Nopa ompa carta tlen kintitlanilijkej Cristo itokilijkauaj tlen Tesalónica

1 Na niPablo, ininuaya Silvano* uan Timoteo, tiinmechtlajkuiljuiliaj katli initstokej ipan tlanechikoli tlen eltok ipan altepetl Tesalónica, katli initstokej sansejko iuaya toTata Dios* uan toTeko Jesucristo:

2 ToTata Dios uan toTeko Jesucristo ma kipiakaj ueyi ininyolo ika inmojuantij* uan ma inmechpaleuikaj kuali ximouikakaj ininuaya.

3 Noikniuaj, tijmatij nochipa moneki tijtlaskamatisej Dios por inmojuantij. Kinamiki kiampa tijchiuasej pampa más kuali intlaneltokatiauij, uan nopa tlaiknelili tlen inkinextiaj se ika seyok nojua tlauel momiakilijtia. 4 Yeka ipan nochi tlanechikoli tlen iaxka Dios tikamanaltij ika miak pakilistli tlen inmojuantij, pampa tlauel inkiijiyouijtokej nochi uan inkinextijtokej intlaneltokaj maske inmechtlatsakuiltiaj uan inkiixnamikij tlaouijkayotl. 5 Nochi ni kinextia para Dios kichiua tlen xitlauak kema tetlajtolsenkaua uan kichiua ma inmechitakaj kinamiki inkiselisej iTlanauatijkayo Dios, pampa yeka intlaijiyouiaj.

6 Kena, kinamiki Dios ma kintlaxtlaui ika tlaouijkayotl katli kichiuaj xitlaijiyouikaj. 7 Pero inmojuantij katli intlaijiyouiaj, inmechyoltlalisej uan nojkia tojuantij, kema ipan iluikak toTeko Jesús monextis ika iángeles katli kipiaj miak chikaualistli 8 ipan ueyi tlilelemektli, kema kintlatsakuiltis katli amo kiixmatij Dios uan katli amo kineltokaj nopa kuali tlamachtili tlen toTeko Jesucristo. 9 Inijuantij kintlatsakuiltisej kema kintsontlamiltisej para nochipa, kiampa ixpoliuisej iixpa toTeko uan ya amo kinpaleuis ika iueyichikaualis, 10 ipan nopa tonali kema ualas para mouejkapantlalis ininuaya katli Dios kiniyokatlalijtok* uan kema nochi katli tlaneltokaj ipan ya kiuejkapantlalisej. Inmojuantij nojkia initstosej ininuaya pampa inkiselijkej uan inkineltokakej tlen tiinmechmatiltijkej.

11 Yeka nochipa timomaijtouaj* por inmojuantij para toDios ma inmechita kinamiki inmechnotsas uan para ya ika itetikayo senkistok ma kichiua nochi tlamantli tlen kuali tlen kineki kichiuas uan ma kitlamilti nochi tlen inmojuantij inkichiuaj pampa intlaneltokaj. 12 Kiampa itoka toTeko Jesús mouejkapantlalis ika inmojuantij, uan inmojuantij inmechuejkapantlalisej iuaya. Nopa panos pampa toDios uan toTeko Jesucristo kinextiaj ueyi ininyolo ika inmojuantij.*