Taoxa ta ge ī xawe ta ge ge sîsabe kai

Viennas, Austriab ǃnâ hâ ǃās ǃnâ ta ge ge ǃnae 1951 Katolik omaris ǃnâ. Tao xa ta ge ī xawe ta ge Elob ǃnâ gere ǂgom tsî tsēs hoasa gere ǀgore. Khoese kurixa ta ge io ob ge ti dadaba Jehova ǃoab-aon ǀkha Elobmîsa ge ǁkhāǁkhāsen tsoatsoa tsîs ge ti mamas tsîna ega ge sao-ai tsoatsoa.

Tsî da ge ega Viennas ǃnâ, Dobling ti ǀon hâ ǀhaohâb ǃnâ ge ǁani kai. Omaris ase da ge ǂgui xūna ǀguipa gere dī. Elobmîsa da ge khomai tsî gere ǁkhāǁkhāsen, ǀhaode hâǃnâ tsî māsenxase ǀkharigu ǀhaodi tawa gere hui. ǁNā kurigu ǃnâb ge ti dadaba ge hui te î ta Jehovaba kaise ǀnam. Ti dadab ge hoaǁae gere ǀgore î-i tita tsî ti ǃgâs tsîna aimâba-ao kai. Xawe ta ge tita ǁnāsa ge dī ǂgao tama hâ i.

ǀOASA ǁAEBA ǃOABA TSOATSOAS

ǁĀǁnâhe ta ge ge 1965, 14 kurixa ta a hîna. Kaise i ge ge ǃgomba te ī ǀū ta a khoena aoǁnâbasa. ǃNāsa ǁaeba ta ge gere ǂâi nau ǂkham khoen tita xa a ǃgâisa tsî ta ge ǁîn xa gere ūǃoahe ǂgao. ǁNās khaoǃgâ gaxu ǁaeba ǃkharu tamase ta ge Jehovaba ǃoaba tama khoen ǀkha ge ǀhōsagu tsoatsoa. ǁÎn ǀkha hâs ge ge ǃgâiba te ī xawes ge ti ǃgâiǂâisa gere ǂhani te. Jehovaba ǀnam tama khoen ǀkha da ge ǃnāsa ǁaeba gere hâ amaga. Xawe ta ge ǀgaiba ge ūhâ tama hâ i dī-ūnusensa. Tae-e ge hui te?

ǁNā ǁaeb ais ge 16 kuri xa ǀgôas Dorothee ti ǀon hâsa sida ǀhaohâba ǃoa ge doe. ǁÎs omsa xu omsa ǀkha aoǁnâsa ūba hâ ǀnamma ta ge ge mû. ǁÎs xa ta ge ge ǂkharirose kai ī xawe ta ge tsēs hoasa ge aoǁnâ tama hâ i. Ti ǃnâ ta ge gere ǂâi: ‘ti ǁgûra ge hoara amab ǃnâ hâ, xawe Dorothees ge ǀguri amab ǃnâ ge hâ i tsî ǀaegusa mamasas ǀkha gere hâ xawes ge hoaǁae aoǁnâ sîsenni ǃnâ gere ǂoa.’ ǁÎs aiǁgaus ge ge ǂkhâǃnâ te î ta ǃnāsa-e Jehovaba dība. Tsîm ge Dorothee hâma ǀguipa ge ǃoaba tsoatsoa ǂgurose huiǃnâra aimâba-aose, ǁnāpaxu ǁnaetisa aimâba-aose. ǁÎs ge ge hui te î ta ti ǂguro Elobmîs ǁkhāǁkhāsa tsoatsoa. ǁAe-e ǃkharu tsî i ge ge supuba te khoen ǀkha dao-amdi, ǃgangu tsî nau ǃkhain ai ǃhoasa.

Aimâba-aose ta ge ǃoaba tsoatsoas khaoǃgâb ge Austriaba xu ǃgâsaba sida ǀhaohâba ǃoa ge ǀkhī. Amabab ge Kanadab ǃnâ ge ǁkhāǁkhāsen, ǁîb ǃgâsab Jehovaba ra ǃoababab sari hâ hîna. Heinsi ge sida ǀhaohâba ǃoa ge ǁgaumâihe ǀō-aisa aimâba-aob ase. Tsoatsoasa xu ta ge ǁîb xa ge ǃgâibahe ī xaweb ge ǁîba gere sîsabe kai ǂgao tsî tita ge ǁnāsa ge ǂgao tama hâ i. ǁNā-amaga ta ge ǁîb xa ta ǃgâibahesa ge ǁgau tama hâ i. Egam ge Heins hâma ǂangu tsî ge ǃgame tsîm ge ǀguipa Austriab ǃnâ aimâba-aose ge ǃoaba tsoatsoa.

SÎSABE TURABA OMKHÂIS

Heinsi ge ǃnāsa ǁaeba sîsabe kai ǂgaob ra ǃkhais turuba tita ǀkha gere ǃhoa. ǁGari te tamab ge ge hâ i xaweb ge hoaǁae ǂkhâǃnâ te ra dîde gere dî. Aiǁgause, “ǀgôa-em ūhâ tama hâo ǃnāsa-em Jehovab ǃoabas ǃnâ a dī ǁkhā?” Taoxa ta ge i amaga ta ge gere ǃao sîsabe kaisa. ǁNaetisa aimâba-ao ta ge ī xawe ta ge gere ǂâi sîsabe kais nî ǃgomba tesa. Xaweb ge Heinsa ge hui te î ta sîsabe kais xa ǂâiǃgâ. Tsî ge huite î ta ti ǃaob ai kaise tā ǂâisa ǂnûi xawe khoena huis ai. ǁÎb ǀapemās ge kaise ge hui te.

Tsîs ge nēsa sîsabe kais di turaba ge omkhâi. Tsîm ge Gilead skoli ǃaroma ge xoaǂgāsen. ǁNā ǁaeb ai ǁnâub beros dawa gere sîsen ǃgâsab ge ge mîba te î ta ǀapaǃao gowaba ǁkhāǁkhāsen. ǁÎb ge ǀapemāde khami ta ge ge dī tsî ǀapaǃao gowaba ge ǃgâiǃgâi. Xawem ge ǃnona kurigu khaoǃgâ Heins hâma Serbo-Croatian ǀhaohâba ǃoa ge ǁgaumâihe Salzburg ti ǀon hâ ǃās, Austriab ǃnâ. ǁNā ǂkharis ǃnâm ge hû kuriga ge sîsen tsî ǀgui kuriba ǃnarimâra sîsen-e ge dī. Serbo-Croatian gowab ge kaise ge ǃgom i xawem ge ǂgui khoena Elobmîsa gere ǁkhāǁkhā.

ǁNāpaxum ge 1979 ge ǂganhe îm “ǂkhari ǁaeroba” Balgeriaba ǃoa ī xawe i ge ǁnāpa aoǁnâ sîsenne ge mā-amhe tama hâ i. Tsîm ge ǁnās xa ǃaromahe hâse ge aoǁnâ tama hâ i. Xawem ge ǁîn ǀgūse ǂkhinina ǁnā ǃhūb ǃnâ ǂgâ-ū tsî koro ǃgâsadi hîna kai ǃās Sofias ǃnâ gere hâde ge mā. Kaise ta gere ǃao xaweb ge Jehovaba ge hui te. Tronkes ǃnâ di ǂgāhe ǁkhā ǁkhōǁkhōsa mâsib ge hâ i xawe di ge ǃgâsade ūhâ i ǁkhoaǂgaosib tsî ǃgâiaǂgaob ge ǁkhoaǂgaosiba ge mā te î ta Jehovab ǀapeǂhumis ra ǂgan te xū-i hoa-e dī.

ǁAe-e ǃkharu tsîm ge Gilead skoli ǃaroma ge xoaǂgāsen tsîm ge nē ǃnās ai ge ūǃoahe. ǀApaǃao gowab ǃnam Amerikab ǃnâ skola nî hâǃnâ tim ge ge ǂâi hâ i. Xawe i ge Novemberi 1981 Wiesbaden Gilead skola ǁnâub beros Duistlands ǃnâ ge ǁkhopam. ǁNā-amagam ge nē skola Duits gowab ǃnâ ge dī ǁkhā i tsî supuse gere ǁnâuǃā. Mapam ge ǁgaumâihe?

TOROBA RA HŌǃÂ ǃHŪB ǃNÂ ǃOABAS

Keniaba ǃoam ge ge ǁgaumâihe. Xawes ge ǁnâub berosa ge ǂgan mî māsenxam gao îm Ugandab xōǀkhā hâ ǃhūb ǃnâ sī ǃoaba. Disi kuriga ǃkharu tsî i ge Idi Amin ti ǀon hâ dana ǂgaeǂgui-aoba Ugandab ǂhanuba ge ǃkhōǃkhuni. ǁÎb ǂgaeǂguis ǁaeb ǃnâ i ge ǂgui khoena ge ǃgamhe tsîn ge khoena kaise ǃgom ûiba ge ūhâ i. ǁNāpaxub ge Ugandab ǂhanuba ǁkhapa 1979 ge ǃkhōǃkhunihe. ǀNîsi du ge ǁnâuǃā ǁkhā tae-i ǃaroma ta gere ǃaosa ǂkhabadība ūhâ ǃhūba ǃoa doesa. Xawe Gileadi ge ge aiǂhumi mî Jehovab ǃnâ ǂgomǃgâsa. Tsîm ge ǁnā ǁgaumâisa ge ǃkhōǃoa.

Ûib ge kaise Ugandab ǃnâ ge ǃgom i. 2010 nî di kurib ǂkhinis ǃnâb ge Heinsa saorase ge xoa: “ǂHanub ge ǁgammi, krag-i tsî ǂhâǂhâsa xūn tsîna ge mā ǁoa-i. Selfonan tsîn ge ge sîsen tama hâ i, khoen ge ǂnoagu tsî khoen xūna ǃuia gere ǃnari. ǁNā-amaga i ge mâ khoe-i hoa-e ǁî-i omms ai hâ tsî gere ǀgore khoe-i hā tsî ǁî-î xūna ǃnari tsî ǂnoa nî tidesa.” Nē xūn hoan ǃnân ge ǃgâsan Ugandab ǃnâ hâna ǁîn ǂgomsa ǃkhōǀgara tsî Jehovaba ǃgâiaǂgaob ǀkha gere ǃoaba.

Ugandab di dana ǃās Kampalas ǃgam ge Heins hâma 1982 ge sī. ǂGuro koro kurigu ǃnam ge Sammi tsî Christina Waiswa hâra oms ai gere hâ, haka omaris ǁanin ǀkha. Waiswa omaris ǁanin ge ǀgui ǃnās ǀguisa tsēs ǃnâ gere ǂû. Xawen ge māsenxase hoaǁae ūn ge hâ i ǂkharirona sim ǀkha gere ǀgoragu. ǁNîn ǀkham ge hâ i ǁaeb ǃgam ge ǂgui xūna ge ǁkhāǁkhāsen sîsabe sîsenni ǃnâ ge huimîna. Aiǁgausem ge ge ǁkhāǁkhāsen matim ǁgamme ǀorose a sîsenu ǁkhāsa. ǂKhari ǁgammi ǀkha ǁāsen tsîm ge ega ǁnā ǁgamme gere sîsenu toiletsa ǁhōǁnâsa. Kampalas ǃgam ge sîm hâ ǃkhaisa 1983 ge hō.

Aoǁnâ sîsenni xam ge kaise ge ǁkhoaxabahe i. Aiǁgausem ge ǀgui ǁkhâb ǃnâ 4 000 ǂkhaniga ge ǀgoraǂui. Xawe gere mâǂoa xū-i ge khoen ge amaba gere ūǃoa ǀgausa. ǁÎn ge Eloba ǃgôa tsî Elobmîs xa gere ǁgam ǂgao. Sîm ge ǁkhaubexa 10 sa xu 15 Elobmîs ǁkhāǁkhāde mâ khoe-i hoa-e ge ūhâ i. Tsîm ge ǁkhāǁkhām gere khoena xu ǂgui xūna ge ǁkhāǁkhāsen. Aiǁgaus asen ge ǀhoade hâǃnâs ǃaroma ǃnūse gere ǃgû. Xawen ge ge ǃgae tama hâ i tsî hoaǁae ǃgâiaǂgaoba ge ūhâ i. 

Ugandab ǃnâ i ge ǁkhapa 1985 tsî 1986 ǀgam torokha ge hâ i. Kōhe ra ǃkhaidi hoadi aim ge kai ǃabuga tani hâ ǀgôaroga gere mû. ǁÎgu ge soldagu ase gere sîsenūhe tsî daogu ai gere ǃkharu khoena gere kōǃgâ. ǁNā ǁaeb ǃgân ge gā-aisib tsî ǃnomsa ǂgaoga ūhâsa ge ǀgoreba, Elobmîs ǃnâ ǃgâiǃgâibasensa ūhâ khoenam ge aoǁnâ sîsenni ǃnâ gere ôa hîna. Jehovab ge sîm ǀgorede ge ǁnâu-am. Gaosib ǃgâiǂhôasa ge ǃgâise gere ǃkhōǃoa khoe-i ǀkham gere ǀhao, om ge sîm ǃaob xa gere ǀuru.

Ugandaba ǃoa ge ǀkhī khoena aoǁnâbas xas tsînam ge ge ǃgâibahe i. Aiǁgausem ge Murati tsî Dilbar Ibatulin hâra ǀkha ge ǀhao ǁîra ge Tatarstansa xu ra hā. Murati ge ge dokter i. Hoa ra ge ge ǁāǁnâhe tsî noxopa Jehovaba ǂgomǂgomsase ra ǃoaba. Ega ta ge aiǂhanuba ge ūhâ i Tatjana Vileyskasa ge ǀhao-ū Ukraina xu gere hāsa. ǁÎs ge ǁnā ǁaeb ai kaise gere ǂâiǂhansen tsî gere ǃgamsen ǂgao. Tatjanas ge ǁāǁnâhe toas ges khaoǃgâ Ukraina ǃoa ge oa. Tsî ega sida ǂkhanina Ukrainni ǃnâ ǂnûǃkhunis ǀkha gere hui.

ǀASA ǃGOMSIGU

Austriab ǃnâm sari hâ hînam ge 1991 Austriab di ǁnâub berosa xu sîǂkhanisa ge ǃkhōǃoa. Tsî ge ǂganhe îm ǀasa ǁgaumâisa ūǃoa, Bulgariab ǃnâ. ǂGui kuriga i ge aoǁnâ sîsenne ǂgui ǃhūgu Europi digu ǃnâ ge ǂkhāsa i. Xawes ge ǁnāsa ge dawa tsî i ge Jehovab di ǃoaba-aona ge mā-amsa ī ǁnā ǃhūgu ǃnâ aoǁnâsa, Bulgariab tsîn ge ge ǁnā ǃhūgu di ǀgui i. ǀNai ta go mî hâ i khamim ge tita tsî Heinsi tsîna ǂkhinina ǂganǃgâsib ǃnâ ǁnā ǃhūgu ǃnâ gere ǂgâ-ū, aoǁnâ sîsenni ǂkhāsa ǁaeb ǃnâ. Xawem ge nēsisa ǁnāpa ra sîhe îm sī aoǁnâ.

ǃGâsagu ge ge mî îm tā Uganda ba ǃoa oa. Tsîm ge ǀhami tamase sîm ǀhōsana mîba tama i tsî Duistlands ǃnâ hâ betels tawa sī audosa ū tsî Bulgariaba ǃoa ge ī. Sofias ǃnâ 20 khoena ūhâ ǃgubisa ǃoam ge ge ǁgaumâihe.

Bulgariab ǃnâm ge ǀasa ǃgomsiga gere hōǃâ. ǂGurosem ge gowaba ge ǀū i. ǀGamǁîse i ge ǀgam ǂkhini ra ǀguira Bulgariab gowab ǃnâ ge hō-e ǁkhā i, Truth That Leads to Eternal Life tsî My Book of Bible Stories ti ǀon hâra. ǁNās ge gere ǃgom kai Elobmîs ǁkhāǁkhāde tsoatsoasa. Nē ǃgomsin ǂam-ai i ge ǃgâsana kaise ge ôasa i tsî i ge aoǁnâ sîsenne gere aiǃgû. Orthodox kerkheb ge nēsa ge mûǂan tsî i ge ǁnāpa ǃgomsiga ge tsoatsoa.

Jehovab ǃoaba-aon ge 1994 ǂgoms ase ge ǂanǃgâhe ǀû. Bulgariab khoen ge ǁkhōǁkhōsa ǂgoms khoen ase gere mû da. ǃGâsan ge ǃkhōsis ǃnâ ge ūhe. ǂHôan ǃnân ge khoena sida xa ǂgui ǂhumi xūna gere mî. ǁÎn ge gere mî Jehovab ǃoaba-aon ǂhâba hâsa în ǁîn ôana ǁō mā-am nî ǂgao taman hâ amaga în ǀaoba ǁaihe. Tsîn ge nau Xristeǁîna gere mîbasa în ǃgamsen. ǁNās ǀkha i ge sîma kaise ge ǃgomba i aoǁnâsa. Aoǁnâm gere on ge khoena ǃaumî, ǀapaǃnamga bel tsî xūn ǀkha gere ǂnoa mî. Supu tama i ge ge hâ i ǂkhinina ǃhūb ǃnâ ǂgâxa-ūsa tsî salga ǀhaodi ǃaroma hōs ge ge ǃgom i. ǀApaǃnamgu tsîn ge sida ǀkharib kai ǀhaosa ge ǀû kai. Heins hâm ge nēti ī ǀgaub ǃnâ hā-ūhesa ge ǁnaeti tama hâ i. Nēs ge Ugandab ǃnâ ge Elobmîsa gere ǁkhāǁkhāsen ǂgao khoena xu ge ǀkhara i. Tae-e ge hui mî îm ǃgâiaǂgaoba nē ǁgaumâis ǃnâ ǃkhōǀgara?

ǁNā ǃās di ǃgâsan ǀkha hâ ǀhaos ge ge hui mî. ǁÎn ge amaba ge ǀnam i tsî gere ǃgôaǃgâ ǁîn ǀkham ge hâ-i xui-ao. Kōǃgâgu tsî da ge hoa da gere hui gu. Ī ge xūna xum ge ge ǁkhāǁkhāsen ǃgâiaǂgaobam mâ ǁgaumâi-i hoa-i ǃnâ ūhâ ǁkhāsa. Khoenam ga aiǃgû tsî ǀnamo.

ǁAeba ǃkharu tsî i ge ge supu aoǁnâ sîsenne dīsa. Sida ǀapeǂhumis ge 1998 ge ǂanǃgâhe tsî i ge ǂgui ǂkhinina Bulgariab ǃnâ ge hō-e ǁkhā i. Tsî i ge ǁnāpaxu 2004 ǀasa ǁnâub berosa ge māǁnâhe. Nētsē i ge 57 ǀhaohâga Bulgariab ǃnâ hâ 2 953 aoǁnâ-aon ǀkha. Jesub ǁōb ǂâiǂâisensan ge 6 475 khoena ge hâǃnâ 2024. ǂGuro î ge 5 ǃgâsadi ǀguide Sofias ǃnâ ge hâ i xawe i ge nēsi 9 ǀhaohâga hâ. ‘ǁNān hîa a ǀoron ge ǀoadisi’ kaisam ge ge mû.—Jes. 60:22.

ǃGOMSIN ǃNÂ MÂǀGAIS

Kaise ta ge ge ǀaegusa i. ǂGui ǃnāde gu ge dokterga ǃkharagagu ǃkhain ai kankersa ge hōǃâ te ti danasa ǃkhōǂgā hâse. ǀGaisa ǀaeǃkhōsa ta ge ge hō îs tā kankeresa ti soros ǃnâ khoraǂuisen. Indiaba ǃoa ta ge ge ī tsîb ge doktera nē ǃhôasa ge dī. ǁNās khaoǃgam ge ǁaeroba Indiab di betels tawa ge hâ ǃgâise ta nî tsâs kōse. Tsîm ge ǁnāpaxu Bulgariaba ǃoa ge oa.

Tsîb ge Heinsa ǂanǂansa tama ǁōs Huntingtons ti a ǂansasa ge hō. ǁNās xa ǃaromahe hâseb ge ǃgû, ǃhoa tsî ǁîb di spīrna ge ǃkhō-oa ǁoa i. ǁÎb di ǀaeb ge ge ǀgai tsîb ge ǃnāsa huiba tita xu ge ǂhâ hâ i. ǀNî ǁaegu ai ta ge kaise tsau tsî gere ǂâiǂhansen ǁîba da ge kōǃgâ hō tidesa. ǀGui ǃgâsab Bobi ti ǀon hâb ge Heinsa aoǁnâ sîsenne ǃoa gere ǁkhau. ǁÎb ge Heinsi di ǃhoa ǀgaub tamas ka io tanisen i gere ǀgauba ge tao tama hâ i. Heinsa ta ge hui ǁoa i ǁaeb hoab ǃnâb ge Bobi ba gere huite. Nē ǃhūbaib ǃnâm ǀgôana hō tide tsî Jehovaba ǃnāsase nî ǃoabasam ge mîǁgui xaweb ge Jehovaba Bobi ba ǀgôab ase ge māmî.—Mrk. 10:​29, 30.

Heinsi ge kankers tsîna ge ūhâ i. Tsûaǂgaoxaseb ge ti aoba 2015 ge ǁō. Ti aoba ta ge kaise ra ǁkhore ǁîb ge gere hui te i ta ǀorose ǂâiǂhansen. Kaise i ge ge ǃgom i ǁîb a ǀkhaisa ūǃoasa xaweb ge ti ǂâis ǃnâ ûitsama. (Luk. 20:38) ǃNāsa ǁaeba ta ge ǃgâi mîdi tsî ǀapemādi ǁîb gere mā te de ra ǂâihō. Kaise ta ge ra gangan ǂgui kurigam ge ǀguipa Jehovaba ǃoaba ǁkhā isa.

JEHOVAB DI ǂKHÂǃNÂSA TA GE RA ǃGÔAǃGÂ

Jehovab ge amabes ǃnâ ge hui te i ta ǃkharagagu ǃgomsigu ǃnâ mâǀgai. ǁÎb ge ge hui te i ta khoena ǀnam sîsabe kai taoxa ta ge i xawe. (2Tim. 1:7) Jehovaba ta ge ra gangan tita tsî ti ǂkham ǃgâsas tsîm nēsi Jehovaba ǀoasa ǁaeba ra ǃoabasa. ǁÎs tsî ǁîs aob tsîn ge Europi ǃnâ Serbian gowaga ra ǃhoa ǀhaohâga ra sari. Jehovab ge ti dadab ge ǀgôaro ta a hîna a dī ǀgorede ge ǃeream.

Elobmîsa ta ra ǁkhāǁkhāsen ǁaeb hoaba i ge ra hui te i ta ǃnomsa tsî ǂkhîba ūhâ Jehovab ra mā te ba. ǃGom ǁaegu ǃnâ ta ge ge ǁkhāǁkhāsen Jesub khami “ǁkhōǁkhōsase” ǀgoresa. (Luk. 22:44) ǀGui ǀgaub ti ǀgoredi ra ǃereamheb ge Sofia ǀhaohâb ǃnâ hâ ǃgâsan di ǀnammi tsî ǃgâisib ǃnâ-ū. ǁÎn ge ǃnāsa ǁaeba ra ǁkhaude tsî ra ǂâiǂâiǃnâte ǀnam ten asa. ǁNās ge kai ǃgâiaǂgaoba ra mā te.

ǃNasa ǁaeba ta ge khâis xa ra ǂâiǃgâ. Ti ǁgûra ta ge sîm oms aiǃâ ra mûnan-ai ǃgamme ra ge tsēs ai ra ge îsase gere mûsen khami. Ti ǂkham ǃgâsasa ta ge ǂû-e ra aiǂhumise ra mûnan-ai tsî Heinsa hāb xōlkhāb mâse. Nē xūna mûnan-ais ge kai ǃgâiaǂgaoba ra mā te tsî ra hui te i ta mâǀgai tsî ganganxasiba hōǃâ.

Jehovab ge ti ûib ǃnâ mā te xūn xa ǂâiǃgâs ge ra ǂkhâǃnâ te. Tsî hānîǁaeba ǃoa ta ga mûǂûi, o ta ge Davidi mîdi Psalmdi 27:​13, 14 ǃnâ xoasade ra ǃkhō-am: “ǂGom tama ta ga hâo, ǃKhūb di ǃgâisiba ta ûitsaman ǃnâ nî mûsa. ǃKhūba ǃâu re, ǀgaiba ūhâ î tā ǂkhabuǂâi ǃKhūb ai ǂgomaiǂnûi.”