Apocalipsis

18 Teipa, nikitak seyok ángel temoyaya tlen iluikak ika miak tlanauatili, uan ika iueyitilis kitlauilik Tlaltipaktli. 2 Uan ya chikauak kuatsajtsik: “¡Ya uetski! ¡Ya uetski Ueyi Babilonia! Kampa itstokej amo kuali ajakamej,* uan kampa amo kuali ajakamej uan nochi totomej katli amo tlapajpaktikej uan tlen amo kinekij kinitasej, kinekij teichtakauisej. 3 Pampa nochi altepemej kinkajkayajki para ma kiikaj ivino, nopa eli kema tlauel kineki auilnemis;* tlanauatianij katli itstokej ipan Tlaltipaktli auilnenkej iuaya, uan tlanamakanij katli itstokej ipan Tlaltipaktli tlauel tlatominpixkej pampa kinpaleuik ni siuatl, katli amo pinaua kisentilis miak tlamantli”.

4 Uan nijkajki seyok itoskak tlen ualayaya desde iluikak uan kiijtouayaya: “Noaltepe, tlaj amo inkinekij intlajtlakolchiuasej iuaya uan tlaj amo inkinekij ma inmechasi nopa tlaijiyouilistli tlen fiero, uajka xikisakaj tlen nopaya. 5 Pampa itlajtlakoljuaj momiakilijtok hasta iluikak, uan Dios* kitlajtolsenkauas ika tlen amo kuali kichijtok. 6 Xijkuepilikaj sanse kej ya inmechchiuilik. Kena, xijkuepilikaj ompa uelta tlen ya inmechchiuilik. Ipan nopa copa kampa ya kichijchijki vino, xijchijchiuilikaj ompa uelta. 7 Xijtlaijiyouiltikaj uan xijchiuakaj ma mokueso pampa tlauel mouejkapantlalia uan kisentilijtok miak tlamantli tlen pajpatiyo uan amo pinaua. Pampa ipan iyolo nochipa moseniljuijtok: ‘Nimoseuijtok kej se siuatlanauatijketl, amo miktok noueue uan amo kema nimokuesosʼ. 8 Yeka, san ipan se tonali kiselis tlaijiyouilistli tlen tlauel fiero, mikis, tlauel mokuesos uan mayanas, uan kitlamitlatisej. Pampa Jehová* Dios, katli kitlajtolsenkajki, kipia tetikayotl.

9 ”Kema nopa tlanauatianij katli itstokej ipan Tlaltipaktli, katli auilnenkej* iuaya uan kipixkej miak tlamantli sanse kej ya uan amo pinajkej, kiitasej kenijkatsa popoka, chokasej uan moyolixtejtejtsonasej* por ya. 10 Ika uejka ijkatosej pampa kimakasisej ma kintlaijiyouiltikaj sanse kej ya. Kiijtosej: ‘¡Titeikneltsi! ¡Titeikneltsi, ta, tiueyi altepetl Babilonia, tlen tijpia tetikayotl! ¡Pampa mitstlatsakuiltijkej san ipan se tlalochtli!ʼ.*

11 Nojkia, tlanamakanij katli itstokej ipan Tlaltipaktli chokasej uan mokuesosej por ya, pampa ayokmo itstos katli kinkouilis nochi tlen inijuantij kinamakaj, 12 nochi tlen kinamakaj kej oro, plata, piltetsitsij tlen yejyektsitsij, perlas, yoyomitl tlen lino tlen más kuali, yoyomitl moradojtik, yoyomitl tlachijchiuali ika seda uan yoyomitl tlen nelchichiltik; uan nochi tlamantli tlen kichijchijtokej ika kuauitl tlen ajuiyak mijyotia uan nochi tlamantli tlachijchiuali ika marfil* uan kuauitl yejyektsitsij, cobre, tepostli uan mármol;* 13 nojkia canela, pilxiuitsi tlen ajuiyak mijyotia tlen uala India, incienso,* aceite tlen ajuiyak mijyotia, olíbano, vino, aceite tlen oliva, harina tlen más kuali, trigo, uakaxmej, borregojmej, kauayojmej, kuacarrojmej, tlatekipanouanij uan ininnemilis maseualmej. 14 Kena, nochi kuali tlamantli tlen tlauel tijnekiyaya, ayokmo eli moaxka uan nochi tlamantli tlen ajuiyak uan tlen yejyektsitsij, ya tlanki. Ayokmo kema sampa tijpias.

15 ”Tlanamakanij katli kinamakayayaj ni tlamantli, katli tlatominpixkej por ya, ijkatosej ika uejka pampa kimakasisej ma kintlaijiyouiltikaj sanse kej ya. Chokasej uan mokuesosej, 16 kiijtosej: ‘¡Teikneltsi! ¡Teikneltsi nopa ueyi altepetl, tlen motlalilijtok yoyomitl tlen lino tlen más kuali, moradojtik uan nelchichiltik, uan moyejyekchijtok* ika miak tlamantli tlachijchiuali ika oro, piltetsitsij tlen yejyektsitsij uan perlas! 17 ¡Pampa san ipan se tlalochtli, miak tlamantli tlen tlauel ipati, ixpolijki!ʼ.

”Uan nochi katli kiyakanaj barco uan katli tlapaleuiaj, katli yauij nopaya uan nochi katli tekitij ipan mar, ijkatoyaj ika uejka. 18 Uan kema kiitakej popokayaya, kuatsajtsikej: ‘¡Amo onka seyok altepetl kej ni ueyi altepetl!’. 19 Motemiliyayaj tlaltejpoktli* ipan inintsonteko uan chokayayaj uan mokuesouayayaj, chikauak kiijtouayayaj: ‘¡Teikneltsi! ¡Teikneltsi nopa ueyi altepetl, ya kipixtoya miak tlamantli tlen tlauel ipati, yeka tlatominpixkej nochi katli kipixtoyaj barcos ipan mar! ¡Pampa san ipan se tlalochtli kitsontlamiltijkej!’.

20 ”¡Xiyolpakikaj katli initstokej ipan iluikak por tlen kipanok! ¡Nojkia xiyolpakikaj inmojuantij katli inelij intlatsejtseloltikej,* apóstoles uan teokamanalouanij!* Pampa Dios kitlatsakuiltijtok ika tlen inmechchiuilik”.

21 Uan se ángel katli tlauel tetik, kitlananki se tetl tlen eliyaya kej se ueyi tetl tlen ika tisij, kitlauisok* ipan mar uan kiijtok: “Kiampa kitlauisosej ueyi altepetl Babilonia, uan ayokmo kema sampa kiitasej. 22 Kampa ta ayokmo kema kikakisej katli uikaj uan kitsotsonaj arpas, yon katli uikachiuaj, katli kipitsaj flauta o katli kipitsaj trompeta. Kampa ta ayokmo kema kiitasej yon se katli kimachijchiua se tlamantli. Kampa ta ayokmo kema kikakisej kenijkatsa molinia nopa tetl kampa tisij. 23 Kampa ta ayokmo kema kauanis yon se tlauili yon amo kema kikakisej kampa ta itoskak katli mosiuajtis o monamiktis. Pampa katli tlanamakayayaj eliyayaj katli más pankisayayaj ipan Tlaltipaktli uan pampa tikinkajkayajki nochi altepemej ika tlamantli tlen ika titetlajchiuiyaya.* 24 Kena, ya elki itlajtlakol pampa kinmiktijkej teokamanalouanij, katli tlatsejtseloltikej uan nochi katli kinmiktijkej ipan Tlaltipaktli”.