1 Pedro
1 Nejua Pedro niitatitanil Jesucristo. Nejin amatajkuilol para namejuan akin Dios namechijitak,* akin nantepalyetokej uan namoyaujtokej* ompa Ponto, Galacia, Capadocia, Asia uan Bitinia. 2 Yejua toTajtsin akin namechxeloj ika ichikaualis ijkon kemej ipa kiixtalijkaya, para xitatakamatikan uan para namechchipauas ika iesyo Jesucristo:
Maj Dios okachi namechmakatiuj itatiochiualis tein amo technamiki uan maj namechpaleui kuali iuan ximouikakan.
3 Maj tikueyitalikan iDios uan iTajtsin toTekotsin Jesucristo, porin kemej semi techiknelij kichiuak maj oksepa tiyolikan uan maj tikchiakan tein amo tamis porin kichiuak maj oksepa nemi Jesucristo. 4 Dios namechmakas tein amo uejueliui, tein amo pitsotik uan amo kuetaui. Nejin namechmakaskej ne iluikak, 5 namejuan akin Dios namechmatampauijtok ika ichikaualis porin nantakuaujtamatij. Namechmatampauijtok para namechmakixtis, uan nejin monextis itech tonalmej keman tatamitiya. 6 Yejua ika namejuan semi nanyolpakij, maski seki tonalmej monekis nankijyouiskej tataman ouijkayomej. 7 Ijkon, keman nankinextiskej ke yekmelauj nantakuaujtamatij, tapaleuis maj namechueyitalikan uan maj namechtakachiuakan* keman monextis Jesucristo. Komo ijkon nantakuaujtamatij semi namechpaleuis uan okachi kipias ipatiuj ke oro tein ixpoliui maski kichipaujkej ika tit.* 8 Maski namejuan amo keman nankiitakej Cristo, nankitasojtaj. Maski axkan amo nankiitaj, iuan nantakuaujtamatij uan semi nanyolpakij hasta amo ueli nankinmelauiliaj oksekin keniuj nanyolpakij, 9 porin nankiyekmatij ke namechmakixtiskej porin nantakuaujtamatij.
10 Tanauatianij* akin kitematiltijkej tatiochiualis tein amo technamiki tein Dios namechmakas, semi tatemojkej uan kitelnekiaj kimatiskej keniuj namechmakixtiskej. 11 Achtopaya, Dios ika ichikaualis kinmatiltij ke Cristo tajyouiskia, uan satepan kiueyitaliskiaj. Yejua ika kisentokakej kitemojkej kimatiskej toni kipanoskia Cristo uan kemanian. 12 Dios kinmatiltij ke tein kiteixmatiltiayaj amo katka para yejuan, ta para namejuan. Uan akin namechixmatiltijkej kuali tanauatilmej* axkan namechiluijkejya nochi nejin. Yejuan kichiujkej nejin porin kinpaleuij ichikaualis Dios tein kiualtitanik de ne iluikak. No yejua nejin tein ángeles yekmelauj kitelnekij kimatiskej.
13 Yejua ika, xikyektalikan namotanemilil para chikauak nantekitiskej uan kuali xitalnamiktokan. Xitakuaujtamatikan uan xikchiakan itatiochiualis Dios tein amo technamiki tein namechmakas keman monextis Jesucristo. 14 Namejuan axkan nanikoneuan Dios akin nankitakamatij. Yejua ika, amo xiksentokakan xikchiuakan tein achto nankinejnekiaj keman amo nankiixmatiaj; 15 okachi kuali, xichipaujkej itech nochi tein nankichiuaskej ijkon kemej akin namechnotsak, porin yejua Yektik, 16 uan no ijkuiliujtok: “Moneki nanyeskij nanchipaujkej, porin nejua niyektik”.
17 ToTajtsin amo techichikouia. Komo tikchiujkej tein kuali techtatiochiuis uan komo tikchiujkej tein amo kuali techtatsakuiltis. Uan komo namejuan nankinotsaj, xinemikan kemej nankinextiskej ke nankimojkatokaj nochi tonalmej keman nantepalyetoskej nikan taltikpak. 18 Porin namejuan nankimatij ke namechmakixtijkej para amo nankisentokaskej nanenkajnemiskej ijkon kemej namechnextilijkej namouejkaujtatuan. Keman namechmakixtijkej amo taxtaujkej ika plata uan oro tein uejueliui, 19 ta ika iesyo Cristo, tein semi kipia ipatiuj, kemej iesyo se ichkatsin* tein amo teyi kipoloua uan amo pitsotik. 20 Tein melauj yejua kiixmatkej* achto ke peuaskiaj yoliskiaj akin nemij nikan taltikpak, sayoj ke monextij itech nejin tonalmej tein tamitijya para namechpaleuis. 21 Itechkopa Cristo, namejuan nankineltokaj Dios, akin kichiuak maj oksepa nemi* uan kiueyitalij para iuan nantakuaujtamatiskej Dios uan nankichiaskej maj namechtatiochiui.
22 Namejuan namochipaujkejya porin nankitakamatij tamachtilis tein melauak. Uan nejon tapaleuiani yekmelauj ximotasojtakan kemej yeskia naniknimej. Yejua ika, namechiluia semi ximotasojtakan se iuan okse ika nochi namoyolo. 23 Porin amo oksepa namechyolitijkej ika se xinach tein palani, ta ika se xinach tein amo palani, ika itajtol Dios akin nemi nochipaya. 24 Porin “nochin tamatij kemej xiuit, uan ininkualtsinyo tamati kemej se xochit tein moskaltia xiujtaj; xiuit kuetaui uan xochit uetsi, 25 sayoj ke itajtol Jehová* amo keman ixpoliui”. Nejin “tajtol” yejua kuali tanauatilmej tein namechixmatiltijkej.