Nochi moneki ma techyolchikauakaj

¿Tikilnamiki kenijkatsa tiuetski kema nojua tieliyaya tikonetl? Uelis timomakokok o timotlankuakokok. ¿Tlake kichijki monana? Uelis kipojpojki uan kipijki kampa timokokok. Uan kema tichokayaya, monana mitsyoltlalik ika tlen mitsiljuik uan mitsnajnauajki ika miak tlaiknelili. Kema nojua tikonemej, amo ouij techyoltlaliaj uan techyolchikauaj.

Kema timoskaltijtiauij, tikixnamikij sekinok kuesoli tlen nelia ouij. Uan kemantika amo aka ueli techyolchikaua. Kema se akajya katli ya ueyi kipia se kuesoli, amo uelis tijpaleuisej ma kisenkaua san ika se keski tlajtoli o san pampa tijnajnauasej. Ma tikitakaj kenke tikijtouaj ni.

• ¿Kenijkatsa tijyolmati kema amo tijpantia se tekitl? Julián kiijtoua tlauel motekipachok kema kikixtijkej kampa tekitiyaya. Uan nochipa moiljuiyaya: “¿Kenijkatsa nikintlamakas nokoneuaj? Tlauel miak xiuitl chikauak nitekitik, ¿kenke nama moiljuiaj ayokmo kuali nitekiti?”.

• ¿Mitskajki moueue o mosiua? Raquel kiijtoua: “Panotok se xiuitl uan tlajko kema noueue sanima nechkajki. Nelia tlauel nimokuesok, nijmatiyaya kejuak nechyoltlapanki. Uan amo san nimoyolkokok, nojkia pejki nitlakayokuajkualo. Tlauel nimomajmatik”.

• ¿Tlauel timokokoua uan amo ueli timochikaua? Uelis nojkia tijyolmati kej Job, katli kiijtok: “Nelia nikijia noyolis pampa axtleno ipati” (Job 7:16). O uelis tijyolmati kej Luis, katli kipia 80 xiuitl. Ya kiijtok: “Kemantika san nijchixtok ma nimiki”.

• ¿Tijneki ma mitsyolchikauakaj pampa mijki se akajya katli tlauel tikikneliyaya? Robert kiijtoua: “Kema nechiljuijkej nokone mijki ipan se avión tlen motepexiuik, nimoiljuiyaya amo nelia. Teipa pejki tlauel nimoyolkokoua..., kej Biblia kiijtoua, nijmatki kejuak se espada nechyolkechilijkej” (Luc. 2:35).

Maske Julián, Raquel, Luis uan Robert tlauel tlaijiyouijkej, teipa ayokmo tlauel moyolkokojkej, pampa toTeotsij katli kipia miak chikaualistli kinyolchikajki. ¿Kenijkatsa teyolchikaua toTeotsij? ¿Nojkia mitsyolchikauas kema tijpias se kuesoli?