Jehovab ge nî ǁkhauba du—Mâ ǀgaub ǃnâ?

1. Jesuba tae-i ǃaroma Jehovaba ge ǂgan îb ǁîb ǁkhāǁkhāsabega sâuhe?

JESUB ge ǀuniga ǃuis ai gere ǂâi. Mati gu ǁîb di ǁkhāǁkhāsabega nî ǃgomsina nî hōǃâ ǀgausa. Jesub ge ǁîb ǁkhāǁkhāsabegab ǀnam ama ǀgore tsî ge ǂgan Jehovaba. Îb ǁîb ǁkhāǁkhāsabega ‘ǂkhababa xu sâuhe.’ (Jhn. 17:14, 15) Jesub ge ge ǂan i ǀgūǁaeb nî ǀhomma ǃoa nî oasa. Tsîb ǁGâuaba ǁnān hîna Jehovaba ra ǃoaban ǃoagu nî mâsa. Amase, Jehovab di khoen ge ǁkhaubahesa ǂhâba hâ.

2. Mati da a ǂan Jehovab sida ǀgorede nî ǃereamsa?

² Jehovab ge Jesub di ǀgoresa ge ǃeream. ǁÎbab a ǀnam amaga. Sida di ǁkhāsib hoab ǀkha da ga dītsâ o. Î da Jehovaba ǂkhîǂkhî. Ob ge ǁîb tsîna sida nî ǀnam. Tsîb ge ǁnās ǀkhas tsîna sida ǀgorede nî ǃeream tsî nî ǁkhauba da. Oms di Danab ra ǁîb omarisa kōǃgâ, khamib ge Jehovab tsîna ǀnamxaǃnâ ǀgaub ǃnâ ǁîb di ǀgôana nî kōǃgâ. ǁÎb ǀgôanab ga ǁkhauba tama io, i ge ǁîb di ǀonsa ǁgai ǀgaub ǃnâ nî mûhe.

3. Tae-i ǃaroma da Jehovab xa ǁkhaubahesa ǂhâ hâ nētsē?

³ Jehovab xa ǁkhaubahesa da ge ǀnais xa nēsi ǃnāsase ǂhâ hâ. ǁGâuab ge ǀhomma xu aoǂuihe hâ. “Tsîb ge kai ǁaiba ūhâ.” (J.ǂHa. 12:12) ǁÎb ge ǀnî khoena ǂâi kai hâ. Jehovab di ǃoaba-aonan ga ǁgâiǀā o, on Eloba “ǁnās ǀkha ra ǃoaba” di. (Jhn. 16:2) Tsî naun hîna ra sida ǁgâiǀān ge a ǂan. Sida ǃhūbaib di ǂâiǀgauba ūhâ tama amaga ra ǁgâiǀā da. Matikōsen ga khoena ǁgâiǀā da xawe da ge sida ǃao tama hâ. Tae-i ǃaroma? Elobmis nēti ra mî amaga: “Xawe ǃKhūb a ǂgomǂgomsa, sado ǀgaiǀgai tsî ǂkhababa xu nîra sâuba.” (2Tes. 3:3) Jehovaba mati ra ǁkhauba da? ǀKhī re da nēsi ǁîb ra mā ǀgam xūna ǃhoaǂgao.

JEHOVAB GE HOARAGA ǁÂTANINA RA MĀDA

4. Efeseǁîn 6:13-17 ǃoagu îb Jehovaba tae-e mā da hâ?

⁴ Jehovab ge hoaraga ǁâtanina māda hâ. Hîna ǁGâuab di ǃâitsâga xu a ǁkhauba da ǁkhāna. (Khomai re Efeseǁîn 6:13-17 sa.) Nē gagasi ǁâtanin ge kaise a ǀgaisa tsî a sîsen ǁkhā. Xawe da ga hoaraga ǁâtanina ga ra ana ǀgara o. O ǀgui i ge sida a ǁkhauba ǁkhā. Nē ǁâtanin di ǃâga tae-e ra ǂâibasen. Hā re î da mâ ǃâb hoaba ǃhoaǃgao.

5. Tae-e a amab di belt tsî tae-i ǃaroma da nî anasi?

⁵ Amab di belts ge amab hîna Elobmîs ǃnâ ra hōheba ǃoa ra ǁnaeǁgau. Tae-i ǃaroma da nē beltsa nî ana? ǁGâuab a ‘ǂhumib di ǁgû’ amaga da ge nî ana. (Jhn. 8:44) ǁGâuab ge ǀoadisidi kurina ǂhumib ǀkha ǃgoaxa. Tsîb ge ‘ǃhūbaib hoaragaba ǂgaeǂhapu’ hâ. (J.ǂHa. 12:9) Xawe amab hîna Elobmîs ǃnâ hâb ge ra ǁkhauba da. Î da tā ǁîb xa ǂgaeǂhapuhe. Xawe mati da nē amab di beltsa a ana ǁkhā? ǁNāsa da ge ra dī Jehovab xa da ga ǃnāsase a ǁkhāǁkhāsen o. Tsî da ge ǁîba ǃgâi ǂâis ǀkha nî ǃoaba. Tsî hoa xūn ǃnâ anusase nî tanisen.—Jhn. 4:24; Efe. 4:25; Heb. 13:18.

6. ǁKhaib ǁâsarab ǂhanu-aisib diba a tae, tsî tae-i ǃaroma da nî ana?

⁶ ǁKhaib ǁâsarab ǂhanu-aisib dib ge Jehovab di ǂhanu-ai ǀgauga ra ǁnaeǁgau. Tae-i ǃaroma da ǁkhaib di ǁâsaraba nî ana? ǁKhaib ǁâsarab ta soldaba ǁkhauba îb tā tsûtsûhe khami. Da ge sida tsîna nî ǂhanu-aisib di ǁâsaraba nî ana. Tsî sida di ǂgaob tsî ǂganagaba nî ǁkhauba. Nē ǁgai ǃhūbaib di ǂâiǀgauba xu. (ǂKhm. 4:23) Jehovab ge ra ǂhâba î da sida ǂgaob hoab ǀkha ǁîba ǃoaba. (Mat. 22:36, 37) ǁNā-amagab ge ǁGâuaba ra dītsâ îb sida ǂgaoba ǀgora. Î da ǃhūbaib di xūna ǀnam tsoatsoa. Tsî nēn ge xūn hînab Jehovaba ǃhui hâna. (Jak. 4:4; 1Jhn. 2:15, 16) Tsî da ga nē ǃhūbaib di xūna ǀnam tama io. Ob ge ǁGâuaba nî dītsâ îb ǀnîhâ ǀgauga sîsenū. Î da Jehovaba ǃoaba ǀû. Tamas ka io Jehovab ǃhui hâ xūna dī.

7. Mati da ǁkhaib ǁâsarab ǂhanu-aisib diba ra ana?

⁷ ǁNā ǁkhaib sarab ǂhanu-aisib diba da ge ra ana. Jehovab ǀgauga da ga ūǃoa o. Tsî da ga ǁnā ǀgaugu ǃnâ sida ûib ǃnâ ga ra sîsenǂui o. (Psa. 97:10) ǀNî khoen ge ǀnîsi nî tsâ Jehovab di ǀgaugu ǃnorasasiba mā tama hâ ti. Elobmîs ta mî ǀgaub ai da ga sida ûi tama io. O da ge ǁnā soldab hîna ǁkhaib saraba ra ǃkhams hâ hîna ūǁnâb. ǃGom i a ǃkhais ǃaromab khami nî ī. ǁNās ge ǃgâi tama mîǁguisa. Xawe ǁnān hîna Jehovaba ǀnaman ge nēsa a ǂâi hō ǁkhā. ǁÎb di mîmādi ge “ǃgom tama hâ.” Xawe ûiba ra sâu.—1Jhn. 5:3.

8. Tae-e i ra ǂâibasen î da ǂaide ǂgaeǂgā māsenxasib, ǂkhîb ǃgâiǂhôas dib ǀkha?

⁸ Paulub tsîn ge ǂkhâǃnâ da tsî ge mî î da ǂaide ǂgaeǂgā māsenxasib, ǂkhîb ǃgâiǂhôas dib ǀkha ti. ǁNās ge ra ǂâibasen î da hoa ǁae, ǃgâiǂhôasa aoǁnâs tawa ǂhomisa. Elobmîsa xu da ra hō xūna da ga nau khoen ǀkha ǀgoragu o. O î ge sida di ǂgomsa ra ǀgaiǀgaihe. Kaise i ge ǂkhâǃnâsa mûsa matin Jehovab di ǃoaba-aona hoaǁae ǃgâiǂhôasa aoǁnâs di ǃēden ga hō o ra dīsa. Aiǁgausen ge skolgu, sîsengu, ǁamaxū ǃkhaigu, omsa xu oms ǀkhas. Tsî Jehovaba ǃoaba tama khoenan ga aoǁnâbas tsî ǁnān hînan ga ǀhao-ūn tsîna ra aoǁnâba. ǀNîsi da ga ǃao tsî ga ra aoǁnâ ǀû o. O da ge soldab hîna ǃkhams nox hâ hîna ǁîb ǁkharode ra ǁkhūb khami nî ī. ǁNāsab ga dī o, o i ge ǁîb di ǂaide nî tsûtsûhe. Tsî i ge ǁnās ǀkhas tsîna ǁîba nî ǃgomba ǁkhaubasensa.

9. Tae-i ǃaroma da ǂgoms di ǁâtaniba nî ǃkhōǀgara?

⁹ Khōsikhōb ǂgoms dib ge ǂgoms hîna da Jehovab ǃnâ ūhâsa ra ǂâibasen. ǂGomǃgâsiba da ge ūhâ ǁîb mîmâi hâ xūnab di dī ǀoaǀoasa. ǁNā ǂgoms hîna da ūhâs ǀkha da ge ‘ǀaexa ǂāgu ǂkhabab digu hoaga a ǀari ǁkhā.’ Tae-i ǃaroma da khōsikhōb ǂgoms diba nî ūhâ? Nēs ge ni huida î da ǃgâi tama ǁkhāǁkhāde xu ǂgōsen. Tamas ka ion ga khoena ǃgâi tama xūna sida ǃoagu ga ra mî o. Î da tā ǂkhabuǂâi. ǂGoms ose da ge ǀgai-e ūhâ tide nau khoen ga ga ra ǃâitsâ da o î da Jehovaba ǁnâuǀnam tsî ǁîb di ǀgauga sao. Mâ ǁaeb hoab hîna da sida ǂgomsa ra ǁkhaubab. Aiǁgause skoli tamas ka io sîsenni ai o da ge ǂgoms di ǁâtaniba ana hâ. (1Pet. 3:15) Mâ ǁaeb hoab hîna da ǃgâise ra matare da sîsen-e ra ǁnaxub ai, da ge ǂgoms di ǁâtaniba tani hâ. (Heb. 13:5, 6) Tsî mâ ǁaeb hoab hîna da mâǃoahe tsî ra ǁgâiǀāhe xawe. Jehovaba ra ǃoaba ǀgarab ais ge sida di ǂgomsa ra ǁkhaubahe.—1Tes. 2:2.

10. Toro ǀgapas ǃgâiǃōsib disa a tae tsî tae-i ǃaroma da ǁîsa nî ǂnûi?

¹⁰ Toro ǀgapas ǃgâiǃōsib dis ge ǃâubasens hînab Jehovaba ra mādasa. Nē ǃâubasens ge ra ǂâibasen ǁîb di ǂâisa da ga dī ob nî ǀkhaedasa. Tsîb nî ǁō da ga xawe khâisa nî mādasa. (1Tes. 5:8; 1Tim. 4:10; Tit. 1:1, 2) Toro ǀgapas soldab danasa ra ǁkhauba khami i ge sida di ǃâubasens tsîna sida di ǂâiǀgauba ra ǁkhauba. Mati? ǁNā ǃâubasens ge ra hui da î da Jehovab mîmâi hâ xūn ai kō. Tsî tā nē ǃhūbaib di ǃgomsin ai sida di ǂâisa ǂnûi. Mati da nē ǀgapasa ra ǂnûi? Jehovab ra ǂâi ǀgaub ai da ga ǂâi tsoatsoa o, o da ge ǁnāsa ra dī. Aiǁgause hâ hâ tide ǃkhusib ai ǂgomǃgâ tama i tsî da ge Elob ai ra ǂgomǃgâ.—Psa. 26:2; 104:34; 1Tim. 6:17.

11. Taeba a gagab di gôa tsî mati da nî sîsenū?

¹¹ Elobmîs ge a gagab di gôa. ǁNā gôab ge ǂhumib tsî amaba ra ǀgora. Tsî khoena ǃgâi tama ǁnaetiga xu ra ǃnora kai. (2Kor. 10:4, 5; 2Tim. 3:16, 17; Heb. 4:12) ǁNā gôaba sîsenūsa da ge ra ǁkhāǁkhāsen. Elobmîsa khomais tsî Jehovab di ǀapeǂhumis ta mā ǁkhāǁkhādi ǃnâ-ū. (2Tim. 2:15) Nē ǁâtanin ai ǀaros tawab ge Jehovaba ǀnî hâ xū-i hîna ǁkhauba da ǁkhā-e ra māda. Tae-e ǁnā-e?

ǂHÂBASA TAMA I GE HÂ ǀGURI ǃKHAMSA

12. Tae-i tsîna da ǂhâ hâ tsî tae-i ǃaroma?

¹² ǂAnsa ūhâ soldab ge ra mûǂan ǁîb kai toroba ǀguri a ǃkham ǁoa ǃkhaisa. Xaweb ge nau soldagu di huib tsîna ǂhâ hâ. Tsî ǁnā ǀgaub ai da ge sida tsîna ǁGâuab tsî ǁîba ra saon tsîna sida ǀkhāba xu a ǃkhamǃoa ǁoa. Sida ǃgâsan di huiba da ge ǂhâ hâ. Jehovab ge ǃhūbaib ǂhabase hâ ‘ǃgâsana’ māda hâ, în huida.—1Pet. 2:17.

13. Hebreǁîn 10:24, 25 ǃoagu da ga ǀhaode hâ ǃnâ o, o da tae ǀkhaeba ra ǃkhōǃoa?

¹³ ǀGui ǀgaub hîna da ra ǂkhâǃnâheb ge ǀhaodi tawa sīsa. (Khomai re Hebreǁîn 10:24, 25 sa.) Hoa da ge ǀnî ǁaega ra ǂkhabuǂâi. Xawe da ga ǀhaodi tawa sī o. O da ge ra khoakhoahe. Sida ǃgâsan ǂgaoba xu ra mā ǃereamdi ge ra omkhâi da. Elobmîsa xun da mā ǃhoadi ge ra ǀgaiǀgaida î da Jehovaba ǃoaba ǀgara. Sida ǁgamǀhaodi, ǀhaos aisis tsî khaos ai di ge ra omkhâi da. (1Tes. 5:14) ǁNās ǀkha da ge ǀhaodi tawa ǃēsa ra hō î da nau ǃgâsana hui. Tsî da ge ǁnās ǀkha ra sida tsîna ǂkhî. (ǃNǃkh. 20:35; Rom. 1:11, 12) Sida ǀhaodi ge ǀnîhâ ǀgaugu ǃnâs tsîna ra huida. Nēs ge ra huida î da ǃgâi aoǁnâ-ao kai ǁkhā. Aiǁgause da ge ǁkhāǁkhās boksis ǃnâ hâ ǂkhanina ǃamku ǀgaub ǃnâ a sîsenū ǁkhā. ǁNā-amaga ǃamkuse aiǂhomisen re ǀhaodi ǃaroma. ǀHaos tawa ǃamkuse ǃgâ re. ǀHaos ai du go ǁkhāǁkhāsen xūna sîsenǂui re. ǁNāna du ga dī o, o du ge nî Jesu Xristub di ‘ǃgâi ǃkham-ao’ kai.—2Tim. 2:3.

14. Mapa xus tsîna da huiba a hō ǁkhā?

¹⁴ Hoada ge miliundi ǀgaisa ǀhomǃgāgu xa ra huihe. ǂÂi re ǀgui ǀhomǃgāb a dīǁkhā xū-e. (Jes. 37:36) Nēsi ǂâi re tae-e gu ǂgui ǀhomǃgāga a dīhō ǁkhāsa. Khoe-i tamas ka io demongu ge Jehovab di ǀgaisa toroǃkham-aoga a dā ǁoa. Jehovab ge hoaǀgaixa. Tsîb ga ǁîba sida ǀkha hâ o. O da ge ǁnān hîna sida ra mâǃoan xa a ǀgaisa. Matikōn ga xawes tsîna. (ǂHǂh. 6:16) ǂGom ǁkhā da ge a nēs a amasa. ǁNā xūn xa du ga ǂâi o du ge nēsi i ga, skol ǀhōsan, sîsen ǁare-aon. Tsî ǁnān hîna Jehovab ǃnâ ǂgom tamana ǁgai xūna a mî o ǂkhabuǂâi tide. ǂÂi hō re ǀguri du ge hâ tama nē ǃkhams ǃnâ. Jehovab ge ra daoǁgau du.

JEHOVAB GE HOAǁAE NÎ ǁKHAUBA DA

15. Jesajab 54:15, 17 ǃoagu i ǃgâiǂhôasa aoǁnâsa tae-i ǃaroma xū-i xa a ǁkhaehe ǁoa?

¹⁵ Nē ǃhūbaib hîna ǁGâuab xa ra ǂgaeǂgui-eb ge ǂgui ǃaromade ūhâ. Sida ǃhuis diba. Sida ge tātsēs tsîna ǂgīǂgosi xūn ǃnâ ǁkhao tama hâ. Tsî torob ǃnâs tsîna ǂgâ tama. Sida ge Jehovab ǀonsa koa tsî ǁîb di Gaosib nî ǀkhī-ū ǃgâi xūna ra ǂhôa. Tsî ǁnās ǀkhas tsîna Jehovab di ǂhanuga ra ǁnâuǀnam. Khoena da ge ra ǁgau nē ǃhūbaib di ǂgaeǂgui-aob a ǂhumi-ao tsî ǃgam-ao ǃkhaisa. (Jhn. 8:44) Tsî da ge ra ǂhôa ǁGâuab di ǃhūbaib nî ǀgū ǁae, dīkākāhesa. Xawe ǁGâuab tsî ǁîb di saosaben tsîn ge tātsēs tsîna sida di aoǁnâ sîsen-e ǀû kai tide. ǁNās ǃaroma da ge hoaǁae hō da ra ǃēs hoas tawa Jehovaba nî koa. ǁGâuab a ǀgaisa xaweb ge tātsēs tsîna. ǃGâiǂhôasa ǃhūbaib ǂhawase aoǁnâhesa ǁkhae hō tama hâ. Nēs ge a īǁkhā Jehovab di mâxōǀkhāsa da sida ǀkhāb a ūhâ amaga.—Khomai re Jesajab 54:15, 17 sa.

16. Matib Jehovaba kai ǁgâiǀāb tawa ǁîb khoena nî sâu?

¹⁶ Tae-e hānîǁaeb ǃnâ nî ī? Kai ǁgâiǀāb ǃnâb ge Jehovaba ǀgam ǀō-aisa ǀgaukha ǃnâ nî ǁkhauba da. ǂGuroseb ge ǁîb di ǂgomǂgomsa ǃoaba-aona nî sâu. ǁNā ǁaeb hînab da ama tama ǂgomdi hîna Babilons kais ǃnāka ra ǁnāde ra dīkākā hîna. (J.ǂHa. 17:16-18; 18:2, 4) Tsîb ge ǁnapaxu ǁîb khoena nî sâu. Armagedons ǃnâb ga ǁGâuab di ǃgau hâ xūna ga ra dīkākā o.—J.ǂHa. 7:9, 10; 16:14, 16.

17. Mâ ǃgâiba da ra hō Jehovab ǀgūse da ga hâ o?

¹⁷ Jehovab ǀgūse da ga hâ o ob ge ǁGâuba tātsēs tsîna hâhâ ra tsûba sida ai a dī ǁoa. ǁÎb ǀguib ge ǁnā tsûba nî hōǃâ. (Rom. 16:20) ǁNā-amaga ǀoasa ǁâtanina ana re. Tsî hoaǁae ana ǀgara re. Tā ǁGâuab tsî ǁîba ra sao khoen ǃoagu ǀguri ǃkham ǂgao re. Sadu di ǃgâsana ǂkhâǃnâ re. Jehovab di daoǁgausa sao re. ǁNāsa du ga dī o o du ge a ǂgomǃgâsiba ūhâ ǁkhā. Sadu di ǀhomsi ǁGûb Jehovab nî ǁkhauba du tsî ǂkhâǃnâ dusa.—Jes. 41:10.