“Elob xa ǁnâi ǃgaeǀhaohe hâ-e” ǃgôaǃgâ re

1, 2. Hebreǁîn 13:4 sa tae-e ra ǂkhâǃnâ da dīsa?

JEHOVABA ǃgâiaǂgao kaisa du ra ǃgôaǃgâ? Îo, ǁnāsa da ge ra ǃgôaǃgâ. ǁÎb ge nēsa ra ǃgôaǃgâ tsî sada tsîna ǃgôasiba ra ǁgau. (1Sam. 2:30; ǂKhm. 3:9; J.ǂHa. 4:11) ǁÎb ge ǃhūbaib ǂhanugu tsîna da ǃgôasiba nî ǁgausa ra ǂgao. (Rom. 12:10; 13:7) Xawe ǀgui ǀgaub ge hâ ǃgôaǃgâsiba da nî ǁgauba. Nēs ge ǃgameb ǃnâsa.

² Apostel Paulub ge ge xoa: “Ab ǃgameba hoan tawa ǃgôasib ǃnâ ūhâhe, îb ǃgameb kharoba ǂnao-ose ī, ǀai-aon tsî ǃgamekhôa-aonab ge Eloba nîra ǀgoraǃgâ xuige.” (Heb. 13:4) Paulub ge nēsa ǃgaoǃgâs ǀguisa ge dī tama hâ i. Xawe nēs ge Xristeǁîna gere ǂkhâǃnâ în ǃgameba ǃgôaǃgâ tsî ǀō-aisase mû. Sadu tsîna ǃgameba nēti ra mû, ǃgōsase sadu ǃgameba, ǃgame du ga ra io?

3. Jesuba mâ ǂhâǂhâsa ǀapemāde ǃgameb xa ge mā? (Tsoatsoas ǃnâ hâ ai-īsiba mû re.)

³ ǃGameba ǃgôaǃgâs ǃgao du ge ǃgâi ǃkhais ǃnâ hâ. Jesub ge ǃgameba gere ǃgôaǃgâ. Farisegu ge Jesuba ǀgoras xa a dî o, ob ge Elob ge ǂguro ǃgameb xa a mî mîde ǃoa ge ǁnaeǁgau: “ǁNā-amagab ge khoeba ǁgûb tsî ǁgûs tsîra ǁnāxū, tsî taras âb ai nî ǂgāmâisen. Tsî ra ge ǁîǀgamra nî ǀgui ǁgan. ǁNā-amaga ra ge ǃaruǀî ǀgam tama tsî a ǀgui ǁgan.” Jesub ge ge ǀaro: “Elob xa ǁnâi ǃgaeǀhaohe hâ-e i ge khoe-e ǀgora tide.”​—Khomai re Markub 10:2-12; Gen. 2:24.

4. Jehovaba tae-i ǁgaraga ǃgameb ǃgao ge mā?

⁴ Jesub ge ge mûǂan ǃgameb a ǂhâǂhâsa ǃkhaisa tsî da nēsa nî ǃgôaǃgâsa. Elob ge Adammi tsî Evas tsîna ge mîba tama hâ i ǃgameb ge a khôahe ǁkhā di. Nē ǃhanab ǃnâ ge dīhe mîmâis ge gere ǁgau, ǀgam khoera ge nî ǀgui kai ǀamosib kōse.

ǃNUBU ǁAEROB ǀKHARAǀKHARAN ǃGAMEB XA

5. ǁŌba ǃgameba mati ra tsâǀkhā?

⁵ Adammi ǁoreb ge ǀkharaǀkharana ge hau. ǀGui ǀkharaǀkhara î ge ǁōba hîna ǃgameba ra tsâǀkhāba. Nēsa da ge a mû ǁkhā apostel Paulub ge xoa mîde xu, Xristeǁîn ge nētsē Moseb ǂhanub ǃnāga hâ tama hâ. ǁÎb ge ge ǁgau ǁōb ge ǃgameba ra khôa di tsî ûi ǃgau ra î ge ǃgame ǁkhā.—Rom. 7:1-3.

6. Moseb ǂhanub tsî Elob mûǂûib ǃgameb dib tsîna mati gere ǃgûǀhao?

⁶ Elob ge Israelǁaesa a mā ǂhanub ge ǃgameb xa ǃnāsase gere ǃhoa. Nēs ge ǀguis xa ǃnāsa tarade ǀgui ǁaeb ai ūhâsa gere mā-am, nēs ge Elob ge ǂhanuba a mās aiǃâ ge hâ i. Xawe nēs ge gere ǁkhaehe i di khoede tā ǂgui tsî ǃgoma tsâ. Aiǁgause, Israelǁî-aob ga ǃgāsa ǃgame o tsî ǁnāpaxū ǀgamǁî tarasa, ob ge ǁîb ǂguro taras ǂû-i, saran tsî sorosise ǂharugus tsîna ǀoro kai tide. Elob ge gere ǂgaoǀkhā ǁîb tarasab nî kōǃgâsa. (Eks. 21:9, 10) Sida ge nē ǂhanub ǃnāga hâ tama hâ xawe da ge Jehovab ǃgameb ǃnâ ūhâ ǃgâiǃgâibasensa ra mû. Nēsa hui du tama hâ ǃgameba ǃgôaǃgâsa?

7, 8. (a) Deuteronomium 24:1 ǃoagu da mâ ǁgaraba ǃgame khôas xa ūhâ? (b) Jehovaba ǃgameba mâ ǀgaub ǃnâ ra mû?

⁷ O ǃgame khôas nē ǂhanub ǃnāga? Elob ge ǃgameba kaise ra ǃgôaǃgâ xaweb ge ǃgame khôasa gere mā-am ǀnî ǃaromadi ǃgao. (Khomai re Deuteronomium 24:1.) Israelǁî-aob ge ǁîb tarasa xu gere ǀgora “ǀkhomas ga ǁîb mûǁae hō tama io.” Nē ǂhanub ge “ǀkhoma” di hâ mîsa ge ǁguiǃā tama hâ i. Nē î ge ǀnîsi ge ǁgai xū-i hînas ge tarasa a dī-e. (Deu. 23:14) Jesub tsēdi ǃnân ge ǂgui Jodeǁîna ‘mâ ǂâibasens hoas ai’ gere ǃgame khôa. (Mat. 19:3) Sadu ge nēsa tā nî sao.

⁸ Maleaxib ge Elob mûǂuiba ǃgameb ai ge ǁgau da. ǁNā ǁaeb ǃnâb ge aoba ǁîb ǂkhamsis taras ǀkha ǃgameba khôasa ge mā-amsa i, îb ǀnîhâ ǂkhamkhoesa ǃgame. Maleaxib ge Elob ǃgameba ra mû ǀgaub xa ge mî: “ǃGamekhôasab ǁîba ǁkhan hâ ǃkhaisa.” (Mal. 2:14-16) Nēs ge Elob ge ǂguro ǃgameb xa a mîs ǀkha ra ǃgûǁae: “ǁîb di taras tawa ǂgāmâisen, o ra ge ǁîǀgamra nî ǀgui ǁgan.” (Gen. 2:24) Jesub ge ǁîb ǁGûb ge ǃgameba gere mû ǀgauba gere ǃgôaǃgâ tsî ge mî: “Elob xa ǃgaeǀhaohe hâ-e i ge khoe-e ǀgora tide”—Mat. 19:6.

ǀGUI ǃAROMAS ǀGUIS GE HÂ ǃGAMEBA KHÔAS ǃGAO

9. Jesub mîdi Markub 10:11, 12 ǃnâ hâde mati a ǁnâuǃāhe ǁkhā?

⁹ ǀNî khoen ge ǀnîsi ra dî, ‘Xristeǁîna ǀgora tsî ǁkhawa ǃgamesa mā-amhe hâ?’ Jesub ge ǃgame khôasab ra mû ǀgaus xa ge mî: “Taras âba xu ǀgora tsî ga ǀkharasa ǃgameb hoab ge ǁîs tawa ra ǃgamekhôa. Tsî taras ga aob âsa xu ǀgora tsî ga ǀkharaba ǃgame, os ge ra ǃgamekhôa.” (Markub 10:11, 12; Lukab 16:18) Jesub ge ǁnā ǀgaus ǃnâ ǃgameba gere ǃgôaǃgâ tsî nau khoen tsîn nēsa nî dīsa ra ǂgao. Aob tamas ka io taras hîna ge ǂgomǂgomsa tama hâ i, i ge gere ǃgamekhôa. Nēs ge ge ama i khoe-e xu ǀgoras ge ǃgamekhôa di ǂâibasen tama hâ i amaga. Elob mûǁae ra ge ǁîra noxoba a “ǀgui ǁgan.” Jesub ge ge ǁgau kaikhoeb ga ǁîb taras hîna xū-e dī tama hâsa xu ǀgora o, ob ge ǁîba ra ǃgamekhôa-ao kai. Mâ ǀgaub ǃnâ? ǃKharu ge ǁaeb ǃnâs ge kaikhoeb xa ǁnāxūhe hâ tarasa ǁkhawa gere ǃgame ǂgao îs marisise hui-e ǁkhā. Nēs ge ǀaiba ga ǃaroma hâ.

10. Mâ ǁgaragu ǃoagu ǀgui i Xristeǁî-e a ǃgame khôa ǁkhā tsî ǁkhawa a ǃgame ǁkhā?

¹⁰ Jesub ge ǁgaragu ǃgamekhôas diga ge mā, mî rase: “Tarasa ga ǁnāxūb hoab, ǀaiba xu i ga ī tama io, tsî ǀkharasa ga ǃgameb ge ra ǃgamekhôa; tsî ǁnāxūheb hâ hîa ga ǃgameb ge ǁkhāti ra ǃgamekhôa.” (Mat. 19:9) ǁÎb ge nēsa ǃhommi aoǁnâs tawas tsîna ge dī. (Mat. 5:31, 32) Jesub ge hoa ǀgam ǃnāra ai “ǀaib” xa gere ǃhoa. Nē mîs ge ǃgame tama hâse ǁgoe-ūgus, ǀaib, khoen hîna xamanin ǀkha ra ǁgoen tsîna ǃkhōǂgā hâ. Aiǁgauseb ga ǃgame hâ aoba ǂhauǃnâ tama ga ra io, os ge ǁîb tarasa nî mîǁgui ǀgora ǂgaos ra ǃkhaisa tamas ka ios nî aiǃgûsa. ǁÎba xus ga ǀgora o, os ge nēsa Elob mûǁae a ǃgame khôa.

11. Xristeǁî-e tae-i ǃaroma ǃgamekhôa tama hâ, Elobmîs ai ǃgaoǃgaosa ǃaromasa î ga ra ūhâ xawe?

¹¹ Jesub ge ge mî tama hâ i ǀaib ge ǃgame khôasa nî ǃaroma di. Aiǁgauses ge tarasa ǀnîsi noxoba kaikhoeb ǀkha a hâ ǁkhā ǂhauǃnâ tamab ga ra ī xawe. ǁÎs ge ǁîba a ǀnam tsî nî ǀûba bi, î ra ǁîra ǃgameba ǃgâiǃgâi. Ama as ge ǃgameba khôa tsîs ga ǁkhawa ǃgame tama ga ra io, os ge ǃgomsiga nî hōǃâ. O ǁîs sorosi ǂhâsigu? O ǀguri tsâsens? ǀGôana hâ ǂâis ǃnâ nî ūhēna? ǃGamekhôasa ǀgôana amab ǃnâ kaikaisa nî ǃgom kai? (1Kor. 7:14) Tsî nēs ge ǀgora xu-e ge khoe-e ǃgomsiga nî mā.

12, 13. (a) Tae-e Hoseab ǃgameb ǃnâ ge ī? (b) Hoseaba tae-i ǃaroma Gomersa ge ū-oa tsî nēsa xu da tae-e a ǁkhāǁkhāsen ǁkhā nētsē?

¹² Kēbo-aob Hoseab aiǁgaus ge ra ǁguiǃāhe. Elob ge Hoseaba ge mîba “ǃgû îts taras ǀaigu dis tsî ǀgôan ǀaigu dina ū.” Gomers ge “ǀgamǀkhā tsî ǀgôaba ǁîba ge ǁoraba.” (Hos. 1:2, 3) Egas ge ǁîs ǀaib ǃnâ-ū ǀgôas tsî ǀgôab tsîna ge ǁora. Gomers ge ǂgui ǃnāde ǂhauǃnâ tama hâ i xaweb ge Hoseaba ǁîra ǃgameba ge khôa tama hâ i. Egas ge Hoseaba ǁnāxū tsî ge ǃgā kai. Xaweb ge ǁîsa sī ge ū-oa. (Hos. 3:1, 2) Jehovab ge Hoseaba gere sîsen-ū îb ǁgau matib ge Israelǁaes ǁorena hoaǁae gere ǀûba ǀgausa. Nēsa xu da tae-e a ǁkhāǁkhāsen ǁkhā?

¹³ ǀGui î ga ra ǀai o, o î ge nau î hîna xū-e dī tama hâ-e mîǁguiba nî dī. Jesub ge ge mî ǀai tama hâ i ge ǃgameba a khôa ǁkhā tsî ǁkhawa a ǃgame ǁkhā. Tamas ka io î ge noxoba a ǀûba ǁkhā. Nēs ge tsū tama hâ. Hoseab ge Gomersa ǁkhawa ge ū-oa. Gomers ge Hoseaba ǃoa a oa sī o, os ge nau khoegu ǀkha ǂharugusa ge mā-amhe tama hâ i. Hoseab ge ǁîs ǀkha gaxūse sorosise ge ǂharugu tama hâ-i. (Hos. 3:3.) Nēs ge Elob ǀgauba ge ǁgau ǁîb khoenab ǀûba tsî ǁkhawa ǁîn ǀhōsagusisa ra ǃgâiǃgâisa. (Hos. 1:11; 3:3-5) Nēsa nētsē hâ ǃgamega mati ra tsâǀkhā? Xū-e dī tama khoe-i ga nau khoe-i ǀkha ǁkhawa ga ra ǂharugu o, os ge nēsa ra ǁgau ǁî-i go a ǀûba ǃkhaisa. (1Kor. 7:3, 5) Nēs ge ǃgamekhôasa ga ǃaroma tama hâ. ǁNās khaoǃgâ ra ge ǁîra ǃgameba Elob mûǁae nî ǃgâiǃgâi.

ǃGÔASIBA ǃGOMSIB HÂ ǃGAMEB ǃNÂ

14. 1 Korinteǁîn 7:10, 11 ǃoagu i tae-e ǃgameb ǃnâ a īǁkhā?

¹⁴ Hoa Xristeǁîn ge ǃgameba nî ǃgôaǃgâ Jesub tsî Jehovab tsîn khami. ǀNî khoen ge nēsa dīhō tama hâ, ǀoasa kurusa da ūhâ tama hâ amaga. (Rom. 7:18-23) ǃKharu ge ǁaeb ǃnân ge ǀnî Xristeǁîna ǃgameb ǃnâ ǃgomsina ūhâ i ǃkhais ge buru kai da tide. Paulub ge ge xoa “taras aoba xu ǀgora tidesa” xawes ge nēsa ǀnî ǁaeb ai ra ī.—Khomai re 1 Korinteǁîn 7:10, 11.

15, 16. (a) ǃGameb ǃnâ î ga ǃgomsina ga ra hâ xawe î mâ mîǁguiba nî dī-e tsî tae-i ǃaroma? (b) Nēsa mati Jehovaba ǃoaba tama khoe-e ǃoa ra ǁnaeǁgau?

¹⁵ Paulub ge ge ǁguiǃā tama hâ i nē ǀgoras ge tae-i xa a ǃaromahesa. ǃGomsib ge aob tawa ge hâ tama hâ i, hîna ge ǂhauǃnâ tama hâ îba. Paulub ge ge mî taras hîna ǁîs aoba xu ra ǀgoras ge “ǃgame tamase hâ, tsî ǁnā tamas ka io, as aob ǀkha ǂkhîbagusa dī.” ǁÎra ge Elob mûǁae noxoba ǃgame hâ. Paulub ge ge ǀapemā ǀaib ga ra ǀkhai io, o ra ge nî ǀûbagu di. ǁÎra ge huiba ǀhaohâb ǃûi-aoga xu nî hō. ǀHaohâb ǃûi-aogu ge ǀkhā-e ǁhûi tide xawe Elobmîs ai ǃgaoǃgaosa ǀapemāde nî mā.

¹⁶ Kai ǃgomsib ge nî ī ǀgui khoe-i ǀgui-i ga Elob ǁgaragu ǃoagu ga ra ûi o ǃgameb ǃnâ. Nē ǃgomsin hoan ǂam-ai ǀgoras ǀguisa nî hui? Xoadi ge ra ǁgau ǀaib ge ǃgamekhôasa a ǃaroma ǁkhā di xawe ǀgoras di ǁgaraga ūhâ tama hâ. Paulub ge ge xoa: “Tsî taras ga ǂgomoǃnâ aoba ūhâ, tsîs ga ǂkhî ǁîb ǀkha ǁansa, as ǁîba tā ǁnāxū.” (1Kor. 7:12, 13) Nēs ge sida tsēde ǃoas tsîna ra ǁnaeǁgau.

17, 18. ǀNî Xristeǁîna tae-i ǃaroma ǃgomsin hâ xawe ǀgora tama hâ?

¹⁷ ǀNî ǁaegu ai î ge Jehovaba ǃoaba tama aoba ra mî ǁîb ge ǁîb taras ǀkha a hâ ǁoa di. ǁÎb ge ǁîb tarasa kaise ra ǁore, ǁîs ûib tsî ǂurusib tsîn ǁkhōǁkhōsasib ǃnâ hâ khamis ra tsâs kōse. ǁÎb ge ǁîb omarisa kōǃgâ ǀû tsî ǁîb tarasa gagasise ǁkhōǁkhōsasib ǃnâ ra mâi. ǀNî ǁaegu ain ge ǀnî Xristeǁîna ǁî-i ra mî xū-i ǂam-ai ǃgameba khôasa ra mîǁgui. Xawe ǀnî Xristeǁîn hîna ǃgom mâsiga ra hōǃân ge ge mâǀgai tsî ǃgameba ǃgâiǃgâisa ra dītsâ. Tae-i ǃaroma?

¹⁸ Nēti i ǀgoras ǃnâ ra ge ǁîra noxoba ǃgame hâ. ǀGora hâse ra ga hâ o, o ra ge ǃgomsina nî hōǃâ. Apostel Paulub ge ǀguiǃnâxase hâs di ǃaromasa ge mā. ǁÎb ge ge xoa: “ǂGomoǃnâ aob ge taras ǃnâ ǃanuǃanuhe hâ, tsî ǂgomoǃnâ taras ge aob ǃnâ ǃanuǃanuhe hâ amaga. ǁNāti i ga ī tama io, on ga sadu ôana ǃanuoǃnâ hâ; xawe nēsin ge a ǃanu.” (1Kor. 7:14) ǂGui ǂgomǂgomsa Xristeǁîn ge Jehovaba ǃoaba tama hâ khoen hînan ǃgame hân xa ra mâǃoahe xawe ra mâǀgai. Nēs ge kaise a ǃgâi ǁîn ǃgame hâ khoe-i ga Jehovaba ga ra ǃoaba tsoatsoa o.—Khomai re 1 Korinteǁîn 7:16; 1 Pet. 3:1, 2.

19. ǃGâiǃō ra ǃgamega tae-i ǃaroma Xristeǁî ǀhaohâb ǃnâ a ǂgui?

¹⁹ Jesub ge ǃgamekhôas xa ge ǃhoa tsî apostel Paulub ge ǀgoras xa ǀapemāde ge mā. Hoakha ge Elob ǃoaba-aon ǃgameba nî ǃgôaǃgâsa gere ǂgao. ǃHūbaib ǂhawase î ge nētsē Xristeǁî ǀhaohâga ǃgamegu ǃnâ ra ǃgâiǃō. Sadu ǀhaohâb ǃnâs tsîna du ge ǃgameb ǃnâ ra ǃgâiǃō ǃgâsana ǀnîsi ra hō. Nēs ge kaikhoegu hîna ǁîgu tarade a ǀnamgu tsî taradi hîna ǁîdi kaikhoega a ǀnamdi tsîna ǃkhōǂgā hâ. Kaise da ge ra ǃgâiaǂgao ǂgui khoen Elob mîdi ǃoagu ra ûi o, mîb ge o: ‘ǁNā-amagab ge khoeba ǁgûb tsî ǁgûs tsîra ǁnāxū tsî nî taras âb ai ǂgāmâisen, o ra ge ǁî ǀgamra nî ǀgui ǁgan.’—Efe. 5:31, 33.