Tlen kiijkuilok Lucas
16 Teipa, Jesús nojkia kiniljuik itokilijkauaj: “Itstoya se tlakatl katli tlatominpiayaya uan kipixtoya se tlayakankatlatekipanojketl. Ni tlakatl kitlateljuijkej san kinempolojtoya tlen iaxka iteko. 2 Uajka iteko kinotski uan kiiljuik: ‘Nijkaktok amo kuali kamanaltij tlen ta. Xia uan xikamatlali kenijkatsa tijtekiuik notomij, pampa ayokmo uelis titlayakanas ipan nochaj’. 3 Uajka nopa tlayakankatlatekipanojketl moiljuik: ‘¿Nama tlake nijchiuas pampa noteko ayokmo nechkauas ma nitlayakana ipan ichaj? Amo nijpia chikaualistli para nitlaxauas uan nipinaua nimotlaejeuis.* 4 ¡Ah! Ya nijmati tlake nijchiuas, kiampa maseualmej nechselisej ininchaj kema ayokmo nitlayakanas ichaj noteko’. 5 Uan kinnotski sejsentsitsij katli kitlauikiliyayaj iteko. Se kitlatsintokik: ‘¿Keski tijtlauikilia noteko?’. 6 Kinankilik: ‘Nijtlauikilia 100 tlatamachiuali* aceite tlen oliva’. Nopa tlayakankatlatekipanojketl kiiljuik: ‘Nikaj ijkuilijtok tlen titlauika. Ximoisiuilti, ximoseui uan xikamatlali 50’. 7 Teipa kitlatsintokik seyok: ‘Uan ta, ¿keski titlauika?’. Kinankilik: ‘Nijtlauikilia 100 uejueyi tlatamachiuali* trigo’. Nopa tlayakankatlatekipanojketl kiiljuik: ‘Nikaj ijkuilijtok tlen titlauika. Xikamatlali 80’. 8 Uan iteko kiuejkapantlalik nopa tlayakankatlatekipanojketl, pampa ika tlen kichijki, maske amo kuali, kinextik tlalnamikiyaya. Pampa katli itstokej ipan ni tonali,* kinextiaj más tlalnamikij ika tlen kinchiuiliaj sekinok que katli nemij ipan tlauili.
9 ”Nojkia niinmechiljuia: xijtekiuikaj tomij tlen onka ipan Tlaltipaktli* para inkinpiasej inmouampoyouaj,* kiampa kema tlamis tomij, inijuantij inmechselisej kampa initstosej tlen uejkauas nochipa. 10 Katli eli temachtli ipan tlamantli tlen kentsi, nojkia eli temachtli ipan tlamantli tlen miak. Uan katli kichiua tlen amo kuali ipan tlamantli tlen kentsi, nojkia kichiua tlen amo kuali ipan tlamantli tlen miak. 11 Yeka, tlaj inmojuantij amo intemachmej kema inkitekiuiaj tomij tlen onka ipan Tlaltipaktli, ¿ajkia inmechkauilis xijmokuitlauikaj tlen nelia ipati? 12 Uan tlaj amo intemachmej kema inkitekiuiaj tlen seyok iaxka, ¿ajkia inmechmakas se tlamantli tlen elis inmoaxka? 13 Amo aka uelis kintekipanos omej itekojuaj, pampa kikualankaitas uan kitlauelkauas se, uan nopa seyok kiiknelis uan amo kitlauelkauas. Amo uelis inkitekipanosej Dios* uan nojkia Tomij”.
14 Nopa fariseos,* katli tlauel kipatiitayayaj tomij, kitlakakilijtoyaj nochi ni tlamantli uan pejkej ixkuijkuilichiuij. 15 Uan Jesús kiniljuik: “Inmojuantij inmonextiaj ininixpa maseualmej kej katli kichiuaj tlen kuali, pero Dios kiixmati inmoyolo. Pampa tlen maseualmej tlauel kipatiitaj, Dios kiijia.
16 ”Nopa Tlanauatili uan tlen kiijkuilojkej Teokamanalouanij* motematiltik hasta kema Juan pejki tlajtolmoyaua. Uajka pejki momoyaua iTlanauatijkayo Dios kej se kuali tlamachtili, uan nochi maseualmej kichiuaj kampeka kalakisej nopaya. 17 Niinmechiljuia, más amo ouij ixpoliuisej iluikaktli uan Tlaltipaktli, pero yon se rayita tlen kipia se letra tlen eltok ipan Tlanauatili amo ixpoliuis hasta moaxitis.
18 ”Nochi katli kikauaj ininsiua uan sampa mosiuajtiaj, momekatiaj,* uan katli mosiuajtia iuaya se siuatl katli kikajtok iueue, momekatia.
19 ”Itstoya se tlakatl katli tlatominpiayaya uan moyoyontiyaya ika yoyomitl moradojtik,* tlachijchiuali ika lino, uan mojmostla tlauel moyolpakiltiyaya ika tlen kipixtoya. 20 Pero ipuertajteno kikauayayaj se tlakatl katli motlaejeuiliyaya* uan motokaxtiyaya Lázaro, katli tlamikokotiyaya 21 uan tlauel mayanayaya hasta kinekiyaya kikuas tlen uetsiyaya imesajtantitla* nopa tlatominpixketl. Hasta ualayayaj chichimej uan kipipitsouayayaj ikokouaj. 22 Teipa nopa tlakatl katli motlaejeuiliyaya mijki uan ángeles kiuikakej inakastla* Abrahán.
”Nopa tlatominpixketl nojkia mijki uan kitlalpachojkej.* 23 Uan ipan Mijkaostotl,* kampa tlauel tlaijiyouiyaya, ajkotlachixki uan kiuejkaitak Abrahán uan inakastla* itstoya Lázaro. 24 Uajka kiiljuik: ‘Notata Abrahán, xinechtlasojtla uan xijtitlani Lázaro ma kixoloni imakpilyakapa ipan atl uan ma kiseselti nonenepil pampa tlauel nitlaijiyouia ipan ni tlitl tlen lementok’. 25 Pero Abrahán kinankilik: ‘Nokone, xikilnamiki kema tiitstoya timoyolpakiltik ika miak tlamantli tlen kuali, pero Lázaro tlauel tlaijiyouik. Nama nikaj kiyoltlalijtokej, pero ta titlaijiyouijtok. 26 Nojkia techxelojtok se ueyi ostotl tlen tlauel uejkatla,* yeka katli nikaj itstokej uan kinekisej panosej para neka, amo uelisej, uan nojkia maseualmej katli neka itstokej, amo uelisej panosej kampa tiitstokej’. 27 Uan nopa tlatominpixketl kiiljuik: ‘Notata Abrahán, uajka nimitstlajtlania xijtitlani ichaj notata, 28 pampa nikinpia makuiltij noikniuaj. Senkistok ma kinmatilti, kiampa inijuantij amo kalakisej nikaj kampa tlauel tlaijiyouiaj’. 29 Abrahán kinankilik: ‘Kipixtokej tlen kiijkuilojkej Moisés uan Teokamanalouanij; ma kitlakakilikaj tlen nopaya ijkuilijtok’. 30 Uajka ya kiijtok: ‘¡Amo, amo, notata Abrahán! Tlaj se katli ya miktok yaui kampa inijuantij, moyolkuepasej’. 31 Pero Abrahán kinankilik: ‘Tlaj amo kitlakakiliaj tlen kiijkuilojkej Moisés uan Teokamanalouanij, nojkia amo kitlakakilisej se katli miktoya uan moyolkuis’ ”.