Nojua más ma titeiknelikaj

1. ¿Tlake tlamantli tijyekok kema timomachtik Biblia?

¿TIKILNAMIKI nochi tlen tijyekok kema pejki timomachtia Biblia? Uelis tlauel tiyolpajki kema tijmatki toTeotsij kipia itoka, uan uelis nojkia kuali tijyolmatki kema tijyekok toTeotsij amo kintlatsakuiltia maseualmej ipan tlitl. Nojkia uelis tlauel mitsyolchikajki kema tijyekok katli tikiniknelia uelis moyolkuisej uan tiitstos ininuaya ipan Xochimili.

2. ¿Ika tlake sekinok tlamantli tijnextik pejtoya kuali titlaneltoka? (Efesios 5:1, 2).

² Kema timomachtijtiajki toTeotsij iTlajtol, tikiknelijtiajki Jehová uan nopa tlaiknelili mitsyololinik xijchiua ipan monemilis tlen timomachtiyaya, uan pejki kuali tijtlapejpenia tlen tijchiuas. Nojkia tijpatlak tlen timoiljuiyaya uan tlen tijchiuayaya pampa tijnekiyaya tijchiuas tlen toTeotsij kipaktia. Kej se konetl kichiua kej itata, ta nojkia pejki tijchiua kej motata Jehová, katli tlauel teiknelia (xijpoua Efesios 5:1, 2).

3. ¿Tlake uelis timotlajtlanisej?

³ Uelis timotlajtlanisej: “¿Nama más nikiknelia Jehová uan amo kej kema nimoatsonpoliuiltik? ¿Nimoiljuia kej Jehová uan nimonejnemiltia kej ya kineki? ¿Más nikiniknelia toikniuaj?”. Tlaj ayamo tlauel titeikneliaj, amo ma timoyolkokokaj, nojkia kiampa kinpanok toikniuaj tlen achtoui siglo. Maske kiampa kinpanok, Jesús kimatiyaya sampa ueliskia teiknelisej, uan nojkia kiampa moiljuia ika tojuantij (Apoc. 2:4, 7). Jesús kimati sampa uelis titeiknelisej kej kema pejki timomachtiaj.

4. ¿Tlake timomachtisej ipan ni tlamachtili?

⁴ Ipan ni tlamachtili achtoui tikitasej tlake techpaleuis nojua más tikiniknelisej Jehová uan sekinok. Uan teipa tikitasej kenijkatsa techpaleuia tojuantij uan sekinok kema tijnextiaj tlaiknelili.

MA TIJCHIUAKAJ KAMPEKA MÁS TIKIKNELISEJ JEHOVÁ

5, 6. ¿Tlake tlaouijkayotl kiixnamijki Pablo kema tlajtolmoyajki, uan tlake kipaleuik nojua ma kitekipano Jehová?

⁵ Maske apóstol Pablo tlauel yolpakiyaya kema tlajtolmoyauayaya, kiixnamijki miak tlaouijkayotl. Monejki nejnemis tlauel uejka, kampa ueliskia kipanos tlen amo kuali. Kemantika monejki kiixkotonas “ueyi atl tlen mauilili” uan nojkia mopantik “ininuaya tlachtekinij”. Uan kemantika ikualankaitakauaj kitlaijiyouiltiyayaj (2 Cor. 11:23-27). Uan amo san ya nopa kipanok, kemantika toikniuaj nojkia amo kipatiitayayaj tlen kichiuayaya (2 Cor. 10:10; Filip. 4:15).

⁶ ¿Tlake kipaleuik Pablo nojua ma kitekipano toTeotsij? Ya kuali kiixmatiyaya Jehová pampa momachtijtoya iTlajtol uan pampa kiitstoya kenijkatsa kipaleuijtoya ipan inemilis. Yeka motemachiyaya Jehová nelia kiikneliyaya (Rom. 8:38, 39; Efes. 2:4, 5). Uan Pablo nojkia tlauel kiiknelik Jehová, yeka kiniknelik toikniuaj uan nojkia kinpaleuik ma kitekipanokaj (Heb. 6:10).

7. ¿Tlake techpaleuis más tikiknelisej Jehová?

⁷ Tlaj tijnekij más tikiknelisej Jehová moneki kuali timomachtisej iTlajtol. Kema tijpouasej Biblia moneki tikitasej tlake techmachtia sejse tlapoualistli tlen Ya. Uelis timotlajtlanisej: “¿Kenijkatsa kinextia ni versículos Jehová nechiknelia? ¿Uan kenijkatsa kinextia moneki nikiknelis?”.

8. ¿Kenijkatsa techpaleuia kema mojmostla timomaijtouaj?

⁸ Tlaj mojmostla timomaijtouaj, nojkia techpaleuis más ma tikiknelikaj Jehová (Sal. 25:4, 5). Uan Jehová nelia techtlakakilis (1 Juan 3:21, 22). Khanh,b se tosiuaikni katli itstok Asia kiijtoua: “Achtouia nikikneliyaya Jehová san pampa nimomachtijtoya tlen Biblia kiijtoua, pero nama más nikiknelia pampa nikita nelia nechtlakakilia kema nimomaijtoua. Nopa nojkia nechpaleuik ma nijneki nijchiuas tlen kiyolpakiltia”.

MA TIJCHIUAKAJ KAMPEKA MÁS TIKINIKNELISEJ SEKINOK

9. ¿Kenijkatsa Timoteo techmachtik ma tikiniknelikaj toikniuaj?

⁹ Kema Pablo ya mochijtoya se Cristo itokilijka, kiixmatki Timoteo. Ya tlauel kiikneliyaya Jehová uan nojkia kinikneliyaya maseualmej. Teipa Pablo kiniljuik toikniuaj tlen Filipos ni tlamantli tlen Timoteo: “Axaka seyok kipia se iyolo keja Timoteo. Yajaya, keja na, motekipachoua inmopampa para xinejnemikaj kuali” (Filip. 2:20). Pablo tlauel mosentlachiliyaya kema kiitayaya kenijkatsa Timoteo tlauel kinikneliyaya toikniuaj uan amo san pampa kuali kichiuayaya se keski tekitl o tlamachtiyaya. Uelis toikniuaj tlauel kinpaktiyaya ma kinpaxalo Timoteo (1 Cor. 4:17).

10. ¿Kenijkatsa kinextijkej teikneliaj Anna uan iueue?

¹⁰ Tojuantij nojkia tikitaj kenijkatsa tikinpaleuisej toikniuaj (Heb. 13:16). Ma tikilnamikikaj Anna katli tikijtojkej ipan tlamachtili 29. Kema ya panotoya se chikauak ajakatl, ya uan iueue kinpaxalotoj se toikni uan ichampoyouaj uan kiitakej sosolijtoya ininchaj. Yeka toikniuaj amo kipiayayaj ininyoyo tlen mokentisej. Anna kiijtoua tlen kichijkej: “Tijuikakej ininyoyo, tijchikuenijkej, tijplancharojkej, tijkuelpachojkej uan sampa tikinuikilijkej. Maske tlen tijchijkej amo ouij, techpaleuik kuali ma timouampojchiuakaj”. Anna uan iueue tlauel teikneliyayaj yeka kinpaleuijkej nopa toikniuaj (1 Juan 3:17, 18).

11. 1) ¿Kenijkatsa kiyolmatij sekinok kema tijnextiaj tikinikneliaj? 2) Kej kiijtoua Proverbios 19:17, ¿tlake kichiua Jehová kema tijnextiaj titeikneliaj?

¹¹ Kema tikinikneliaj uan tikinpaleuiaj sekinok, tijnextiaj timoiljuiaj uan tijchiuaj sanse kej Jehová. Uan uelis amo kema kiilkauasej tlen tijchiuasej uan tlauel kipatiitasej. Khanh, katli tikijtojkej ipan párrafo 8, kinilnamiki ika miak tlaiknelili nochi katli kipaleuijkej, ya kiijtoua: “Tlauel nikintlaskamatilia tosiuaikniuaj katli nechuikakej ma nitlajtolmoyauati. Kinextijkej tlauel nechikneliaj, ualayayaj nechualtemouaj, nechtlaneuiyayaj ma nitlakuati ininuaya ijnalok o tlajkotona, uan teipa nechualkauayayaj nochaj. Nama nikita, kichijkej kampeka nechpaleuisej uan kichijkej ika miak tlaiknelili”. Nojkia tijmatij amo nochi techtlaskamatilisej. Ma tikitakaj tlen kiijtoua Khanh: “Nijnekiskia nikintlaskamatilis uan nojkia nikinpaleuis katli nechpaleuijkej. Pero se keskij amo nijmati kanke itstokej. Maske amo ueli nijchiua ni tlamantli, Jehová kena kimati uan nikiljuia ma kinteochiua”. Uajka, Jehová kena kiita sejse tlamantli tlen tijchiuaj kema tikinpaleuiaj sekinok maske amo miak, uan ya tlauel kipatiita uan kineki techkuepilis nochi tlen tijchiuaj (xijpoua Proverbios 19:17).

12. ¿Kenijkatsa toikniuaj tlakamej uelis kinextisej teikneliaj? (Nojkia xikita tlaixkopinkayomej).

¹² Toikniuaj tlakamej uelis kinextisej teikneliaj ipan tlanechikoli kema kinpaleuiaj toikniuaj. Se telpokatl katli itoka Jordan, kitlajtlanik se ueuejtlakatl tlake ueliskia kichiuas uan kiampa kinpaleuis toikniuaj. Nopa ueuejtlakatl kiyolchikajki uan kiiljuik kuali tlen kichijtiauiyaya uan kiiljuik tlen nojua monekiyaya kichiuas. Kiiljuik kualka ma asi ipan tlanechikoli, ma kintlajpalo toikniuaj, ma tlanankili, ma tlajtolmoyaua ipan igrupo uan ma kiita kenijkatsa kinpaleuis toikniuaj. Kema kichijki tlen kiiljuijkej, amo san kipaleuik ma kiseli sekinok tekitl, nojkia kinextik más kiniknelia toikniuaj. Nojkia kiitak kema se toikni kitekimakaj kej tlapaleuijketl, amo uajkaya peua kinpaleuia toikniuaj, moneki ipa momajtos kiampa kichiuas (1 Tim. 3:8-10, 13).

13. ¿Tlake kipaleuik Christian sampa ma tlatekipano kej ueuejtlakatl?

¹³ Tlaj ayokmo titlatekipanoua kej ueuejtlakatl o tlapaleuijketl, amo xikilkaua Jehová kiilnamiktok nochi tlen tijchijki uejkajkia (1 Cor. 15:58). Uan nochipa kiita kema tijnextia titeiknelia. Se toikni katli itoka Christian tlauel moyolkokok kema kiiljuijkej ayokmo ueliskia tlatekipanos kej ueuejtlakatl. Maske ayokmo kipixki nopa tekitl, nojua kichijki kampeka kuali tlatekipanos, ya kiijtoua: “Maske ayokmo nitlatekipanouayaya kej ueuejtlakatl, nimosentlalik nijchiuas tlen kena niueliyaya pampa tlauel nikiknelia Jehová”. Teipa Christian sampa kitekimakakej kej ueuejtlakatl, ya kiijtoua: “Nimoiljuiyaya amo nijseliskia ni tekitl, pero teipa nimoiljuik tlaj Jehová kikaua nojua ma nijchiua ni tekitl uajka moneki nijselis, pampa nikiknelia ya uan nojkia toikniuaj”.

14. ¿Tlake tijyekouaj ika tlen kiijtok se tosiuaikni katli eua Georgia?

¹⁴ Nochi katli tijtekipanouaj Jehová nojkia tijnextiaj tikinikneliaj maseualmej (Mat. 22:37-39). Elena, katli eua Georgia kiijtoua: “Achtouia nitlajtolmoyauayaya san pampa nikikneliyaya Jehová, pero kema más nikiknelijtiajki, nojkia pejki nikiniknelia sekinok maseualmej. Pejki nimoiljuia tlake kuesoli kipiaj, uan tlake tlamachtili ueliskia kinpaleuis. Kema nijpatlak notlalnamikilis, kichijki más ma nijneki nikinpaleuis” (Rom. 10:13-15, TNM).

TLAUEL TECHPALEUIA KEMA TITEIKNELIAJ

15, 16. Kej nesi ipan tlaixkopinkayomej, ¿tlake tlamantli pano kema titeikneliaj?

¹⁵ Kema tikinikneliaj toikniuaj, nojkia kinpaleuia sekinok maseualmej. Kema pejki momoyaua kokolistli COVID-19, Paolo uan isiua kinpaleuikej miakej toikniuaj katli ya uejueyij ma kimatikaj kenijkatsa kitekiuisej celular o tableta uan kiampa tlajtolmoyauasej. Se tosiuaikni ouij kimatiyaya kitekiuis icelular, pero teipa momachtik uan yeka kintlanejki iteixmatkauaj nojkia ma kiilnamikikaj Cristo imikilis. Ya kintlanejki 60 maseualmej ma kikakikaj nopa tlamachtili ipan videoconferencia. Tlen kichijkej toikniuaj amo san kipaleuik nopa tosiuaikni, nojkia kinpaleuik sekinok maseualmej. Nopa tosiuaikni, kiniljuik Paolo uan isiua: “Tlauel niinmechtlaskamatilia pampa inkinpaleuijkej miakej toikniuaj katli ya uejueyij. Amo kema nikilkauas kenijkatsa Jehová kinextik techiknelia uan pampa inkipixkej inmoyolo”.

¹⁶ Ika tlen kipanok, Paolo kiitak más ipati titeiknelisej uan amo titlalnamikisej o tijmatisej tijchiuasej se tlenijki. Paolo kiijtoua: “Ipan se keski xiuitl, nikinpaxalok tlanechikolmej chijchikuasej metstli, maske toikniuaj amo kiilnamikij tlake tlamachtili nijpanoltik, uelis kena kiilnamikij kenijkatsa nikinpaleuik ika se keski tlamantli”.

17. ¿Kenijkatsa techpaleuia kema titeikneliaj?

¹⁷ Kema titeikneliaj nojkia tlauel techpaleuia, kiampa kipanok se toikni katli eua Nueva Zelanda. Se sábado ika tlajkotona, Jonathan kiitak se precursor iselti tlajtolmoyauayaya maske chikauak tonayaya. Jonathan mosentlalik tlajtolmoyauas iuaya sejse sábado ika tiotlak. Amo moiljuiyaya tlaj nojkia tlauel kipaleuiskia tlen kichiuaskia, ya kiijtoua: “Ipan nopa tonali, amo tlauel nechpaktiyaya nitlajtolmoyauas, pero kema nikitak tlauel kuali tlamachtiyaya toikni uan kenijkatsa tlauel kuali kitlakakiliyayaj, nojkia pejki nechpaktia nitlajtolmoyauas. Nojkia kuali nimouampojchijki iuaya, más kuali nitlaneltokak, más nechpaktik nitlatekipanos uan más kuali nimouikak iuaya Jehová”.

18. ¿Tlake kineki Jehová ma tijchiuakaj?

¹⁸ Jehová kineki ma tijchiuakaj kampeka tikiknelisej uan nojkia tikiknelisej sekinok. Kej tikitakej ipan ni tlamachtili, tlaj tijnekij tikiknelisej Jehová, moneki tijpouasej iTlajtol, timoyoliljuisej uan timomaijtosej mojmostla. Uan tlaj tijnekij más tikiniknelisej toikniuaj, moneki tikinpaleuisej. Uan kema más titeiknelijtiasej, techpaleuis más kuali timouikasej iuaya Jehová uan ininuaya toikniuaj. ¡Uan teipa uelis nochipa kuali timouikasej ininuaya!