tsoatsoahe tsî Xristeǁîn ǁnaeti tama hâ xawe khoesi ǁnaetigu ai a ǃgaoǃgaosa.”
Jesub ge kruiseb ai ǁō tama hâ. Grikegowab mîs “kruiseb” di hâs ge ra ǂâibasen “ǂgōse mâ haib,” “ǃnaob,” tamas ka io “hais.” The Companion Bibles ge ra ǁguiǃā: “Xū-i ge a ǀnai ǀAsa testaments ǃnâ ǀgam ǃnao kha ǃoa ra ǁnaeǁgau-e.” Jesub ge ǂgōse mâ haib ai ge a ǁō.
Jehovab ge ǂgao tama hâ î da ai-īsiga sada ǀgoreǀîs ǃnâ sîsenū.—Eksodus 20:4, 5; 1 Korinteǁîn 10:14.
16 ǂÂIǂÂISENS
Jesub ge ǁîb khāǁkhāsabena ge mîmā în ǁîb ǁōba ǂâiǂâisen. ǁÎn ge nēsa mâ kurib hoaba ra dī 14ǁî tsēs Nisani dis ai, Israelǁaes gere pasxaba tsēdī tsēs ai. Pere-i tsî xûi-i tsîn ge Jesub soros tsî ǀaob tsîna ra ǂnûǁkhaeba. Nē pere-i tsî xûi-i tsîn ge ra sî mâ-e î-i mâ khoe-i hoa-e mû Jesub ǁōb di ǂâiǂâisens tawa. ǁNān hîna Jesub ǀkha nî sī ǀhommi ǃnâ ǂgaeǂguin ge pere-e ǂû tsî xûi-e xu nî ā. ǁNān hîna ǀamose ǃhūbaib ai nî hân ge ǃgôasib ǃnâ nē ǂâiǂâisensa ra hâǃnâ xawe pere-e ǂû tsî xûi-e xu ā tama hâ.
17 ǀOMS
Nama/Damara Elobmîs ge “ǀoms” di hâ mîsa ra sîsenū (1) khoe-i, (2) ǀguru-i, tamas ka io (3) khoe-i tsî ǀguru-i di ûib ǃoa ra ǁnaeǁgau.Nēn ge ǀnî aiǁgaude:
Khoen. “Noaxi tsēdi. . . ǃnâ di ge ǁkhaisa ǀomde, ǁgamma xu ge sâuhe.” (1 Petrub 3:20) Nēbas ge “ǀomde” khoen ǃoa ra ǁnaeǁgau—Noaxi, tsî ǁîb taras, ǁîb ǃnona ǀgôagu tsî ǁîgu taradi tsîn ǃoa.
ǀGurun. “Ob ge Eloba ge mî: A gu ǁgamga ǃnāǂamsase ūǀkhī gons ûitsama ǀomdi disa, în anina doe ǃhūbaib ǂamǃnâ ǀhommi di ǃāǂuisab ǃnâǃ Ob ge Eloba ge mî: Ab ǃhūba ūǀkhī ûitsama ǀomde ǁîdi di ǃnôaba ǃoa, tsî ǂhanaben tsî ǀgurun ǃhūbaib din tsîna ǁîn di ǃnôaba ǃoa! Tsî i ge ǁnāti ge ī.”—Genesis 1:20, 24.
Khoe-i tsî ǀguru-i ûib ǃoa ra ǁnaeǁgau. Jehovab ge Moseba ge mîba: “ǁNā aogu sa ǀomsa gere ôa-amgu hoagu ge ǁō.” (Eksodus 4:19) Jesub ge ǃhūbaib ai hâ io, ob ge ge mî: “Tita ge ǃgâi ǃÛi-aota. ǃGâi ǃÛi-aob ge ǁîb di ûiba ǁîb di gūna ra mâiba.”—Johaneb 10:11.
ǀArosase, khoe-i ga xū-e ǁî-i di “ǀoms hoas” ǀkha dī o, os ge nēsa ra ǂâibasen ǁî-i māsenxase ǁî-i di ǁkhāsib hoab ǀkha xū-e ra dīsa. (Mateub 22:37; Deuteronomium 6:5) “ǀOms” di hâ mîs tsîn ge a sîsenūhe ǁkhā turab ûitsama kurusabe-i di-i ǃoa. ǁŌ hâ khoe-i tamas ka io ǁō hâ soros ǃoas tsîna da ge a mî ǁkhā ǁō hâ ǀoms di.—Numeri 6:6; ǂKhoamîdi 23:2; Jesajab 56:11; Hagaib 2:14.
▸ 6ǁÎ danaǃâs, 5ǁî xoaǀgoras; 15ǁî danaǃâs, 17ǁî xoaǀgoras
18 GAGAB
Hebregowab tsî Grikegowab mî ra “gagab” di ra ǂnûiǃkhunihe ra ge ǃkharagagu ǂâibasende a ūhâ ǁkhā Elobmîs ǃnâ. ǁÎs ge khoen xa mûhe ǁoasa xū-i ǃoa ra ǁnaeǁgau, ǁnās ǁkhās khami ǂoab tamas ka io khoen tsî ǀgurun ra ǀomǂgā ǂoab ǃoas tsîna ra ǁnaeǁgau. Nē mîs ge gagasi kurusabe-i tsî ǃanu gagab ǃoas tsîna a ǁnaeǁgau ǁkhā, Elob ta sîsenū ǀgaiba. Elobmîs ge ǁkhāǁkhā tama hâ khoe-i ga ǁōs khaoǃgâ i ra ûiǃkharu ǃkhaisa.—Eksodus 35:21; Mateub 12:43; Lukab 11:13.
▸ 6ǁÎ danaǃâs, 5ǁî xoaǀgoras; 15ǁî danaǃâs 17ǁî xoaǀgoras
19 GEHENNAS
Grikegowab ǃnâ Gehenna di hâ mîs ge Nama/Damara Elobmîs ǃnâ “ǀamoǀaeb” ase a ǂnûiǃkhunisa. Jesub di ǁaeb ǃnâs ge ǃkhaisa ge hâ i Jerusalems ǀgūse, Gehennas di gere ǂgaihesa. ǁNāpan ge ǀapona gere ǂhubihe tsî hoase gere dīkākāhe. ǁGauǁgau-i ge a ǀnai Jesub ǁaeb ǃnân ge ǀgurun tsî khoen tsîna ûitsamase ǁnāpa gere ǂhubihesa. Gehennas ge mûhe ǁoasa ǃkhaib khoen ga ra ǁōs khaoǃgân ra sī ǀamosib kōse ǂhubiheb ǃoa ǁnaeǁgau tama hâ. Jesub ge Gehennas ǃnâ aoǂgāhes xa gere ǃhoa o, ob ge hoase dīkākāhes xa gere ǃhoa.—Mateub 5:22; 10:28.
20 SIDA ÎTSE ǀGORES
Nēs ge ǀgores Jesub ge ǁîb ǁkhāǁkhāsabena a ǁkhāǁkhāsa matin nî ǀgoresa. ǁÎs ge Sida Îtsē ǀgores dis tsîna ra ǂgaihe. Aiǁgauseb ge Jesuba ge ǁkhāǁkhā da î da nēti ǀgore:
“Sa ǀonsa as khaihe re!”
ǀGore da ge ra îb Jehovaba ǁîb ǀonsa ǂhumiba xu ǃanuǃanu tsî în hoan hîna ǀhommi tsî ǃhūbaib ai hâna ǁîb ǀonsa ǃgôa.
“Sa gaosiba ab hā re”
ǀGore da ge ra îb Elob ǂhanuba ǃhūbaib ǂama ǂgaeǂgui, îb Satanni eloxoresa ǃhūbaiba dīkākā tsî ǃhūbaiba paradais ǃnâ ǀkharaǀkhara.
“Sa ǂâisa as ī, . . . ǃhūbaib on ai”
ǀGore da ge ra în ǁnâuǀnamxa tsî dīǀoaǀoasa kurusa ūhâ khoena paradais ǃhūbaib ai ǀamosib kōse ûi, Jehovab ge tsoatsoasa xu ǂhâba hâ i khami.
21 XOREMARIB
Jehovab ge xoremariba ge mā în khoena ǁoreb tsî ǁōba xu ǃnora kaihe. Xoremarib ge ge ǂhâbasa i Adammi ge ǂoaǃnâ dīǀoaǀoasa ûiba ǁama oas ǃaroma tsî Jehovab ǀkhab ge ūhâ i ǃgaeǁaesa dī-unus ǃgao. Elob ge Jesuba ǃhūbaib ǃoa ge a sî, îb hoa ǁore-aona ǁōba. Jesub di ǁōb ǃaroman ge hoa khoena ǃēsa ūhâ ǀamose ûi tsî dīǀoaǀoasa kurusa ūhâs tsîna.
▸ 8ǁÎ danaǃâs, 21ǁî xoaǀgoras; 9ǁî danaǃâs 13ǁî xoaǀgoras
22 TAE-I ǃAROMAB 1914ǁÎ KURIBA KAISE A ǂHÂǂHÂSA?
Danieli 4ǁî danaǃâs ge ra ǁkhāǁkhā da Elob ge 1914ǁî kurib ǃnâ Gaosiba a ǂnûikhâisa.
Kēbos: Jehovab ge Gao-aob Nebukadnesara ǁhaposa ge a mā kai hais hîna ge ǁhāǁnâhes xa. Nē ǁhapos ǃnâs ge hais di ǃgaosa ǂnūǀurib tsî ǂaiǃgae-ūda-i ǀkha ge ǃgaesa i, is haisa tā kai “hû ǁaega.” ǁNās khaoǃgâs ge haisa ǁkhaba nî kai.—Danieli 4:1, 10-16.
ǁNā kēbosa tae-e sada ra ǂâibasenba: Hais ge Elob di ǂgaeǂguisa gere ǂnûǁkhaeba. ǂGui kurigab ge Jehovaba gao-aoga gere sîsenū, î gu Jerusalemsa xu Israelǁaesa ǂgaeǂgui. (1 Kroniks 29:23) Xawe ǁnā gao-aogu ge ǂgomǂgomsase ge hâ tama hâ i tsî ǁîgu ǂgaeǂguis ge ge ǀam. Jerusalems ge ge dīkākāhe 607ǁî kurib ǃnâ Jesub aiǃâ. ǁNās ge ge ‘hû ǁaegu’ di tsoatsoa i. (2 Gao-aogu 25:1, 8-10; Esegieli 21:25-27) Jesub ge ge mî, “tsîs ge Jerusalemsa ǁaedi xa nîra dāǃgâhe, ǁaedi di ǁaegu nîra ǀoas kōse.” ǁÎb ge ‘hû ǁaegu’ xa gere ǃhoa. (Lukab 21:24) Jesub ge ǃhūbaib ai hâ io, o gu ge ǁnā “hû ǁaega” ge ǀam tama hâ i. Jehovab ge ge mîmâi ǁnā ‘hû ǁaegu’ ǀams aib nî Gao-ao-e ǁgaumâisa. Nē ǂgaeǂguis ǀasa Gao-aob Jesub dis ge ǂgui ǀkhaega Elob khoen hoana ǃhūbaib ai nî hauba ǀamosib kōse.—Lukab 1:30-33.
Gaxusib ǁnā ‘hû ǁaegu’ dib: ǁNā ‘hû ǁaegu’ ge 2 520 kurigu ǀgaiba ge gaxu i. ǁNā 2 520 kuriga xu da ga ra 607ǁî kurib Jesub aiǃâ kōse ǃgôa o, o da ge 1914ǁî kuriba ra hō. ǁNāb ge ǁaeba Jehovab ge Jesub Mesiaba, Gaosib di Gao-aose a ǁgaumâisa.
Mati da 2 520 sa ra hō? Elobmîs ge ra mî ǁaeb tsî ǁaegu tsî ǃkhare ǁaeb ge 1 260 tsēdi ǀkha a ǀgui. (ǂHaiǂhais 12:6, 14) ‘Hû ǁaegu’ ge ǀgamǃnāra kōse ra ǃgôahe tamas ka io 2 520 tsēde. Nē 2 520 tsēdi ge a ǀgui 2 520 kurigu ǀkha, nēs ge kēbos ǁgaragu ǀkha ra ǀgau “mâ tsēs hoasa ǀgui kurib” ase ra ǃgôagu ǀkha.—Numeri 14:34; Esegieli 4:6.
23 MIXAELI ǂAMǀHOMǃGĀB
“ǂAmǀhomǃgāb” di hâ mîs ge “ǀhomǃgāgu danab” di ra ǂâibasen. Elobmîs ge ǀgui ǂamǀhomǃgāb xa ǀgui ra ǃhoa tsî ǁîb ǀons ge Mixael.—Danieli 12:1; Judab 9.
Mixaeli ge Elob ǂgomǂgomsa ǀhomǃgāgu ǂgaeǂgui-aoba. ǂHaiǂhais 12:7 ge ra mî: “Mixaeli tsî ǀhomǃgāgu âb ge draka ge ǃkhamū, . . . tsî ǀhomǃgāgu âb tsîna.” ǂHaiǂhais ǂkhanis ge ra mî Jesub a Elob ǂnubidi ǂgaeǂgui-aosa tsî Jesub di nau ǀons ge a Mixael.—ǂHaiǂhais 19:14-16.
24 ǀUNIGA TSĒDI
Nēs ge ǁaeb ǃoa ra ǁnaeǁgau kai ǁaxasigu hîna Elob Gaosib nî Satanni ǃhūbaiba dīkākās aiǃâ nî ība. ǁGâiǂuisendi “nē hâ ǁaeb ǀams” tsî “Khoen Ôab di hās” ge Elobmîs ǃnâ ra sîsenūhe kēbodi ǀkha ǀgui ǁaeb ǃoa ra ǁnaeǁgau. (Mateub 24:3, 27, 37) “ǀUni tsēdi” ge ge tsoatsoa Elob Gaosib ge 1914ǁî kuri ǀhommi ǃnâ a ǂgaeǂgui tsoatsoa o tsî ǁnā Gaosib ge Satanni ǃhūbaiba Armagedons tawa nî dīkākā.—2 Timoteub 3:1; 2 Petrub 3:3.
25 KHÂIS
Elob ga ǁō ge khoe-e ûi-ûi o, os ge ǁnāsa khâis di ra ǂgaihe. Elobmîs ǃnâ i ge khoese ǃâde hâ khâis xa ra ǃhoade. Eliab, Elisab, Jesub, Petrub tsî Paulub tsîn ge khoena gere ǂkhaiǂkhai ǁōba xu. Nē buruxadīn ge Elob di gagab xa ge ī ǁkhā kai-e. Jehovab ge ge mîmâi ǁîb ge “ǂhanu-ain tsî ǂhanuoǃnân” tsîna khâisa nî mā ǃhūbaib ai. (ǃNaeǃkhaidi 24:15) Elobmîs ge ǀhommi di khâis xas tsîna ra ǃhoa. Nēs ge ǂkhauhesan ga Elob xa khâisa ga ra māhe o în Jesub ǀkha ǀguiba ǀhommi ǃnâ sī hâ.—Johaneb 5:28, 29; 11:25; Filipeǁîn 3:11; ǂHaiǂhais 20:5, 6.
26 ǃGAIDĪB
ǃGaidīb ge ǁnaetib asen khoena demongu ǀkha ra ǃhoa ǀgausa aiǁgause ǃgai-aogu, aimûǀgaru ra gagab tamas ka io hānîǁaeb ǃnâ nî ī xūna ra mî khoe-i ǃnâ-ū. Khoen hîna ǃgaidīb di ǁnaetiga ra saon ge ra ǂgom khoe-i gagab ǁō tama hâsa xawe ǁî-i ra ǀgaisa ǀnore kaisa. Demongu ge khoena ra ǂgaeǂhapu în tā Eloba ǁnâuǀnam. ǀGamirode kēs, aimûǀgarus, ǃgaidīb, ama tama ǂgom ǀgaub tsî khoen ǃâ-ai hâ ǀgaigu hoagu ge demongu ǀkha a ǀgui. Nēn ge ǂgui ǂkhanin, ǂkhanigu, ǂhôaǂkhanin ǃnâ hâ ǀgamiro kēs, muvin, ai-īsigu ǃgaidīb xa hâ gu tsî amdi ǃnâs tsîna ra hō-e. ǁÎn ǃnâ i ge demongu, ǃgaidīb tamas ka io khoen ǃâ-ai hâ ǀgaiga ǁkhoaxase ra mûsen kaihe. ǂGui ǁkhōn di ǁneatigu ge demongu ǀkha dīxū-e ūhâ aiǁgause ǁō hân ǁguibadi, ǁkhōde ǁâudīs, ǁkhōs ge dīhe kurib xa ǂâiǂâisens, ǁō xu-e hâ taras di tsēdīb tamas ka io ǂnûǂkhais ǁnaetigu tsîna. Khoen ge ǀhubuǀhubusenūxūna ra sîsenū în demonga xu ra hā ǀgaiba hō.—Galateǁîn 5:20; ǂHaiǂhais 21:8.
▸ 10ǁÎ danaǃâs, 10ǁî xoaǀgoras; 16ǁî danaǃâs 4ǁî xoaǀgoras
27 JEHOVAB ǂGAEǂGUIS
Jehovab ge a Hoaǀgaixa Elo tsîb ge ǁîba hoaraga ǃhūbaiba ge a kuru. (ǂHaiǂhais 15:3) ǁÎb ge a ǀhonkhoe nē ǃhūbaib dība tsî hoa kurusabena ǂgaeǂguisa anu hâ. (Psalmdi 24:1; Jesajab 40:21-23; ǂHaiǂhais 4:11) ǁÎb ge ǁgaraga ge mā hoaraga xūn hînab ge kurun ǂamai. Jehovab ge ǀgaiba ūhâ ǂgaeǂgui-aoga ǁgaumaîsa. Sida ge ǁîba da a ǀnam tsî ra ǁnâuǀnam ǃkhais ǃaroma ǁîb ǂgaeǂguisa ra ǂkhâǃnâ.—1 Kroniks 29:11.
▸ 11ǁÎ danaǃâs, 10ǁî xoaǀgoras
28 ǀGÔA ĀǁNÂS
ǀGôa āǁnâs ge ǂanǃgâsase ra dīhe ǃnâe tama hâ ǀgôa-e ǃgams ǃaroma. Nēs ge tsūkēǃgâb tamas ka io khoesi sorosi ǃnubusib xa ǃaromahe tama hâ. ǀGôa-i ra ǂnûsa xu i ge ǁî-e ǁgûs di soros di ǃâs ǀguisa ī tama hâ. Xawe ǁî-i tsîn ge a khoe.
29 ǀAOBA ǁAIǂGĀS
Nē ǀaeǃkhōǀgaub ge hoase tamas ka io haka ǃân ǀaob din ǃnâ a ǀgoraǂgāsa. Nē i ge khoe-i di soros ǃnâ ra ǁaiǂgāhe nau khoe-i sorosa xu tamas ka io sâu-e hâ ǀaoba xu. ǀAob di haka ǃâgu ge plasmab, ǀaba seldi, ǃuri seldi tsî plateletga xu hâ.
▸ 13ǁÎ danaǃâs, 13ǁî xoaǀgoras
30 ǁNAMAS
Elobmîs ǃnâ i ge “ǁnamasa” ǁkharas ǀkha ǀgui tama hâ. ǁNamahe da ra o, o da ge ra dauǁgauhe, ǁkhāǁkhāhe tsî ra ǀkharaǀkharahe. Jehovab ge tāstēs tsîna karoǂgaoxase ǁnama da tama hâ. (ǂKhoamîdi 4:1, 2) Jehovab ge ǁgûna ǃgâi aiǁgausa ge mā. Nē ǁnamas ge kaise ǃgâi sîsenǂuiba ūhâ tsî ǁnās ǀkha nî hui î-i ǀnamahe ra khoe-e ǁnamahesa ǀnam. (ǂKhoamîdi 12:1) Jehovab ge ǁîb khoena a ǀnam tsîra ǁkhāǁkhā. ǁÎb ge ǁîna ra ǁkhāǁkhā în ǃgâi tama ǂâi ǀgauga daba tsî ra hui nî în ǃgâi ǀgaub ǃnâ tanisen. ǁGûn ǃaroma, ǁnamas ge ǀgôana nî hui în ǁnâuǃā tae-i ǃaroman nî ǁnâuǀamsa. Nēs ge ra ǂâibasen ǁîna huisa în Jehovaba ǀnam tsîn ǁîb di mîsa nî ǀnamsa tsî tsoatsoade nî ǁnâuǃāsa.
▸ 14ǁÎ danaǃâs, 13ǁî xoaǀgoras
31 DEMONGU
Nē gu ge mûhe ǁoa, eloxoresa gagagu hîna khoen ǃâ-ai hâ ǀgaiba ūhâ gu. Demongu ge eloxoresa ǀhomǃgāga. ǁÎgu ge ge Elob di khākhoe kai ǁÎba gu ge ǁnâuǀnamoǃnâ o. (Genesis 6:2; Judab 6) ǁÎgu ge ǀguiba ge mâǀhao Jehovaba mâǃoas ǃnâ-ū.—Deuteronomium 32:17; Lukab 8:30; ǃNaeǃkhaidi 16:16; Jakobub 2:19.