Khomai-aon dîdi

Satanni ge Evasa mîba o, is hais ǃgâib tsî ǂkhabab tsîkha disa xu ǂû ob nētsē hoaǃnâ-aixase a ǂansa ǁkhāǁkhās ǁō ǁoa gagas disa ǃoa gere ǁnaeǁgau?

ǁGâuab ge Evasa Elob xa ǂkhā-e hâ haisa xu ǂû kai o, ob ǁîsa ǀamoses nî ûi di ǀgui ge mîba tama hâ i xaweb ge nētsē ǁō ǁoa gagas ase a ǂansa ǁkhāǁkhās tsîna ge mâi-aiǃâ. Satanni ge Evasa ǀaob ǃnâ-ū ge mîba, ǂkhāsa haisa xus ga ǂû, ‘os tātsē ǁō tide di.’ ǁÎb ge ǁîsa nēs ǃnâ-ū gere mîba ǀamoses ǃgâi ûiba ǃhūbaib ai nî ūhâ tsî Elob ǂgaeǂguis ǃnāga hâ tide di.—Gen. 2:17; 3:3-5.

ǁŌ ǁoa gagas di ǁkhāǁkhās ge Edenni ǃnâ tsoatsoa tama io, os nēsa mâpa ge tsoatsoa? Nēs ge mâpa tsoatsoasa da ge a ǀū. ǂAn da ge a ama tama ǂgomdi ǁkhāǁkhā ǀgaugu Noaxi kai ǁgammi dâus tawa ge ǁō ǂoasa. Ama tama ǂgomdi ǁkhāǁkhā ǀgaugu ge kai ǁgammi dâusa ge ûiǃkharu tama hâ i, Noaxi tsî ǁîb omaris ama ǂgomsa ra ǂkhâǃnân ǀguin ge ûiǃkharu amaga.

Nēs ǃaromas ge ǁō ǁoa gagas di ǁkhāǁkhāsa kai ǁgammi dâus khaoǃgâ ge tsoatsoa. Elob ge khoen di gowaga ǂgō-ommi tawa ǀkharaǀkhara tsîn ge khoena “ǃhūbaib hoaragab ai” ǁan tsoatsoa on ge ǁō ǁoa gagas di ǁkhāǁkhās ǀkha ge aiǃgû. (Gen. 11:8, 9) Nē ama tama ǁkhāǁkhās ge mâǁae tsoatsoa ǃkhaisa da ǀū xawe da ge a ǂan “ǂhumib di ǁgûb” Satanni nēs ǃgâb ai hâ tsîb kaise a ǂkhîsa nē ǁkhāǁkhās ǃhūbaib ǂhawase hâsa.—Jhn. 8:44.