Jehovab ai ǂgomaiǂnûi Simsonni khami

1-2. Tae-i ǃaroma da Simsonni ǃnaeǃkhais ǃnâ ǃgâiǃgâibasensa nî ūhâ?

SIMSONNI ǀons xa du ga ǁnâu, o du tae-i xa ra ǂâi? ǁÎb ge ǀgaisa i ǀgaus xa du ge ǀnîsi ra ǂâi. ǁNās ge a ama. Simsonni ge ǁgai mîǁguigu kai tsûba ge ǃaroma ga ge dī. Xawe ǁnās ǂam-aib ge Jehovaba, Simsonni ge ǁîba ǃoabas ǃnâ gere dīn ai ǂâisa ge ǂnûi. Tsîb ge Simsonni ǂgomǂgomsasiba, Elobmîs ǃnâ sida ǃgâib ǃaroma ge xoamâi kai.

² Jehovab ge Simsonni ǃnâ-ū buruburuxa xūna ge dī, îb Israelǁaesa hui. Tsî 1 000 kuriga Simsonni ǁōb khaoǃgâb ge Jehovaba, apostel Pauluba Simsonni ǀonsa ǂgomǂgomsa khoegu ǁaegu ge xoa kai. (Heb. 11:32-34) Simsonni aiǁgaus ge a ǂkhâǃnâ da ǁkhā. ǁÎb ge ǃgom mâsigu ǃnâs tsîna Jehovab ai ge ǂgomaiǂnûi. Nē ǁkhāǁkhāǃâs ǃnâ da ge tae-e da Simsonna xu nî ǁkhāǁkhāsens. Tsî ǁîb aiǁgaudi mati ra ǂkhâǃnâ da ǀgauba nî ǃhoaǃgao.

SIMSONNI GE JEHOVAB AI GE ǂGOMAIǂNÛI

3. Simsonna mâ ǁgaumâisa ge ūhâ i?

³ Simsonni gere ǃnae ǁaeb ǃnâ i ge, Filisteǁîna Israelǁaesa ǂgaeǂgui tsî gere ǁgâiǀā. (ǂHǂh. 13:1) Israelǁaes ge ǃgoma gere tsâ, Filisteǁîn ge ǁgai ǀgaub ǃnâ gere ǂgaeǂgui amaga. Jehovab ge Simsonna ge ǁhûi îb, ‘Israelǁîna Filisteǁîna xu huiǂui.’ (ǂHǂh. 13:5) Xawe ǁnā ǁgaumâis ge kaise ge ǃgom i. Nē ǁgaumâisa dīǀoaǀoas ǃaromab ge, Simsonna Jehovab ai ǀoasase ge ǂgomaiǂnûi.

4. Jehovaba mati Simsonna ge hui, îb Filisteǁîna xu ǃnorakaisen? (ǂHanuǂhanu-aogu 15:14-16)

⁴ Simsonni di ǂgomǃgâsib tsî ǂkhâǃnâs Jehovaba xub gere hōs xa ǂâiǃgâ re. ǀGui ǃnâ-i ai î ge, Filisteǁî toroǂnubisa Simsonna Lehi ti ǀon hâ ǃās Judab dis ǃnâ ge ǃkhō. Judab ǃnâ hâ khoegu ge ǃaob xa Simsonna ǃkhō tsî khākhoeb ǃomǁae ge māǁnâ. Simsonni khoen ge ǁîba ǃkhō tsî ǀgam tsurigu ǀkha ge ǃgae tsî ǁîba Filisteǁîna ǃoa ge sī-ū. (ǂHǂh. 15:9-13) Xawe ‘Jehovab di gagab ge ǀgaiǀgai bis’ khaoǃgâb ge Simsonna, ge oresen. Tsîb ge “ǀase ǁō hâ dâuki-i di ǃnâniǂkhōba” hō tsî 1 000 Filisteǁî khoega ge ǃgam.—Khomai re ǂHanuǂhanu-aogu 15:14-16 sa.

5. Simsonna mati ǂgomǃgâsiba Jehovab ǃnâ ge ǁgau, dâukib ǃnâniǂkhōba sîsenūs ǃnâ?

⁵ Simsonna tae-i ǃaroma dâukib di ǃnâniǂkhōba ge sîsenū? ǁNāti ī xū-i ge ǃkhams ǃnâ ge sîsenūhe tama hâ i. Simsonni ge ge ǂan i, Jehovab mâ ǃkham-ū xū-i ǀgui-eb ga sîsenū xawe nî huibisa. Nē ǂgomǂgomsa-aob ge ūb ge hâ i xū-e ge sîsenū, Jehovab di ǂâisa dīǀoaǀoas ǃnâ. Simsonni ge nē khoegu hoaga ge ǃgam ǁkhā-i, Jehovab aib gere ǂgomaiǂnûi amaga.

6. Sida ǁgaumâide dīǀoaǀoas ǃnâ da, tae-e Simonna xu a ǁkhāǁkhāsen ǁkhā?

⁶ Sida tsîn ge ǁgaumâide a dīǀoaǀoa ǁkhā, ǃgomse î ga mûsen xawe. Elob ge buru kai da ǁkhā a ǀgaub ǃnâ huida ǁkhā. ǂGomǃgâ re Jehovab hîna ge Simsonna a huib tsîn sado nî huisa, î du ǁÎb ǂâisa dī ǁÎb ai du ra ǂgomaiǂnûis kōse.—ǂKhm. 16:3.

7. Mâ aiǁgausa ra ǁgau, ǂhâǂhâsa î asa Jehovab daoǁgausa ôasa?

⁷ ǂGui ǃgâsan sida ǃoaba omga ra oman ge, ǂgomǃgâsiba Jehovab ǃnâ ǁgau hâ. ǃKharuge ǁaeb ǃnân ge ǃgâsana ǃoaba ǃkhaigu mati nî dīhes tsî nî omhe ǀgaub tsîna gere mîǁgui. ǃNāsa khoen ra ǁāǁnâhe tsî i ǀapeǂhomis di ǂhâsiga ra ǀarosen, amaga î ge ǀkharaǀkharana ra dīhe. ǃEreamsa ūhâ ǃgâsagu ge Jehovab daoǁgausa ôa tsî ǀasa ǀgauga ra sîsenū. Aiǁgause, ǃkhaina ǁama tsî dī-unus khami. Robert-i hîna ge ǂgui kuriga ǃkharu tsî omsîsengu ǃnâ, ǃhūbaib ǂhawase gere sîsenni ge ra mî: “ǂGuro î ge ǀnîna ge supuba tama hâ i, nē ǀasa ǀgauga ūǃoasa.” ǁÎb ge aiǃgû tsî ra mî: “ǂGui kurina ǃkharu tsî da gere dīsa xus ge nēsa ge ǀkhara i. Xawe gu ge ǃgâsaga māsenxase ge ūǃoa. Tsî î ge a mûsen ǁkhā, Jehovab nē ǀkharaǀkharana ra ǀkhaesa.” Nēb ge ǀgui ǀgaub Jehovab ǁîb khoena ra daoǁgauba îb ǁîb ǂâisa dīǀoaǀoa. ǁAeba xu ǁaeb ǀkha da ge hoada nî dîsen: ‘Jehovab daoǁgausa ôa tsî ta māsenxase ǀkharaǀkharana ra dī, ǁîba ǃgâi ǀgaub ǃnâ ǃoabas ǃaroma?’

SIMSONNI GE JEHOVAB GE MĀ XŪNA GE SÎSENŪ

8. Simsonna tae-e ge dī kaiseb ge ǁgâ io?

⁸ ǀNîsi du ge Simsonni ge dī buruxa xūna ra ǂâihō. ǀGuri xamma ǃgam tsîb ge ega ǃnonadisi (30) khoega Filisteǁîn ǃās Askelons ǃnâ ge ǃgam. (ǂHǂh. 14:5, 6, 19) Simsonni ge ge ǂan i, Jehovab huib oseb ǁnā xūna dīhō tidesa. ǁNās ge ge ǃgāsa-i, ǀgui ǃnâ-i aib ge 1 000 Filisteǁî khoega ǃgam toa hâs khaoǃgâ a ǁgâ o. Tae-eb ge dī? Āb nî ǁgam-e aitsama ôas xab ge, Jehovab ai huiba ge ǂgan.—ǂHǂh. 15:18.

9. Jehovaba mati Simsonni ǀgoresa ge ǃeream? (ǂHanuǂhanu-aogu 15:19)

⁹ Jehovab ge Simsonni di ǀgoresa ge ǃeream, buruxa ǀgaub ǃnâ ǁîba ǁgam-e mās ǃnâ-ū. Simsonni ge ǁnā ǁgam-e ā, ob ge ǀgai tsî “ǃgâi tsâsiba” ge ūhâ i. (Khomai re ǂHanuǂhanu-aogu 15:19 sa.) Mîheras ǃoagu î ge nē ǀasa ǀausa, noxoba kēbo-aob Samueli ge ǂHanuǂhanu-aogu ǂkhanisa xoa, o ge hâ i. Israelǁaes hîna ge ǁnā dâu ra ǁgam-e a mûs ge ge ǂâiǂâiǃnâhe, Jehovab ain ga ǂgomǂnûi ob ǁîb ǂgomǂgomsa ǃoaba-aona ǂhâsib ǃnâ nî huisa.

10. Tae-e da nî dī î da Jehovab huiba hō? (Ai-īsiba mû re.)

¹⁰ Sida tsîn ge Jehovaba ǃoa nî kō, gā-aisib tsî ǁkhāsib tsîna da ga ūhâ xawe. Tamas ka io Jehovab ǃoabas ǃnâ da ge dī xūn ǃaroma. ǃGamǃgamsenxase da ge nî ǁnâuǃā Jehovab ra ǂgan da xūna da, ǁîb ai da ga ǂgomaiǂnûi o ǀgui a dīhō ǁkhāsa. Simsonni ge ǂhâb ge hâ i ǀgaiba ge hō Jehovab ge mābi ǁgam-eb ge ā o. Simosonni khami da ge sida tsîna Jehovab huiba nî ūǃoa, î da ǂgomǂgomsase ǁîb ǃoa hâ.—Mat. 11:28.

11. Mati da Jehovab ai huib ǃaroma nî ǂgomǃgâ? ǁGuiǃā re.

¹¹ Sao ra aiǁgausa ǃgaoǃgâ re, Alekseb ge Russiab ǃnâ hâ ǃgâsan di ǀguib hîna ra mâǃoaheba. Tae-e ǁîba ge hui îb ǃgomǁaegu ǃnâ mâǀgai? ǁÎb tsî ǁîb taras tsîn ge gagasi xūna hoaǁae ǀguiba ra dī. ǁÎb ge ra mî: “Dītsâ ta ge ra ti gagasi ǀapeǁguiba ūhâ ǀgarasa, î da Elobmîsa khomai tsî ǁîsa tsēs hoasa ôaǃnâ ǀgara. Mâ ǁgoas hoasa ta ge ti taras ǀkha tsēsmîsa ra ǃhoaǃgao tsîm ge ǀguiba ra ǀgore.” Nēsa tae-e ra ǁkhāǁkhāda? Sida ai ǂgomǃgâs xa da ge, Jehovab ai nî ǂgomaiǂnûi. Mâ ǀgaub ǃnâ? Nēsa da ge ra dī, sida ǂgomsa ra ǀgaiǀgai xūna da ga hoaǁae dī o. Aiǁgause Elobmîsa ôaǃnâ, ǀgore, ǀhaode hâǃnâ tsî da ga aoǁnâ o. ǁNāpaxūb ge Jehovaba ǂhâ da hâ, huiba nî māda î da aiǃgû tsî ǁîba ǃoaba. Simsonnab ge ge ǀgaiǀgai tsîb ge ǁkhā ǀgaub ǃnâ sida tsîna nî ǀgaiǀgai.

SIMSONNI GE GE ǀÛSEN TAMA HÂ I

12. Simsonna mâ ǁgai mîǁguiba ge dī? Tsî matib ge ǂguro masiba Delilas ǀkhab ge ūhâ iba xu ǀkhara i?

¹² Simsonni ge sida khami ǀoasa kurusa ge ūhâ tama hâ i. Tsîb ge ǀnî ǁaegu ai ǃgâi tama mîǁguiga ge dī. ǀGui mîǁguib hînab ge dīb ge ǃgâi tama ǀamǂoasa ge hau. ǂHanuǂhanu-aob aseb ǁaeroba ǂgaeǂgui hâ hînab ge Simsonna, “Delila ti ǀon hâ khoes Sorekǃgoaǃnāb ǃnâ ge ǁan hâ isa ge ǀnam.” (ǂHǂh. 16:4) Aiǃâb ge ǀnai Simsonna Filisteǁî khoesab nî ǃgammesa ge mîmâi hâ i. Xawe ǁnā ǃgaeǁnaes ge Jehovaba xu ge hâ i. “ǃKhūb ge Filisteǁîn ǃoagub nî ǃkham soa-e gere ôa xui-ao.” Egab ge Simsonna ǀai-aos di oms ǃnâ gere hâ, Filisteǁîn ǃās Gasas ǃnâ. ǁNā ǃnās aib ge Eloba Simsonna ge ǀgaiǀgai îb ǁnā ǃās di dao-amde tani bē tsî ǃāsa ǂkhabu kai. (ǂHǂh. 14:1-4; 16:1-3) Delilas ǀkha î ge ge ǀkhara i, ǁîs ge ǀnîsi Israelǁî i amaga.

13. Delilasa tae-e Simsonna ge dī?

¹³ Delilas ge kai mari-e Filisteǁîna xu ge ǃkhōǃoa îs Simsonna ǀapexū. Kaiseb ge ǀnîsi ge ǀnam ǁō hâ i tsîb ge Delilas tae-e ra dī ǂgaosa ge ǀū i. Mâ ǃaroma-i ǀgui i ga hâ xawes ge Delilasa Simsonna ǃnās hoasa gere dî, tae-i ǃaromab ge ǀgaisa isa tsîb ge ǁîsa ge mîba. Tsûaǂgaoxaseb ge Simsonna ge mā-am î-i ǁnā mâsiba ǃaroma, îb ǁîb ǀgaib tsî Jehovab di mā-ams tsîna ǁaeroba ǂoaǃnâ.—ǂHǂh. 16:16-20.

14. Tae-e Simsonni ǀkha ge ī Delilasab ge ǂgomǃgâ amaga?

¹⁴ Simsonni ge tsûba ge hōǃâ, Delilas ǃnâ ǂgomǃgâ tsîb ge Jehovab ǃnâ ǂgomǃgâsiba ǁgau tama hâ i ǃkhais ǃaroma. Filisteǁîn ge Simsonna ǃkhō tsî ǁîb mûde ge xoroǂûi. Gasa ti ǀon hâ ǃās di ǃkhōsis ǃnâb ge ge ǂganamǂgāhe. ǁNā ǃās di daoteb ge Simsonna aiǃâ ge khôaǁnâ hâ-i. ǁNā ǃās khoen ge ǃhoro-i di ǁkhami-aob ase ge ūbi. Tsî ǁîn di ama tama elob dagon ti ǀon hâban ge ǁguibade ge dība, Simsonnab ge ǁîn di ǃomaǁae mā amaga. “ǁKhoaxasi-e dī” tsîn ge Simsonna ǃkhōsisa xu ge sī-ū, în ǁîba ǃhō.—ǂHǂh. 16:21-25.

15. Simsona mati ǁkhawa ge ǁgau, Jehovab aib ra ǂgomǃgâsa? (ǂHanuǂhanu-aogu 16:28-30) (Tsoatsoas ai hâ ai-īsiba kō re.)

¹⁵ Dīsāb ge xaweb ge Simsonni ge ǀûsen tama hâ i, ǃē-eb ge ge ôa îb Filisteǁîn ǃoagu Elob xab māhe hâ ǁgaumâisa dīǀoaǀoa. (Khomai re ǂHanuǂhanu-aogu 16:28-30 sa.) Simsonni ge Jehovaba ge ǀkhoma nē ǃnâs ǀguisa ǁkhawa ǀgaiǀgaite re, “î ta nē ǀgui dīb ǀkha Filisteǁîna ǀkhaobasen.” Ama Elob ge Simsonni di ǀgoresa ge ǃeream tsî ǁkhawa buruburuxa ǀgaiba ge mābi. ǁNās xa ǃaromahe hâseb ge Simsonna ǃnāsa Filisteǁîna nē ǃnâs ai ge ǃgam ǀnaib ge dī hâ is xa.

16. Tae-e da Simsonni ge dīsā xū-e xu a ǁkhāǁkhāsen ǁkhā?

¹⁶ Simsonni ge ǁîb dīsā hâ xū-i xa tsûba a hōǃâ. Xawe î ge nē-e ge ǃaroma tama hâ i îb Jehovab di ǂâisa ǀû. Dīsā tsî da ga ǁnamahe tamas ka io aiǂhanu-e ǂoaǃnâ xawe da ge tā nî ǀûsen. ǂÂis ǃnâ ūhâ, Jehovab ge sida ǃnâ ǀûsen tama hâ. (Psa. 103:8-10) Dīsā da ga xawe da ge noxoba Jehovab xa a sîsenūhe ǁkhā, Simsonni khami.

17-18. Michaeli aiǁgausa tae-i ǃaroma ra ǂkhâǃnâ du? (Ai-īsiba mû re.)

¹⁷ Michael ti ǀon hâ ǂkham ǃgâsab aiǁgaus xa ǂâi re. Jehovab ǃoabas ǃnâb ge ǂgui xūna gere dī, ǁîb ge ǀhaohâb hui-aob tsî ǁnaetisa aimâba-aob ases tsîna gere ǃoaba. Tsûaǂgaoxaseb ge ge dīsā tsîb ge ǀhaohâb ǃnâb ge ūhâ i aiǂhanuga ge ǂoaǃnâ. ǁÎb ge ra mî: “Nēsis kōse ta ge kaise ge ǀhape i Jehovab di ǃoabas ǃnâ. Xawen ge xūna ǃkhaese ge dawa, xū-e ta Jehovab ǃoabas ǃnâ a dīǁoa khami ta ge gere tsâ. ǂÂi tama ta ge ge hâ i, Jehovab tātsē ǁnāxute tide ǃkhaisa. Xawe ta ge gere ǂâi ti ǀhōsagusis Jehovab ǀkha ta ūhâs ǀgui tidesa. Tamas ka io ta ǁîba ǁkhawa ǀnai ta gere dī khami ǀoaba hō tidesa.”

¹⁸ Michaeli ge ge ǀûsen tama hâ i. ǁÎb ge ra ǀaro: “ǃGarise ta ge ge sîsen î ta Jehovab ǃoa ǀgū. ǃNās hoasa ǁîb ǃoa ǀgore, Elobmîsa ôaǃnâ tsî ǂâiǃgâs ǃnâ-ū.” ǁAeba ǃkharu tsîb ge Michaela ǁîb aiǂhanuga ǀhaohâb ǃnâ ge hō-oa. Nēsisab ge ǀhaohâb ǃûi-ao tsî ǁnaetisa aimâba-aose ra ǃoaba. ǁÎb ge ra mî: “ǂKhâǃnas hîna ta ge ǃgōsase ǀhaohâb ǃûi-aoga xu hōs ge ge huite î ta mûǂan Jehovab noxoba a ǀnamtesa. ǁKhawa ta ge nēsi ǀhaohâb ǃnâ, ǃanu ǃgâiǂâis ǀkha ǃoaba ǁkhā. Nē xū-i ge ge ǁkhāǁkhāte î ta ǁnâuǃā Jehovab ama ǃhobasen ra khoena ra ǀûba ǃkhaisa.” ǂGomǃgâsiba da ge a ūhâ ǁkhā, Jehovab sîsenū da ǁkhāsa tsîb nî ǀkhaedasa dīsā da ga xawe. ǁKhā da a-i hoa-e dī tsî da ga sida daoga a ǂhanuǂhanuo. Aiǃgû tsî da ga ǁîb ai ǂgomaiǂnûi o.—Psa. 86:5; ǂKhm. 28:13.

19. Simsonni aiǁgausa mati ra ǀgaiǀgai du?

¹⁹ Nē ǁkhāǁkhāǃâs ǃnâ da ge ǀoro xūron hîna ge Simsonni ûib ǃnâ īna go ǃhoaǃgao. ǁÎb ge ǀoasa kurusa ge ūhâ tama hâ i, xaweb ge ǀûsen tamase Jehovaba ǃoabas ǃnâ ge ǁgūtsâ, Delilas ǀkhab ge dīsās khaoǃgâs tsîna. Jehovab ge ǁîb ǃnâ ge ǀûsen tama hâ i. Elob ge ǁkhawa Simsonna kai ǀgaub ǃnâ ge sîsenū. Jehovab ge noxoba ǁîba ǀgaisa ǂgomsa ūhâ khoeb ase gere mû. Tsîb ge ǁîba ǂgomǂgomsa khoen hîna Hebreǁîn 11ǁî danaǃâs ǃnâ xoamâisan ǃnâ ge ǃkhōǂgā. Kaise i ge ra ǁkhaeǂgao da ǂansa, nēti ī ǀnamxaǃnâ ǁGûba da ra ǃoaba ǃkhaisa. Hîna ǀgaiǀgaidas turaba ūhâba, ǃgōsase ǂkhabu da ga ǁaeb ai. ǁNā-amaga da ge Simsonni khami Jehovaba nî ǀkhoma ǀgara: “Tita xa ǂâi re. Nē ǃnās ǀguisa ǁkhawa ǀgaiǀgai te re.”—ǂHǂh. 16:28.