Romanos
6 Komo ijkon, ¿toni tikijtoskej? ¿Moneki tiksentokaskej titajtakoskej para maj Dios okachi techmaka itatiochiualis tein amo technamiki? 2 ¡Amo! Kemej iixpan tajtakol kemej yeskia timomikilijkejya, ¿keniuj uelis titajtakolchiujtoskej? 3 ¿Oso amo nankimatij ke tinochin akin timoauijkejya uan tipouij iuan Cristo Jesús timoauijkej itech imikilis? 4 Yejua ika, iuan techtokkej keman timoauijkej itech imikilis, para maj tejuan amo tinemikanok kemej achto, ijkon kemej Cristo oksepa nemik* ika iueyi chikaualis toTajtsin. 5 Komo timosentiliaj iuan keman timomikiliaj kemej yejua momikilij, no timosentiliskej iuan keman oksepa tinemiskej ijkon kemej yejua. 6 Porin itechkopa tikpatakej* kemej achto tikatkaj, para maj amo techyekanaok tein amo kuali tein tiknejnekij uan maj amo tiksentokakanok imako tajtakol. 7 Porin akin momikilia kitapojpoluiliaj* itajtakol.
8 Uan no, komo timomikilijkejya iuan Cristo, tikneltokaj ke no tinemiskej iuan. 9 Axkan ke Cristo oksepa nemi,* tikmatij ke amo keman momikilisok; amo yetokok imako mikilis. 10 Porin yejua sayoj sepa momikilij para kiixpolos tajtakol, uan amo kemanok monekis momikilis. Axkan nemi para kichiuas tein Dios kineki. 11 No ijkon, ximoitakan kemej yeskia namomikilijkejya iixpan tajtakol, sayoj ke ximoitakan ke nanyoltokej para nankichiuaskej tein Dios kineki kemej imomachtijkauan Cristo Jesús.
12 Yejua ika, amo xikauakan maj tajtakol kisentoka kiixyekana kemej tekiuaj namonakayo tein ueli miki uan ijkon amo nankichiuaskej tein kinejneki namonakayo. 13 Amo no xiksentokakan xiktemaktikan namonakayo itech tajtakol para nankichiuaskej tein amo kuali, ta ximotemakakan imako Dios kemej yeskia oksepa nanemiskiaj. Xikmaktilikan Dios namonakayo para nankichiuaskej tein kuali. 14 Maj tajtakol amo namechixyekana kemej namoteko, porin namejuan amo namoyekanaj ika iTanauatil Moisés, ta ika itatiochiualis Dios tein amo technamiki.
15 Komo ijkon, ¿toni tikijtoskej? ¿Titajtakoskej porin amo timoyekanaj ika iTanauatil Moisés, ta ika itatiochiualis Dios tein amo technamiki? ¡Amo! 16 ¿Amo nankimatij ke komo namotemaktiaj kemej itakeual aksa* para nankitakamatiskej, tein melauj namoajsij imako? Yejua ika, komo namejuan namoajsij imako tajtakol namikiskej, sayoj ke komo namoajsij imako Dios uan nankitakamatij, nanyeskij nanyolmelaujkej. 17 Sayoj ke tiktasojkamatiliaj Dios, porin maski achto nanyetoyaj imako tajtakol, axkan ika nochi namoyolo nankitakamatij uan nankichiuaj tein namechmachtij. 18 Kemej namechmakixtijkej imako tajtakol, axkan nanyetokejya imako Dios uan nankichiuaj tein kuali yetok. 19 Porin nantajtakolejkej, nikui tajtolmej tein nankiajsikamatiskej. Ijkon kemej achto namotamitemakayaj para nankichiuaskej tein pitsotik uan tein amo kuali, axkan ximotamitemakakan para nankichiuaskej tein kuali yetok uan tein chipauak. 20 Porin keman nanyetoyaj imako tajtakol, amo monekia nankichiuaskej tein kuali.
21 Yejua ika, ¿keniuj namechpaleuij tein nankichiuayaj itech nejon tonalmej? Axkan ika namopinaujmatij nejon. Porin nochi nejon kichiua maj se miki. 22 Sayoj ke, axkan ke namechmakixtijkejya imako tajtakol, xikchiuakan tein chipauak kemej itakeualuan Dios. Komo ijkon nankichiuaj, nanemiskej nochipaya. 23 Porin tajtakol techtaxtauia ika mikilis, sayoj ke Dios techtayokolia nejin: maj tinemikan nochipaya itechkopa toTekotsin Cristo Jesús.