ǂHumisa î du a ‘ǃhūbaiba ǀumisa’?

ǂHUMISA Î DU A ǃHŪBAIBA PARADAIS ǃOA ǀKHARAǀKHARASA?

Jehovab ge mîmā o, în khoena “ǃhūbaiba ǀoaǀoa, î ǁîb ǂama gaosîsen.” Ob gere ǂâibasens ge hoa ǃhūbaib nî paradais kai ǃkhaisa. (Gen. 1:28) ǁNān ǀamose nî ûin tsîn ge nē mîmāsa nî ǁnâuǀnam. Paradais ge tsoatsoas ǃnâ ǃhūbaib ai hâ tide, Edenni ǃhanab a ǀkhai amaga. Armagedons khaoǃgâ da ge ǂgui sîsen-e nî ūhâ. ǃHūbaib ǃâgu hîna ge ǁgaiǁgaihega ǃanusa. ǁNās ge ǂgui sîsen-e nî ǂgaoǀkhā da.

Nēs ge ra ǂâiǂâiǃnâ da, Israelǁîn ga dī hâ sîsenni xa. Babilonsa xun ge oasī o. ǁÎn ǃhūb ge 70 kuriga ge ǁan ǃnâhe tama hâ i. Xawe Jesajab ge ge kēbo, Jehovab huib ǀkhan ǁkhawa ǁîn ǃhūba nî îsa kaisa. Kēbos ge ge mî: ‘ǁÎb ge ǃgaroǃhūba Edenni khami nî dī tsî ǁîs ǀgopaǃhūba ǃKHŪB di ǃhanab khami.’ (Jes. 51:3) Jehovab ge Israelǁaesa ge hui în ǁîn ǃhūba îsa kai. ǁNās ǁkhās khamin ge Jehovab huib ǀkha, ǁnān hîna ǃhūbaiba nî ǀumina nē ǁan ǃkhaisa nî îsa paradais kai. Tsî nēsis tsîna du ge a ǁgau ǁkhā, ǁnā turaba du ūhâsa nē sîsenni ǃnâ ǁhaosa.

ǀGui ǀgaub ge ǁkhā du a-e dīsa, sadu oms tsî ǂnamipeb tsîna ǃanu tsî ǃamkuse ūhâsa. ǁNāsa du ge a dī ǁkhā, sadu ǁanǁare-aon ga ǃanu tama i xawe. ǀHaohâb ǀhaodi tsî ǀkharib kai ǀhaodi salgu tsîna ǃanuse ūhâs ǀkhas tsîna da ge a hui ǁkhā. Sadu mâsib ga mā-am o, o du ge māsenxase. Tsūkēǃgâb ga hâ o, huis ǃaroma tsîna a xoaǂgāsen ǁkhā. ǁNās ge nî ǁgau sadu ǃgâsana du ra hui ǂgaosa ǂhâsib ga hâ o. Dîsen re, ‘ǀNî xūn hîna ta hānîǁaeb ǃnâ a sîsenū ǁkhāna ta ǀnai nēsi a ǁkhāǁkhāsen ǁkhā?’

ǂHUMÎSA Î DU A KHÂISA NÎ HŌNA KŌǃGÂSA?

ǁŌba xub ge Jairub di ǀgôasa a khâi kais ǃkhaoǃgâb ge. Jesuba ge mî, îs nē ǀgôasa ǂûs nî xū-e mā-e. (Mrk. 5:42, 43) Nē 12 kurixa ǀgôasa kōǃgâs ge ga ǃgom sîsen tama hâ. Xawe ǂâi re matikō sîsen-e dīsa da ǂhâ hâsa, Jesub ga ǁîb di mîmâisa gara dīǀoaǀoa o. Sao rase: ‘Hoaraga ǁō hân nî ǀhobadi ân ǃnâ dommi Elob Ôab diba ǁnâu tsî ǁkhawa nî khâi.’ (Jhn. 5:28, 29) Elobmîs ga hoa xūna ǃkhōǂgā, tama ga ra ī xawe da ge a mûnanai ǁkhā. Khâisa ra hōn huiba ǂhâ hâsa ǂû-i, hâ ǃkhai-i tsî saran ǀkha. Nēsis tsîna du a ǁgau ǁkhā hui ǂgao du ra ǃkhaisa? Sao ra dîde du ge a ǂâiǃgâ ǁkhā.

ǃNarimâra mûǂam-aob ge sadu ǀhaohâba sī nî sari, di i ga ǂanǂanhe o. O māsen î du ra ǁîba ǂû ǀhaos ǃaroma ǁkhausa? Jehovaba ǀoasase ra ǃoaba ǃgâsa-i ga, betelsa xu aoǁnâ sîsenni ǃoa ǁkhawa a ǁgaumâihe o. Tamas ka io ǃNarimâra mûǂam-ao-i ase a ǃoaba ǀû o. ǁÎ-e du a hui ǁkhā hâ ǃkhai-e hōs ǀkha? ǀKharib kai ǀhaos tamas ka io ǀō-aisa kai ǀhaos ga sadu ǀgūse a hâ o. O du ǀnîsi ǀapeǁguib aiǃâ tamas ka io khaoǃgâ. Māsenxase sari-aona ǁkhoreǁhares ǀkha a hui ǁkhā?

ǂHUMÎSA Î DU A KHÂISA RA HŌNA ǁKHĀǁKHĀSA?

ǃNaeǃkhaidi 24:15 ǃnâ da ra khomai khami da ge, a ǃâubasen ǁkhā biliundi khoen khâisa nî hōsa. ǂGuin ge Jehovab xan ǂan tama hâ hîna ge ǁō. Xawen ge ǁnā ǃēsa nî hō khâis khaoǃgâ.a ǂGomǂgomsa ǃoaba-aon Elob din ge, ǁnāti ī ǁkhāǁkhās sîsenni ǃnâ ǃâ-e nî ūhâ. (Jes. 11:9) ǃGâsas Charlottes hîna ge Europi, Suid Amerikab tsî Afrikab ǃnâ gere aoǁnâs ge nēsa ǃoa ra mûǂui. ǁÎs ge ǃgâiaǂgob ǀkha ra mî: “Mûǂui ta ge ra khâisa nî hō khoena ǁkhāǁkhāsa. ǃKharuge ǁaeb ǃnâ ge ûi hâ i khoe-i xa ta ga khomai o. ‘O ta ge ǃnāsa ǁaeba ra ǂâi, ǁnā khoe-i ga Jehovaba ǂan hâ o. O i ge ǁî-i di ûiba ga ǀkhara hâ.’ ǃÂuǁoa ta ge a khâisa ra hō khoena mîbasa tae-en ge ǂoaǃnâsa.”

ǂGomǂgomsa ǃoaba-aon Jehovab din hîna ge Jesub ǃhūbaib ai nî ǀkhīs aiǃâ. Hâ in tsîn ge noxoba ǂgui xūna nî ǁkhāǁkhāsen. Mûnan-ai re, matikō ǃgâiǂgaob tsî aiǂhanub tsîna i ni mâdasa Daniela ǁguiǃābasa. ǁÎb ge xoa kēbodi hînab ge ǁnâuǃā tama hâ i, di ge mati a dīǀoaǀoahesa (Dan. 12:8). Tamas ka io Ruts tsî Naomis tsîna huisa î ra ǁkhāǁkhāsen. Matib ge Mesiaba ǁîra di suriba xu a hāsa. ǃGâiaǂgaob ǀkha da ge hoa ǃhūbaib ǃnâ khoena nî ǁkhāǁkhā. Tsî da ge ǁgâib tsî nētsēs ǁgai ǃhūbaib ǃnâ hâ ǂhanib tsîna ūhâ tide.

Mati du nēsi a ǁgau ǁkhā, ǂhumisa du asa nē ǁkhāǁkhā sîsenni ǃnâ ǃâ-e ūhâsa? ǀGui ǀgaub ge aoǁnâ sîsenni ǃnâ ǀāǀāsensa tsî ǁî-e dīsa. (Mat. 24:14) Nēsi da ga kaira tamas ka io ǀkhara mâsigu xa ǃaromahe hâse aoǁnâ sîsen-e a dīǁoa. Xawe da ge a ǁgau ǁkhā ǂhumisa da a ǃkhaisa khâisa ra hō khoena ǁkhāǁkhāsa. Tsî nēsi ǁkhā da a-e dītsâsa aoǁnâ sîsenni ǃnâ.

Saora dîdi xa ǂâis ge kaise a ǂhâǂhâsa: ǃHūbaiba amase ǀumisa ǃoa du ra mûǂui? Mûǂui î du ra ǃhūbaib ǂama Gaosîsen tsî khâisa ra hō khoena kōǃgâ tsî ǁkhāǁkhāsa? ǁGau ǁkhā du ge a ǂhumisa du a ǃkhaisa nētsē aoǁnâ sîsenni ǃnâ mâ ǃēs hoasa sîsenūs ǃnâ-ū. Î du ǃhūbaiba du ga ǀumi o, ǁnā xūna sī sîsenū.