Hechos (Tlen apóstoles kichijkej)

10 Ipan Cesarea itstoya se tlakatl katli motokaxtiyaya Cornelio, eliyaya se inintlayakanka soldados* katli ualayayaj Italia. 2 Eliyaya se tlakatl katli tlauel tlaneltokayaya uan kimakasiyaya Dios,* sanse kej nochi katli itstoyaj ichaj. Tlauel kinpaleuiyaya katli amo tleno kipixtoyaj uan ajachika* kitlajtlaniyaya Dios ma kipaleui. 3 Se tonali, nechka las 3 ika tiotlak,* kuali kiitak kejuak ipan se temiktli se iángel Dios kalakiyaya kampa ya itstoya uan kiiljuiyaya: “¡Cornelio!”. 4 Cornelio kisentlachilik ika majmajtli uan kitlatsintokik: “¿Tlake pano noTeko?”. Nopa ángel kiiljuik: “Dios kitlakakilijtok nopa tlamaijtoli* tlen tijchiua uan kiitstok tikinpaleuia katli amo tleno kipiaj, uan ya kiilnamiki. 5 Uajka xikintitlani se keskij tlakamej ma yakaj Jope para ma kiualikakaj se tlakatl katli motokaxtia Simón, katli nojkia kiiljuiaj Pedro. 6 Ya mokaua ichaj Simón, se tlakatl katli tekiti ika kuetlaxtli uan ichaj eltok iteno nopa mar”. 7 Kema kistejki nopa ángel katli kinojnotski, Cornelio nimantsi kinnotski omej itlatekipanojkauaj uan se soldado katli tlauel tlaneltokayaya uan eliyaya temachtli, 8 kinpouilik nochi uan kintitlanki ma yakaj Jope.

9 Ika ualmostla,* kema inijuantij yauiyayaj ipan ojtli uan monechkauijtiauiyayaj ipan nopa altepetl, Pedro tlejkok kalkuitlapa* nechka tlajkotona* para momaijtos. 10 Uajka tlauel mayanki uan kinejki tlakuas. Kema kichijchiuayayaj tlen kikuas, pejki kiita se tlanextilili kej se temiktli 11 uan kiitak iluikaktli tlapojtoya uan nojkia se tlamantli tlen nesiyaya kej se ueyi yoyomitl tlen lino tlen najkak kiitskitoyaj* ualtemoyaya ipan Tlaltipaktli. 12 Ipan nopa yoyomitl itstoyaj nochi tlamantli tlapialmej katli nemij ika naui ininikxi, tlapialmej katli mouauatatsaj uan totomej. 13 Uajka se akajya kiiljuik: “¡Ximoketsa Pedro, xikinmikti uan xikinkua!”. 14 Uan Pedro kinankilik: “Amo noTeko. Amo kema nijkuajtok se tlamantli tlen sokiyo o amo tlapajpaktik”. 15 Ika ompa kinojnotskej uan kiiljuijkej: “Ayokmo xikijto para sokiyo nopa tlamantli tlen Dios ya kichijki tlapajpaktik”. 16 Kiampa panok ika expa, uan nimantsi nopa yoyomitl tlakuepilik iluikak.

17 Pedro san tekitl mokajki* uan kema nojua moseniljuijtoya tlake kinekiyaya kiijtos nopa tlanextilili, nopa tlakamej katli Cornelio kintitlantoya ya tlajtlantoyaj kanke ichaj Simón uan ya itstoyaj ipuertajteno. 18 Tlanojnotskej uan tlatsintokakej tlaj nopaya mokauayaya Simón, katli nojkia kiiljuiaj Pedro. 19 Kema Pedro nojua moiljuijtoya ipan nopa tlanextilili, Dios kiiljuik ika ichikaualis:* “¡Xikita! Eyij tlakamej mitstemouaj. 20 Ximoketsa, xitemo uan amo ximoiljuijto tlaj tias ininuaya o amo, pampa na nikintitlantok”. 21 Uajka Pedro temok kampa itstoyaj nopa tlakamej uan kiniljuik: “Nikaj niitstok. Na nieli katli inkitemouaj. ¿Kenke inualajtokej?”. 22 Inijuantij kiiljuijkej: “Cornelio eli se inintlayakanka soldados, se tlakatl katli kichiua tlen kuali uan kimakasi Dios uan nochi judíos kuali kamanaltij tlen ya. Dios kititlanki se ángel tlen tlatsejtseloltik ma kiiljuiti ma mitstlaneui ichaj uan ma kikaki tlen tikijtos”. 23 Uajka Pedro kiniljuik ma kalakikaj uan kinkajki ma mokauakaj nopaya.

Ika ualmostla mejki uan yajki ininuaya, uan nojkia yajkej se keskij toikniuaj tlen Jope. 24 Uan kema panok seyok tonali asitoj Cesarea. Cornelio ya kinchixtoya uan kinsentilijtoya iuikaljuaj* uan iuampoyouaj* katli más kuali mouikayayaj iuaya. 25 Kema Pedro asito kalijtik, Cornelio kinamikito uan motlankuaketski iixpa para kiuejkapantlalis. 26 Pero Pedro kitlananki uan kiiljuik: “Ximoketsa. Na nojkia san nieli se tlakatl”. 27 Kema nojua kamanaltitoya iuaya, kalajki uan kinitak miakej maseualmej mosentilijtoyaj nopaya. 28 Uajka Pedro kiniljuik: “Inmojuantij kuali inkimatij para iTlanauatil Moisés kiijtoua se judío amo kinamiki mouikas iuaya se tlakatl katli amo eli judío o ma kamanalti iuaya. Pero Dios nechnextilijtok amo kinamiki nikijtos se akajya eli sokiyo o amo tlapajpaktik. 29 Yeka kema nechtemotoj, niualajki uan amo nikijtok para amo niualas. Nama xinechiljuikaj, ¿kenke innechnotskej?”.

30 Cornelio kinankilik: “Nayopaya* nimomaijtouayaya nochaj kej ni hora, nechka las 3 ika tiotlak,* uan nimantsi monextiko noixpa se tlakatl ika iyoyo tlen kauaniyaya 31 uan nechiljuik: ‘Cornelio, Dios kitlakakilijtok nopa tlamaijtoli tlen tijchiua uan kiilnamiki kenijkatsa tikinpaleuia katli amo tleno kipiaj. 32 Yeka, xijtitlani se akajya ma yaui Jope para kinotsati Simón, katli nojkia kiixmatij kej Pedro. Ya mokaua ichaj Simón, se tlakatl katli tekiti ika kuetlaxtli uan ichaj eltok iteno mar’. 33 Nimantsi nitlatitlanki ma mitstemotij uan ta ika nochi moyolo tijnejki tiualas. Uan nama nochi tiitstokej nikaj iixpa Dios para tijkakisej nochi tlen Jehová* mitsnauatijtok xikijto”.

34 Kema Pedro kikajki nopa, pejki kamanalti uan kiijtok: “Nama nelia nijmati Dios amo techikoita, 35 ya kinselia katli kimakasij uan kichiuaj tlen kuali, maske kampa ueli euaj. 36 Ya kintitlanilik itlajtol ikoneuaj Israel para kinmatiltis nopa kuali tlamachtili tlen tlaseuilistli tlen uelis tijpiasej iuaya Dios ika tlen Jesucristo kichijki. Yaya ininTeko nochi maseualmej. 37 Inmojuantij inkimatij tlen kiijtouayayaj ipan nochi Judea, tlen pejki ipan Galilea, kema Juan ya tematiltijtoya maseualmej monekiyaya moatsonpoliuiltisej: 38 kamanaltiyayaj tlen Jesús katli eua Nazaret, kenijkatsa Dios kitlapejpenik ika ichikaualis uan kimakak tetikayotl, uan kenijkatsa nentinenki ipan Tlaltipaktli uan kichijtinemiyaya tlen kuali uan kinchikauayaya nochi katli Diablo kintlaijiyouiltiyaya, pampa Dios itstoya iuaya. 39 Tojuantij tikitstokej nochi tlamantli tlen kichijki ipan ininaltepe judíos uan ipan Jerusalén, pero inijuantij kimiktijkej kema kikuapilojkej ipan se kuauitl. 40 Ipan eyi tonali Dios kiyolkuik* uan kikajki ma monexti 41 maske amo ininixpa nochi maseualmej, san kiitakej katli Dios ipa kintlapejpenijtoya, tojuantij, katli titlakuajkej uan tikikej se tlenijki iuaya kema ya moyolkuitoya.* 42 Nojkia technauatik ma tikinkamanaljuikaj maseualmej uan senkistok ma titematiltikaj para ya eli katli Dios kitekimakatok kej juez katli kintlajtolsenkauas katli yoltokej uan katli miktokej. 43 Nochi teokamanalouanij* tematiltiaj tlen ya, uan kiijtouaj nochi katli tlaneltokaj ipan ya, kintlapojpoljuiaj inintlajtlakoljuaj ika itoka”.

44 Kema Pedro nojua kamanaltitoya tlen ni tlamantli, ichikaualis Dios temok kampa itstoyaj nochi katli kitlakakilijtoyaj nopa tlamachtili. 45 Uan nopa tlaneltokanij katli ya mochiuilijtoyaj circuncisión* katli yajtoyaj iuaya Pedro, mosentlachilijtoyaj pampa katli amo eliyayaj judíos nojkia kiseliyayaj ichikaualis Dios kej se regalo, 46 pampa inijuantij kinkakiyayaj kamanaltij ipan miak tlajtoli uan kiueyichiuayayaj Dios. Teipa Pedro kiijtok: 47 “Ni maseualmej nojkia kiselijtokej ichikaualis Dios, sanse kej tojuantij. Uajka, ¿ajkia uelis kintsakuilis uan kiijtos amo ma kitekiuikaj atl para moatsonpoliuiltisej?”. 48 Uajka tlanauatik ma kinatsonpoliuiltikaj ipan itoka Jesucristo. Teipa kiiljuijkej Pedro ma mokaua ininuaya se keski tonali.