Ma tikinpaleuikaj katli kiixnamikij tlaouijkayotl

1. ¿Tlake kichiua Jehová kema kinnankilia itekipanojkauaj?

¿TIJMAJTOYA Jehová uelis mitstekiuis kema kinankilia se toikni katli momaijtoua? Maske tielij tiueuejtlakamej, tlapaleuianij, precursores, tlajtolmoyauanij, telpokamej, tlakamej, siuamej o ya tiuejueyij, Jehová uelis techtekiuis. Kema se akajya katli kiiknelia Jehová kiiljuia ma kipaleui, Jehová kintekiuia ueuejtlakamej uan sekinok itekipanojkauaj uan kiampa kiyolchikaua (Col. 4:11). Tlauel tiyolpakij pampa tijtekipanouaj Jehová uan pampa tikinpaleuiaj toikniuaj. Uelis kiampa tijchiuasej kema momoyaua se ueyi kokolistli, kema pano se tlamantli tlen amo tijchiayayaj o kema techtlatsakuiltiaj.

KEMA MOMOYAUA SE UEYI KOKOLISTLI

2. ¿Kenke uelis ouij tijmatisej tikinpaleuisej toikniuaj kema momoyaua se ueyi kokolistli?

² Kema momoyaua se ueyi kokolistli, uelis tijmatij ouij tikinpaleuisej sekinok. Se neskayotl, maske tijnekiskiaj tikinpaxalosej o tikintlaneuisej toikniuaj katli amo kipiaj tomij ma tlakuakij touaya, amo uelis pampa ueliskia timomauasej o tikinmauasej. Uan maske tijnekij tikinpaleuisej ika nochi toyolo, uelis tochampoyouaj nojkia tlaijiyouiaj. Kema kiampa pano, Jehová tlauel yolpaki pampa kiita tijchiuaj nochi tlen tiuelij (Prov. 3:27; 19:17). Uajka, ¿kenijkatsa uelis tikinpaleuisej?

3. ¿Tlake techmachtia tlen kichijkej nopa ueuejtlakamej tlen itlanechikol Desi? (Jeremías 23:4).

³ Tlen uelis kichiuasej ueuejtlakamej. Tlaj titlatekipanoua kej ueuejtlakatl, kuali xikinixmati toikniuaj (xijpoua Jeremías 23:4). Desi, katli tikijtojkej ipan tlamachtili 51, kiijtoua: “Ueuejtlakamej katli tlayakanayayaj ipan nogrupo nochipa tlajtolmoyauayayaj touaya, uan nojkia tijchiuayayaj sekinok tlamantli sansejko”.b Nopa kichijki ueuejtlakamej amo tlauel ouij ma kimatikaj kipaleuisej Desi kema se keskij ichampoyouaj mijkej ika COVID-19.

4. ¿Kenke se keski toikniuaj uelkej kipaleuiaj Desi uan tlake kinmachtia ueuejtlakamej?

⁴ Desi kiijtoua: “Nimouampojchijtoya ininuaya ueuejtlakamej, yeka amo ouij nijmatki nikiniljuis tlen nijyolmatiyaya uan tlen nechtekipachouayaya”. ¿Tlake kinmachtia ueuejtlakamej? Moneki kinmokuitlauisej toikniuaj uan mouampojchiuasej ininuaya kema ayamo pano tlen amo kuali. Tlaj amo ueli inkinpaxalouaj toikniuaj ininchaj pampa momoyajtos se ueyi kokolistli, xijchiuakaj kampeka inkinnojnotsasej ika sekinok tlamantli. Desi nojua kiijtoua: “Kemantika miakej ueuejtlakamej nechnojnotsayayaj uan nechtitlaniliyayaj mensajes ipan sanse tonal. Nopa textos tlen nechpouiliyayaj asiyaya ipan noyolo maske miakpa nijkaktoya”.

5. ¿Kenijkatsa uelis kimatisej ueuejtlakamej tlen kinpoloua toikniuaj uan kenijkatsa uelis kinpaleuisej?

⁵ Ueuejtlakamej uelis kimatisej kenijkatsa kinpaleuisej toikniuaj tlaj kintlatsintokiaj se keski tlamantli (Prov. 20:5). Uelis kintlajtlanisej tlaj kipiaj pajtli, tlakualistli, tlaj nojua kipiaj tekitl o kampa mokauasej, o tlaj moneki ma kinpaleuikaj kisenkauasej ininama uan kiampa kiniljuisej tekichiuanij ma kinmakakaj se tlenijki. Maske se keskij toikniuaj kipaleuijkej Desi ika tlen monekiyaya, nojua tlauel kipaleuik pampa ueuejtlakamej kiyolchikajkej uan kipaleuijkej kuali ma tlaneltoka. Desi nojua kiijtoua: “Ueuejtlakamej momaijtouayayaj nouaya. Maske amo nikilnamiki nochi tlen kiijtouayayaj, nikilnamiki kuali nijyolmatiyaya. Nijmatiyaya Jehová kejuak nechiljuiyaya ‘Na niitstok mouayaʼ” (Is. 41:10, 13).

6. ¿Kenijkatsa uelis timoyolchikauasej ipan tlanechikoli? (Xikita tlaixkopinkayotl).

⁶ Tlen nochi uelis tijchiuasej. Maske ueuejtlakamej kinpaleuiaj toikniuaj kema moneki, Jehová techiljuia nochi tojuantij ma tikinyolchikauakaj uan ma tikinpaleuikaj (Gál. 6:10). Kema se akajya mokokoua, uelis tlauel kipatiitas tlaj tijmakasej se tlamantli maske amo tlauel patiyo. Konemej uelis kiixkopinasej se tlamantli o kichiuasej se amatlajkuiloli uan kimakasej se toikni. Katli nojua telpokamej ueliskia kitlakouilitij se tosiuaikni katli ya ueyi. Sekinok uelis kichiuilisej se tlakualistli se katli mokokoua uan kikauilitij ichaj. Kema momoyaua se ueyi kokolistli, nochi moneki ma techyolchikauakaj. Yeka, tlauel techpaleuis tlaj nojua timokauasej se kentsi kema tlami tlanechikoli uan tikamanaltisej ininuaya toikniuaj ipan videoconferencia o ipan kali kampa timosentiliaj. Ueuejtlakamej nojkia moneki ma tikinyolchikauakaj, yeka se keskij toikniuaj kintlajkuiljuiliaj uan kintlaskamatiliaj ininteki, pampa kema momoyaua se ueyi kokolistli nojua tlauel motekiuiaj. Tlauel kuali tlaj tijchiuaj kampeka tijchiuasej tlen kiijtoua ni texto: “Noja más ximoyolchikauakaj ipan Toteko uan ximofuerzamakakaj” (1 Tes. 5:11).

KEMA PANO TLEN AMO TIJCHIAYAYAJ

7. ¿Tlake ueliskia kipanos se toikni kema pano se tlamantli tlen amo kuali?

⁷ Kema pano se tlamantli tlen amo kuali uelis kipatlas inemilis se akajya maske amo kichiayaya. Uelis kipolos ichaj, tlen kipia o miki se akajya katli tlauel kiiknelia. Uan ni tlamantli nojkia kinpano toikniuaj. ¿Kenijkatsa uelis tikinpaleuisej?

8. ¿Tlake moneki kichiuasej ueuejtlakamej uan tetajmej kema ayamo pano tlen amo kuali?

⁸ Tlen uelis kichiuasej ueuejtlakamej. Ueuejtlakamej, xikinpaleuikaj toikniuaj ma kimatikaj tlake kichiuasej tlaj panos se tlamantli tlen amo kuali uan kiampa uelis momanauisej uan inmechnojnotsasej. Margaret, katli tikijtojkej ipan tlamachtili 51, kiijtoua: “Ipan tlanechikoli, ueuejtlakamej techiljuijkej nojua ueliskia tlatlas kuatitlamitl kampa tiitstoyaj, uan techiljuijkej tlaj tekichiuanij techiljuiskiaj ma tikisakaj o tlaj ueliskia techpanos tlen amo kuali, monekiyaya nima tikisasej”. Tlen ueuejtlakamej kiniljuijkej tlauel kinpaleuik pampa kema panok makuili semanas, tlatlak kuatitlamitl kampa itstoyaj. Tetajmej, kema inmomachtisej ininuaya inmochampoyouaj ximoiljuikaj tlake monekis kichiuas sejse tlen inmojuantij tlaj panos se tlamantli tlen amo kuali. Tlaj inmojuantij uan inmokoneuaj kuali inmokualchijchijtosej, amo tlauel inmotekipachosej kema panos tlen amo kuali.

9. ¿Tlake moneki kichiuasej ueuejtlakamej kema ya panok uan kema ayamo pano se tlamantli tlen amo kuali?

⁹ Tlaj titlayakana ipan se grupo, amo xijchia ma pano tlen amo kuali. Nima xikintlajtlani nochi toikniuaj ininnúmero uan kanke itstokej. Xijchiua se lista uan xijpatlatia tlen moneki. Kiampa, tlaj pano se tlamantli tlen amo kuali, uelis tikinnojnotsas toikniuaj uan tikitas kenijkatsa tikinpaleuis. Xijpanoltili ni lista katli kinyakana ueuejtlakamej uan ya monojnotsas iuaya toikni katli tepaxaloua chijchikuasej metstli. Tlaj inmosentikapaleuiaj uelis kuali inkinpaleuisej toikniuaj. Kema tlanki tlalemeni, nopa toikni katli tepaxaloua chijchikuasej metstli kampa Margaret itstoya, amo kochki 36 horas pampa kiyakanayaya tlen kichiuayayaj ueuejtlakamej katli kintemouayayaj uan kinpaleuiyayaj se 450 toikniuaj katli kistejkej ininchaj (2 Cor. 11:27). Yeka, uelkej kipantiaj kampa mokauaskiaj nochi toikniuaj.

10. ¿Kenke ueuejtlakamej moneki kinmokuitlauisej toikniuaj? (Juan 21:15).

¹⁰ Ueuejtlakamej moneki kinyolchikauasej toikniuaj uan kinpaleuisej kuali ma tlaneltokakaj (1 Ped. 5:2). Kema pano se tlamantli tlen amo kuali, achtoui moneki kiitasej tlaj kuali itstokej nochi toikniuaj, tlaj kipiaj tlakualistli, yoyomitl uan kampa mokauasej. Uelis se keski metstli nojua monekis kinyolchikauasej uan kinpaleuisej kuali ma tlaneltokakaj (xijpoua Juan 21:15). Harold, eli se tlen Katli kiyakanaj Betel ipan se altepetl, uan kamanaltitok ininuaya miakej toikniuaj katli kintlasojsoljuilijtok se tlenijki. Ya kiijtoua: “Toikniuaj amo nima kuali kiyolmatij. Maske uelis ayokmo tlauel moyolkokouaj, kemantika miakpa kiilnamikij tlen kinpanok. Uelis kiilnamikij mijki se akajya katli tlauel kiikneliaj, kipolojkej se tlamantli tlen tlauel kipatiitayayaj o uelis nechka kinpanoskia tlen amo kuali. Tlen kiilnamikij uelis kichiuas sampa ma moyolkokokaj. Ni amo kiijtosneki amo kuali tlaneltokaj, pampa nochi maseualmej kiampa kiyolmatij kema pano se tlamantli tlen amo kuali”.

11. ¿Ika tlake sekinok tlamantli nojua monekis kinpaleuijtosej toikniuaj?

¹¹ Ueuejtlakamej moneki kichiuasej tlen kiijtoua ni texto: “Xichokakaj ininuaya tlen chokaj” (Rom. 12:15). Katli kintlasojsoljuilijtok se tlenijki moneki ma kinilnamikilikaj Jehová nojua kiniknelia uan toikniuaj nojkia. Ueuejtlakamej uelis kinpaleuisej toikniuaj nojua ma momaijtokaj, ma momachtikaj, ma yakaj tlanechikoli uan ma tlajtolmoyauakaj. Nojkia uelis kiniljuisej tetajmej ma kinpaleuikaj ininkoneuaj ma mosentlalikaj san ipan tlen nojua kipiaj. Tetajmej, xikinilnamikilikaj inmokoneuaj Jehová nochipa mouampojchijtos ininuaya uan amo kintlauelkauas. Xikiniljuikaj ipan nochi Tlaltipaktli itstokej toikniuaj katli uelis inmechpaleuisej (1 Ped. 2:17).

12. ¿Kenijkatsa uelis tlapaleuisej nochi toikniuaj kema pano se tlamantli tlen amo kuali? (Xikita tlaixkopinkayotl).

¹² Tlen nochi uelis tijchiuasej. Tlaj nechka kampa tiitstok tlasosoloua se tlenijki, xikintlajtlani ueuejtlakamej kenijkatsa uelis titlapaleuis. Uelis tikijtos ma mokauakaj mochaj toikniuaj katli kistejkej ininchaj o katli tlapaleuiaj nopaya. Uelis titlapaleuis kampa temakaj tlakualistli uan sekinok tlamantli tlen moneki. Uan tlaj amo tiitstok nechka kampa tetlasosoljuilik se tlenijki, ¿nojkia uelis titlapaleuis? Kena. Uelis tikiljuis Jehová ma kinpaleui toikniuaj uan nojkia titemakas tomij ika nochi moyolo (2 Cor. 1:8-11; 8:2-5). Uan tlaj uelis tias kampa panok nopa tlamantli, xikintlajtlani ueuejtlakamej kenijkatsa uelis titlapaleuis. Tlaj mitstlaneuisej, uelis mitsmachtisej tlake tijchiuas. Kiampa titlapaleuis kampa kinamiki uan kema kinamiki.

KEMA TECHTLATSAKUILTIAJ

13. ¿Tlake tlaouijkayotl kiixnamikij toikniuaj kampa amo kinkauaj ma tlaueyichiuakaj?

¹³ Kema kintlatsakuiltiaj toikniuaj, kichiua nojua tlauel ouij ma itstokaj. Katli itstokej kampa amo kinkauaj ma tlaueyichiuakaj, kemantika amo kipiaj tlen ika mopanoltisej, mokokouaj o miki se katli tlauel kiikneliaj. Uan pampa amo kinkauaj ma tlaueyichiuakaj, ueuejtlakamej ouij kimatij kinyolchikauasej toikniuaj. Kiampa kipanok Andréi, katli tikijtojkej ipan tlamachtili 51. Se tosiuaikni katli itstoya ipan igrupo, ayokmo kipixki tlen ika mopanoltis uan teipa kipanok tlen amo kuali kema yauiyayaj ipan carro. Tepajtianij miakpa kitejkej uan yeka amo ueliyaya tekiti. Maske amo kinkauayayaj ma tlaueyichiuakaj uan momoyajtoya COVID-19, toikniuaj kichijkej kampeka kipaleuisej uan Jehová amo kitlauelkajki.

14. ¿Kenijkatsa ueuejtlakamej kinextiaj motemachiaj ipan Jehová?

¹⁴ Tlen uelis kichiuasej ueuejtlakamej. Andréi momaijtok uan kichijki nochi tlen ueliyaya uan kiampa kipaleuik nopa tosiuaikni. ¿Uan tlake kichijki Jehová? Kichijki ma kipaleuikaj sekinok toikniuaj katli kena ueliyayaj kisaj. Se keskij kiuikayayaj kampa tepajtijketl uan sekij kipaleuiyayaj ika tomij. Jehová kinteochijki pampa mosentikapaleuijkej uan pampa amo majmajkej (Heb. 13:16). Ueuejtlakamej, kema ayokmo techkauasej ma titlaueyichiuakaj, xikiniljuikaj sekinok toikniuaj ma inmechpaleuikaj (Jer. 36:5, 6). Uan ximotemachikaj ipan Jehová pampa ya inmechpaleuis kema inkinpaleuisej toikniuaj ika tlen monekis.

15. ¿Tlake techpaleuis kuali ma timouikakaj kema techtlatsakuiltisej?

¹⁵ Tlen nochi uelis tijchiuasej. Kema techtlatsakuiltisej, uelis monekis timosentilisej san ininuaya se keskij toikniuaj. Yeka, ipan ni tonali tlauel moneki tijchiuasej kampeka kuali timouikasej ininuaya. Ma timoteuikaj iuaya Satanás, amo ininuaya toikniuaj. Ma tikintlapojpoljuikaj uan nima ma tijsenkauakaj tlen ueli kuesoli (Prov. 19:11; Efes. 4:26). Ma tikitakaj kenijkatsa uelis timopaleuisej ininuaya sekinok (Tito 3:14). Kema toikniuaj tlen Andréi igrupo kipaleuijkej nopa tosiuaikni, tlauel kinpaleuik pampa nojua kuali mouikakej (Sal. 133:1).

16. Kej kiijtoua Colosenses 4:3, 18, ¿kenijkatsa uelis tikinpaleuisej toikniuaj katli kintlatsakuiltiaj?

¹⁶ Tlauel miakej toikniuaj kitekipanouaj Jehová maske tekichiuanij amo kinkauaj ma tlaueyichiuakaj. Se keskij kintsaktokej pampa kiampa kichiuaj. Ma tikiljuikaj Jehová ma kinpaleui toikniuaj katli tsaktokej, ininchampoyouaj uan katli kichiuaj kampeka kinpaleuisej kuali ma tlaneltokakaj, kinmakasej tlen moneki uan kinmanauisej maske nojkia ueliskia kintsakuasej (xijpoua Colosenses 4:3, 18).c Amo kema ma timoiljuikaj amo uelis tikinpaleuisej tlaj timomaijtouaj ininpampa (2 Tes. 3:1, 2; 1 Tim. 2:1, 2).

17. ¿Tlake techpaleuis ma tikijiyouikaj tlen panos kema techtlatsakuiltisej?

¹⁷ Ta uan mochampoyouaj uelis inmokualchijchiuasej uan kiampa inkiijiyouisej kema techtlatsakuiltisej (Hech. 14:22). Amo san ximoiljuikaj panos tlen amo kuali. Nojua kuali ximouampojchiuakaj iuaya Jehová, uan xikinpaleuikaj inmokoneuaj nojkia kiampa ma kichiuakaj. Tlaj se tonali tlauel inmotekipachojtosej, xikiljuikaj Jehová nochi tlen inkiyolmatij (Sal. 62:7, 8). Xikijtokaj tlake tlamantli kinextia uelis timotemachisej ipan Jehová.d Tlauel kinpaleuis mokoneuaj tlaj tikiniljuis tlake kichiuasej kema panos tlen amo kuali uan tlaj tikinmachtis ma motemachikaj ipan Jehová. Kiampa amo majmauisej uan kipiasej tlaseuilistli.

18. ¿Kenijkatsa tiitstosej teipa?

¹⁸ Nopa tlaseuilistli tlen toTeotsij techmaka techpaleuia amo ma timajmauikaj (Filip. 4:6, 7). Ika nopa tlaseuilistli, Jehová techpaleuia kema momoyaua se ueyi kokolistli, kema pano se tlamantli tlen amo tijchiayayaj o kema techtlatsakuiltiaj. Jehová kintekiuia ueuejtlakamej, katli kuali techmokuitlauiaj, uan techiljuia nojkia uelis timopaleuisej ininuaya toikniuaj. Nopa tlaseuilistli techpaleuia ma timokualchijchiuakaj uan kiampa uelis tikijiyouisej tlen teipa techpanos uan nopa “ueyi tlaijiyouilistli” (Mat. 24:21). Ipan nopa tonali monekis tijpiasej tlaseuilistli ipan toyolo uan tikinpaleuisej sekinok nojkia kiampa ma kiyolmatikaj. Uan kema ya tlantos nopa ueyi tlaijiyouilistli, ayokmo timotekipachosej pampa ayokmo techpanos tlen amo kuali. Ipan nopa tonali tiitstosej kej toTeotsij kineki uan tijpiasej tlaseuilistli tlen amo kema tlamis (Is. 26:3, 4).