Nopa ompa carta tlen kintitlanilijkej Cristo itokilijkauaj tlen Corinto
11 Nechpaktiskia xinechijiyouikaj se kentsi maske nesi amo nitsontlalnamiki. ¡Maske inmojuantij nelia ya innechijiyouijtokej! 2 Pampa tlauel nimotekipachoua ika inmojuantij* sanse kej Dios* motekipachoua,* pampa na nijtenkajki para niinmechtemaktilis para ximonamiktikaj iuaya san setsi tlakatl, Cristo, uan nijneki niinmechnextiti iixpa kej se kuali ichpokatl katli kuali monejnemiltijtok. 3 Pero sanse kej nopa kouatl* kitemolik kenijkatsa kikajkayauas Eva, nijmakasi para se akajya uelis kinempolos inmotlalnamikilis uan kichiuas xijtlauelkauakaj* Cristo uan ayokmo xiitstokaj intlapajpaktikej iixpa. 4 Pampa kiampa kej nama pano, tlaj se akajya yaui uan inmechkamanaljuia tlen seyok Jesús katli amo sanse ika tlen titematiltijkej o tlaj inkiseliaj seyok chikaualistli* para ma kiyakana inmotlalnamikilis tlen amo eli sanse ika tlen achtouia inkiselijkej, o tlaj se akajya yaui uan inmechmatiltia sekinok kuali tlamachtili tlen amo sanse ika tlen inmechmachtijkej, inmojuantij nimantsi inkiseliaj. 5 Nimoiljuia ya nijnextijtok para amo nieli más echkapa* que nopa “apóstoles tlen mochiuaj tlauel kuajkualmej” katli itstokej inmouaya. 6 Pero maske na amo tlauel niyajati* nikamanaltis, kena nikixmati Dios, uan nopa xitlauak tiinmechnextilijtokej ipan nochi tlamantli tlen tijchiuaj.
7 Niinmechpouilik ika miak pakilistli nopa kuali tlamachtili tlen Dios uan amo niinmechtlajtlanik tomij. Nimoechkapanok para ma inmechuejkapantlalikaj. ¿Nitlajtlakolchijki kema kiampa nijchijki? 8 Nijselik inintlapaleuil sekinok tlanechikolmej uan nopa elki kejuak nikintlachtekilik para uelis niinmechtekipanos. 9 Uan maske kiampa nijchijki, kema niitstoya inmouaya uan nechpolok tlen ika nimopanoltis, amo nielki kej se tlamamali para se akajya, pampa toikniuaj katli asitoj tlen Macedonia nechpaleuijkej ika nochi ininyolo para nijpias tlen nechpolouayaya. Kena, nijchijki kampeka para amo nielis kej se tlamamali ika yon se tlen inmojuantij, uan kiampa nijsentokilis nijchiuas. 10 Nieli se Cristo itokilijka, yeka amo niistlakati kema nikijtoua nochipa nimoueyimatis ika ni tlamantli ipan nochi tlali Acaya. 11 ¿Uan kenke? ¿Pampa amo niinmechiknelia? Dios kimati nelia niinmechiknelia.
12 Itstokej se keskij katli moueyimatij uan kiijtouaj elij apóstoles sanse kej tojuantij. Yeka, nojua nijsentokilis nijchiuas tlen ipa nijchijtok uan kiampa inijuantij amo uelis moueyimatisej ika yon se tlamantli. 13 Pampa nopa tlakamej amo nelnelia elij apóstoles, tlatekipanouaj san para kinkajkayauasej sekinok uan san mochiuaj kejuak nelia Cristo iapóstoles. 14 Uan amo nimosentlachilia, pampa Satanás nojkia mochiua kej se ángel tlen kuali.* 15 Yeka, amo timosentlachiliaj kema itekipanojkauaj nojkia mochiuaj kejuak nelia kichiuaskiaj tlen xitlauak. Pero inijuantij kiselisej tlen kinamiki ika tlen kichiuaj.
16 Sampa niinmechiljuia: amo aka ma moiljui amo nitsontlalnamiki. Pero maske kiampa inmoiljuisej, xinechselikaj kej se akajya katli amo tsontlalnamiki, kiampa na nojkia uelis nimoueyimatis se kentsi. 17 Nama amo niinmechkamanaljuia kej kichiuaskia toTeko, niinmechkamanaljuia kej kichiuaskia se katli amo tsontlalnamiki, katli motemachia ipan ya uan moueyimati. 18 Sanse kej miakej moueyimatij ika tlamantli tlen onka ipan Tlaltipaktli, na nojkia nimoueyimatis. 19 Inmojuantij tlauel “intlalnamikij”, yeka kuali inkinseliaj katli amo tsontlalnamikij. 20 Kena, inkinseliaj nochi katli inmechchiualtiaj xitlatekipanokaj, katli inmechkuiliaj tlen inmoaxka, katli inmechichtekiliaj tlen inkipiaj, katli moueyimatij uan inmechchiuaj amo inmopati uan nochi katli inmechixtlatsiniaj.
21 Hasta tipinauaj tikijtosej nopa, pampa sekij ueliskia moiljuisej amo tiuelij tijtekiuiaj kej kinamiki nopa tlanauatili tlen tijpiaj.
Pero tlaj sekinok amo pinauaj moueyimatisej, na nojkia amo nipinauas nimoueyimatis maske sekij nechitasej kejuak amo nitsontlalnamiki. 22 ¿Inijuantij elij hebreos? Na nojkia. ¿Elij israeleuanij? Na nojkia. ¿Elij iteipaixuiuaj Abrahán? Na nojkia. 23 ¿Elij Cristo itekipanojkauaj? Nitlanankilia kej se katli ya tsonuiuitia:* na más nijtekipanoua Cristo que inijuantij. Más nitekititok, más miakpa nechtsaktokej, miakpa tlauel nechmakilijtokej uan miakpa nechka nimiki. 24 Judíos makuilpa nechuijuitejkej 39 ueltas, 25 nechkuapipitsuijkej eyi ueltas, nechtepachojkej* se uelta, eyi ueltas atsonpolijki nopa barco kampa niauiyaya uan niseyoualtik uan nisetonaltik* ipan mar kampa tlauel uejkatla. 26 Ejeliuis* ninentok, nikixkotontok ueyatl tlen tlauel mauilili, nimopantijtok ininuaya tlachtekinij, nechtlaijiyouiltijtokej katli elij judíos sanse kej na uan nojkia katli amo elij judíos, nikixnamiktok tlen mauilili ipan altepetl, ipan uaktok tlali uan ipan mar, nimopantijtok ininuaya katli amo nelnelia elij toikniuaj, 27 tlauel nitekititok hasta amo nimosiajketstok, miak ueltas nimokochsosolojtok, nipanotok mayantli uan kemantika amo nijpixki tlen nikis, miakpa amo nitlakuajtok, miakpa nisesekuiyaya* uan kemantika amo nijpixtoya tlen nimokentis.*
28 Uan amo san nopa tlamantli nechpano, nojkia mojmostla nechtekipachoua tlen kinpano toikniuaj tlen nochi tlanechikoli. 29 Tlaj se akajya momachilia amo tetik, na nojkia kiampa nijyolmati. Uan tlaj se akajya kichiua seyok ayokmo ma tlaneltoka, tlauel nechkualankamaka.
30 Tlaj moneki timoueyimatisej, na nimoueyimatis ika nopa tlamantli tlen kinextia amo nitetik. 31 Dios, katli eli iTata toTeko Jesús uan kinamiki nochipa ma tijueyichiuakaj, kuali kimati amo san niistlakati. 32 Ipan altepetl Damasco, nopa gobernador katli tlanauatijketl Aretas kitekitlalijtoya, kintlalik se keskij ma kimokuitlauikaj nopa puertas tlen nopa altepetl para ma nechitskikaj, 33 pero ipan se ventana tlen eltoya ipan nopa ueyi tepamitl, toikniuaj nechtemouijkej ipan se chikiuitl uan kiampa uelki nimochololtia.