ToTeotsij kimakatok chikaualistli Jesús, yeka uelis kitsontlamiltis nochi tlen techtlaijiyouiltia. Maske tojuantij amo ueli tijsenkauaj se keski kuesoli, ika tlen Jesús kichijki kinextik ya kena ueli. Ya uelis kitsontlamiltis nopa tlajtlakoli tlen kichiua ma timokokokaj uan ma timikikaj (Mat. 9:1-6; Rom. 5:12, 18, 19). Nopa milagros tlen kichijki, kinextik ya uelis kitsontlamiltis “tlen ueli kokolistli” uan kinyolkuis katli miktokej (Mat. 4:23; Juan 11:43, 44). Nojkia, uelis kitsakuilis uejueyi ajakatl uan kintlanis amo kuali ajakamej (Mar. 4:37-39; Luc. 8:2). Tlauel techyolchikaua pampa tikitaj Jehová kimakatok miak chikaualistli iKone. Uelis timotemachisej tijselisej miak tlateochiualistli kema tekichiuas toTeotsij iTlanauatijkayo. Nopa milagros tlen Jesús kichijki kema itstoya ipan Tlaltipaktli, kinextik tlen kichiuas kema tlanauatis ipan toTeotsij iTlanauatijkayo. w23.04 3, 4 párrs. 5-7

Tlaj ipan motlanechikol itstokej miakej toikniuaj, uelis kemantika amo titlanankilia pampa miakej kinekij tlanankilisej. Uan uelis timoiljuia ayokmo timomatlananas. Maske kiampa timoiljuia, nojua xijchijto kampeka timomatlananas. Xikita miak párrafos kampa uelis titlanankilis. Kiampa tlaj amo titlanankilis kampa peua nopa tlamachtili, uelis teipa kena titlanankilis. Kema timomachtis pilamochtsi Tlen Tematiltia, ximoiljui kenijkatsa nopa párrafos mouika ika nopa tlamachtili. Kiampa uelis titlanankilis kema tijnekis. Nojkia, uelis timokualchijchiuas ipan párrafos kampa moixtoma tlamachtili tlen tlauel ouij. Ipan nopa párrafos amo miakej momatlananaj pampa eli ouij. ¿Uan tlaj amo ueli titlanankilia maske ya tijchijki nochi ni tlamantli? Uelis tikamanaltis iuaya nopa toikni katli kiyakanas se tlamachtili uan xikiljui tlake tlajtlanili mitspaktiskia tijnankilis. w23.04 22 párrs. 9, 10

José nochipa kineltokayaya tlen Jehová kiiljuiyaya, nopa kipaleuik kuali ma kiyakana isiua. ToTeotsij expa kiiljuik tlen monekiyaya kichiuas uan nopa kinpaleuiskia ichampoyouaj. Uan maske eliyaya ouij, ya nima kichijki (Mat. 1:20; 2:13-15, 19-21). José kineltokak Jehová, yeka kuali kimokuitlauik María uan amo tleno kipanok, nopa kichijki María nojua ma kiikneli uan ma kitlepanita. Katli inkipiaj inmosiua, uelis inkichiuasej kej José uan inkiitasej ipan Biblia tlen uelis inmechpaleuis kuali xikinmokuitlauikaj inmochampoyouaj. Kema inkichiuasej tlen nopaya kiijtoua maske monekis inkipatlasej se keski tlamantli, inkinextisej inkiikneliaj inmosiua. Uan tlaj kiampa inkichiuaj, inmechpaleuis nojua tlauel kuali xiitstokaj. Se tosiuaikni tlen Vanuatu, katli kipia 20 xiuitl mosenkajki, kiijtoua: “Kema nikita noueue kikaua Jehová ma kiyakana uan kichiua tlen Biblia tetlajtolmaka, nechpaleuia nojua ma nijtlepanita, ma nimotemachi ipan ya uan ipan tlen kitlapejpenia”. w23.05 21 párr. 5