Tlauel miakej kinueyichiuaj Jehová uan Cristo

1. ¿Tlake panok kema nopa telpokatl kikajki tlen moixtonki ipan 1935?

IPAN 1926 moatsonpoliuiltik se telpokatl katli kipixtoya 18 xiuitl. Itatauaj eliyayaj Estudiantes de la Biblia, kiampa kinixmatiyayaj Jehová itlajtoltemakauaj. Kinpixtoyaj eyij okichpilmej uan omej siuapilmej, uan kinmachtijkej ma kitekipanokaj Jehová uan ma monejnemiltikaj kej Cristo. Sejse xiuitl kema moilnamikiyaya Cristo imikilis, nopa telpokatl kikuayaya pantsi uan kiijiyaya vino kej kichiuayayaj nochi Estudiantes de la Biblia ipan nopa tonali. Uan ipan 1935 ayokmo kiampa kichijki pampa kikajki se tlamachtili tlen kipanoltik toikni Joseph Rutherford ipan se ueyi tlanechikolistli ipan Washington (Estados Unidos), tlen motokaxtik “Tlauel miakej maseualmej”. ¿Tlake yankuik tlamantli kinmatiltijkej ipan nopa ueyi tlanechikolistli?

2. ¿Tlake yankuik tlamantli kiixtonki toikni Rutherford?

² Ipan nopa tonali toikni Rutherford kiijtok ajkia eliyayaj nopa “onpano miak[ej] tlakamej” tlen kiijtoua Apocalipsis 7:9. Kema ayamo kiixtomayaya nopa tlamachtili, moiljuiyayaj eliyayaj se keskij katli yaskiaj iluikak, katli amo tlauel ininpati eliyaya pampa amo eliyayaj tlen nopa tlapejpenilmej. Toikni Rutherford kiixtonki ika Biblia nopa tlauel miakej maseualmej amo kintlapejpenijtoyaj yasej iluikak, inijuantij elij nopa “sekinok tlakamej”b katli momanauisej ipan nopa “ueyi tlaijiyouilistli” uan itstosej ipan Tlaltipaktli (Apoc. 7:14). Jesús kiijtok: “Itstokej sekinok tlakamej tlen nojkia noaxkauaj tlen axakij nikaj. Nojkia moneki nikinnotsati ma nechtokilikaj uan nechtoskakisej. Uan uajka nochi noaxkauaj itstosej sansejko uan nochi san na nikinmokuitlauijtos” (Juan 10:16). Ni elij katli amo kitlauelkajtokej Jehová uan kichiaj itstosej nochipa ipan Tlaltipaktli kema mochiuas se xochimili (Mat. 25:31-33, 46). Ma tikitakaj kenijkatsa tlen moixtonki kichijki toikni katli kipixtoya 18 xiuitl uan sekinok toikniuaj ayokmo ma moiljuikaj kej achtouia (Sal. 97:11; Prov. 4:18).

KINMATILTIJKEJ SE YANKUIK TLAMACHTILI

3, 4. ¿Tlake kikuamachilijkej ipan nopa ueyi tlanechikolistli tlen mochijki ipan 1935, uan kenke?

³ Ipan 1935, tlauel yolpajkej kema toikni Rutherford kintlatsintoki katli nopaya itstoyaj: “¿Ueliskiaj moketsasej nochi katli motemachiaj itstosej nochipa ipan Tlaltipaktli?”. Uelis se katli nopaya itstoya kiijtok kipano tlajko 20,000 moketskej. Uajka toikni Rutherford kiijtok: “¡Inijuantij elij nopa tlauel miakej maseualmej!”. Uajka, pejkej momatlatsiniaj uan tlauel yolpakiyayaj. Katli moketskej kikuamachilijkej amo kintlapejpenijtoyaj yasej iluikak yon amo kintlapejpenijtoyaj ika toTeotsij itonal. Ika ualmostla ipan nopa ueyi tlanechikolistli moatsonpoliuiltijkej se 840 toikniuaj. Miakej eliyayaj tlen nopa “sekinok tlakamej”.

⁴ Ipan nopa tonali tlauel miakej toikniuaj uan nojkia nopa telpokatl katli tikijtojkej achtoui, ayokmo kikuajkej pantsi yon kiijikej vino kema moilnamijki Cristo imikilis. Miakej kiyolmatiyayaj kej se toikni katli amo moueyimatiyaya, kiijtok: “Kema nijkajki nopa tlamachtili, ayokmo nijkuajki pantsi yon nikijik vino kema moilnamiki Cristo imikilis pampa nikitak Jehová amo kichijtoya ma nijneki niitstos iluikak. Ya kichijtoya ma nijneki niitstos uan ma nitlapaleui kema mochiuas xochimili” (Rom. 8:16, 17; 2 Cor. 1:21, 22). Ipan nopa tonali pejkej momiakiliaj nopa tlauel miakej maseualmej uan mosentikapaleuiaj ininuaya katli yasej iluikak, katli nojua itstokej ipan Tlaltipaktli.

5. ¿Kenijkatsa kinita Jehová katli ayokmo kikuaj pantsi yon kiijij vino?

⁵ Ma timotlatsintokikaj: ¿Kenijkatsa kinita Jehová katli ayokmo kikuajkej pantsi yon kiikej vino kema panotoya xiuitl 1935? Uan, ¿tlake pano kema se toikni kikua pantsi uan kiiji vino pampa moiljuiyaya kitlapejpenijtokej uan teipa kiita amo kitlapejpenijtoyaj? (1 Cor. 11:28). Miakej kiampa kichiuayayaj pampa moiljuiyayaj yasej iluikak. Kema se toikni kiita amo kinamikiyaya kiampa kichiuas, uan ayokmo kikua pantsi yon kiiji vino kema moilnamiki Cristo imikilis uan nojua kuali tlatekipanoua, Jehová kiselia kej se tlen nopa “sekinok tlakamej”. Maske toikni ayokmo kiampa kichiua, ya nojua monechikoua ipan nopa tonali pampa kitlaskamati Jehová uan Jesús ika tlen kichijkej ipampa.

KISELISEJ MIAK TLATEOCHIUALISTLI

6. ¿Tlake kiniljuia Jesús ma kichiuakaj iluikaeuanij?

⁶ Monechkauia ueyi tlaijiyouilistli, yeka tlauel techpaleuis tlaj timomachtiaj Apocalipsis capítulo 7, kampa kamanalti katli kintlapejpenijtokej yasej iluikak uan tlen nopa tlauel miakej maseualmej tlen “sekinok tlakamej”. Nopaya kiijtoua Jesús kiniljuia iluikaeuanij nojua ma kitsakuilikaj nopa “naui tlamantli ajakatl”. Nojkia kiniljuia ayamo ma kikauakaj ma “tlailpitsa ipan Tlaltipaktli” pampa katli kintlapejpenijtokej yasej iluikak moneki kipixtosej nopa “sello” o moneki nesis tlaj Jehová nelia kinselijtok (Apoc. 7:1-4). Pampa amo kitlauelkajkej Jehová, tlanauatisej iuaya Cristo uan elisej sacerdotes ipan iluikak (Apoc. 20:6). Jehová, Jesús uan iluikaeuanij tlauel yolpakisej kema nopa 144,000 katli kintlapejpenijtokej itstosej iluikak.

7. Kej kiijtoua Apocalipsis 7:9, 10, ¿ajkia kinitak Juan, uan tlake kichiuayayaj? (Xikita tlaixkopinkayotl ipan ipantsajka).

⁷ Kema Juan ya kiijtojtoya tlen nopa 144,000 katli elisej tlanauatianij uan sacerdotes, nojkia kinitak “onpano miak[ej] tlakamej tlen axaka ueli kinpoua” katli momanauijkej tlen Armagedón. Ni ome pamitl amo eli sanse pampa amo tijmatij keskij nelia elisej nopa tlauel miakej maseualmej (xijpoua Apocalipsis 7:9, 10). Inijuantij mokentijtokej “ininyoyo tlen chipauak”, ni kinextia “momokuitlauiaj ipan ni Tlaltipaktli para tlen fiero axkinyoltilanas ma tlajtlakolchiuakaj” uan amo kema kitlauelkajtokej Jehová uan Jesús (Sant. 1:27). Chikauak kuatsajtsij uan kintlaskamatiliaj Jehová uan Jesús pampa kinmakixtijkej. Nojkia, ininmako kiuikaj imakuayo apachkuauitl, kiampa kinextiaj kiseliaj Jesús kej inintlanauatijka katli Jehová kitekimakatok (nojkia xikita Juan 12:12, 13).

8. ¿Tlake kiijtoua Apocalipsis 7:11, 12 tlen Jehová uan nochi katli itstokej iluikak?

⁸ Xijpoua Apocalipsis 7:11, 12. ¿Tlake panok ipan iluikak kema kinitakej nopa tlauel miakej maseualmej? Juan kinita tlauel yolpaktokej uan kiueyichiuaj Jehová kema nesij ajkia inijuantij elij nopa tlauel miakej maseualmej. Jehová uan nochi katli itstokej iluikak tlauel yolpakisej kema kiitasej kenijkatsa moaxitia tlen Juan kiitak, kema nopa tlauel miakej maseualmej momanauiaj ipan ueyi tlaijiyouilistli.

9. Kej kiijtoua Apocalipsis 7:13-15, ¿tlake kichijtokej nopa tlauel miakej maseualmej?

⁹ Xijpoua Apocalipsis 7:13-15. Juan kiijtoua nopa tlauel miakej maseualmej “kichikuenijtokej ininyoyo ika ieso nopa Pilborregojtsi, uan yeka kichijtokej chipauak ininyoyo”. Ni kiijtosneki kipiaj tlapajpaktik inintlalnamikilis uan Jehová kuali kinita (Is. 1:18). Elij Cristo itokilijkauaj katli motemaktilijtokej uan moatsonpoliuiltijtokej pampa kineltokaj Cristo imikilis uan mouampojchijtokej iuaya Jehová (Juan 3:36; 1 Ped. 3:21). Pampa kiampa kichijtokej, nama “kitekipanouaj [Jehová] youali uan tonali” ipan Tlaltipaktli. Yeka, tlajtolmoyauaj uan kinpaleuiaj sekinok ma elikaj Cristo itokilijkauaj uan kiachtouitlaliaj toTeotsij iTlanauatijkayo ipan ininnemilis (Mat. 6:33; 24:14; 28:19, 20).

10. ¿Tlake motemachiaj nopa tlauel miakej maseualmej, uan tlake tlateochiualistli moaxitis?

¹⁰ Inijuantij motemachiaj Jehová kinmokuitlauis kema ya panotos nopa ueyi tlaijiyouilistli pampa ya “itstos ininuaya keja ininTeko”. Nojkia, moaxitis tlen nopa “sekinok tlakamej” kichiaj: “ToTeko kinuachilis nochi ininixayo. Uan ayok kema aki mikis, niyon mokuesos, niyon chokas, niyon mokokos” (Apoc. 21:3, 4).

11, 12. 1) Kej kiijtoua Apocalipsis 7:16, 17, ¿tlake tlateochiualistli kiselisej nopa tlauel miakej maseualmej? 2) ¿Tlake uelis kichiuasej kema moilnamiki Cristo imikilis, uan kenke?

¹¹ Xijpoua Apocalipsis 7:16, 17. Ipan ni tonali se keskij Jehová itekipanojkauaj amo kipiaj miak tlakualistli pampa amo kipiaj tomij, onka tlauilankayotl uan kualantli. Sekij kintsaktokej pampa kitekipanouaj Jehová. Maske kiampa kinpano, nopa tlauel miakej maseualmej tlauel yolpakij pampa kimatij tlaj momanauisej kema ya panotos nopa ueyi tlaijiyouilistli, kipiasej tlen moneki uan kinpaleuisej kuali ma tlaneltokakaj. Kema Jehová kitsontlamiltis nochi tlen Satanás kinauatia, ya kinmokuitlauis tlen ikualankayo Satanás. Teipa kema ya panotos nopa ueyi tlaijiyouilistli, Jesús “kinuikas amelko kampa [...] temaka yolistli para nochipa”. Ximoiljui: ¡san nopa tlauel miakej maseualmej uelis amo kema mikisej! (Juan 11:26).

¹² Yeka, tlauel kintlaskamatiliaj Jehová uan Jesús pampa kiselisej tlen kichiaj. Jehová tlauel kiniknelia uan kinpatiita katli itstosej ipan Tlaltipaktli maske amo kintlapejpenik yasej iluikak, kej katli kena kintlapejpenijtok. Katli yasej iluikak uan katli itstosej ipan Tlaltipaktli kinueyichiuaj Jehová uan Jesús kema mosentiliaj kema moilnamiki Cristo imikilis.

MA TIKINUEYICHIUAKAJ JEHOVÁ UAN JESÚS KEMA MOILNAMIKI CRISTO IMIKILIS

13, 14. ¿Kenke tlauel ipati timosentilisej kema moilnamiki Cristo imikilis?

¹³ Ipan se keski xiuitl tlen panotok, kema moilnamiktok Cristo imikilis uelis se tlen 1,000 katli mosentiliaj kikuaj pantsi o kiijij vino. Yeka, uelis tikijtosej ipan miak tlanechikolmej amo itstok yon se katli kikua pantsi uan kiiji vino. Miakej katli mosentiliaj ipan nopa tonali motemachiaj itstosej ipan Tlaltipaktli. Uajka, ¿kenke mosentiliaj? Ximoiljui: ¿kenke maseualmej yauij kema mosiuajtia se ininuampo? Yauij pampa kiikneliaj uan pampa kinekij kipaleuisej. Nojkia kiampa pano ika nopa “sekinok tlakamej” katli mosentiliaj kema moilnamiki Cristo imikilis, kema yauij kinextiaj kinikneliaj uan kinpaleuiaj Jesús uan katli kintlapejpenijtokej. Uan nojkia kinextiaj kitlaskamatij Cristo imikilis, pampa kiampa uelis itstosej nochipa ipan Tlaltipaktli.

¹⁴ Nojkia, kema nopa “sekinok tlakamej” yauij kema moilnamiki Cristo imikilis, eli pampa kineltokaj tlen Jesús tlanauatik. Jesús kiniljuik iapóstoles monekiyaya kiilnamikisej imikilis, kiniljuik: “Xijchiuakaj pampa inkiilnamikij nimijki inmopampa” (1 Cor. 11:23-26). Yeka, nopa “sekinok tlakamej” nojua kiilnamikisej Cristo imikilis pampa katli kintlapejpenijtokej yasej iluikak nojua itstokej ipan Tlaltipaktli. Nojkia ipan nochi Tlaltipaktli kintlaneuij nochi maseualmej ma mosentilikaj ipan nopa tonali.

15. ¿Kenijkatsa uelis tikinueyichiuasej Jehová uan Jesús kema moilnamiki Cristo imikilis?

¹⁵ Kema moilnamiki Cristo imikilis, uelis tikinueyichiuasej Jehová uan Jesús kema tiuikasej sansejko uan timomaijtosej. Nopa tlamachtili tlen ni xiuitl, itoka: “Ma tijnextikaj tijtlaskamatij tlen toTeotsij uan Cristo techmakatokej”. Kema tijkakisej nopa tlamachtili, nojua tlauel tikintlaskamatilisej Jehová uan Jesús. Uan kema kipanoltisej nopa pantsi uan vino nochi uelis tikilnamikisej tlake kiixnextiaj: itlakayo tlen amo tlajtlakole uan ieso Jesús. Nojkia tikilnamikisej kenijkatsa Jehová kikajki iKone ma miki topampa, kiampa tiitstosej nochipa (Mat. 20:28). Nochi katli kiikneliaj Jehová uan iKone, mosentilisej kema moilnamikis Cristo imikilis.

XIJTLASKAMATILI JEHOVÁ PAMPA TIJSELIS TLEN KITENKAJTOK

16. ¿Kenke tikijtouaj katli kintlapejpenijtokej uan katli motemachiaj itstosej ipan Tlaltipaktli elij kejuak sanse?

¹⁶ Jehová kinpatiita uan kiniknelia katli kintlapejpenijtokej yasej iluikak uan katli motemachiaj itstosej ipan Tlaltipaktli. Tijmatij ni pampa Jehová nochi kinmakixtik kema Jesús motemaktilik uan mijki. Maske amo sanse tlen kiselisej katli kintlapejpenijtokej uan katli motemachiaj itstosej ipan Tlaltipaktli, nochipa moneki kintekipanojtosej Jehová uan Jesús (Sal. 31:23). Ma tikilnamikikaj Jehová kitekiuia itonal uan kichiua ika nochi itokilijkauaj. Yeka, Jehová uelis kinmakas itonal nochi itekipanojkauaj, katli kintlapejpenijtok o katli amo.

17. ¿Tlake kichiaj ma moaxiti katli kintlapejpenijtokej yasej iluikak?

¹⁷ Jehová kichiua katli kintlapejpenijtokej yasej iluikak ma kinekikaj nopaya itstosej pampa kema tlakatij amo kiampa kiyolmatij. Yeka, nochipa moyoliljuiaj ipan tlen kiselisej, kiijtouaj kema momaijtouaj uan tlauel kinekij kiselisej nopa tlaxtlauili ipan iluikak. Uan maske amo kimatij kenijkatsa nelnelia elis inintlakayo, inijuantij tlauel kinekij itstosej ininuaya Jehová, Jesús, iluikaeuanij uan se keskij katli kintlapejpenijtokej tlen ya itstokej nopaya, uan kinekij tlanauatisej ipan toTeotsij iTlanauatijkayo (Filip. 3:20, 21; 1 Juan 3:2).

18. ¿Tlake kinekij kiselisej nopa “sekinok tlakamej”?

¹⁸ Nopa “sekinok tlakamej” kinekij itstosej nochipa ipan Tlaltipaktli, inijuantij kena tlakatij ika nopa tlamantli (Ecl. 3:11). Tlauel kichiaj nopa tonali kema uelis tlapaleuisej ma mochiua Tlaltipaktli se xochimili uan kichijchiuasej ininchaj, tlatojtokasej, ayokmo mokokosej uan itstosej ininuaya ininchampoyouaj (Is. 65:21-23). Nojkia, tlauel kinekij sejkanok tlaixmatitij, kej kampa onka uejueyi tepetl, kuatitlamitl o ueyi atl, uan kiampa kiitasej nochi tlen Jehová kichijchijtok. Uan tlauel yolpakij pampa ipan nopa tonali nojua kuali mouampojchiuasej iuaya Jehová uan mojmostla monechkauisej iuaya.

19. 1) ¿Tlake uelis tijchiuasej kema moilnamiki Cristo imikilis? 2) Ipan ni xiuitl, ¿kema moilnamikis?

¹⁹ Jehová kinmakatok sejse itokilijkauaj se yejyektsi tlateochiualistli (Jer. 29:11). Kema moilnamiki Cristo imikilis techpaleuia ma tikinueyichiuakaj Jehová uan Jesús pampa ika tlen kichijkej uelis tiitstosej nochipa. Kena, nochi toTeotsij itekipanojkauaj tlauel tijpatiitaj kema moilnamiki Cristo imikilis. Ipan xiuitl 2021, nopa tlanechikoli mochiuas sábado 27, metstli marzo kema kalaktos Tonati. Miakej kena uelis mosentilisej ipan ni xiuitl, sekij maske kipiaj tlaouijkayotl nojkia uelis kichiuasej uan sekij uelis ouij kimatisej pampa tsaktokej. Yeka, tijnekij ipan nochi tlanechikoli, kampa ayamo miakej mosentiliaj uan sekinok maseualmej, ma yolpakikaj ipan nopa tonali pampa Jehová, Jesús uan nochi iluikaeuanij kintlachilijtosej.