¿Tlake techpaleuis amo tlauel timokuesosej?

Maske miakej techiljuisej tlake uelis tijchiuasej, amo nochi techpaleuis. Sekij uelis techiljuisej ma timoyoltetilikaj uan amo ma tichokakaj, uan sekinok techiljuisej kena ma tichokakaj uan ma tijnextikaj nelia techyolkokoua. Tlen Biblia kiijtoua nelia tlauel techpaleuis, uan tikitasej tlen kiijtoua sanse ika tlen momachtijtokej se keskij maseualmej.

Ipan se keski altepemej amo kuali kiitaj kema se tlakatl choka. ¿Kinamiki tipinauasej tlaj sekinok techitaj kema tichokaj? Tepajtianij katli kinpaleuiaj tlen tlauel motekipachojtokej kiijtouaj amo kenijki tlaj tichokasej kema se akajya miki. Yeka, tlaj tichokasej techpaleuis teipa ayokmo tlauel timokuesosej. Uan tlaj timoijyouisej uan timoyoltetilisej, uelis kichiuas ma uejkaua timokuesojtokaj. Biblia amo kiijtoua amo kuali tlaj tichokasej o tlaj tlakamej chokasej. Xikilnamiki tlake kichijki Jesús. Kema iuampo Lázaro mijki, ya amo pinajki chokas maske kimatiyaya ueliskia kinyolkuis katli miktokej (Juan 11:33-35).

Kema se akajya miktiuetsi, tlauel timokuesouaj uan kemantika sekij kinextiaj mokuesouaj kema kualantikisaj. Kemantika ika tlen ueli tlamantli mokualankamakaj, uelis pampa se akajya kiniljuia se tlenijki tlen amo kinamiki uan kinyolkokoua. Mike, katli eua Sudáfrica, kiijtoua: “Kema nijpixtoya 14 xiuitl, notata mijki. Kema kitlalpachotoj, se pastor kiijtok toTeotsij kineki maseualmej tlen kuali ininyolo ma itstokaj nepa iluikak uan yeka kinuika.a Tlen kiijtok tlauel nechkualankamakak, pampa tojuantij tlauel tikikneliyayaj notata uan tijnekiyayaj ma itsto touaya. Maske ya panotok 63 xiuitl, nojua nechyolkokoua tlen kiijtok”.

¿Tlake uelis tijchiuasej tlaj timotlajtlakoltiaj? Kema se tlen tochampoyouaj o se kuali touampo miktiuetsi, uelis timoiljuisej: “Tlaj na nijchijtoskia ni..., amo miktoskia”. Uan uelis tlauel timoyolkokouaj pampa timokualanijkej iuaya kema ayamo mikiyaya.

Tlaj tlauel timotlajtlakoltia uan amo kuali tijyolmati, amo xikijyouijto, xikiljui se mouampo tlen tijyolmati uan ma mitspaleui tijkuamachilis nochi kiampa kinpano kema miki se akajya katli tlauel kiikneliaj. Biblia kiijtoua: “Se tlen tokualuampo temachtli techiknelia nochipa. Kema onka tlaouijkayotl techpaleuia keja eliskia se toikni” (Prov. 17:17).

Kema techpano nopa, toTeotsij Jehová nelia eli se kuali touampo. Yeka xikiljui nochi tlen tijyolmati “pampa yajaya [mits]mokuitlauia” uan kitekipachoua tlen mitspano (1 Ped. 5:7). Tlaj tijchiuas ni, kuali tijyolmatis pampa “toTeko [mits]makas tlaseuilistli” uan ‘nopa tlaseuilistli kiyaualtsakuas moyolo uan motlalnamikilis’ (Filip. 4:6, 7). Nojkia xijkaua toTeotsij ma mitsyolchikaua ika iTlajtol. Yeka, xijtlapejpeni textos tlen tlauel mitsyolchikaua uan xijtsontekontlali se keski (xikita nopa recuadro). Tlaj timoyoliljuis ipan tlen kiijtoua, tlauel mitspaleuis kema tiitstos moselti uan kema amo uelis tikochis (Is. 57:15).

Namanok, se tlakatl katli kipia 40 xiuitl mijki isiua pampa kipixtoya cáncer. Maske kemantika kimati tlauel iselti itstok, kema momaijtoua tlauel kipaleuia. Ya kiijtoua: “Kema nikamanalti iuaya Jehová, nijmati ayokmo noselti niitstok. Kemantika tlajkoyoual niisa uan ayokmo ueli nikochi. Kema nijpoua Biblia uan nimoyoliljuia ipan tlen nijpojki uan teipa nimomaijtoua, tlauel kuali nijyolmati. Kiampa nijpia tlaseuilistli uan ueli nikochi”.

Se ichpokatl tlen itoka Vanessa, katli mijki inana pampa tlauel mokokouayaya, kiijtoua nojkia tlauel kipaleuijtok momaijtos. Ya kiijtoua: “Kema tlauel amo kuali nijyolmatiyaya, tlauel nichokayaya uan miakpa nikijtouayaya toTeotsij itoka. Jehová nechtlakakilik uan nochipa nechpaleuik”.

Tepajtianij kiniljuiaj katli tlauel moyolkokouaj ma kinpaleuikaj sekinok. Kiniljuiaj uelis tlapaleuisej kampa itstokej. Kema kiampa kichiuaj, kuali kiyolmatij uan ayokmo tlauel moyolkokouaj (Hech. 20:35). Miakej Cristo itokilijkauaj katli nojkia mokuesojtoyaj pampa mijki se akajya kiijtouaj tlauel kuali kiyolmatij kema tepaleuiaj (2 Cor. 1:3, 4).