Khomai-aon dîdi

ǃGâiǂhôas sîsenne mâǁae nî ǀam?

Jesub ge ge mî: “Tsîs ge ǃGâiǂhôas Gaosib disa hoaraga ǃhūbaib ai nî aoǁnâhe, hoa ǁaedi nî ǁîsa ǀhûǀgui; tsîs ge ǀamsa nî hā.” (Mat. 24:14) Grike mîs nē xoas ǃnâ “ǀamsa” ti hâs tsî 6ǁî ǁaraǃās tsî 13ǁî ǁaraǃās ǃnâ hâs ge teʹlos. ǁNās ge ǁGâuab ǃhūbaib Armagedons dawa nî ǀamsa ǃoa ra ǁnaeǁgau. (J.ǂHa. 16:​14, 16) ǁNā-amaga da ge aiǃgû tsî ǃgâiǂhôasa nî aoǁnâ, Armagedons nî hās aiǃâ. Nēs ge ǂguro da gere ǁnâuǃā ǀgauba ra ǃgāsa kai.

ǂGuro da ge gere ǁnâuǃā kai ǁgâiǀāb ga tsoatsoao, da ge aoǁnâ sîsenne nî ǀamsa tsî î Babilons kaisa nî hîkākāhesa. (J.ǂHa. 17:​3, 5, 15, 16) ǁNâuǃā da ge gere kai ǁgâiǀāb ga tsoatsoa, ob Jehovaba khoena ǃēsa mā tidesa ǃgâiǂhâos xa ǁkhāǁkhāsensa. (Jes. 61:2) ǂGom da ge gere kai ǁgâiǀāba ga ûiǃkharun Jehovab ǃoan ǂgomǂgomsa ǃkhaisa nî ǁgausa, kai ǁgâiǃāb nî tsoatsoas aiǃâ. Jodeǁîn hîna ge Jerusalems hîkākāsa 607ǁî kuri ûiǃkharun ǀkha da ge gere ǀgopeǀnō. Nē khoen ge aiǃâ ge ûiǃkharun ge Jehovaba ǃoaba tsî ǁgai xūna ge ǃhui hâ i. (Ese. 5:11; 9:4) Xawe ǁnā ǀgopeǀnōs ge Mateub 24:14 ǃnâ hâ mîdi ǀkha ǃgûǀhao tama, khoen ǀams nî hās aiǃâ Armagedons tawa ǃgâiǂhôasa ǃkhōǃoas ǃēsa nî hō ti ra mîsa.

Mateub 24:14 sa da ǃgāsase ra ǁnâuǃā amaga da ge kai ǃnareb khami ǃgom haisi-ams ǂHaiǂhais 16:21 ǃnâ hâsa da ra ǁnâuǃā ǀgauba nî ǃgāsa kai. Ôaǃnâ di ge ra ǁgâu nē ǀgam xoa ra ǃgûǀhaosa. Mâ ǀgaub ǃnâ? Khoen Gaosib haisi-amsa ra ǃkhōǃoa ǀgaub ge ra hui da nēsa mûǃāsa. Apostel Paulub ge ge xoa, “ǁnān hîa ra ǃgâiǃō kaihena ge ge ǃgâihamxūn” ûib din ase ī. Xawe Elob khākhoen “ǁōǁōsa hammi” ǁōb dib ase īsa. (2Kor. 2:​15, 16) ǁÎn ge Gaosiba haisi-amsa ǃui hâ, ǁîn ǂgaeǂgui-aob ǁGâuab xa ra ǃaromahe ǁgai xūna i ra ǂhaiǂhai amaga tsîs nē ǂgaeǂguisa nî hîkākāhe xui-ao.—Jhn. 7:7; 1Jhn. 2:17; 5:19.

ǃGaoǃgâs tsîna dī re ǂHaiǂhais 16:21 ǃnâ ra mîhe “ǃnaredi” ge ǁgauǁgaus ase ī. Nēs ge a ǂâibasen ǁkhā kai ǁgâiǀāb ǁaeb ǃnâ i aoǁnâ sîsenne kaise nî ǀgaisasa, ǀnî mîdi ǃnâs ge Jehovab ǀonsa ǂguros xa ǃnāsase hoa khoen xa nî ǂanhe. (Ese. 39:7) ǁNā ǁaeb Babilons kais nî hîkākāhes khaoǃgân khoena, ǃgâihamxūn ǃgâiǂhôasa ǃoa nî ǂgaehe? Nēs ge a īǁkhā. ǁÎn ge ǀnîsi a ǂâi-oa ǁkhā matin ge Jehovab ǃoaba-aona ǂgui kuriga gere ǂanǂansa ǂhumi ǂgomdi nî hîkākāhesa.

Nēs ge Egipteǁîn ǀkha ge 10 ǁkharagu khaoǃgâ a ī xū-i ǀkha a ǀgui. Jehovab ge “hoaraga elogu Egipteb” diga hîkākās khaoǃgân ge “kai ǂnubis di khoen” Israelǁae tama ge hâ îna Israelǁaesa ge sao. (Eks. 12:​12, 37, 38) Nē khoen ge īǁkhāsib ga hâo, Jehovaba ǃoabasa ge ǁhûi mûn ge o matib ge Moseb ǃnâ-ū 10 ǁkharaga sîsenǂui ǀgausa.

Babilons kais hîkākās khaoǃgâ î ge khoe i Jehovaba ǃoabas ra ǁhûihe ǁnā aiǂhanuba nî ūhâ Xristub ǃgâsagu ǃhūbaib ai noxopa ǁnā ǁaeb ai nî hâ ga ǂkhâǃnâsa. (Mat. 25:​34-36, 40) Gūn ase ǀgoraǃgâhes aiǂhanub ge Armagedons nî tsoatsoas aiǃâ nî ǀam, ǃgau hâ ǂkhauhesan ga ǁîn ǀhomsi ǀumisa hō ǁaeb ai.

Nē ǀasa ǁnâuǃā ǀgaub ge Jehovab ǀnammi tsî ǀkhomxaǃnâsib tsîna ra ǁgau. Amase Jehovab ge “khoe-i nî kāǁō ǃkhaisa ǂgao tama hâ, xawe hoan nî ǃhobasensa.”—2Pet. 3:9.