Tlen kiijkuilok Marcos

14 Poliuiyaya ome tonali para peuas Pascua uan Nopa Iljuitl Tlen Pantsi Tlen Amo Kipia Levadura.* Uan sacerdotes katli kipiayayaj tlanauatili uan escribas,* kitemoliyayaj kenijkatsa kikajkayauaskiaj Jesús para kiitskisej uan kimiktisej. 2 Pampa kiijtouayayaj: “Amo ma tikitskikaj ipan iljuitl, pampa maseualmej uelis moajkomanasej”.

3 Kema Jesús itstoya Betania uan tlakuayaya ichaj Simón katli kipixtoya lepra,* kinechkauik se siuatl katli kiualikayaya se piltekontsi* temitok ika aceite tlen ajuiyak mijyotiyaya, eliyaya senkistok nardo,* tlauel patiyo. Kema kikechpostejki nopa piltekontsi, pejki kitekilia Jesús ipan itsonteko. 4 Kema kiitakej nopa, se keskij katli nopaya itstoyaj amo kinpaktik uan moiljuijkej se ika seyok: “¿Kenke san kinempolok nopa aceite tlen ajuiyak mijyotia? 5 Ni aceite ueltoskia monamakas ika kipano 300 denarios...* ¡uan nopa tomij ueltoskia tikinmakasej katli amo tleno kipiaj!”. Tlauel kualankej ika nopa siuatl. 6 Pero Jesús kiniljuik: “Amo tleno xikiljuikaj. ¿Kenke inkinekij inkikuatotonisej? Ya nechchiuilijtok se tlamantli tlen tlauel kuali. 7 Pampa katli amo tleno kipiaj nochipa itstokej inmouaya uan uelis inkinpaleuisej kema inkinekisej, pero na amo nochipa niitstos inmouaya. 8 Ya kichijki tlen uelki; maske ayamo nimiki, nechtlalilik aceite tlen ajuiyak mijyotia ipan notlakayo, kiampa nechkualchijchijki para kema nechtlalpachosej.* 9 Temachtli niinmechiljuia, ipan nochi Tlaltipaktli kampa momoyauas ni kuali tlamachtili, nojkia teiljuisej tlen kichijki ni siuatl, uan kiampa kiilnamikisej”.

10 Judas Iscariote, se tlen nopa 12 apóstoles, yajki kinitato sacerdotes katli kipiayayaj tlanauatili pampa kinekiyaya kinmaktilis Jesús. 11 Kema kikajkej tlen kiniljuik, inijuantij tlauel kinpaktik uan kiiljuijkej kimakaskiaj tomij. Uajka Judas pejki kitemolia kenijkatsa temaktiliskia Jesús.

12 Ipan nopa achtoui tonali tlen Nopa Iljuitl Tlen Pantsi Tlen Amo Kipia Levadura, kema momajtoyaj kimiktiaj nopa tlapiali para Pascua, itokilijkauaj kitlatsintokijkej: “¿Kanke tijneki ma tiakaj titlakualtlalitij para tijkuas nopa tlakualistli tlen kikuaj ipan Pascua?”. 13 Uajka ya kintitlanki omej itokilijkauaj uan kiniljuik: “Xiakaj altepeko. Nopaya inmechnamikis se tlakatl katli kiuika se komitl ika atl. Xijtokilikaj 14 uan kampa kalakiti, xikiljuikaj katli iaxka nopa kali: ‘ToTlamachtijka kiijtoua: “¿Kanke eltok nopa cuarto kampa uelis nijchiuas Pascua ininuaya notokilijkauaj?” ’. 15 Uan ya inmechnextilis se ueyi cuarto tlen eltok uejkapa, tlen kipia nochi tlen moneki. Nopaya xitlakualtlalikaj”. 16 Itokilijkauaj yajkej, asitoj ipan nopa altepetl uan kipantijkej nochi kej ya kiniljuijtoya; uajka kisenkajkej* nochi tlen monekiyaya para Pascua.

17 Kema tlayouixki, asito nopaya ininuaya nopa 12 apóstoles. 18 Uan kema tlakuayayaj kampa mesa, Jesús kiniljuik: “Temachtli niinmechiljuia, se tlen inmojuantij nechtemaktilis, se katli nikaj tlakua nouaya”. 19 Inijuantij tlauel mokuesojkej, uan sejsentsitsij kiiljuijtiajkej: “Amo nielis na, ¿axke?”. 20 Ya kinnankilik: “Eli se tlen nopa 12 apóstoles, katli kiakechia* ipantsi nouaya ipan plato. 21 Katli Eli iKone Se Maseuali* mikis, kej ijkuilijtok kipanos. Pero, ¡teikneltik katli kitemaktilis Katli Eli iKone Se Maseuali! Más kuali amo tlakajtoskia”.

22 Kema nojua tlakuayayaj, Jesús kikuik se pantsi, kichijki se tlamaijtoli,* kitlajkoitak, kinmakak uan kiniljuik: “Xijkuikaj; ni kiixnextia notlakayo”. 23 Uan kikuik se copa, kitlaskamatilik Dios* uan kinmakak, uan nochi kiikej ipan nopa copa. 24 Uan kiniljuik: “Ni kiixnextia noeso, ‘estli tlen ika mochiuas se tlajtolsenkauali’,* tlen toyauis para kinpaleuis miakej maseualmej. 25 Temachtli niinmechiljuia, ayokmo nikis vino, hasta nopa tonali kema nikis vino tlen yankuik ipan iTlanauatijkayo Dios”. 26 Teipa, kema tlankej uikaj tlen ika kiueyichiuaj Dios, yajkej ipan tepetl tlen Olivos.

27 Uan Jesús kiniljuik: “Nochi inmojuantij innechtlauelkauasej,* pampa ijkuilijtok: ‘Nijkokos tlapialmokuitlauijketl uan ipilborregojuaj mosemanasej’.* 28 Pero kema ya nimoyolkuitos,* nitlayakanas Galilea uan nepa timoitasej”. 29 Pedro kinankilik: “¡Maske nochi mitstlauelkauasej,* na amo kema nimitstlauelkauas!”. 30 Uajka Jesús kiiljuik: “Temachtli nimitsiljuia, ni youali kema se kuapele* ayamo tsajtsitos ika ompa, ta expa tikijtos amo tinechixmati”. 31 Uan Pedro nojua kiiljuiyaya: “Maske monekis nimikis mouaya, na amo kema nikijtos amo nimitsixmati”. Uan nochi nopa sekinok nojkia kiampa pejkej kiijtouaj.

32 Uajka asitoj kampa kitokaxtiaj Getsemaní, uan Jesús kiniljuik itokilijkauaj: “Nikaj ximoseuijtokaj, na nimomaijtoti”. 33 Uan kinuikak Pedro, Santiago uan Juan, uan pejki tlauel mokuesoua uan tlauel motekipachoua. 34 Kiniljuik: “Nijmati ya nimiki* pampa tlauel nimotekipachoua. Ximokauakaj nikaj uan xitlachixtokaj”. 35 Teipa yajki achi neka, motlankuaketski uan moixtlapachok uan pejki momaijtoua, uan tlajtlaniyaya tlaj ueliskia amo ma kiasi nopa hora tlen tlauel ouij. 36 Kiijtouayaya: “Abba,* Pa, ta nochi ueli tijchiua, xinechkixtili ni copa.* Pero amo ma mochiua tlen na nijneki, ma mochiua tlen ta tijneki”. 37 Teipa tlakuepilik kampa inijuantij itstoyaj uan kinpantito kochtokej. Uan kitlatsintokik Pedro: “Simón, ¿tikochki? ¿Amo uelki tiisatos* maske san se hora? 38 Xitlachixtokaj uan ajachika* ximomaijtokaj, kiampa amo inuetsisej ipan tlajtlakoli. Kena, inmojuantij tlauel inkinekij inkichiuasej tlen kuali, pero inmotlakayo amo kiijiyouia”.* 39 Uajka sampa yajki momaijtoto uan sampa tlajtlanki tlen achtoui tlajtlantoya. 40 Sampa tlakuepilik uan kinpantito kochtokej, pampa tlauel kochisnekiyayaj. Uan inijuantij amo kimatiyayaj tlake kiiljuisej. 41 Uan ika expa tlakuepilik uan kiniljuik: “¡Inkochtokej uan inmosiajketstokej ipan se hora kej ni! ¡Ya xiisakaj! ¡Ya asik hora! Xikitakaj, Katli Eli iKone Se Maseuali kitemaktilisej ininmako katli tlajtlakolejkej. 42 Ximoketsakaj, ma tiakaj. Xikitakaj, ya asitiuala katli nechtemaktilis”.

43 Ipan nopa tlalochtli,* kema nojua kamanaltitoya, asiko Judas, se tlen nopa 12 apóstoles, uan iuaya ualayayaj miakej maseualmej ika espadas* uan ika kuauitl. Sacerdotes katli kipiayayaj tlanauatili, escribas uan katli kinyakanayayaj judíos, kintitlantoyaj nopa maseualmej. 44 Katli kitemaktiliskia kiniljuijtoya kenijkatsa kimatiskiaj ajkia eliyaya: “Katli nijtsoponis, yaya eli; xikitskikaj uan xijtlachilijtiakaj para amo ma cholo”. 45 Uajka xitlauak yajki kampa itstoya Jesús, kinechkauik uan kiiljuik “¡Tlamachtijketl!”,* uan kitsoponik. 46 Uajka kiitskijkej uan kiuikakej. 47 Pero se katli itstoya nopaya kikixtik iespada, kiteuik itlatekipanojka sumo sacerdote uan kinakastsontejki. 48 Uajka, Jesús kiniljuik: “¿Inualajtokej ika espadas uan ika kuauitl para innechitskisej kejuak nieliskia se tlachtejketl? 49 Mojmostla niitstoya inmouaya ipan teokali uan nitlamachtiyaya, uan inmojuantij amo innechitskijkej. Pero nochi ni panotok para ma moaxiti tlen kiijtoua iTlajkuilol Dios”.

50 Uan nochi kitlauelkajkej* uan cholojkej. 51 Pero se telpokatl katli san moyoyontijtoya ika se kuali yoyomitl tlen lino, pejki kitokilia. Kinejkej kiitskisej, 52 pero ya kikajtejki iyoyo tlen lino uan cholojtejki xolotik.*

53 Uajka kiuikakej Jesús kampa sumo sacerdote, uan mosentilijkej nochi sacerdotes katli kipiayayaj tlanauatili, katli kinyakanayayaj judíos uan escribas. 54 Pedro kiuejkatokilijtiajki hasta ikalteno* sumo sacerdote, uan nopaya moseuik ininuaya katli tlatekipanouayayaj ipan nopa kali, uan mototoniyayaj* tliteno. 55 Nopa sacerdotes katli kipiayayaj tlanauatili uan Tekichiuanij Katli Kipiayayaj Más Tlanauatili,* kitemoliyayaj kenijkatsa kitlateljuiskiaj Jesús uan kiampa kimiktiskiaj, pero amo tleno kipantijkej. 56 Yauiyayaj miakej katli san tlakajkayauayayaj, pero amo sanse tlamantli kiijtouayayaj. 57 Nojkia, se keskij moketskej uan kiistlakauijkej Jesús, kiijtojkej: 58 “Tojuantij tijkajkej kiijtok: ‘Nijuelonis ni teokali tlen tlakamej kichijchijtokej uan ipan eyi tonali nijketsas seyok tlen amo kichijchiuasej tlakamej’ ”. 59 Pero hasta ipan ni tlamantli amo sanse kiijtouayayaj.

60 Uajka nopa sumo sacerdote moketski tlatlajko uan kitlatsintokik Jesús: “¿Amo tleno titlanankilia? ¿Amo tijkaki tlen ika mitstlateljuijtokej?”. 61 Pero ya amo molinik uan amo tleno kiijtok. Uajka nopa sumo sacerdote sampa pejki kitlatsintokia uan kiiljuik: “¿Ta tieli nopa Cristo, iKone Dios katli Tlateochiuali?”. 62 Uajka Jesús kinankilik: “Kena, na nieli. Uan inmojuantij inkiitasej Katli Eli iKone Se Maseuali moseuijtok ika imanejmak Dios katli kipia chikaualistli,* uan ualtemotiuala ika mixtli tlen iluikak”. 63 Kema nopa sumo sacerdote kikajki tlen kiijtok, kitsayanki iyoyo uan kiijtok: “¿Kenke tijnekij más testigos? 64 Inmojuantij inkikaktokej kiixpanok Dios ika tlen kiijtok. ¿Tlake inmoiljuiaj?”. Nochi kiijtojkej monekiyaya mikis. 65 Uan se keskij pejkej kichajchaj, kiixtsajkej, kimakilijkej ika maitl* uan kiiljuiyayaj: “Tlaj tieli teokamanalojketl,* xikijto ajkia mitsmakilik”. Teipa kiixtlatsinijkej, uan katli tlamokuitlauiyayaj kampa itstoyaj tekichiuanij, kiuikakej.

66 Kema Pedro itstoya tlatsintla ipan kalixpamitl, asito se tlen nopa ichpokamej katli kitekipanouayayaj sumo sacerdote. 67 Kema kiitak Pedro mototoniyaya tliteno, kiixtlachilik uan kiiljuik: “Ta nojkia tinemiyaya ika ne Jesús, nopa Nazaret ejketl”. 68 Pero ya kiiljuik amo. Uan kiijtok: “Yon nikixmati yon nijmati tlake tikijtoua”. Uajka yajki kampa puerta. 69 Nopa ichpokatl kiitak uan sampa pejki kiniljuia katli nopaya itstoyaj: “Ya nojkia nemiyaya ininuaya”. 70 Uan ya nojua kiijtouayaya amo kiixmati. Teipa, katli itstoyaj nopaya sampa pejkej kiiljuiaj Pedro: “Temachtli ta nojkia tinemiyaya ininuaya, pampa nima nesi tieua Galilea”. 71 Uajka pejki tlatelchiua uan kiijtoua: “¡Dios kiitstok,* na amo nikixmati nopa tlakatl!”. 72 Uan nimantsi se kuapele tsajtsik* ika ompa, uan Pedro kiilnamijki tlen Jesús kiiljuijtoya: “Kema se kuapele ayamo tsajtsitos ika ompa, ta expa tikijtos amo tinechixmati”. Tlauel moyolkokok uan pejki mochokilia.