Nopa achtoui carta tlen kititlanilijkej Timoteo
3 Ni tlamantli tlen nikijtos eli temachtli: tlaj se tlakatl kichiua kampeka elis tlayakanketl,* kitemoua se tekitl tlen tlauel kuali. 2 Yeka, se tlayakanketl moneki kuali monejnemiltis para amo ma kitlateljuikaj ika yon se tlamantli, kipias san setsi isiua uan kuali kinauatis tlen kichiua ipan inemilis; moneki kinextis kuali tlalnamiki, kichiuas nochi kej kinamiki, kuali teselis uan kuali kimatis kenijkatsa tlamachtis. 3 Moneki amo moiuintis, amo mosisinis* yon kitemolis nochipa ma mochiua san tlen ya kineki. Moneki amo san kichijtinemis kualantli yon san kinejnektos tomij. 4 Moneki elis se tlakatl katli kuali kinyakanas ichampoyouaj,* uan ikoneuaj moneki nochipa kineltokasej uan kuali monejnemiltisej 5 (pampa tlaj se tlakatl amo kimati kenijkatsa kinyakanas ichampoyouaj, ¿kenijkatsa kimokuitlauis itlanechikol Dios?).* 6 Moneki amo elis se tlakatl katli namanok pejtok tlaneltoka, para amo ma moueyimati uan kiampa amo kitlatsakuiltisej sanse kej Diablo. 7 Nojkia, moneki elis se tlakatl katli kuali kiitaj maseualmej katli amo tlaneltokaj, kiampa amo aka uelis kitlateljuis ika yon se tlamantli uan amo uetsis ipan se tlamasiltili* tlen Diablo kitlalilis.
8 Nojkia kiampa moneki elisej tlapaleuianij,* moneki elisej tlakamej katli nochi kintlepanitaj;* amo kinamiki kipajpatlasej tlen kiijtouaj* yon kiisej miak tlaili yon san kinejnektosej kitlanisej tomij uan kitemosej san tlen inijuantij kinpaleuia, 9 moneki nochipa motlatskilisej ipan nopa tlaneltokilistli, tlen kiijtosneki tlen Dios ayamo tematiltia,* ika se kuali inintlalnamikilis.
10 Nojkia, achtoui moneki kintlachilisej tlaj kuali kichiuaj ininteki, uan tlaj amo aka kintlateljuia ika yon se tlamantli uajka ma tlatekipanokaj kej tlapaleuianij.
11 Siuamej nojkia moneki amo kiajauilmatisej* yon se tlamantli uan amo teistlakauisej. Moneki kuali kinauatisej tlen kichiuaj ipan ininnemilis uan kinextisej elij temachmej ipan nochi tlamantli.
12 Tlapaleuianij* moneki kipiasej san setsi ininsiua uan moneki kuali kinyakanasej ininkoneuaj uan ininchampoyouaj. 13 Pampa tlakamej katli kuali kichiuaj ininteki kinpaleuia para sekinok kuali ma kinitakaj, uan kiampa amo tleno kintsakuilis kema teiljuisej tlaneltokaj ipan Cristo Jesús.
14 Maske nimoiljuia nechka nias nimitsitati, nimitstlajkuiljuilia ni tlamantli, 15 kiampa tlaj niuejkauas, tijmatis kenijkatsa kinamiki timonejnemiltis kej se tlen ichampoyouaj Dios, tlen kiijtosneki itlanechikol Dios katli yoltok uan eli kej se tlaketsali uan tlen kimanauia tlen melauak. 16 Kena, temachtli eli ueyi nopa tlamantli tlen Dios ayamo tematiltia* tlen kiijtoua kenijkatsa kinamiki tijtekipanosej Dios ika nochi toyolo: ‘Jesús tlakatki kej se maseuali, Dios kiitak xitlauak kema sampa kichijki ma kipia itlakayo para itstos iluikak, monextik ininixpa ángeles, tematiltijkej tlen ya ipan nochi altepemej, ipan Tlaltipaktli tlaneltokakej ipan ya, kiselijkej ne iluikak uan kiuejkapantlalijkej’.