Hechos (Tlen apóstoles kichijkej)
1 Teófilo, ipan nopa achtoui tlapoualistli nikijkuilok nochi tlamantli tlen Jesús pejki kichiua uan tlamachtia 2 hasta nopa tonali kema tlejkok iluikak, kema ya kiniljuijtoya ika ichikaualis Dios* tlake monekiyaya kichiuasej iapóstoles katli kintlapejpenijtoya. 3 Jesús tlaijiyouik uan teipa monextik ininixpa uan kichijki miak tlamantli para xitlauak kinnextilis nelia yoltoya. Inijuantij kiitakej 40 tonali, uan ya kinkamanaljuik tlen iTlanauatijkayo Dios. 4 Kema mosentilijtoya ininuaya, kinnauatik: “Ximokauakaj altepetl Jerusalén. Xijchixtokaj tlen toTata kitenkajtok, tlen niinmechiljuik. 5 Pampa Juan teatsonpoliuiltik ika atl, pero ipan se keski tonali inmojuantij inmechatsonpoliuiltisej ika ichikaualis Dios”.
6 Kema inijuantij mosentilijkej, kitlatsintokijkej: “ToTeko, ¿tijchiuas ipan ni tonali sampa ma itsto se tlanauatijketl ipan Israel?”. 7 Jesús kiniljuik: “Inmojuantij amo kinamiki inkimatisej kema o tlake tonali kiixtlalijtok toTata, pampa san ya kipia tlanauatili para kiijtos. 8 Pero kema ichikaualis Dios ualas ipan inmojuantij, inkipiasej tetikayotl. Uan intematiltisej tlen na ipan Jerusalén, ipan nochi Judea uan Samaria, uan hasta kampa más uejka ipan Tlaltipaktli”. 9 Kema tlanki kiijtoua ni tlamantli, tlejkok iluikak kema inijuantij nojua kitlachilijtoyaj. Uajka se mixtli kitsajki uan ayokmo kiitakej. 10 Inijuantij kuali kitlachilijtoyaj iluikak kema tlejkoyaya, uajka sanima* monextikoj ininnechka omej tlakamej ika ininyoyo chipauak 11 uan kiniljuijkej: “Tlakamej katli ineuaj Galilea, ¿kenke nopaya inijkatokej uan inajkotlachixtokej? Ni Jesús katli itstoya inmouaya uan yajki iluikak, ualas sanse kej inkiitakej yajki iluikak”.
12 Teipa tlakuepilijkej Jerusalén. Inijuantij itstoyaj ipan tepetl tlen Olivos, se tepetl tlen eltok nechka Jerusalén uan iuejkaka mokaua kej se kilómetro.* 13 Kema asitoj, tlejkokej ipan nopa cuarto kampa mokauayayaj tlen eltoya uejkapa. Itstoyaj Pedro, Juan, Santiago uan Andrés, Felipe uan Tomás, Bartolomé uan Mateo, Santiago ikone Alfeo, Simón katli tlauel kipaktiyaya tlatekipanos uan Judas ikone Santiago. 14 Nochi inijuantij mosentlalijtoyaj ajachika* momaijtosej* ininuaya se keskij siuamej, uan nojkia itstoya María inana Jesús uan iikniuaj, pampa kipixtoyaj sanse inintlalnamikilis.
15 Ipan nopa tonali, Pedro moketski tlatlajko kampa toikniuaj (itstoyaj se 120) uan kiniljuik: 16 “Tlakamej, noikniuaj, monekiyaya moaxitis tlen kiijtoua iTlajkuilol Dios, tlen uejkajkia ichikaualis Dios kichijki David ma kiijkuilo tlen Judas, katli kinyakanki katli kiitskijkej Jesús. 17 Ya itstoya touaya uan kitlapejpenijkej para nojkia ma kichiua ni tekitl. 18 (Ni tlakatl kikojki se tlali ika nopa tomij tlen kitlanki kema kichijki tlen amo kuali, uan kema uetsito ika itsonteko, tsayanki iijti uan kiski ikuitlaxkol. 19 Nochi katli itstokej Jerusalén kimatkej uan kitokaxtijkej nopa tlali Akéldama, ika inintlajtol kiijtosneki ‘Tlali Tlen Kikojkej Ika Estli’). 20 Pampa ijkuilijtok ipan libro tlen Salmos: ‘Ichaj ma mokaua tlatsitsikatok uan amo aka ma itsto nopaya’ uan ‘Nopa tekitl tlen kipiayaya kej tlayakanketl,* ma kimakakaj seyok’. 21 Yeka, moneki tijpatlasej ni tlakatl ika seyok katli nentok touaya nochi tonali kema toTeko Jesús kichijki iteki kema itstoya touaya, 22 desde kema Juan kiatsonpoliuiltik hasta nopa tonali kema itstoya touaya uan tlejkok iluikak. Ni tlakatl nojkia tematiltis touaya para Jesús moyolkuik”.
23 Uajka kintlalijkej omej tlakamej: José, katli kitokaxtiaj Barsabás uan nojkia kiiljuiaj Justo, uan Matías. 24 Teipa momaijtojkej uan kiijtojkej: “ToDios* Jehová,* ta katli tikinixmati ininyolo nochi maseualmej, xijnexti ajkia tlen ni omej tlakamej tijtlapejpenijtok 25 para kiselis ni tekitl uan elis apóstol, pampa Judas kitlauelkajki iteki para kitokilis iojui”. 26 Uajka kitemojkej se tlamantli tlen ika Dios kinextiskia* ajkia monekiyaya kitlapejpenisej, uan kinextik Matías monekiyaya ma kitlapejpenikaj, uan ya nojkia kipojkej kej nopa 11 apóstoles.