Jonatán amo majmajki uan amo tetlauelkajki

Iachtouikone tlanauatijketl Saúl motokaxtiyaya Jonatán, uan eliyaya se tlateuijketl katli amo majmauiyaya. David kiijtok Jonatán ‘achi más chikauak motlalouayaya que se kuajtli uan eliyaya más tetik que se león’. Se tonali, Jonatán kinitak se keskij filisteaeuanij itstoyaj tepeixko. Uajka kiiljuik itlateuijka katli kiuikiliyaya nopa tepostli tlen ika tlateuiyaya: “Tikinteuisej tlaj tikitasej Jehová kineki ma tikinteuikaj. Tlaj inijuantij techiljuisej ma titlejkokaj kampa itstokej, tijmatisej kinamiki tikinteuitij”. Nopa filisteaeuanij chikauak kiniljuijkej: “Xitlejkokaj, timoteuisej inmouaya”. Nopa omej tlakamej tlejkokej uan kinmiktijkej 20 filisteaeuanij.

Maske Jonatán kinamikiyaya tlanauatis pampa eliyaya iachtouikone Saúl, ya kimatiyaya Jehová kitlapejpenijtoya David ma tlanauati, yeka amo kikualankaitak. Jonatán uan David kuali mouampojchijkej, uan moiljuijkej nochipa momokuitlauisej uan mopaleuisej. Jonatán kinextik David nelia eliyaya iuampo, yeka kimakak iyoyo tlen mokentijtoya, ikuauitol, iespada uan itsinkechilpika.

David motlatijtinemiyaya pampa Saúl kitemojtinemiyaya. Se tonali Jonatán kiitato kampa itstoya uan kiiljuik: “Amo ximajmaui. Jehová mitstlapejpenijtok kej titlanauatijketl. Uan notata nojkia kimati”. ¿Tijnekiskia tijpias se kuali mouampo kej Jonatán?

Maske Jonatán kimatiyaya ueliskiaj kimiktisej tlaj kipaleuiskia David, ya miakpa kipaleuik. Uan kimatiyaya itata, tlanauatijketl Saúl, kinekiyaya kimiktis David, yeka kiiljuik: “Tlaj tijmiktis David, tlauel titlajtlakolchiuas pampa ya amo tleno kichijtok”. Saúl tlauel kualanki ika Jonatán. Teipa, kema panok se keski xiuitl, Saúl uan Jonatán mijkej kema tlateuiyayaj.

Teipa, kema ya miktoya Jonatán, David kitemok Mefi Boset katli eliyaya Jonatán ikone. Kema kipantik kiiljuik: “Nochipa nimitsmokuitlauis pampa motata eliyaya se kuali nouampo. Tiitstos ipan nochaj uan titlakuas kampa na nitlakua”. David amo kema kiilkajki iuampo Jonatán.