Tlen kiijkuilok Lucas
14 Seyok tonali, ipan sábado,* Jesús tlakuato ichaj se katli kinyakanayaya fariseos.* Katli nopaya itstoyaj san kisentlachilijtoyaj. 2 Uan iixpa itstoya se tlakatl katli tejtemiyaya.* 3 Uajka Jesús kintlatsintokik katli kuali momachtijtoyaj iTlanauatil Moisés uan fariseos: “¿Kinamiki kichikauasej se akajya ipan sábado o amo?”. 4 Pero inijuantij amo tleno kiijtojkej. Uajka kitlalik imax ipani nopa tlakatl, kichikajki uan kiiljuik ma yaui. 5 Jesús kiniljuik: “¿Ajkia tlen inmojuantij amo nimantsi kikixtiskia se ikone o se itoro tlaj uetsiskia ipan se ameli maske ipan sábado?”. 6 Uan amo uelkej kinankiliaj.
7 Kema kiitak katli kintlanejtoyaj kitlapejpeniyayaj moseuisej kampa más kuali, kinmachtik ni tlamantli:* 8 “Kema mitstlaneuisej ipan se iljuitl kampa mosenkauaj, amo ximoseui kampa más kuali, pampa uelis nojkia kitlanejtokej se katli más kitlepanitaj que ta. 9 Uajka katli inmechtlanejki ualas uan mitsiljuis: ‘Xijkaua ni tlakatl nikaj ma moseui’. Uan tipinauas uan monekis timoseuiti hasta tlaika. 10 Más kuali kema mitstlaneuij, ximoseuiti hasta tlaika, kiampa kema ualas nopa tlakatl katli mitstlanejki, mitsiljuis: ‘Nouampox,* ximoseuiki nikaj kampa más kuali’. Kiampa mitstlepanitasej ininixpa nochi katli kintlanejtokej. 11 Katli moueyimati, kipinaualtisej, pero katli amo moueyimati, kiuejkapantlalisej”.
12 Teipa kiiljuik nopa tlakatl katli kitlanejtoya: “Kema tijchiuas se tlakualistli, amo xikinnotsa mouampoyouaj yon moikniuaj yon mouikaljuaj* yon mokalnechkauaj katli tlatominpiaj. Tlaj kiampa tijchiuaskia, inijuantij nojkia ueliskia mitstlaneuisej, uan ya nopa eliskia motlaxtlauil. 13 Más kuali, kema tijchiuas se tlakualistli xikintlaneui katli amo tleno kipiaj, katli amo uelij nejnemij o amo uelij kioliniaj ininmax, katli metskuachotikej uan katli amo tlachiaj, 14 uan tiyolpakis pampa inijuantij amo kipiaj tlen ika mitstlaxtlauisej. Uan Dios* mitstlaxtlauis kema kinyolkuis katli kichijkej tlen kuali”.
15 Kema se katli kitlanejtoyaj kikajki nopa, kiiljuik: “Yolpaki katli tlakuas ipan iTlanauatijkayo Dios”.
16 Jesús kiiljuik: “Se tlakatl katli kichiuaskia se ueyi tlakualistli, kintlanejki miakej maseualmej. 17 Kema asik hora para tlakuasej, kititlanki itlatekipanojka ma kiniljuiti katli kintlanejtoya: ‘Xiualakaj pampa ya nochi eltok’. 18 Pero nochi katli kintlanejtoya pejkej motechtiaj.* Se kiijtok: ‘Nijkojki se tlali uan moneki nikitati; nimitstlajtlania xinechtlapojpoljui’. 19 Seyok kiiljuik: ‘Nikinkojki makuiltij pares torojmej uan nikintlachiliti; nimitstlajtlania xinechtlapojpoljui’. 20 Uan seyok kiiljuik: ‘Namanok nimosiuajtik, yeka amo uelis nias’. 21 Uan nopa tlatekipanojketl yajki kipouilito iteko. Uajka iteko tlauel kualanki uan kinauatik itlatekipanojka: ‘Nimantsi xia ipan ueyi ojtli uan ipan calles tlen ni altepetl uan xikinualika nikaj katli amo tleno kipiaj, katli amo uelij nejnemij o amo uelij kioliniaj ininmax, katli amo tlachiaj uan katli metskuachotikej’. 22 Teipa nopa tlatekipanojketl kiijtok: ‘Noteko, mochijtok nochi tlen titlanauatik uan nojua onka kampa moseuisej’. 23 Uan iteko kinauatik nopa tlatekipanojketl: ‘Xia ipan ojtli uan ipan pilojtsitsij uan xikinchiualti maseualmej ma kalakikaj para temis nochaj. 24 Pampa niinmechiljuia, yon se tlen nopa tlakamej katli nikintlanejki kiyekosej* ni tlakualistli’ ”.
25 Uan iuaya Jesús yauiyayaj miakej maseualmej; ya kinnechkauik uan kiniljuik: 26 “Tlaj se akajya uala kampa na uan amo kikualankaita* itata, inana, isiua, ikoneuaj, iikniuaj uan isiuaikniuaj uan hasta inemilis, amo uelis elis notokilijka. 27 Katli amo kineki kiuikas nopa kuauitl tlen ika tlaijiyouis* uan nechtokilis, amo uelis elis notokilijka. 28 Ximoiljuikaj, tlaj se tlen inmojuantij kineki kichijchiuas se uejkapantik kali, ¿amo moseuiskia achtoui uan kiitaskia keski tomij monekis uan kiampa kiitas tlaj kiaxilis para kitlamiltis? 29 Tlaj amo, san kitsinpeualtis pero amo uelis kitlamiltis, uan nochi katli kiitasej peuas kipinajtisej 30 uan kiijtosej: ‘Ni tlakatl pejki kichijchiua ni kali pero amo uelki kitlamiltia’. 31 O se tlanauatijketl katli moteuiti iuaya seyok, ¿amo moseuia achtoui uan kiita tlaj ika 10 mil isoldados uelis kiteuis nopa seyok tlanauatijketl katli kinpia 20 mil soldados? 32 Uajka, tlaj kiita amo uelis kitlanis, kintitlani se keskij ma kisenkauatij nopa kualantli kema nopa seyok tlanauatijketl nojua itstok uejka. 33 Nojkia, kuali xijmajtokaj yon se tlen inmojuantij uelis elis notokilijka tlaj amo kikajteua nochi tlen kipixtok.
34 ”Nopa istatl tlauel kuali. Pero tlaj istatl kipolos ipoyejka, ¿kenijkatsa sampa kipoyeltisej? 35 Ayokmo kuali yon para tlali yon para tlapialkuitlatl;* yeka maseualmej kitepeuaj. Katli kipia inakas para tlakakis, kuali ma tlakaki”.