Jonás
1 Jehová kiluij Jonás* ikoneuj Amitái: 2 “Xiouj ueyi xolal Nínive. Xikiniluiti akin ompa nemij ke nikinixpoloti porin kichiujtokej miak taman tein amo kuali”.
3 Sayoj ke Jonás kicholuij* Jehová uan kinemilij yas Tarsis. Yejua ika temok Jope uan kiajsito se barco tein yaya Tarsis. Jonás kiixtauak ipasaje uan tejkok* itech barco. Yajki Tarsis para amo kichiuas tein kinauatijka Jehová.
4 Uan Jehová kichiuak maj tel taejeka itech mar. At peuak motelajkotatamota uan yaya kipojpostekitia barco. 5 Kemej takamej akin tekitiaj itech barco semi momoujtijkej, sejse takat peuak kitsajtsilia idios maj kipaleui. Uan peujkej kipantamotaj aijtik nochi tein kiuikayaj para maj amo kietilianiok barco. Sayoj ke Jonás temoka taijtik den barco, ompa motekak uan kochtiajki.* 6 Akin taixyekanaya itech barco kiitato uan kiluij: “¿Keyej nikan tikochtok? ¡Ximeua, xiktsajtsili modios maj techpaleui! Xa akin yekmelauj Dios techiknelis uan amo timikiskej”.
7 Takamej moiluijkej: “Maj tikitakan akoni itajtakol maj mochiujto nejin tetsauit”. Yejua ika kitatamotkej tetsitsin* para kimatiskej akoni, uan nesik ke katka Jonás. 8 Yejuan kiluijkej Jonás: “Timitstataujtiaj xitechilui ox tejua motajtakol maj mochiujto nejin tetsauit. ¿Itech toni titekiti? ¿De kani tiuitse? ¿Akonimej mochankauan?”.
9 Jonás kinnankilij: “Nihebreo* uan nikueyichiua Jehová, Dios akin nemi iluikak, akin kichijchiuak mar uan taltikpak”.
10 Nejon takamej okachi momoujtijkej, yejua ika kitajtanijkej:* “¿Keyej tikchiuak nejon?”. (Jonás kiniluijkaya nejon takamej ke kicholuijtoya* Jehová). 11 Kemej at okachi moajkotatamotaya kiluijkej: “¿Toni moneki timitschiuiliskej para maj at amo moajkotatamotaok?”. 12 Yejua kinnankilij: “Xinechpantamotakan aijtik, ijkon at amo moajkotatamotasok; porin nikmati ke notajtakol maj mochiujto nejin tetsauit tein namechtajyouiltijtok”. 13 Kemej takamej amo kinekiaj kipantamotaskej, peuak mochikauaj kiuikaskej barco atenoj. Sayoj ke kemej at okachi moajkotatamotaya amo uelik kiuikakej.
14 Yejua ika kiluijkej Jehová: “¡Timitstataujtiaj Jehová, amo xikaua maj timikikan sayoj porin nejin takat amo mitstakamatik! Jehová, nochi nejin mochiujtok porin tejua ijkon tikneki. Amo xitechtajtakolti komo tikmiktiaj nejin takat akin amo teyi kichiuak”. 15 Satepan kipantamotkej Jonás uan at amo moajkotatamotakok. 16 Nejon kichiuak maj takamej semi kimojkatokanij Jehová. Yejua ika kimaktilijkej Jehová se tapialtsin uan motenkaujkej kiueyichiuaskej.
17 Satepan, Jehová kichiuak maj se pescado* tein semi ueyi kitolouani Jonás, uan Jonás yetoya iijtik nejon ueyi pescado eyi tonal.