2 Juan

1 Nejua nitayekankej,* nimitstajkuilouilia tejua siuatsin akin Dios mitsijitak* uan nikintajkuilouilia mokoneuan akin yekmelauj nikintasojta, uan amo sayoj nejua, ta no nochin akin kiixmatij tamachtilis tein melauak. 2 Tamechtasojtaj porin tamachtilis tein melauak yetok itech toyolo uan ompa yetos nochipaya. 3 ToTajtsin Dios uan Jesucristo, iKoneuj toTajtsin, techmakaj tatiochiualis tein amo technamiki, techikneliaj uan techpaleuiaj maj kuali timouikakan iuan Dios. Yejuan techtasojtaskej uan techmachtiskej tein melauak.

4 Semi niyolpakik nikmatis ke seki mokoneuan kisentokaj nemij itech ojti tein melauak, ijkon kemej toTajtsin technauatij. 5 Siuatsin, yejua ika axkan nimitstataujtia maj timotasojtakan se iuan okse. (Amo nimitsijkuilouilia se yankuik tanauatil, ta se tein tikpiaj desde keman peuak tikixmatij Cristo). 6 Uan yejua nejin tein kinextia ke titetasojtaj: maj tiksentokakan tiktakamatikan itanauatiluan. Namejuan nankikakkej nejin tanauatil desde keman peuak nankiixmatij Cristo: xiksentokakan xitetasojtakan. 7 Porin neskejya nikan taltikpak miakej takajkayauanij, akin kijtouaj ke Jesucristo amo nemiko kemej takat. Yejua in takajkayaujkej uan akin kiixnamiki Cristo.

8 Ximoyekpiakan para amo nankipoloskej tein ika timotekitiltijkejya uan para nankiseliskej nochi tatiochiualismej tein Dios kiixtalijtok namechmakas. 9 Akin amo kitakamati itamachtilis Cristo uan tamachtia okse taman, amo kiyolpaktia Dios. Akin kemaj kitakamati itamachtilis Cristo, kiyolpaktia toTajtsin uan iKoneuj. 10 Komo aksa* namechitati uan amo tamachtia nejin, amo xikselikan namochan nion xiktajpalokan. 11 Porin akin kitajpaloua kemej yeskia no kichiujtok tein amo kuali tein yejua kichiua.

12 Maski miak taman nikneki namechiluisok, amo nikneki nikijkuilos, ta nikchia namechitatiuj uan namouan nitajtos para senkis xiyolpakikan.

13 Ikoneuan mokniuj siuat, akin Dios kijitak,* mitstajpalouaj.