‘ǃGomǀgausa ǃamsam’ ge ge hō

Winston, Elobats ge ôa ǀgaub xa ǁgamba da re.

Tita ge Queensland di ǀon hâ ǃās hîna Australiab ǃnâ hâs ǃnâ ge kai, ti omaris ge Elobmîs ǃnâ ge ǂgom tama hâ i. ǃNūse da gere hâ amaga ta ge ǂgui khoena ge ǀū i. 12 kurixa ta a hîna ta ge Eloba ge ôa tsoatsoa. ǁÎba ǃoa ta ge ge ǀgore tsî ge ǂgan ǁîb xa hâ amaba ta ra ǂan ǂgao ǃkhaisa. ǁAeb ra ī khami ta ge ǃgaroǃāsa xu, Adelaide di ǀon hâ ǃās hîna Australiab ǃkhapagas ǃnâ hâsa ǃoa ge doe. 21 Kurixa ta a hîna ta ge Pams ǀkha ge ǀhao, Sydnis ǃnâ ta sâǁaeb ǀkha hâ hîna, ǁîs ge British-Israel ǂnūbis xa ge mîba te, nē ǂnūbis ge British khoen ge kā hâ ǃhaos Israeli disa xu ra ǃhui di gere ǂgom. Nē ǂnūbis ge ra mî nē ǃhaodi ge ge disi ǃhao i hîna ge ǃkhōsis ǃnâ ūhe hâ ina ǃkharu ge ǁaeb ǃnâ. Tsî ta ge Adelaidesa ǃoa a oa o, o ta ge nēs xa ti sîsenǁare-aob hîna ge Jehovab di ǀHûǀguitimî-aon ǀkha Elobmîsa gere ǁkhāǁkhāseni ǀkha ge ǃhoa. ǁÎb ǀkha ta ge Jehovab di ǀHûǀguitimî-aon ǂgoms xa a ǃhoa toas khaoǃgâ ta ge ge mû, ti ǀgoredi ge ra ǃeream-e di. Ti kuru-aob tsî ǁîb Gaosib tsîn xa hâ amaba ta ge gere ǁkhāǁkhāsen. ‘ǃGomǀgausa ǃamsa’ ta ge ge hō.—Mat. 13:45, 46.

Pam, sas tsîn ge nē ǃamsa ǂkhams a hîna ge ôa tsoatsoa. Matis ge nēsa hō?

Tita ge Elobmîs ǃnâ ra ǂgom omaris ǃnâ ge kai, Coffs Harbour di ǀon hâ ǃās hîna New South Wales ǃnâ hâs ǃnâ. Ti ǁgûra tsî ti aumara tsîn ge British-Israeli di ǂnūbis ǁkhāǁkhāde ge ūǃoa. Ti ǃgâb, ti ausis tsî tita tsîn ge Elob ge British ǂnūbis khoen ǃnâ ǀgui ǃgâiǃgâibasensa ūhâ di hâ ǂâis ǀkha ge kai khâi. Xawe ta ge tita nēs ǃnâ ge ǂgom tama hâ i, gagasise ta ge ǀoasase ge tsâ tama hâ i. 14 Kurixa ta a hîna ta ge ǂgui kerkega gere sari, nēs ge Anglican, Baptist tsî Seventh-day Adventist kerkegu tsîna ǃkhōǂgā hâ. Xawen ge ǁîna Elobmîsa ǂans ǀkha ge huite tama hâ i.

Ti omaris ge ega Sydnisa ǃoa ge doe, Winstoni ǀkha ta ge ǀhaoba, sâǁaeb ǀkhab hâ hîna. ǁÎb goro mî khami î ge sim ǁgamǀhaode ge dī îb Elobmîsa ǀHûǀguitimî-aon ǀkha ǁkhāǁkhāsen tsoatsoa. ǁNās khaoǃgâ î ge ǁîb ge tita ǃoa gere xoa sîǂkhanide Elobmîs xoade ge ūhâ i. ǂGuro ta ge kaise gere ǂâiǂhansen tsî ǁaixas tsîna gere hî. Xawe ta ge ǁaeb ǀkha amaba ge mûǂan.

1962ǁÎ kurib ǃnâ ta ge Adelaidesa ǃoa ge doe, î ta Winstoni ǀgūse hâ ǁkhā. ǁÎb ge ge dī î da ǀHûǀguitimî-ao khoe-aogura ǀkha hâ, Thomas tsî Janice Sloman di ǀon hāra, ǁîra ge Papua New Guineab ǃnâ sîsabe ra ase gere ǃoaba. ǁÎra ge khoexaǃnâsiba gere ǁgau te, 18 kurixa ta ge ge i tsî ra ge kaise gagasise ge huite. Elobmîsa ta ge ge ǁkhāǁkhāsen tsoatsoa tsî ta ge ǁaeb ǀkha ge mû nēb ge a ama di. Tita tsî Winstoni tsîn ge ǃgame toa o, om ge sim ǃoabas ǀkha ge tsoatsoa, ǃgomsin ge hâ i xawem ge ǃgomǀgausa ǃams hînam ge hōsa ǃgôasiba gere ǁgau.

Winston, sa ûib xa ǁgamba da re Jehovab di ǃoabas ǃnâ.

ǁAeb ǃkharu tama hâ hînam ge ge ǃgame, Jehovab ge ǂgui dao-amde ge ǁkhowa-am ǁîb di ǃoabasa khoraǂuis ǃgao. (1Kor. 16:9) ǂGuro dao-ams ge ǃgâsab Jack Porteri xa ge ǁkhowa-amhe, ǁîb ge sida ǀhaohâb ǃnâ ǃnarimâra mûǂam-aob ase ge hâ i. (Nēsib ge a ǁnâub beros kōmitees ǁani.) Jacki tsî ǁîb taras Roslyns tsîn ge ge ǂkhâǃnâ mi aimâba-aose ǃoabasa, nēsam ge koro kuriga ge dī. 29 Kurixa ta a hînam ge Pams tsî tita tsîna ge ǂgan-e im ǃnarimâ sîsen-e South Pacific Ailands ǃnâ sī dī, nēs ge Fiji ǁnâub beros kōǃgâs ǃnāga ge hâ i. Nēs ge American Samoab, Samoab, Kiribati, Nauru, Niue, Tokelau, Tonga, Tuvalu tsî Vanuatu ailandi tsîna ge ǃkhōǂgā hâ i.

ǁNā tsēdi ǃnân ge khoena nē ailandi ǃnâ Jehovab di ǀHûǀguitimî-aona gere mâǃoa, ǁnās ǀkha da ge kaise ǂōrisase gere aoǁnâ. (Mat. 10:16) ǀHaohâgu ge ǀoro ǃgâsana ge ūhâ i tsî ǀnîn ge hâ ǃkhaisa ge mā mi ǁoa i. Tsîm ge ǀhûhâsib khoen tawa hâ ǃkhai-e gere ǂgan mâ, nē khoen ge kaise ge khoexaǃnâ i.

ǂNûiǃkhuni sîsenni ǃnâts ge ǃgâiǃgâibasensa ge ūhâ i, Winston. Nēsats ge mati omkhâi?

ǁNā ǁaeb ǃnân ge Tonga ailands ǃnâ ge hâ i ǃgâsana ǀoro ǂhawegu tsî ǂkhanidi tsîna ge ūhâ i, Tongan gowab ǃnâ. Aoǁnâ sîsenni ǃnân ge ǀawaǃaogowab ǃnâ hâ ǂkhanis hîna Truth di hâsa gere sîsen-ū. Haka wekhega ge hâ i ǀhaohâb ǃûi-aogu skoli tawa gu ge ǃnona ǀhaohâb ǃûi-aogu hîna ge ǀawaǃaogowaba ǃgâise ǃhoa tama hâ i ga ge mî ǁîgu ge The Truth That Leads to Eternal Life di hâ ǂkhanisa Tongan gowab ǃnâ nî ǂnûiǃkhuni di. Pams ge gere xoa tsî da ge Amerikab ǁnâub berosa ǃoa ǁgâis ǃgao gere sî. Nēs ge ǁkhaisa wekhega ge ū. ǂNûiǃkhunis ge kaise ǃgâi tama hâ i xawe i ge nē ǂkhanisa ǂgui khoen hîna Tongan gowaba ra ǃhoana ge hui în amaba ǁkhāǁkhāsen. Tita tsî Pams tsîn ge ǂnûiǃkhuni-ao tama hâ xawe î ge nēsa sim ǃnâ ǃgâiǃgâibasensa ge omkhâi.

Pam, ailandi ûiǀgauba mati Australiab ûiǀgauba xu gere ǀkhara?

Nēs ge kai ǃkharagagusiba ge ūhâ i. ǀNî ǃkhaidi ge ǀûitsiga ge ūhâ i, kaise ge ǀgamsa i tamas ka io ǀaegu tsî ǀoro ǂû-i tsîna ge ūhâ i. Xawe i ge tsēs ǀams ai kaise ge ǁkhoaxa i sim hâ ǃkhaisa xu kō tsî huriba mûsa. ǀNî ǃuide i ge ǁkhâba kaise gere ǃnâ tsîm ge palm haide ge mû ǁkhā i. Nēn ge ge dī im ǂâiǃgâ tsî ǀgore tsî ǃgâi ǂâide ūhâ ǁgaidi ose.

ǀHao-ūm gere ǀgôanam ge kaise gere ǀnam, ǁîn ǀkham ge ǁkhoaxa ǁaeba ge ūhâ i, ǁîn ge gere buru ǃuri khoeran gere mû o. Niue di ǀon hâ ailandsam sari hâ hînab ge ǀgôaroba Winstoni ǁôab ai hâ ǀûna ǃkhō tsî ge mî, “kaise îsa ǃammi ge” di. ǁÎb ge noxoba nēti ǂgui ǀûna ǁôab ai ge mû tama hâ i tsî ǁnās ǀkha ge ǀū i matib nēsa nî ǁguiǃāsa.

Kaisem ge gere tsûaǂgao khoen a ǀgâsa ǀgausa mûsa tsî ǁîn mati ǃgom mâsigu ǃnâ ra ûisa. ǁÎn ge kaise îsa ǃkhaib tawa gere ǁan xawe ǂkhabusa ǂurusib tsî ǀoro ǁgam-i tsîna ge ūhâ i. Xawen ge sida ǃgâsana ge ǂâiǂhansen tama hâ i. Nēs ge ǁîn ǃgao ge hoaǃnâ-aixa ûiǀgau i. ǁÎn omariden ūhâ ǃkhais ge kaise gere ǂkhî kain tsî ǃkhais hînan nî ǃoabas tsîna tsî aiǂhanub hînan ūhâb Jehovaba ǃoabasa. ǁÎn aiǁgaus ge ge hui mi ǂhâǂhâsa xūna ǂgurose mâisa tsî sim ûiba ǀguiǃgubuse ūhâsa.

ǀNî ǁaegu ais ge aitsama sī ǁgam-e ū tsî ǂû-e sas a ǂansa xu ǀkhara mâsigu ǃnâ gere sâi. Nēsas ge mati gere dīhō?

Ti ǁgûba ta ge ra gangan ǁkhāǁkhāteb ge ǃkhais ǃgao. ǁÎb ge ǂgui xūna ta nî sîsen-ū ǀgausa ge ǁkhāǁkhāte, ǀaesa ta nî khau ǀgaus tsî mati ta ǂkhari xūro i ǀkha nî ûi hō ǀgaus tsîna. ǀNî ǁaeb aim ge Kiribati di ǀon hâ ailandsa a sari o, om ge ǂkhariro oms ǃnâ gere hâ hîna haigu ǀkha kuruhe hâsa. ǂÛ-e sâis ǃgao ta ge āsa oms ǃnâ gere kuru, i ta ǀaesa khau ǁkhā. ǁGammi ǃgao ta ge nau kaikhoedi ǀkha tsaus tawa sī gere mâ. ǁGam-e hōs ǃgao î ge haiba gere sîsen-ūhe hîna ǃani ǂaide a gaxuba, nēs ge ǁauǃkhōs haib khami ge ī i. ǁÎn ge ǀunis ai nē haiba ge ǃgae tama hâ i xawe dōba gere ǃgae. Hoa kaikhoedi ge ǃēde gere māgu tsî ǁaeb ai gere dawasen. Dōb ge dawasen tsî ǁgammi ǀkha gere ǀoa. Tita ge ge ǂâi hâ i nēs a supu di, tita ge nēsa aitsama a dīs kōse. Ti haiba ta ge ǂgui ǃnāde ge aoǂgā xawe i ge xū-e ge ī tama hâ i. Khoen ge âi tes khaoǃgâs ge ǀgui kaikhoesa ge huite. ǁNā ǃās ǃnâ ge hâ i khoen ge hoaǁae ge huixa i tsî ge khoexaǃnâ i.

Hoaro ge saro ǁgaumâisa ge ǀnam ailandi ǃnâ. ǀNî ǂoaǂamsa ǁaegu xa ro a mîba da ǁkhā?

Winston: ǁAeroba î ge ge ū ǀnî ǁnaetiga ǁnâuǃāsa. Aiǁgause, ǃgâsan ge ǂû-en gere sâi o, o ūn ge hâ i ǂû-i hoa-e gere mā mi. ǂGurom ge ge ǀū i ǁîn tsînam xū-e nî ǁnāxūba ǃkhaisa. ǁNās ǀkham ge hoa ǂûn hînam gere mā-ena gere ǂû toa. Xawem ge amabes ǃnâ khoen di mâsiga a ǂanǂui o, om ge ǂû-e ge ǁnāxū tsoatsoa. ǃGâsan ge kaise ge ǁnâuǃāxa i. ǁÎn ge kaise gere ǂkhî mâ ǃani ǁkhâgu khaoǃgâ sima mûsa. Sim ǂam-ain ge ǁnā ailands ǃgâsana ǀnî hâ ǃgâsan ǀkha ge ǀhao tama hâ i.

Sim saridi ge ǀhûhâsib ǃnâ ǃgâi aoǁnâsa gere mā. ǂGui khoen ge gere ǂgom nē ǂgoms ge ǃgâsan xa aitsama ge tsoatsoahe di. Xawe i ge mûǂam-aob tsî ǁîb taras tsîna gere sari o, o i ge nēsa khoena kaise gere ǃgâiaǂgao kai.

Pam: Tita kaise ra ǃgôaǃgâ ǁaeb ge Kiribatis ǃnâm ge hâ io, nē ǀhaohâb ǃnâ i ge ǀoro ǃgâsan ǀguina ge hâ i. Itinikai Matera di ǀon hâ ǃgâsab hîna ge ǁîb ǀguiba ǀhaohâb ǃûi-ao îb ge ǁîb ǁkhāsib ǃnâ hâ xūn hoana gere dī kōǃgâ das ǃnâ. ǁÎb ge ǀgui tsē ǀgui ǃubus ǀkha ge sī. “Saro di a” dib ge ge mî. ǃUbus ge kaise sida ǃgao ge ǂoaǂamsa i ǁnā tsēdi ǃnâ. Nē ǀkhaeb ge sim ǂgaoga ge tsâǀkhā.

Pam, kuriga ǃkharu tsî i ge sa ǀgôa-i hîna ǃnaehe tama hâ-e ge ǁō. Tae-e nēs ǃnâ ge hui si?

Tita ge 1973ǁî kurib ǃnâ ge ǀgamǀkhā, tita tsî Winstoni tsîn ge South Pacific ailands ǃnâ ge hâ i. Xawem ge Australiaba ǃoa ge oaǀkhī tsî haka ǁkhâga ǃkharu tsî sim ǀgôa-e ge ǂoaǃnâ. Winstoni tsîn ge kaise ge tsûaǂgao hâ i, ǁîb ǀgôa tsîna ge i i amaga. Ti tsûaǂgaob ge ǁaeb ǀkha ge bē xawe hoase ge bē tama hâ i, Aprili 15 2009ǁî kurib The Watchtower ǂkhanib ge ǂoas kōse. “Questions From Readers” di hâ ǃâb ge ge dî: “Is there any hope of a resurrection for a baby that dies in its mother’s womb?” Nē ǁkhāǁkhāǃâs ge ge ǁgau Jehovab ge nî mîǁgui tae-eb nî dīsa, ǁîb hoaǁae ǂhanu-ai xūna ra dī amaga. ǁÎb ge ǃgomsin hîna nē eloxoresa ǃhūbaib xa ra ǃaromahena nî ūbē, ǁîb ǀGôabab ǀnamǀnamsa ǀgaub ǃnâ ra daoǁgau hîna îb ‘ǁGâuab sîsenga hîkākā.’ (1Jhn. 3:8) Nē ǁkhāǁkhāǃâs ge ge hui mi, ǂoaǂamsa “ǃams” hînam Jehovab khoen ase ūhâsa ǃgôaǃgâsiba ǁgausa. Gaosib ōsem ge nēm hâ ǃkhais ai ga hâ tama hâ.

Sim ǀgôa-em ge ǂoaǃnâs khaoǃgâm ge ǁkhawa ǀoasase ge ǃoaba tsoatsoa. ǁKhâgam ge Australiab betels ǃnâ gere ǃoaba tsî ǁnāpaxū ǁkhawa ǃnarimâs sîsenni ǀkha ge tsoatsoa. 1981ǁÎ kurib ǃnâm ge haka kurigam New South Wales tsî Sydnis tsîn ǃnâ ǃoaba hâ hîna Australiab ǁnâub berosa ǃoa ge ǁkhau-e tsîm ge ǁnāsa xu nēpa hâ.

Winston, sa ǂans hînats ge South Pacific ailands ǃnâ a hōsa ge huitsi, sa ǁgaumâis nēsits Australasiab ǁnâub kōmitees ǁanib ase ra sîsen o?

Îo, ǂgui ǀgaugu ǃnâ o. ǂGurose, Australiab ge American Samoab tsî Samoab tsîna gere mûǂam. ǁNās khaoǃgâ i ge New Zealandi ǁnâub beros tsî Australiab tsîna ge ǀhaoǀhao-e. Nēsi i ge Australasiab ǁnâub berosa Australiab, American Samoab tsî Samoab, Cook ailands, New Zealandi, Niue, Timor-Leste, Tokelau, tsî Tonga ailandi tsîna ra mûǂam, tita ge aiǂhanuba ge ūhâ i nē ailande ǁnâub beros ǂnûǁkhaeba-aob ase sarisa. Nē ǂgomǂgomsa ǃgâsan ǀkha nē ailandi ǃnâ sîsens ge kaise ge huite, ǁîna ta nēsi ǁnâub berosa xu ra hui amaga.

ǀAms ai ta ga ra mî o, tita tsî Pams tsîn ge ǀnai ge mûǂan kaira khoen ǀgui taman ge amaba ra ôana. Nēsam ge sim aiǁgausa xu aitsama ge mûǂan. ǂKhamkhoen tsîn ge ‘ǃgomǀgausa ǃamsa’ ra ôa, ǁîn omaris ǁanin ga ǃgâiǃgâibasensa amab ǃnâ ūhâ tama i xawe. (2Gao. 5:2, 3; 2Kro. 34:1-3) Jehovab ge a ǀnamǀnamsa Elo hîna ra ǂgaoba kaira tsî ǂkhamkhoen hoan ge ûiba nî hō di.

Tita tsî Pams tsîn ge Eloba a ôa tsoatsoa o 50 kuriga ǃkharu hâse, om ge ge ǀū i sim ôas mâpa nî ī-ū mi ǃkhaisa. Gaosib amab ǃams hîna kaise a ǀō-aisasam ge ge hō. Nē ǃams aim ge hoaǁae ra ǃkhōǀgara ǂgao, sim ǁkhāsib hoab ǀkha.