Nopa ompa carta tlen kiijkuilok Pedro
1 Na Simón Pedro, itekipanojka uan iapóstol Jesucristo, niinmechtlajkuiljuilia inmojuantij katli nojkia inkiselijtokej nopa tlamachtili tlen melauak sanse kej tojuantij. Nochi tijselijtokej ni tlamantli pampa Dios* uan toTlamakixtijka* Jesucristo elij xitlauakej:
2 Dios nojua más ma kinexti ueyi iyolo ika inmojuantij* uan ma inmechmaka tlaseuilistli pampa kuali inkiixmatij uan nojkia toTeko Jesucristo, 3 pampa itetikayo Dios techmakatok nochi tlamantli tlen moneki para uelis tijtekipanosej ika nochi toyolo, ni tlamantli tijselijtokej pampa kuali tikixmatij Dios. Ya technotski pampa tlauel ueyi uan kuali iyolo. 4 Ika ni tlamantli techtenkauilijtok techmakas tlen tlauel ipati uan tlauel ueyi, kiampa uelis inkinextisej nopa yejyektsitsij tlamantli tlen Dios kinextia. Pampa ayokmo inkichijkej tlen amo kuali kej maseualmej kichiuaj pampa kinyoltilana tlen amo kuali.
5 Yeka, maske ya kuali intlaneltokaj, xijchiuakaj kampeka inkichiuasej tlen kuali; uan kema ya inkichiuasej tlen kuali, xijchiuakaj kampeka nojua más inkiixmatisej Dios; 6 uan kema ya inkiixmatisej Dios, nojua más ximonauatikaj;* uan kema ya inmonauatisej, nojua más xikijiyouikaj nochi; uan kema ya inkiijiyouisej nochi, nojua más xijtekipanokaj Dios ika nochi inmoyolo; 7 uan kema ya inkitekipanosej Dios ika nochi inmoyolo, nojua más ximoiknelikaj kej iniknimej; uan kema ya inmoiknelisej kej iniknimej, nojua más xikiniknelikaj nochi maseualmej. 8 Pampa tlaj inkichiuaj uan tlauel inkinextiaj ni tlamantli, inmechpaleuis amo san initstosej* uan amo inelisej kej se kuauitl tlen amo temaka itlajka pampa inkichiuasej tlen inmomachtijtokej tlen toTeko Jesucristo.
9 Pampa katli amo kinextia ni tlamantli, eliskia kejuak amo tlachia pampa amo kineki kitlachilis tlauili,* uan kiilkajtok ya kitlapojpoljuijkej itlajtlakol tlen uejkajkia kichijki. 10 Uajka noikniuaj, nojua más xijchiuakaj kampeka para inkinextisej inelij intemachmej kej katli Dios nojkia kinnotstok uan kintlapejpenijtok. Tlaj nochipa inkichijtosej ni tlamantli, nochipa kuali intlaneltokatosej. 11 Kiampa tlauel inmechteochiuasej uan inmechkauasej xikalakikaj ipan nopa Tlanauatijkayotl tlen uejkaua para nochipa, tlen iaxka toTeko Jesucristo katli eli toTlamakixtijka.
12 Yeka, nochipa nijneki niinmechilnamikilis ni tlamantli, maske inmojuantij ya inkimatij uan kuali inmotlatskilijtokej ipan tlen melauak tlen inmechmachtijtokej. 13 Nikita kinamiki sampa niinmechilnamikilis kema nojua nijpia notlakayo,* 14 pampa nijmati ayokmo uejkauas nojua nijpixtos notlakayo, kej nojkia nechiljuik toTeko Jesucristo. 15 Nochipa nijchiuas nochi tlen niuelis, kiampa kema ayokmo niitstos, inmojuantij inmoselti uelis inkiilnamikisej ni tlamantli.
16 Kema tiinmechmatiltijkej itetikayo toTeko Jesucristo uan kema tlakuepilis,* amo tijchijkej ika tlapoualistli tlen amo melauak tlen kiijtouaj maseualmej, tojuantij ika toixteyol tikitakej iueyitilis. 17 Pampa toTata Dios kimakak tlatlepanitakayotl uan kiuejkapantlalik. Ni panok kema Dios katli ompano ueyi, kiiljuik: “Ni eli noKone katli tlauel nikiknelia, ya kichiua ma niyolpaki”. 18 Kena, tojuantij tijtlakakilijkej ni tlajtoli tlen ualayaya ne iluikak, kema tiitstoyaj iuaya ipan nopa tepetl tlen tlatsejtseloltik.
19 Yeka, tojuantij más timotemachiaj tlen Dios kiijtojtok nelia mochiuas. Kuali xijtlakakilikaj nochi ni tlamantli. Uan ipan inmoyolo, ni tlajtoli moneki elis kej se tlauili tlen tlauia kampa tsintlayoua. Nojua kiampa xijchijtokaj hasta kema peuas tlanesis uan kisas nopa sitlali tlen kualka tlauia.* 20 Pampa kuali inkimatij nochi tlen Dios tematiltik, tlen eltok ipan iTlajkuilol amo uala tlen maseualmej. 21 Pampa Dios amo kema tematiltik se tlamantli pampa maseualmej kiampa kinekiyayaj, Dios ika ichikaualis* kinyakanki tlakamej para ma tematiltikaj tlen ya kiniljuiyaya.