Números
24 Keman Balaam kiitak ke Jehová kinekia kintatiochiuis israelitas, amo kitemojok kimatis ox kinpanoskia tein amo kuali. Yejua ika tachiak itech tal kampa amo teyi onkak. 2 Balaam moixajokuik uan kiitak ke israelitas kualtsin xejxeliujtoyaj. Uan Dios kimakak Balaam ichikaualis. 3 Balaam kitematiltij nejin:
“Nejua Balaam, iokichpil Beor, niktematiltia nejin,
nejua nechpaleuijkej maj niyektachia,
4 nikakik tein Dios kinekia kitematiltis.
Keman niuetsik nitachiak,
uan akin kipia nochi chikaualis nechitaltij se taman:
5 ¡Tel kualtsitsin ininchan ikoneuan Jacob,
kampa nemij ikoneuan Israel!
6 Uejka takuij kemej ataujmej,*
kemej xiujtsitsin tein moskaltiaj atenoj,
kemej áloes* tein Jehová kintokak,
kemej cedrojkoujmej tein yetokej kampa onkak at.
7 De inincubetas kisentoka ijxika at,
uan ininxinach mochiua kampa onkak miak at.
Inintekiuaj no yeski okachi ueyichiujkej ke Agag,
uan kampa taixyekanas kualtsin nemiskej.
8 Dios kinkixtij de Egipto.
Yejua kemej ikuaomiyouan se koujtajkuakouej tein kinpaleuia.
Kintamiskej akin kintajyouiltiaj,
kitetexoskej ininomiyouan uan kinixpoloskej ika ininflechas.
9 Yejuan motekaj, motekaj kemej se león,
uan amo akin moixeuiskia kikuejmolos se león.
Maj Dios kintatiochiui akin kinnejnekiliskej tein kuali
uan maj kintatsakuilti akin kinnejnekiliskej tein amo kuali”.
10 Uan Balac kualanik iuan Balaam. Yejua ika momatajtatsinij uan kiluij Balaam: “Nimitsnotsak para xikintajtanili tein amo kuali akin nechkualantiaj uan amo tikchiuak nejon, ta expaya sayoj tikintajtanilij tein kuali. 11 Xioujya mochan. Nejua niknekia nimitsueyitalis, sayoj ke Jehová amo kinekik maj nimitsueyitali”.
12 Balaam kiluij Balac: “Ipa nikiniluijkaya takamej akin tikintitanka nejin: 13 ‘Jehová nechiluijya tein moneki nikchiuas, uan maski Balac nechmakaskia ichan tein pexontos* de plata uan oro, amo uelis nikchiuas tein nejua niknekis, yeski kuali oso amo. Sayoj nikijtos tein Jehová nechiluis’. 14 Axkan nimokepati kampa ninemi. Sayoj ke achto xiuiki uan maj nimitsilui tein israelitas namechchiuiliskej satepan”.* 15 Yejua ika Balaam kitematiltij nejin:
“Nejua Balaam, iokichpil Beor, niktematiltia nejin,
nejua nechpaleuijkej maj niyektachia,
16 nikakik tein Dios kinekia kitematiltis,
nikmati tein kimati akin okachi ueyichiujkej;
keman niuetstiaya nitachiak,
uan akin kipia nochi chikaualis nechitaltij se taman:
17 nejua nikitas yejua, sayoj ke amo yekintsin;
kualtsin nikitas, sayoj ke amo niman.
Se sitalin kisas de ikoneuan Jacob,
se tekiuaj* kisas de ikoneuan Israel.
Yejua kiixkuatapanas Moab
uan kinkuatapanas nochin akin tel tateuiaj.
18 Yejua moaxkatilis Edom,
Seír mokauas imako akin kitauelitaj,
uan ikoneuan Israel kinextiskej ke yolchikaujkej.
19 Uan semej ikoneuan Jacob kintantias oksekin,
uan kinmiktis nochin akin momakixtijkaj keman kiixpolojkaj ueyi xolal”.
20 Keman Balaam kinitak akin kinixmatij kemej amalequitas kisentokak tajtoj:
“Amalequitas achto peujkej,
sayoj ke satepan kinixpoloskej”.
21 Keman kinitak akin kinixmatij kemej quenitas kisentokak tajtoj:
“Mochan amo teyi kipanoua uan yetok tepani.
22 Sayoj ke aksa* kinchichinos quenitas.*
Amo uejkaua akin nemij Asiria moinuikiliskej”.
23 Uan Balaam kisentokak tajtoj:
“¡Ay! Amo akin uelis makisas keman Dios kichiuas nejin.
24 Kinualkuiskej barcos desde martenoj tein poui Kitim,
uan kitajyouiltiskej Asiria
uan kitajyouiltiskej Éber.
Sayoj ke yejua no senkis kiixpoloskej”.
25 Uan Balaam uan Balac moxelojkej uan seseko yajkej.