¿Kenke tiueuejtiaj uan timikij?

ToTeotsij kiiljuik Adán: “Ipan nopa tonal kema tijkuas itlajka, melauak timikis” (Génesis 2:17). Tlaj toTeotsij ipa kimajtoya Adán ueuejtiaskia uan mikiskia, nopa tlanauatili eliskia san tlapik. Adán kimatiyaya tlaj amo kikuaskia nopa kuauitl itlajka, amo mikiskia.

Ipan nopa xochimili amo san eltoya nopa kuauitl itlajka pampa onkayaya sekinok kuatinij tlen Adán uan Eva ueliskiaj kikuasej (Génesis 2:9). Tlaj amo kikuajtoskiaj nopa kuauitl itlajka kineltokatoskiaj toTeotsij, katli kinmakatoya ininnemilis, uan kinextijtoskiaj san toTeotsij kinamikiyaya kiniljuis tlake kichiuasej.

¿KENKE MIJKEJ ADÁN UAN EVA?

Tlaj tijnekij tijkuamachilisej kenke mijkej Adán uan Eva, moneki tikitasej tlen Satanás kiijtok pampa nopa kichijtok ma titlaijiyouikaj ipan ni tonali. Ika se kouatl kiijtok se istlakatili. Biblia kiijtoua: “Nopa kouatl eliyaya tlen más tlalnamiki uan más kimatiyaya kejatsa tlakajkayauas kej nochi sekinok tlapialmej tlen toTeko Dios kinchijtoya. Uan se tonal nopa kouatl kitlajtlanik nopa siuatl: ‘¿Axinmechiljuijtok Dios para amo xijkuakaj itlajka niyon se kuauitl ipan ni xochimili?’” (Génesis 3:1).

Eva kinankilik: “Uelis tijkuasej itlajka tlen ueli kuauitl, pero iyojtsi ne tlen eltok tlatlajko xochimili Dios techiljuijtok axkuali tijkuasej, niyon tikitskisej itlajka ne kuauitl pampa intla tijchiuasej, timikisej”. Uajka nopa kouatl kiiljuik: “Axneli, axinmikisej. Kuali kimati Dios intla inkikuasej itlajka nopa kuauitl elis keja inmechtlapouilis inmoixtiyol uan inmotlalnamikilis uan inkimatisej tlen kuali uan tlen axkuali”. Ika ni tlajtoli, Satanás kiijtok Jehová eli se istlakatiketl tlen amo kineki kinmakas maseualmej kuajkuali tlamantli (Génesis 3:2-5).

Eva kineltokak tlen Satanás kiiljuik. Pejki kitlachilia nopa kuauitl itlajka, kiixtokak, kitejki uan kikuajki. Biblia kiijtoua: “Teipa kimakak iueue uan ya nojkia kikuajki” (Génesis 3:6).

¡ToTeotsij tlauel moyolkokok kema ikoneuaj katli tlauel kinikneliyaya amo kineltokakej! ¿Tlake kichijki? Jehová kiiljuik Adán: “Uan timitonis miak para tijpantis tlakualistli tlen ika timopanoltis hasta kema timikis uan timokuepas tlali sampa. Na nijchijki motlakayo ika tlali, uan kema timikis, sampa timokuepas tlali” (Génesis 3:17-19). Uan kiampa panok pampa Adán mijki “kema kipixki 930 xiuitl” (Génesis 5:5). Kema Adán mijki amo yajki iluikak yon sejkanok. Kema Jehová ayamo kichijchiuayaya Adán ika tlaltejpoktli, amo kana itstoya, uan kema mijki sampa mokuepki tlaltejpoktli, nopa kiijtosneki, amo kana yajki. ¡Tlauel amo kuali tlen kinpanok!

¿KENKE TIELIJ TITLAJTLAKOLEJKEJ?

Adán uan Eva kiixpanokej toTeotsij, yeka ayokmo elkej xitlauakej uan ayokmo ueliskiaj itstosej nochipa. Ipan nopa tonali mopatlak kej eltoya inintlakayo pampa elkej tlajtlakolejkej. Uan amo san inijuantij kinpanok tlen amo kuali pampa kinpanoltilijkej ininkoneuaj tlajtlakoli. Romanos 5:12 kiijtoua: “Kema pejki Tlaltipaktli, Adán tlajtlakolchijki uan tlajtlakoli pejki ipan Tlaltipaktli pampa san se tlakatl tlajtlakolchijki. Uan pampa pejki tlajtlakoli, nojkia pejki miki[li]stli. Uajka ama miki[li]stli techasi nochi titlakamej, pampa nochi titlajtlakolchijtokej”.

Biblia kiijtoua mikilistli eli kejuak se yoyomitl tlen kinuijkontok nochi maseualmej (Isaías 25:7, TNM). Ni yoyomitl tlen kinuijkontok nochi maseualmej eli kej nopa ajakatl tlen sokiyo tlen nochi kiijiyotilanaj uan amo aka ueli mochololtia. Uajka pampa “Adán tlajtlakolchijki uejkajkia, nochi tlakamej moneki ma timikikaj” (1 Corintios 15:22). Nama uelis nojkia timotlajtlaniaj tlen apóstol Pablo kiijtok: “¿Ajkeya nechmakixtis tlen ni yolistli tlen tlajtlakoli tlen nechualikilia miki[li]stli?”. ¿Ueliskia se akajya techmakixtis? (Romanos 7:24).