Romanos
3 Komo ijkon, ¿toni kichiua maj se judío okachi ueyichiujkej ke oksekin? ¿Toni ika tapaleuia maj se moteki?* 2 Semi tapaleuia itech miak taman. Yekinika, Dios kinkauilij itajtoluan in judíos. 3 Sayoj ke, komo seki judíos amo takuaujtamatkej, ¿kijtosneki ke amo uelisok titakuaujtamatiskej iuan Dios? 4 ¡Amo! Dios nochipa kijtos tein melauak, maski nochin takajkayauaskej, ijkon kemej ijkuiliujtok: “Tein tikijtos maj kinexti ke tiyolmelauak uan titatanis keman mitsteluilijtoskej”. 5 Komo tein amo kuali tein tikchiuaj kinextia ke Dios kichiua tein kuali yetok, ¿toni tikijtoskej? ¿Mopolojtok Dios keman tetatsakuiltia? (Nitajtojtok kemej sekin tanemiliaj). 6 ¡Amo, Dios amo mopolojtok! Komo ijkon yeskia, ¿keniuj kiixtalis tein kinnamiki kiseliskej akin nemij nikan taltikpak?
7 Sayoj ke, komo nitakajkayaua, uan noxolopijyo kinextia ke Dios kijtoua tein melauak uan kichiua maj okachi kiueyitalikan, ¿keyej Dios kijtoua ke nitajtakolchiujkej? 8 ¿Uan keyej amo tikijtouaj “Maj tikchiuakan tein amo kuali para maj monexti tein kuali”? Sekin techijtouiliaj ke tikijtouaj nejon. Tein melauj, yejuan moneki kintatsakuiltiskej.
9 ¿Tiknemiliaj ke tijudíos okachi tiueyichiuanimej ke oksekin? ¡Amo! Porin kemej tikyeknextianijya, nochin yetokej imako tajtakol, judíos uan griegos. 10 Ijkon ijkuiliujtok: “Amo onkak nion se akin yolmelauak, nion se; 11 amo onkak nion se maj kiajsikamati tein moneki mochiuas; amo onkak nion se maj kitemo Dios. 12 Nochin kikauanij, amo teyi ika tapaleuiajok, amo akin kualtakat, nion se”. 13 “Inintenoj kemej yeskia se miketekoch tein tapotok; ika ininnenepil takajkayauaj”. “Inintenijtik kipiaj veneno tein kipiaj kouamej”. 14 “Uan keman tajtouaj sayoj teuijuikaltiaj* uan kinextiaj ke tetauelitaj”. 15 “Yejuan mometsijsiuiliaj para temiktiskej”.* 16 “Itech nochi tein kichiuaj tauejuelouaj uan tetajyouiltiaj, 17 uan amo kimatij keniuj yolseujtoskej”. 18 “Amo kimojkatokaj Dios”.
19 Uan tikmatij ke nochi tein kijtoua iTanauatil Moisés moneki kitakamatiskej akin moixyekanaj ika nejon Tanauatil, para maj amo akin kisentoka motenpaleuijto uan para maj kinnextili nochin ke kinnamiki maj Dios kintatsakuilti. 20 Yejua ika, Dios amo akin kiitas ke yolmelauak porin kichiua tein kijtoua Tanauatil. Tein melauj, Tanauatil kichiua maj okachi tikajsikamatikan toni tajtakol.
21 Sayoj ke axkan, moyeknextij ke uelis yeski se yolmelauak iixpan Dios maski amo se kitakamatis Tanauatil. Nejin no moijtoj itech iTanauatil Moisés uan itech tein kijkuilojkej Tanauatianij,* 22 kemaj, akin takuaujtamatis iuan Jesucristo uelis yeski yolmelauak iixpan Dios. Porin nion se altepet okachi tayekantok. 23 Porin nochin tajtakolejkej uan amo uelis yeskij yektikej kemej Dios. 24 Sayoj ke, Dios kinita ke yolmelaujkej porin Cristo Jesús taxtauak para kinmakixtis. Dios kintayokolij nejin uan ika kinextij itatiochiualis tein amo technamiki. 25 Dios kitemakak tein techpaleuiskia maj oksepa ueli timouikakan iuan porin titakuaujtamatij itech iesyo Jesús. Kichiuak nejin para kinextis ke nochipa kichiua tein kuali yetok, porin yejua amo yolijsiuik uan kintapojpoluilij inintajtakoluan akin nenkej ne uejkauj. 26 Uan itech nejin tonalmej Dios kinextijtok ke nochipa kichiua tein kuali yetok porin kiita ke yolmelauak akin takuaujtamati iuan Jesús.
27 Komo ijkon, ¿uelis teisa ika se moueyimatis?* Amo uelis. ¿Moneki timoueyimatiskej porin tiktakamatij Tanauatil? Amo, ta sayoj porin tiktakamatij tanauatil tein kijtoua ke moneki se takuaujtamatis. 28 Porin tikmatij ke Dios kiita ke se aksa* yolmelauak porin takuaujtamati, amo porin mochikaua kichiuas tein kijtoua Tanauatil. 29 ¿Xe Dios sayoj ininDios judíos? ¿Amo no ininDios akin amo judíos? Kemaj, no ininDios akin amo judíos. 30 Kemej Dios sayoj se, yejua kinitas ke yolmelaujkej akin kintekkejya uan akin amo kintekinij* porin takuaujtamatij. 31 Komo ijkon, ¿tikchiuaj maj amo tapaleuiok Tanauatil porin titakuaujtamatij? Amo, ta tiknextiaj ke semi moneki.