Nopa carta tlen kintitlanilijkej Cristo itokilijkauaj tlen Roma
14 Kuali xijselikaj katli amo kipia tetik itlaneltokilis,* pero amo xikijtokaj para amo kuali tlen kichiua tlaj amo moiljuia sanse kej inmojuantij.* 2 Uelis se tlakatl kipia tetik itlaneltokilis uan kikuas nochi tlakualistli, pero seyok katli amo kipia tetik itlaneltokilis kikuas san kilitl. 3 Katli kikua nochi tlakualistli amo ma kichikoita katli amo kikua nochi, uan katli amo kikua nochi tlakualistli, amo ma kiijilnamiki katli kena kikua, pampa Dios* kuali kiselijtok. 4 ¿Ajkia tieli ta para tikijilnamikis itlatekipanojka seyok tlakatl? Iteko kitlapejpenia tlaj kichiua tlen kuali o amo. Ya uelis kuali itstos iixpa Jehová,* pampa yaya kipaleuis.
5 Se tlakatl kiita se tonali más ipati que nochi nopa sekinok tonali, pero seyok tlakatl kiita nochi tonali eli sanse. Sejse maseuali moneki itstos temachtli ika tlen kitlapejpenijtok. 6 Katli kitlepanita se tonali kichiua pampa kiuejkapantlalia Jehová.* Nojkia katli kikua nochi tlakualistli kichiua para kiuejkapantlalis Jehová,* pampa kitlaskamatilia.* Uan katli amo kikua nochi tlakualistli nojkia kiuejkapantlalia Jehová* uan nojkia kitlaskamatilia.* 7 Kena, yon se tlen tojuantij itstok para mouejkapantlalis, uan amo aka miki san para mouejkapantlalis. 8 Pampa tlaj tiitstokej, tiitstokej para tijuejkapantlalisej Jehová,* uan tlaj timikij, timikij para tijuejkapantlalisej Jehová.* Uajka, tlaj tiitstokej o tlaj timikij, tielij iaxkauaj Jehová.* 9 Kena, yeka Cristo mijki uan moyolkuik: para elis ininTeko katli miktokej uan katli yoltokej.
10 Uajka, ¿kenke tikijilnamiki moikni? ¿O kenke nojkia tijchikoita moikni? Nochi tiitstosej iixpa Dios kampa tetlajtolsenkaua. 11 Pampa ijkuilijtok: “Jehová* kiijtoua: Sanse kej na temachtli niyoltok, nojkia temachtli nochi motlankuaketsasej noixpa uan nochi kiijtosej ininixpa sekinok na nieli Dios”. 12 Yeka sejse tlen tojuantij tikijtosej iixpa Dios tlake tijchijtokej.*
13 Uajka, ayokmo ma timoijilnamikikaj se ika seyok. Más kuali, ximosentlalikaj amo inkichiuasej yon se tlamantli tlen kichiuas inmoikni ayokmo kuali ma tlaneltoka o ma tlajtlakolchiua. 14 Kuali nijmati uan niitstok temachtli ipan toTeko Jesús, para nochi tlen tijkuaj eli tlapajpaktik. San kema se akajya kiita se tlamantli amo tlapajpaktik, uajka para ya amo eli tlapajpaktik. 15 Yeka tlaj tijyolkokoua moikni ika tlen tijkua, ayokmo tijnextia titeiknelia. Cristo mijki para kimakixtis moikni, uajka amo xijchiua ayokmo kuali ma tlaneltoka ika tlen tijkua. 16 Yeka, amo xijchiuakaj amo kuali ma kamanaltikaj tlen nopa kuali tlamantli tlen inkichiuaj. 17 Pampa tlaj se akajya kineki kalakis ipan iTlanauatijkayo Dios, amo kipaleuis nopa tlakualistli o tlen kiis, moneki kichiuas tlen xitlauak, kuali mouikas ininuaya sekinok uan kipias nopa pakilistli tlen Dios temaka ika ichikaualis.* 18 Pampa tlaj se akajya kiampa kitekipanoua Cristo kej se tlatekipanojketl, kiyolpakiltia Dios uan maseualmej kuali kiitaj.
19 Uajka nojua ma tijtemojtinemikaj tlen kichiuas kuali ma timouikakaj uan tlen kichiuas ma timoyolchikauakaj se ika seyok. 20 Ayokmo xijchiua se tlakualistli ma kixoleua* tlen Dios kichijchijtok. Kena, nochi tlamantli uelis tijkuasej, pero amo kuali eliskia tlaj se akajya tlakua uan nopa kichiua seyok ayokmo kuali ma tlaneltoka. 21 Más kuali amo xijkua nakatl yon xiki vino, yon xijchiua se tlamantli tlen kichiuas moikni ayokmo kuali ma tlaneltoka. 22 Tlen tijneltoka, san xijmajto ta uan Dios. Yolpaki katli amo moyolkokoua ika tlen kitlapejpenia kichiuas. 23 Pero tlaj ayamo kitlapejpenia tlake kichiuas uan tlakua, uajka ya tlajtlakolchijki, pampa tlakua pero amo kichiua pampa tlaneltoka. Kena, nochi tlen se akajya kichiua pero amo tlaneltoka, eli se tlajtlakoli.