Nopa ompa carta tlen kintitlanilijkej Cristo itokilijkauaj tlen Corinto
10 Nama, na niPablo, niinmechtlajtlania xijchiuakaj tlen niinmechtlajkuiljuilia, pampa Cristo yolyamanik* uan kipia kuali iyolo, maske se keskij tlen inmojuantij kiijtouaj para ninesi tlen ueltsi maseuali kema niitstok inmouaya, pero kema amo niitstok inmouaya uan niinmechtlajkuiljuilia nesi para tlauel niyoltetik. 2 Nijnekiskia kema nias nopaya, amo monekis ma nijnexti niyoltetik yon chikauak ma nikintlakaualti se keskij katli moiljuiaj timoyakanaj ika tlen maseualmej moiljuiaj, maske uelis kena kinamiki kiampa ma nijchiua. 3 Pampa maske tiitstokej ipan ni Tlaltipaktli,* amo titlateuiaj kej kichiuaj maseualmej tlen ni Tlaltipaktli. 4 Pampa nopa tepostli tlen ika titlateuiaj amo eli kej tlen kitekiuiaj maseualmej, eli tlamantli tlen Dios* techmakatok uan kipia chikaualistli para kixoleuas* tlen ueli tlamantli tlen eli kej se ueyi tepamitl tlen kuali ijkatok. 5 Pampa kejuak tijxoleuaj tlen ueli tlalnamikilistli uan nochi tlamantli tlen kintsakuilia maseualmej para ma kiixmatikaj Dios. Tijnauatiaj nochi tlalnamikilistli kejuak tikilpiskiaj para ma kichiua tlen Cristo tlanauatia. 6 Uan kema inmojuantij ya inkinextijtosej senkistok inkichiuaj tlen inmechnauatiaj,* tojuantij uelis tikintlatsakuiltisej katli amo kichiuaj tlen kinnauatiaj.
7 Inmojuantij san inkitlachiliaj kenijkatsa nesi se tlamantli. Tlaj se akajya motemachia para eli iaxka Cristo, sampa ma moyoliljui ipan ni tlamantli: sanse kej ya iaxka Cristo, tojuantij nojkia tiiaxkauaj. 8 Pampa toTeko techmakak tlanauatili para ma tiinmechyolchikauakaj uan amo para ma tiinmechyolkokokaj, uan tlaj na nimoueyimatiskia maske se kentsi ika nopa tlanauatili, amo nipinauaskia. 9 Pero amo nijnekiskia ximoiljuikaj para nijneki niinmechtemajmatis ika nopa cartas tlen niinmechtitlanilia. 10 Sekij kiijtouaj: “Ipan nopa cartas tlen kiijkuiloua nesi kipia tlanauatili uan chikauak tenojnotsa, pero kema itstok nikaj nesi tlen ueltsi tlakatl uan kema kamanalti amo aka kineki kitlakakilis”. 11 Katli kej nopa kiijtoua, ma kiilnamiki tlen tikijkuilouaj ipan cartas kema amo tiitstokej inmouaya, ya nopa nojkia tijchiuasej kema tiitstosej nopaya. 12 Pampa amo timosemakaj tikijtosej tielij sanse kej katli moueyimatij uan amo timotekitlachiliaj ika tlen inijuantij kichiuaj. Inijuantij ininseltitsitsij motekitlachiliaj ika tlen moiljuiaj eli kuali uan nopa kinextia para amo tlalnamikij.
13 Pero tojuantij amo timoueyimatisej ika tlamantli tlen amo tijchijtokej, san timoueyimatisej ika nopa tekitl tlen Dios techmakatok, uan ipan nopa tekitl nojkia initstokej inmojuantij. 14 Kema tiajkej kampa inmojuantij, amo tijchijkej se tekitl tlen Dios amo techmakatoya, pero achtoui tojuantij tiinmechmatiltijkej nopa kuali tlamachtili tlen Cristo. 15 Uan amo timoueyimatij ika se tlamantli tlen amo tijchijtokej, nopa kiijtosneki nopa tekitl tlen sekinok kichijkej. Pero tijnekij inmotlaneltokilis ma moskalti uan kiampa nopa tekitl tlen tijchijtokej nojua ma momiakili kampa inmojuantij. Uajka uelis tijchiuasej nojua más miak tekitl. 16 Pampa tijnekij titematiltitij nopa kuali tlamachtili ipan nopa altepemej tlen mokaua más uejka kampa inmojuantij initstokej. Kiampa amo timoueyimatisej ika tlen sekinok kichijtokej ipan ininaltepe. 17 “Pero katli moueyimati,* ma moueyimati pampa kiixmati Jehová”.* 18 Pampa katli iselti mouejkapantlalia amo ya nopa katli Dios kuali kiita,* eli Jehová* katli kiijtoua ajkia kuali kiita.