Números
23 Uan Balaam kiluij Balac: “Xikchijchiua nikan chikome altares uan xikinmikti chikome kuakuejmej uan chikome ichkaueuetkej”.* 2 Balac niman kichiuak tein Balaam kiluijka. Balac uan Balaam kitemaktijkej se kuakouej uan se ichkaueuet itech sejse altar. 3 Satepan, Balaam kiluij Balac: “Ximokaua nikan kampa chichinaujtokej tapialmej uan nejua niati. Xa Jehová nechiluis teisa. Nimitsiluis tein yeski taman tein nechmatiltis”. Uan Balaam yajki itech se loma.
4 Uan Dios kinojnotsak Balaam, uan Balaam kiluij: “Nikintejtekpanak chikome altares uan niktemaktij se kuakouej uan se ichkaueuet itech sejse altar”. 5 Jehová kiluij Balaam tein monekia kijtos uan kiluij: “Ximokepa kampa yetok Balac uan yejua nejin tein moneki tikijtos”. 6 Yejua ika Balaam mokepak uan kiitak ke Balac ijkatoya tanakastan de kampa chichinaujtoyaj tapialmej. Iuan yetoyaj nochin taixyekananij de Moab. 7 Uan Balaam kitematiltij nejin:
“Balac akin tekiuajti Moab, nechualkuik desde Aram,
desde tepemej tein yetokej kampa ika ualkisa tonaltsin.
Yejua kijtoj: ‘Xiuiki uan xikintajtanili tein amo kuali ikoneuan Jacob.
Kemaj, xiuiki uan xitajtani maj kintatsakuiltikan ikoneuan Israel’.
8 Amo uelis nikintajtanilis tein amo kuali akin Dios kintatiochiuijtok.
Amo uelis nitajtanis maj kintatsakuiltikan akin Jehová amo kijtojtok ke kintatsakuiltis.
9 Nikinita desde tepejxikuapan,
uan nikinita desde loma.
Ininselti nemij ompa,
yejuan amo kemej akin nemij itech okseki altepemej.
10 Ikoneuan Jacob tel miakej kemej talnex, ¿akoni uelis kinpouas?
Amo akin ueli kinpoua nion se parte.
Maj nimiki kemej mikij akin yolkualmej,
uan maj nimotamili kemej yejuan”.
11 Uan Balac kiluij Balaam: “¿Keyej tinechchiuilij nejin? Nimitsualkuik para xikintajtanili tein amo kuali akin nechkualantiaj uan amo tikchiuak nejon, ta sayoj titajtanik maj kinpano tein kuali”. 12 Yejua kinankilij: “Nimitsiluijya ke sayoj moneki nikijtos tein Jehová nechiluis”.
13 Balac kiluij: “Nimitstataujtia xiouj nouan okseko kampa no uelis tikinitas. Amo tikinitas nochin, sayoj sekin. Xikintajtanili tein amo kuali desde ompa”. 14 Yejua ika kiuikak itech tal kampa motanotsa Zofim, ikuapan Pisgá, uan kichijchiuak chikome altares uan kitemaktij se kuakouej uan se ichkaueuet itech sejse altar. 15 Uan Balaam kiluij Balac: “Ximokaua nikan kampa chichinaujtokej tapialmej uan nejua niouj nepa niknojnotsati Dios”. 16 Jehová kiluij Balaam tein monekia kijtos uan kiluij: “Ximokepa kampa yetok Balac uan yejua nejin tein moneki tikijtos”. 17 Yejua ika Balaam kiajsito Balac uan kiitak ke mochixtoya kampa yetoyaj tapialmej tein chichinaujtoyaj uan taixyekananij de Moab iuan yetoyaj. Balac kitajtanij: “¿Toni kijtoj Jehová?”. 18 Uan Balaam kitematiltij nejin:
“Ximoketsa Balac uan xikaki.
Xinechkaki, iokichpil Zipor.
19 Dios amo se takat akin takajkayaua
nion kipapata tein kiixtalia.
Yejua nochipa kichiua tein kijtoua,
uan nochipa kichiua tein motenkaua.
20 ¡Xikita! Nechualkuikej para maj nitajtani tein kuali;
yejua tatiochiuak uan amo ueli nikpata nejon.
21 Yejua amo kikaua maj kinnaualuikan ikoneuan Jacob
uan amo kikaua maj tajyouikan ikoneuan Israel.
IninDios Jehová iniuan yetok,
uan yejuan kiueyitaliaj kemej inintekiuaj.
22 Dios kinkixtij de Egipto.
Yejua kemej ikuaomiyouan se koujtajkuakouej tein kinpaleuia.
23 Porin nenkaj kitemouaj maj kinpano tein amo kuali ikoneuan Jacob
uan nion se naual uelis teisa kinchiuilis ikoneuan Israel.
Axkan, keman kinitaskej uelis kijtoskej:
‘¡Xikitakan tein Dios kichiuak!’.
24 Israelitas moketsaskej kemej se león,
uan meuaskej kemej se león.
Amo motekaskej hasta ke kitamikuaskej tein kikitskijkej
uan hasta ke tamitayiskej iesyo”.
25 Uan Balac kiluij Balaam: “Komo amo ueli tikintajtanilia tein amo kuali, amo no xikintajtanili tein kuali”. 26 Balaam kinankilij Balac: “Ipa nimitsiluijkaya ke nikchiuaskia nochi tein Jehová nechiluiskia”.
27 Balac kiluij Balaam: “Nimitstataujtia, tiouij okseko. Xa ompa Dios kinekisya xikintajtanili tein amo kuali israelitas”. 28 Yejua ika Balac kiuikak Balaam ikuapan tepet Peor, kampa moita Jesimón.* 29 Uan Balaam kiluij Balac: “Xikchijchiua nikan chikome altares uan xikinmikti chikome kuakuejmej uan chikome ichkaueuetkej”. 30 Yejua ika Balac kichiuak nochi tein Balaam kiluijka, uan kitemaktij se kuakouej uan se ichkaueuet itech sejse altar.