Ma titlajtolmoyauakaj ika jw.org: “Ximouampojchiua iuaya Jehová”

Ipan jw.org, kampa “Amatlajkuiloli” onka videos tlen kinpaleuia konemej, itoka “Ximouampojchiua iuaya Jehová”. (Ipan español nojkia onka uikatl uan se keski tlamantli tlen uelis kichiuasej konemej.) ¿Tijtekiuijtok ni kema titlajtolmoyaua? Tlaj tijmachtia se akajya uan kinpia ikoneuaj, kualtiaskia tijnextilis. Ni uelis kichiuas ma kitemo sekinok tlamantli kampa titlamachtiaj ipan Internet.

Kema se toikni kimakak se siuatl katli kinpixtoya omej ikoneuaj nopa pilamatsi ¿Uelis moyolkuisej katli miktokej?, ya nimantsi kipojki uan ikoneuaj nojkia kinejkej kimatisej tlake eliyaya nopa pilamatsi. Yeka nopa toikni kinixtomilik tlake kiijtouayaya uan kinnextilik kampa titlamachtiaj ipan Internet. Nopa siuatl tlauel kipaktik, yeka nopa toikni kinnextilik ipan iteléfono se video kampa nesi Caleb.

Kampa tekiti, se tosiuaikni kiiljuik se siuatl katli kinpia ikoneuaj tlen onka ipan jw.org. Kiiljuik nopaya kiitaskia miak tlamachtili tlen kipaleuiskia. Nopa siuatl kiitak ininuaya ikoneuaj tlen onkayaya ipan jw.org. Teipa nopa siuatl kiiljuik tosiuaikni ikoneuaj uikayayaj nopa uikatl “Predica la palabra”, ipan tlajtoli español, tlen nesi kampa kiijtoua “Hazte amigo de Jehová”.

Tlauel kuali tlaj nochipa tikitasej nopa yajyankuik tlamantli tlen kitlalijtiauij ipan jw.org, uan tijkixtisej videos, uikatl o sekinok tlamantli. Kiampa kuali tijtekiuisej ni tlamantli uan nojkia tijtekipanojtosej Jesucristo ika nochi toyolo (Hech. 20:19).