Tlen kiijkuilok Juan
17 Kema tlanki kiijtoua nopa tlamantli, Jesús ajkotlachixki uan kiijtok: “Papá, ya asitok nopa hora. Xijueyichiua mokone uan kiampa mokone nojkia mitsueyichiuas, 2 sanse kej tijchijtok ma kipia tlanauatili ika nochi maseualmej, para ma kinmaka nemilistli tlen amo kema tlamis* nochi maseualmej katli ta tijmakak. 3 Ni kiijtosneki nemilistli tlen amo kema tlamis: ma mitsixmatikaj ta,* tiiyojtsi Dios* katli melauak, uan katli ta tijualtitlanki, Jesucristo. 4 Na nimitsueyichijtok ipan Tlaltipaktli; nijtlamichijtok nopa tekitl tlen tinechmakak. 5 Uajka nama Papá, xinechueyichiua kampa ta ika nopa ueyitilistli tlen nijpixtoya kema niitstoya mouaya kema ayamo tlakatiyayaj maseualmej ipan Tlaltipaktli.
6 ”Nikinnextilijtok motoka maseualmej katli tinechmakak ipan Tlaltipaktli. Eliyayaj moaxkauaj uan tinechmakak, uan kineltokatokej motlajtol. 7 Nama kimatij nochi tlamantli tlen tinechmakak uala tlen ta; 8 pampa nikiniljuijtok tlen ta tinechiljuijtok uan inijuantij kiselijtokej, uan nama nelnelia kimatij niualajtok tlen nepa kampa tiitstok uan kineltokaj para ta tinechualtitlanki. 9 Nimitstlajtlania xikinpaleui inijuantij; amo nimitstlajtlania por katli itstokej ipan Tlaltipaktli, nimitstlajtlania xikinpaleui katli ta tinechmakatok, pampa elij moaxkauaj; 10 uan nochi tlen noaxka eli moaxka, uan tlen moaxka eli noaxka, uan inijuantij nechuejkapantlalijtokej.
11 ”Na ayokmo niitstok ipan Tlaltipaktli, pero inijuantij kena, uan na nia kampa ta tiitstok. NoTata katli titlatsejtseloltik, xikinmokuitlaui para tijueyichiuas motoka tlen ta tinechmakak, kiampa elisej san setsi* kej ta uan na tielij san setsi.* 12 Kema niitstoya ininuaya, na nikinmokuitlauiyaya para nijueyichiuas motoka tlen ta tinechmakak; uan nikinmanauijtok uan yon se tlen inijuantij amo polijtok, san katli kitsontlamiltisej, para ma moaxiti tlen kiijtoua moTlajkuilol. 13 Pero nama nia kampa ta, uan nikijtoua ni tlamantli kema nojua niitstok ipan Tlaltipaktli, kiampa inijuantij uelis senkistok kiyolmatisej nopa pakilistli tlen na nijpia. 14 Nikiniljuijtok motlajtol, pero katli itstokej ipan Tlaltipaktli kinkualankaitaj pampa amo elij kej inijuantij, sanse kej na amo nieli kej katli itstokej ipan Tlaltipaktli.
15 ”Amo nimitstlajtlania xikinkixti tlen ni Tlaltipaktli, nimitstlajtlania xikinmanaui tlen Axkualtlakatl. 16 Inijuantij amo elij kej katli itstokej ipan Tlaltipaktli sanse kej na amo nieli kej katli itstokej ipan Tlaltipaktli. 17 Xikinchiua ma elikaj tlatsejtseloltikej* ika tlen melauak; motlajtol eli melauak. 18 Sanse kej ta tinechualtitlanki ipan Tlaltipaktli, na nojkia nikintitlanki kampa maseualmej katli itstokej ipan Tlaltipaktli. 19 Uan nimochiua tlatsejtseloltik para nikinpaleuis, kiampa inijuantij nojkia mochiuasej tlatsejtseloltikej ika tlen melauak.
20 ”Amo nimitstlajtlania san inijuantij xikinpaleui, nojkia nimitstlajtlania xikinpaleui katli teipa tlaneltokasej ipan na ika tlen inijuantij kiijtosej, 21 kiampa nochi elisej san setsi.* Kej ta Papá, tiitstok nouaya uan na niitstok mouaya, inijuantij nojkia ma itstokaj touaya; kiampa katli itstokej ipan Tlaltipaktli kineltokasej ta tinechualtitlanki. 22 Nikinmakatok nopa ueyitilis tlen tinechmakak para ma elikaj san setsi* kej tojuantij tielij san setsi:* 23 na niitstok ininuaya, uan ta tiitstok nouaya, para nelnelia ma itstokaj sansejko. Kiampa katli itstokej ipan Tlaltipaktli kimatisej ta tinechualtitlanki uan tikiniknelik sanse kej tinechiknelik. 24 Papá, nijneki katli tinechmakatok ma itstokaj nouaya kampa na niitstos para ma kiitakaj nopa ueyitilistli tlen tinechmakatok, pampa tinechiknelik kema ayamo tlakatiyayaj maseualmej ipan Tlaltipaktli.* 25 NoTata katli tijchiua tlen xitlauak, katli itstokej ipan Tlaltipaktli nelia amo mitsixmatij, pero na nimitsixmati uan nama inijuantij kimatij ta tinechualtitlanki. 26 Nikinnextilijtok motoka, uan nojua nikinnextilijtos, para nopa tlaiknelijkayotl tlen ika tinechiknelik ma elto ipan inijuantij uan na niitstos ininuaya”.