Tlen kiijkuilok Juan
20 Ipan nopa achtoui tonali kema peua semana, María Magdalena kualka yajki kampa mijkaostotl, kema nojua tlatlayoua, uan kiitak kiijkuinijtoyaj nopa tetl tlen ika kitsaktoyaj mijkaostotl. 2 Uajka motlalojtejki kinitato Simón Pedro uan nopa seyok itokilijka, katli Jesús kiikneliyaya, uan kiniljuik: “¡Kikixtijtokej toTeko tlen mijkaostotl, uan amo tijmatij kanke kitlalijtokej!”.
3 Uajka Pedro uan nopa seyok itokilijka Jesús yajkej kampa mijkaostotl. 4 Nochi omej motlalojtejkej, pero nopa seyok itokilijka motlalok más chikauak que Pedro uan asito achtoui kampa mijkaostotl. 5 Kema mopachok para tlachias kalijtik, kiitak nopaya eltoya nopa yoyomitl* tlen lino, pero amo kalajki. 6 Uajka Simón Pedro, katli ualayaya itepotsko,* nojkia asito uan kalajki kampa mijkaostotl. Uan kiitak nopaya eltoya nopa yoyomitl tlen lino. 7 Nopa yoyomitl tlen ika kipiktoyaj itsonteko Jesús amo eltoya ika nopa sekinok yoyomitl, kimimilojtoyaj uan kitlalijtoyaj iyoka. 8 Teipa nojkia kalajki nopa seyok itokilijka katli achtoui asitoya kampa mijkaostotl, uan kiitak uan kineltokak. 9 Inijuantij ayamo kikuamachiliyayaj iTlajkuilol Dios kampa kiijtoua monekiyaya moyolkuis.* 10 Uajka itokilijkauaj tlakuepilijkej ininchaj.
11 Pero María mokajki ijkatok kalteno uan chokayaya nechka nopa mijkaostotl. Kema chokatoya, mopachok para tlachias iijtik mijkaostotl 12 uan kinitak omej ángeles ika ininyoyo chipauak moseuijtoyaj kampa kitlalijtoyaj itlakayo Jesús; se ika itsontla uan seyok ika iikxitla. 13 Inijuantij kitlatsintokijkej: “Aui, ¿kenke tichoka?”. María kinnankilik: “Pampa kiuikakej noTeko uan amo nijmati kanke kitlalijtokej”. 14 Kema kiijtok ni tlamantli, moikankuepki* uan kiitak nopaya ijkatoya Jesús, pero amo kiixmatki tlaj ya eliyaya. 15 Jesús kitlatsintokik: “Aui, ¿kenke tichoka? ¿Ajkia tijtemoua?”. María moiljuik eliyaya katli tlamokuitlauiyaya kampa tlatojtokaj, yeka kiiljuik: “Tío, tlaj ta tijuikak, xinechiljui kanke tijtlalito uan na nijuikas”. 16 Jesús kiiljuik: “¡María!”. Kema moikankuepki, ya kinankilik ika hebreo: “¡Rabbóni!” (tlen kiijtosneki “tlamachtijketl”). 17 Jesús kiiljuik: “Ayokmo xinechitski pampa ayamo nitlejkotok kampa noTata. Xia kampa itstokej noikniuaj uan xikiniljui: ‘Nitlejkos kampa noTata, katli nojkia eli inmoTata, kampa noDios* uan nojkia inmoDios’ ”. 18 María Magdalena yajki kinitato itokilijkauaj Jesús uan kiniljuik: “¡Nikitstok toTeko!”. Uan kinpouilik nochi tlen kiiljuijtoya.
19 Eliyaya nopa achtoui tonali kema peua semana uan ya tiotlakixtoya, uan itokilijkauaj Jesús mokaltsaktoyaj ika llave kampa mosentilijtoyaj pampa kinmakasiyayaj judíos. Uajka Jesús monextik tlatlajko kampa itstoyaj uan kiniljuik: “Xijpiakaj tlaseuilistli”. 20 Kema kiijtok nopa, kinnextilik imax uan ielchiki. Uan itokilijkauaj tlauel yolpajkej kema kiitakej toTeko. 21 Jesús sampa kiniljuik: “Xijpiakaj tlaseuilistli. Sanse kej noTata nechtitlanki, na nojkia niinmechtitlani”. 22 Kema tlanki kiijtoua nopa, kinilpitski uan kiniljuik: “Xijselikaj ichikaualis Dios.* 23 Tlaj inmojuantij inkitlapojpoljuiaj itlajtlakoljuaj se akajya, uajka Dios ya kitlapojpoljuik; pero tlaj amo inkitlapojpoljuiaj, uajka Dios amo kitlapojpoljuijtok”.
24 Pero Tomás, se tlen nopa 12 apóstoles, katli kiiljuiyayaj Kuate,* amo itstoya ininuaya kema Jesús monextiko. 25 Yeka nopa sekinok itokilijkauaj Jesús kiiljuiyayaj: “¡Tikitakej toTeko!”. Pero Tomás kiniljuik: “Nijneltokas hasta kema nikitas ipan imax kampa kilavosminkej uan nijkalakis nomakpil kampa kikokojkej ika clavos uan nijkalakis nomax ielchikitipa”.
26 Kema chikueyitik, itokilijkauaj sampa mosentilijtoyaj ipan nopa kali, uan Tomás itstoya ininuaya. Maske mokaltsaktoyaj ika llave, Jesús monextik kampa inijuantij uan kiniljuik: “Xijpiakaj tlaseuilistli”. 27 Teipa kiiljuik Tomás: “Xijtlali momakpil nikaj uan xikita nomax; xijualika momax uan xijkalaki noelchikitipa. Ayokmo xikijto para amo nimoyolkuitok uan xijneltoka”. 28 Uajka, Tomás kiiljuik: “¡NoTeko uan noDios!”. 29 Jesús kiiljuik: “¿Tijneltoka san pampa tinechitstok? Yolpakij katli tlaneltokaj maske amo nechitstokej”.
30 Jesús nojkia kichijki ininixpa itokilijkauaj miak milagros* tlen amo moijkuilok ipan ni amamimili. 31 Pero tlen nikaj moijkuilok elki para xijneltokakaj Jesús eli nopa Cristo, iKone Dios, uan kiampa kema inkineltokasej uelis inkipiasej nemilistli ipan itoka.