Tlen kiijkuilok Marcos

16 Uajka, kema ya panotoya sábado, María Magdalena, María inana Santiago uan Salomé, kikojkej xiuitl tlen ajuiyak mijyotiyaya para kitlalilisej itlakayo Jesús. 2 Tlauel ijnalok ipan nopa achtoui tonali kema peua semana, kema ya kistoya Tonati, yajkej kampa mijkaostotl. 3 Uan kiijtouayayaj: “¿Ajkia techpaleuis para kimimilos nopa tetl tlen ika kitsaktokej mijkaostotl?”. 4 Pero kema moixtlanankej, kiitakej ya kimimilojtoyaj nopa tetl, maske eliyaya tlauel ueyi. 5 Kema kalajkej ipan mijkaostotl, kiitakej ika ininmanejmak moseuijtoya se telpokatl katli mokentijtoya iyoyo ueueyak* uan chipauak. Uan tlauel mosentlachilijkej. 6 Ya kiniljuik: “Amo ximomajmatikaj. Inmojuantij inkitemouaj Jesús, katli eua Nazaret, katli kimiktijkej ipan se kuauitl.* Ya moyolkuik.* Ayokmo itstok nikaj. Xikitakaj, nikaj kitlalijtoyaj. 7 Pero xiakaj, xikiniljuitij itokilijkauaj uan Pedro: ‘Ya tlayakantia Galilea uan nepa inmechchiati. Nopaya inkiitasej, kej inmechiljuik’ ”. 8 Uajka kiskej tlen nopa mijkaostotl uan cholojkej. Uiuipikatiauiyayaj uan tlauel mosentlachilijtoyaj. Uan amo aka kiiljuijkej yon tleno pampa majmauiyayaj.*