¿Tlake kuajkuali tlamantli tijnextiaj kema tiauij tlanechikoli?

1, 2. 1) ¿Tlake kiita Jehová kema miakej maseualmej mosentiliaj ipan toTeko iTlakualis? (Xikita tlaixkopinkayotl ipan ipantsajka). 2) ¿Tlake tikitasej ipan ni tlamachtili?

XIMOILJUI kenijkatsa kiyolmati Jehová kema kiita tlauel miakej maseualmej tlen nochi Tlaltipaktli mosentiliaj kema mochiua toTeko iTlakualis. Ya amo san kinita montonijtokej maseualmej, ya kitlachilia iyolo sejse maseuali katli nopaya itstokej. Uan ya kiita ajkia inijuantij sejse xiuitl mosentiliaj. Sekij kichiuaj kampeka mosentilisej maske tlauel kintlatsakuiltiaj. Uan sekinok maske amo sejse chikueyi mosentiliaj ipan tlanechikoli, moiljuiaj kinamiki itstosej kema moilnamikis Cristo imikilis. Uan Jehová nojkia kinita katli mosentiliaj maske amo kema yajtoyaj ipan se tlanechikoli, uelis pampa kinekij kiitasej tlake mochiua.

² Tijmatij Jehová nelia tlauel yolpaki kema kiita miakej maseualmej mosentiliaj kema moilnamiki Cristo imikilis (Luc. 22:19). Maske yolpaki, ya amo kineki kimatis keskij mosentiliaj, ya kineki kimatis kenke mosentiliaj. Ipan ni tlamachtili, tijnankilisej se tlajtlanili tlen tlauel ipati: ¿Kenke nojkia timosentiliaj sejse chikueyi ipan tlanechikoli kampa Jehová kinmachtia katli kiniknelia uan amo san kema moilnamiki Cristo imikilis? Ma tikitakaj tlake kuajkuali tlamantli techyololinia ma tiakaj tlanechikoli.

TIAUIJ TLANECHIKOLI PAMPA AMO TIMOUEYIMATIJ

3, 4. 1) ¿Kenke timosentiliaj ipan tlanechikoli? 2) ¿Tlake kuali tlamantli tijnextiaj kema tiauij tlanechikoli? 3) Kej kiijtoua 1 Corintios 11:23-26, ¿kenke kinamiki timosentilisej kema moilnamikis Cristo imikilis?

³ Timosentiliaj ipan tlanechikoli pampa nopaya nojkia tijueyichiuaj Jehová. Uan nojkia pampa ipan tlanechikoli Jehová techmachtia. Maseualmej katli moueyimatij moiljuiaj amo aka kinamiki kinmachtis se tlenijki (3 Juan 9). Tojuantij amo kiampa timoiljuiaj pampa tijnekij Jehová uan itlanechikol ma techmachtikaj (Is. 30:20; Juan 6:45).

⁴ Uajka, kema tiauij tlanechikoli, tijnextiaj amo timoueyimatij uan tijnekij toTeotsij ma techmachti. Uan tiauij kema moilnamiki Cristo imikilis amo san pampa timoiljuiaj kinamiki tiasej, tiauij pampa amo timoueyimatij uan pampa tijnekij tijneltokasej tlen Jesús tlanauatik: “Xijchijtiakaj ya ni para innechilnamikisej” (xijpoua 1 Corintios 11:23-26). Nopa tlanechikoli techpaleuia ma timotemachikaj ipan tlen tijchiaj uan nojkia techilnamikilia Jehová tlauel techiknelia. Maske techyolchikaua, Jehová kimati nopa amo techpaleuijtos nochi se xiuitl. Yeka, techmaka tlanechikoli tlen mochiua sejse chikueyi, uan technauatia ma timosentilikaj. Kema amo timoueyimatij, tijneltokaj tlen ya technauatia. Tiiyokatlaliaj miak tonali kema timomachtiaj tlen moixtomas ipan tlanechikoli uan kema timosentiliaj.

5. ¿Kenke maseualmej katli amo moueyimatij peuaj monechikouaj?

⁵ Jehová kineki maseualmej ma kiixmatikaj, uan sejse xiuitl miakej kinextiaj amo moueyimatij pampa kinekij momachtisej tlen ya (Is. 50:4). Uelis achtoui yauij kema moilnamiki Cristo imikilis, uan teipa peuaj monechikouaj ipan tlanechikoli (Zac. 8:20-23). Tojuantij uan katli namanok pejtokej mosentiliaj tlauel techpaktia Jehová ma techyakana uan ma techmachti. Ya nojkia techpaleuia uan techmakixtia (Sal. 40:17). Nelia tlauel kuali uan tlauel ipati tiasej tlanechikoli, kampa Jehová techmachtia. Uan nojkia Jesús, katli toTeotsij tlauel kiiknelia (Mat. 17:5; 18:20; 28:20).

6. ¿Kenijkatsa pampa amo moueyimatki se tlakatl kipaleuik ma mosentili kema moilnamijki Cristo imikilis?

⁶ Sejse xiuitl tijchiuaj kampeka tikintlaneuisej nochi maseualmej nojkia ma monechikokaj touaya kema moilnamiki Cristo imikilis. Katli amo moueyimatij tlauel kinpaleuia kema yauij ipan nopa tlanechikoli. Ma tikitakaj se neskayotl. Uejkajkia, se toikni kimakak se tlakatl nopa pilamatsi tlen ika titetlaneuij, uan ya kiijtok amo ueliskia yas. Ipan nopa tonali kema moilnamikiskia Cristo imikilis, toikni kiitak nopa tlakatl kalakito ipan Kali kampa mosentiliaj Jehová itlajtoltemakauaj. Nopa tlakatl tlauel kipaktik pampa kuali kiselijkej uan pejki mosentilia ipan tlanechikoli. Ipan se xiuitl san expa amo yajki tlanechikoli. ¿Kenke moyolpatlak uan kipaktik yas tlanechikoli? Toikni katli kitlanejki teipa kiijtok: “Ya eli se maseuali katli amo moueyimati”. Jehová kiyoltilanki nopa tlakatl pampa kinekiyaya ma itsto ipan itlanechikol. Ipan ni tonali, nopa tlakatl eli se toikni katli moatsonpoliuiltijtok (2 Sam. 22:28; Juan 6:44).

7. ¿Kenijkatsa tlen tijyekouaj ipan tlanechikoli uan tlen tijpouaj ipan Biblia techpaleuia amo ma timoueyimatikaj?

⁷ Tlen tijyekouaj ipan tlanechikoli uan tlen tijpouaj ipan Biblia techpaleuia amo ma timoueyimatikaj. Kema nechka moilnamikis Cristo imikilis, ipan se keski semanas timomachtiaj tlen Jesús kichijki uan nojkia kenijkatsa kinextik amo moueyimatki kema temaktilik inemilis. Uan kema poliui se keski tonali, techyololiniaj ma tijpouakaj ipan Biblia nochi tlen panotiajki kema kimiktiskiaj uan kema moyolkuik. Nopa techpaleuia nojua tlauel ma tijpatiitakaj tlen kichijki. Uan nojkia techyololinia ma tijnekikaj tijchiuasej kej ya uan tijchiuasej tlen toTeotsij kineki, maske kemantika tijmatisej ouij kiampa tijchiuasej (Luc. 22:41, 42).

TIAUIJ IPAN TLANECHIKOLI PAMPA AMO TIMAJMAUIJ

8. ¿Kenijkatsa kinextik Jesús amo majmauiyaya?

⁸ Nojkia tijnekij tijnextisej seyok kuali tlamantli tlen Jesús kinextik: amo timajmauisej. Ma timoiljuikaj kenijkatsa Jesús kinextik nopa kema nechka kimiktiskiaj. Kimajtoya ikualankaitakauaj kipinajtiskiaj, kiuijuitekiskiaj uan kimiktiskiaj (Mat. 20:17-19). Maske kimajtoya nopa, amo majmajki ma kimiktikaj. Kema asik tonali kiampa kipanoskia, kiniljuik itokilijkauaj katli itstoyaj iuaya ipan Getsemaní: “Ximoketsakaj uan ma tiakajya. Xikitakaj, ya uala yajaya tlen nechtemaktilia” (Mat. 26:36, 46). Uan kema maseualmej katli kiitskiskiaj monechkauitoj, ya kiniljuik ajkia eliyaya uan kiniljuik tlateuianij ma kinkauakaj iapóstoles ma yakaj (Juan 18:3-8). ¡Kinextik nelia amo majmauiyaya yon se kentsi! Ipan ni tonali, katli motemachiaj yasej iluikak uan tojuantij, katli timotemachiaj tiitstosej nochipa ipan Tlaltipaktli, tijchiuaj kampeka amo timajmauisej kej Jesús. ¿Kenijkatsa tijnextiaj amo timajmauij?

9. 1) ¿Kenke uelis moneki tijnextisej amo timajmauij uan kiampa tiasej tlanechikoli? 2) ¿Kenijkatsa kinpaleuia toikniuaj katli kintsaktokej tlen tojuantij tijchiuaj?

⁹ Kemantika uelis onka se keski tlamantli tlen kichiua amo ma tiakaj tlanechikoli. Tlaj kiampa techpano, moneki amo timajmauisej. Sekij toikniuaj mokokouaj, tlauel moyolkuesouaj o motekipachouaj. Uan sekinok tlauel kintlatsakuiltiaj ininchampoyouaj uan tekichiuanij. Ma timoiljuikaj se kentsi ipan toikniuaj katli kintsaktokej pampa kitekipanouaj Jehová. ¿Ipa timoiljuijtokej tlaj uelis kinpaleuis tlen tojuantij tijchiuaj? (Heb. 13:3). Kema kimatij tojuantij nojua tijtekipanouaj Jehová maske tikixnamikij miak tlaouijkayotl, kinpaleuia nojua ma kichiuakaj kampeka amo kikauasej inintlaneltokilis, amo majmauisej uan amo tlaixpanosej. Kiampa kipanok apóstol Pablo. Kema kitsaktoyaj ipan Roma, ya yolpakiyaya kema kimatiyaya iikniuaj nojua kuali kitekipanojtoyaj toTeotsij (Filip. 1:3-5, 12-14). Kema nechka kikixtiskiaj o uelis kema kikixtijkej, kiijkuilok nopa amatlajkuiloli Hebreos. Nopaya kiniljuik nochipa ma monechikokaj ipan tlanechikoli, uan kiniljuik: “Axkema xijkauakaj ximoiknelikaj keja iniknimej” (Heb. 10:24, 25; 13:1).

10, 11. 1) ¿Ajkia moneki tikintlaneuisej kema moilnamikis Cristo imikilis? 2) Kej kiijtoua Efesios 1:7, ¿kenke kinamiki tijchiuasej?

¹⁰ Nojkia tijnextiaj amo timajmauij kema tikintlaneuij touikaljuaj, katli ininuaya titekitij uan tokalnechkauaj nojkia ma yakaj kema moilnamikis Cristo imikilis. ¿Kenke tikintlaneuij? Pampa tlauel tijtlaskamatij tlen Jehová uan Jesús kichijkej. Uan nojkia pampa tijnekij maseualmej ma kiitakaj kenijkatsa Jehová kinextik “tlauel ueyi iyolo” ininuaya kema temaktilik iKone (xijpoua Efesios 1:7; Apoc. [Rev.] 22:17).

¹¹ Kema tiauij tlanechikoli nojkia tijnextiaj seyok kuali tlamantli, se tlamantli tlen Jehová uan Jesús tlauel kinextijtokej.

TIAUIJ TLANECHIKOLI PAMPA TITEIKNELIAJ

12. 1) ¿Kenke tlanechikoli kichiua nojua tlauel ma tikiniknelikaj Jehová uan Jesús? 2) Kej kiijtoua 2 Corintios 5:14, 15, ¿kenijkatsa uelis tijchiuasej kej Jesús?

¹² Nopa tlaiknelijkayotl tlen tikinpialiaj Jehová uan Jesús techyololinia ma tiakaj tlanechikoli, uan tlen nopaya moixtoma kichiua nojua ma momiakili nopa tlaiknelijkayotl. Kiampa pano pampa ipan tlanechikoli nochipa techilnamikiliaj tlen inijuantij kichijtokej (Rom. 5:8). Uan kema moilnamiki Cristo imikilis techilnamikilia kenijkatsa tlauel kinikneliaj maseualmej, maske sekij amo kipatiitaj tlen inijuantij kichijtokej. Tojuantij tlauel tijpatiitaj uan yeka tijchiuaj kampeka mojmostla timonejnemiltisej kej Jesús (xijpoua 2 Corintios 5:14, 15). Uan nojkia tijnekij tijueyichiuasej Jehová pampa temaktilik iKone. Uan uelis tijchiuasej nopa kema ika nochi toyolo titlanankilisej ipan tlanechikoli.

13. Xikixtoma kenijkatsa uelis tijnextisej tlauel tikinikneliaj Jehová uan Jesús.

¹³ Kema tijnekij tijkauasej se keski tlamantli, tijnextiaj tikinikneliaj toTeotsij uan Jesús. Tlaj tijnekij tiasej tlanechikoli, moneki tijchiuasej se keski tlamantli. Kanajya kichiuaj tlanechikoli ipan semana kema ya tlayoua pampa nochi ya tlamij tekitij, uan uelis toikniuaj tlauel siajtokej. Uan nopa sekinok tlanechikoli kichiuaj sábado o domingo, kema maseualmej mosiajketsaj. ¿Techita Jehová kema timosentiliaj maske tisiajtokej? Kena techita. Uan tlaj kiitas nojua tlauel tijchiuaj kampeka, ya nojua tlauel kipatiitas tlen tijchiuaj pampa tikikneliaj (Mar. 12:41-44).

14. ¿Tlake techmachtia tlen Jesús kichijki?

¹⁴ Jesús kuali kinextik tlake kiijtosneki timotemaktilisej pampa tikinikneliaj sekinok. Kinextik nopa, amo san pampa kinejki temakas inemilis, nojkia pampa nochipa moiljuik kenijkatsa kinpaleuiskia itokilijkauaj uan amo san moiljuiyaya ipan tlen ya kipanoyaya. Se neskayotl, maske tlauel siajtoya uan mokuesoyaya monechiko ininuaya itokilijkauaj (Luc. 22:39-46). Uan mosentlalik ipan tlen ueliskia kinmakas sekinok uan amo ipan tlen ueliskia kiselis (Mat. 20:28). Tlaj tlauel tikinikneliaj Jehová uan toikniuaj, tijchiuasej kampeka tiasej kema moilnamikis toTeko iTlakualis uan nojkia nochipa tiasej tlanechikoli.

15. ¿Ajkia inijuantij tlauel tijnekij tikinpaleuisej?

¹⁵ Tlauel tiyolpakij pampa tijmatij tlen melauak uan tijnekij sekinok nojkia ma kimatikaj, yeka nochipa tikintlaneuij ma mosentilikaj touaya. Uan nojua tlauel tijnekij tikinpaleuisej “toikniuaj ipan Cristo” katli ayokmo kitekipanouaj Jehová (Gál. 6:10). Tijnextiaj tikinikneliaj kema tikintlaneuij ma yakaj tlanechikoli uan nojkia kema moilnamiki Cristo imikilis. Jehová uan Jesús tlauel yolpakij kema toikniuaj sampa tlakuepiliaj ipan tlanechikoli, uan tojuantij nojkia tlauel tiyolpakij (Mat. 18:14).

16. 1) ¿Ipan tlake tlamantli moneki timoyolchikauasej, uan kenijkatsa techpaleuia kema tiauij tlanechikoli? 2) ¿Kenke kema tikilnamikij Cristo imikilis tlauel moneki ma tikilnamikikaj tlen Jesús kiijtok ipan Juan 3:16?

¹⁶ Nechka peuas tikintlaneuisej maseualmej ma mosentilikaj touaya ipan viernes 19, abril 2019, kema moilnamikis Cristo imikilis, yeka moneki tijchiuasej kampeka miakej tikintlaneuisej (xikita recuadro “¿Tikintlaneuisej sekinok maseualmej?”). Nochipa ma timoyolchikauakaj ininuaya toikniuaj uan ma tiakaj ipan tlanechikoli. Tiitstokej ipan itlamia tonali, yeka tlauel moneki ma tiakaj tlanechikoli pampa nopaya tijyekouaj kenijkatsa uelis amo timoueyimatisej, amo timajmauisej uan titeiknelisej (1 Tes. 5:8-11). Ma tikinnextilikaj Jehová uan Jesús tlauel tikintlaskamatiliaj pampa kinextiaj tlauel techikneliaj (xijpoua Juan 3:16).